སྦིར་ཕྱོཊ་ཀྱི་གསུམ་དུས་ལས་འགུལ།

གནས་ཚུལ་བཏང་འབྱོར་ལ། དེ་རིང་སྦིར་ཅོན་ཏ་ར་སྡེ་ནང་གསུམ་མཉམ་འབྲེལ་ཐོག ཅོན་ཏ་ར་རྒྱ་གར་སློབ་གྲྭ་རྩེ་ཐང་དུ། བོད་མིའི་སྒེར་ལངས་གསུམ་བཅུའི་དུས་དྲན་ཐེངས་ ༥༤ པ་སྲུང་གཙི་གནང་ཡོད་པ་དང་། དེ་རིང་སྔ་དྲོའི་ཆུ་ཚོད་ ༨ པའི་སྟེང་། ས་གནས་མགོ་འཛིན་གསུམ་གཙོས་ས་གནས་འཐུས་ཚོགས་དང་། བོད་མི་མང་སྤྱི་འཐུས། དགོན་སྡེ་ཁག་གི་འཐུས་ཚབ། སློབ་གྲྭ་ཁག་གི་འགན་འཛིན་རྣམ་པ། ས་གནས་གཞོན་ནུ་དང་ས་གནས་བུད་མེད། བོད་ཁྱིམ་གཉིས་དང་སམ་བྷོ་ཊ་བཅས་ཀྱི་དགེ་ལས་སློབ་ཕྲུག་ཡོངས། བཀྲ་ཤིས་ལྗོངས་གཞིས་ཆགས། ཁུ་ནུ་བ་མི་མང་རླངས་འཁོར་ཆེ་བ་གཅིག་བཅས་མི་མང་ ༡༠༠༠ ལྷག་འདུ་འཛོམས་བྱུང་ཡོད་འདུག 

སྐབས་དེར་ཅོན་ཏཱ་རའི་གཞིས་ཆགས་ཀྱི་ལས་དྲུང་བསོད་ནམས་བདེ་སྐྱིད་ལགས་ཀྱིས་མཛད་རིམ་གཙོ་སྐྱོང་འོག ཚང་མ་སྐུ་བཞེངས་ཐོག་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་རྒྱ་གར་རྒྱལ་གླུ་གཉིས་བཏང་རྗེས། བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ལ་གུས་འདུད་ངག་བཅད་སྐར་མ་གཅིག་རིང་གནང་ཡོད་པ་དང་།  དེ་རྗེས་བོད་མི་མང་སྤྱི་འཐུས་འཇུ་ཆེན་དཀོན་མཆོག་ལགས་ནས་སྤྱི་འཐུས་ཀྱི་གསུང་འཕྲིན་སྒྲོགས་སྦྱང་གནང་བ་དང་། སྡེ་དགེ་གཞིས་མགོ་ཚེ་རིང་ཕུན་ཚོགས་ལགས་ནས་བཀའ་ཤག་གི་གསུང་འཕྲིན་སྒྲོགས་སྦྱང་ཞུས་ཤིང་། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་མཆོད་འབུལ་སྨོན་ལམ་གསུངས་བ་དང་། སྐུ་མགྲོན་གཙོ་བོ་ཧི་མ་ཅལ་མངའ་སྡེ་བློན་ཆེན་ཟུར་བ་ཊ་གོར་གྷུ་ལབ་སྲིང་ལགས་ཀྱིས་མར་མེ་ཞལ་འབྱེད་དང་། མི་མང་ལ་གཏམ་བཤད་གནང་ཡོད་འདུག

ཉིན་རྒྱབ་སེར་སྐྱ་མི་དམངས་རྣམས་པ་ལིམ་པུར་ཁྲོམ་གཞུང་དུ་ཕེབས་ནས་བྱང་ཆུབ་སེམས་མཆོག་འུར་འདོན་བྱེད་བཞིན་གོམ་བགྲོད་གནང་བ་དང་། དེའི་རྗེས་པ་ལིམ་པུར་ས་གནས་སྲིད་གཞུང་གི་མདུན་ཐང་དུ་རྒྱ་གར་བོད་དོན་རྒྱབ་སྐྱོར་དང་ས་གནས་འགན་འཛིན་བཅས་ཀྱིས་གཏམ་བཤད་གནང་ཡོད་ཅིང་། ས་གནས་མགོ་འཛིན་དང་དགོན་སྡེ་ཁག་གི་སྐུ་ཚབ་བོད་ཁྱིམ་གཉིས་ཀྱི་དབུ་འཛིན་དང་སམ་བྷོ་ཊའི་སློབ་གྲྭའི་འགན་འཛིན་བཅས་ནས་གསར་འགོད་གསལ་བསྒྲགས་ཤིག་ཀྱང་བསྐྱངས་ཡོད་འདུག དེ་རྗེས་རྒྱ་གར་བོད་དོན་རྒྱབ་སྐྱོར་བ་ཚོ་ལ་གཞིས་མགོ་རྣམ་པས་ཐུགས་རྗེ་ལེགས་འབུལ་གྱི་མཇལ་དར་རེར་བསྒྲོན་པ་དང་། འབིར་གཞིས་མགོ་ཚེ་རིང་ལྷ་མོ་ལགས་ནས་ཐུགས་རྗེ་ཆེ་ཞེས་གསུངས་བཤད་གནང་རྗེས་དགེ་འདུན་པ་དང་སློབ་ཕྲུག་མི་དམངས་བཅས་ནས་བདེན་ཚིག་སྨོན་ལམ་འུར་འདོན་གནང་བཞིན་ལས་རིམ་མཇུག་བསྡུས་ཡོད་འདུག