མིག་མི་འཛུམ།
ཁ་སང་གསུམ་ཅུའི་དུས་དྲན་གྱི་ཉིན་མོར། ཤར་ཕྱོགས་ཁུག་རྟ་ཟེར་བ་ཞིག་གིས་དགྲ་བོའི་དར་ཆ་འཁུར་སོང་བ་དང་དེ་སྔོན་གཞོན་ལྷན་གྱིས་དགྲ་བོའི་དར་ཆ་མེར་བསྲེགས་བཏང་བ་གཉིས་ཀར་ཧ་ལས་ཤིང་ཧོན་འཐོར་དགོས་དོན་ཅི་ཡང་མེད། དོན་དག་གི་ངོས་ནས་རྩོད་མི་དགོས་པའི་གནད་དོན་ཞིག་རེད། ང་ཚོས་ངེས་པར་དུ་འཐབ་རྩོད་བྱ་དགོས་པ་དེ་༸གོང་ས་མཆོག་བོད་དུ་གདན་འདྲེན་ཞུ་རྒྱུ་དང་བོད་མི་རིགས་ལ་རང་དབང་ཞིག་འཐོབ་དགོས་པ་དེ་ཡིན། དེའི་ཕྱིར་རྣམ་པ་འདྲ་མིན་གྱི་སྟེང་ནས་འཐབ་རྩོད་བྱ་དགོས་པའང་གནས་ལུགས་ཤིག་སུས་མ་རེད་ཟེར་ཕོད། ངས་བལྟས་ན་རང་རེའི་སྤྱི་ཚོགས་ནང་ད་ལྟའི་དུས་ཚོད་འདི་ལ་དགྲ་བོའི་ལས་འགན་འཁུར་མཁན་རེ་ཟུང་སིམ་འཛུལ་བྱས་མེད་དམ་སྙམ།
དེ་ནི་ལྟ་བ་དང་ལངས་ཕྱོགས་མི་མཐུན་པའི་ལས་འགུལ་འདི་གཉིས་ཀྱི་བར་དུ་ཤགས་འགྱེད་དང་རྩོད་གླེང་བྱེད་མཁན་དང་། ཆེད་དུ་མངགས་ནས་དེ་དག་གི་སྐོར་ནས་བསམ་ཚུལ་མི་མཐུན་པ་བཟོས་ནས་འུ་ཅག་གི་ཕྱོགས་སོ་སོའི་འཐབ་རྩོད་ཀྱི་སྟོབས་ཤུགས་ཆུང་དུ་གཏོང་མཁན་དེ་དག་རེད། ཁ་སང་དེ་རིང་དྲ་རྒྱ་དང་ངོ་དེབ་སོགས་སུ་བཟང་ངན་གྱི་བསམ་ཚུལ་བཤད་ཁུལ་གྱིས་སྤྱི་ཚོགས་དཀྲུགས་ནས་མི་མང་གི་སེམས་ལ་རྨ་ཁ་བཟོ་མཁན་ཉུང་ཉུང་མིན་པ་མཐོང་ནས་བདག་ལ་ལྡོག་ཕྱོགས་ཀྱི་བློ་འཚབ་འདི་སྐྱེས་སོང་བས་ན། ལས་འགུལ་བ་དང་འཐབ་རྩོད་པ་སུ་ཡིན་གར་བཞུགས་དག་གིས་དོན་མེད་ཀྱི་རྙོག་ཟིང་འདི་དག་ལ་ཅི་བས་ཀྱང་རྣ་བ་མ་གཡོར་རོགས་ཞུ་རྒྱུ་ཡིན།
ང་ཚོས་ཉན་དགོས་པ་དགྲ་བོའི་ཕྱོགས་དང་རྩོད་དགོས་པ་དགྲ་བོའི་ཕྱོགས་ན་ཡོད་ལ། ང་ཚོས་ཁ་རྩོད་དང་རྒྱལ་ཕམ་གྱི་གནད་དོན་ཞིག་ཐག་གཅོད་དགོས་ནའང་དགྲ་བོ་དང་ཉེ་བར་བཅར་དགོས། དེ་ལྟ་མ་ཡིན་པར་ནང་ཁུལ་གྱི་ཁབ་དང་སྐུད་པ་ལྟ་བུའི་ཤགས་འགྱེད་དང་རྩོད་གླེང་ནི་རང་གིས་རང་ཉིད་འཕོང་བར་བྱེད་པ་ལས་མ་འདས་པ་ཚང་མའི་སེམས་ལ་ཉར་རོགས། ང་ཚོའི་འཐབ་རྩོད་ཁ་དང་དགྲ་བོའི་འཐབ་རྩོད་ཁོག་ན་ཡོད་སྟབས། ངྷ་སའི་རི་གྲོང་འདིར་དགྲ་བོས་གསང་སྐུད་ཕྲ་མོ་ཞིག་འཐེན་ནས། དངུལ་དང་མིའི་ཡོ་ལང་ཤུགས་ཆེ་ཙམ་ཡོད་ངེས་ན། ཁོང་དག་གི་ཁ་ཤུགས་དབང་ཤུགས་ཀྱི་འོག་ཏུ་མི་འགྲོ་རྒྱུ་དེ་ང་ཚོའི་སྤྱི་ཡོངས་ཀྱིས་ཤེས་དགོས་པ་དང་། ང་ཚོའི་ངོས་ནས་རང་བཙན་དང་དབུ་མ་གང་ཡིན་རྩོད་གླེང་གིས་ཐག་གཅོད་བྱ་དགོས་པ་ཞིག་མིན།
མ་གཞི་གནད་དོན་འདིའི་ཡོང་ས་གཙོ་བོ་དེ་གླིང་ཚ་ཚེ་བརྟན་རྡོ་རྗེའི་འཐབ་རྩོད་ཀྱི་སྟེང་ནས་འོང་བ་ཞིག་ཡིན་ནའང་། ཁོས་འཁུར་བའི་དགྲ་བོའི་རྒྱལ་དར་དེར་དེ་འདྲའི་སྡང་དགོས་དོན་ཅི་ཡིན་བདག་གིས་ད་དུང་མ་ཤེས། བདག་གི་ངོས་ནས་གླིང་ཚ་བས་དགྲ་བོ་ལ་ཁ་གཏད་ནས་འགྲོ་ཡི་ཡོད་པ་དང་དགྲ་བོ་དང་ མཉམ་དུ་འུ་ཅག་ལ་དགོས་པ་དེ་རྩོད་ལེན་བྱེད་ཀྱི་ཡོད་སྟབས། དེ་ནི་མི་འོས་པ་ཞིག་མ་རེད་ཀྱང་འདོད་མོད། གལ་སྲིད་དེས་བོད་ཀྱི་རྩ་དོན་ལ་གནོད་ཀྱི་ཡོད་ན་མི་སྒེར་གཅིག་གིས་ནོར་བ་ཡིན་སྟབས། སྤྱི་ཚོགས་ནང་ཁུལ་ལ་འཕོང་དཀྲུག་འོང་གཞི་ལྟ་བུར་འགྱུར་དགོས་དོན་མེད། ཤར་ཁུག་ཀྱང་དེ་ལྟར་ཡིན།
ད་ལྟའི་དུས་ཚོད་འདི་ནི་ང་ཚོ་ཚང་མས་རིག་པ་བསྒྲིམ་དགོས་པའི་དུས་ཤིག་ཡིན། རྒྱུ་མཚན་ནི་གཞིས་ལུས་སྤུན་ཟླ་ཚོའི་སྙིང་སྟོབས་དར་བའི་སྒང་ཡིན་པ་དང་། ཁོང་ཚོའི་རེ་བ་དང་ཡིད་ཆེས་ཆ་ཚང་བོད་ཕྱི་ལོགས་ཡིན་སྟབས། འདི་ཕྱོགས་ནས་དོན་མེད་རྩོད་གླེང་གི་ནང་འཁྲུག་གིས་བགས་ཆགས་ངན་པ་ཐེབས་ཚེ། ཁོང་ཚོའི་སེམས་ཤུགས་ཆག་ངེས་ན་དེ་ནི་དགྲ་བོའི་ངོས་ནས་འབད་བརྩོན་བྱེད་ཀྱིན་པའི་རེ་བ་ཉག་གཅིག་བུ་དེ་ཡིན། དེའི་སྟབས་ཀྱིས་ལས་འགུལ་བ་དང་དཔྱད་བརྗོད་པ། ལྷག་པར་དུ་སྤྱི་ཚོགས་སྟེང་གི་མི་ཚང་མས་གཟབ་གཟབ་གནང་རྒྱུ་དེ་ཁ་ཚ་དགོས་གཏུགས་ཡིན། ༸གོང་ས་མཆོག་གིས་ཀྱང་བོད་མི་ཞིག་ཡིན་ཕྱིན་མི་རེའི་ངོ་རེ་ལ་འགན་རེ་ཡོད་སྟབས་བོད་སྤྱི་བའི་རྩ་དོན་ཐད་འགན་རེ་འཁུར་དགོས་པའི་བཀའ་སློབ་དེ་ཡང་དང་བསྐྱར་དུ་གནང་ཡོད་པ་བཞིན། ཆེ་བས་ཆེ་བ་དང་ཆུང་བས་ཆུང་བ་ལྟར་རང་རང་གིས་ལས་དོན་ཞིག་མི་འཁྱོངས་ནའང་བསམ་པ་དཀར་བོ་དང་། ནང་ཁུལ་རྡོག་རྩ་ཆིག་སྒྲིལ་ཡོང་ཐབས་ཤིག་ལ་ཅི་བས་འབད་བརྩོན་གནང་རོགས།
༢༠༡༣ ། ༣ ། ༡༡ ། ལ།
མིག་མི་འཛུམ་ལགས། དེ་སྔར་ངས་ཁྱེད་ཀྱིས་དཔྱད་རྩོམ་ཁ་ཤས་ལ་དགག་པ་རྒྱག་པ་ཙམ་དུ་མ་ཟད་ཚིག་ངན་ཁ་ཤས་བེད་སྤྱོད་བཏང་བ་ཡིན། དེ་རིང་ངོ་མ་ཁྱེད་ཀྱིས་དཔྱད་རྩོམ་འདི་ནི་མཐོང་དཀོན་པའི་ལེགས་བཤད་ཞིག་རེད་འདུག་པས་ངས་ཁྱེད་ལ་སྙིང་ནས་གུས་འདུད་ཞུ་ངེས་ཡིན། ད྄གྲོགས་ཚོ་ངེས་པར་དུ་ཡིད་གཟབ་དགོས་གལ་ཆེ། རྒྱུ་མཚང་པོར་བགྲངས་དགོས་མི་འདུག །མིག་མི་འཛུམ་ལགས་ཀྱིས་གོང་གསལ་རྩོམ་ཡིག་འདིའི་ནང་དུ་གསལ་འདུག །
མི་རིགས་ཞིག་དང་རིགས་གཞུང་གཅིག་སྐྱོབས་པའི་ཐབས་ལམ་སྣ་ཚོགས་ཡོད་དགོས་ལའང་ཡོད་ཀྱང་མཆོག་པ་ཞིག་ཡིན། འོན་ཀྱང་དགྲ་དགའ་གཉེན་སྡུག་དུ་མ་སོང་བའི་འགན་འཁྲི་ཞིག་ཀྱང་ངེས་པར་དགོས། ཡོད་ཚད་ལ་རྒྱའི་རྒྱུགས་ཁྱི་འམ་རྒྱའི་མྱུལ་མ་ཞེས་ཚངས་མིང་དོགས་ཀྱང་བྱས་པ་ཡིན་ན་དེ་ཡང་དཔྱོད་ཤེས་ཞིག་ག་ལ་ཡིན། གལ་ཏེ་རྒྱའི་མྱུལ་མ་ཞིག་ཡོད་ན་མཐར་འབུད་གཏོང་ཀྱང་མ་མཛད་པར་དེ་ལ་རང་རེས་སློབ་གསོ་སྤྲད་ནས་བོད་མི་རིགས་དང་བོད་མིའི་སྤྱི་ཚོགས་ཞབས་འདེགས་ཞུ་བཅུག་ན་གཅིག་གོ་གཉིས་ཆེད་མ་ཡིན་ནམ།
བཀླགས་ཟིན། ཡོག་པོ་འདུག མུ་མཐུད་ཕྲིས་དང་མུ་མཐུད་བཀླག་ཆོག
ནང་ཁུལ་ལ་བཤད་འདོད་པའི་སྐད་ཆ་ཁ་ཤས། ནང་ཁུལ་ལ་ཤོད་བགྱིད་ཡོད་པའི་སྐད་ཆ་ཁ་ཤས། ཞེས་པ་ཞིག་བྲིས་ན་ལེགས།
ཡང་ཁོང་གིས། ་་་་་ ཤར་ཕྱོགས་ཁུག་རྟ་ཟེར་བ་ཞིག་གིས་དགྲ་བོའི་དར་ཆ་འཁུར་སོང་བ་དང་དེ་སྔོན་གཞོན་ལྷན་གྱིས་དགྲ་བོའི་དར་ཆ་མེར་བསྲེགས་བཏང་བ་གཉིས་ཀར་ཧ་ལས་ཤིང་ཧོན་འཐོར་དགོས་དོན་ཅི་ཡང་མེད། ་་་་ཟེར།
ཡང་།
་་་་་ ང་ཚོའི་ངོས་ནས་རང་བཙན་དང་དབུ་མ་གང་ཡིན་རྩོད་གླེང་གིས་ཐག་གཅོད་བྱ་དགོས་པ་ཞིག་མིན། ་་་་ཟེར།
ཡག་པོ་བྲིས་འདུག ཐུགས་རྗེ་ཆེ། ནང་ཁུལ་རྡོག་རྩ་གཅིག་སྒྲིལ་དང་། དགྲ་བོས་སིམ་འཛུལ་ལ་དོགས་ཟོན་དགོས།
དགྲ་དར་འཕྱར་བའི་གནས་ཚུལ་འདི་མིག་ལམ་ན་ཡལ་འགྲོ་བའི་སྐབས་འདིར་ཡང་མིག་མི་འཛུམ་ཟེར་མཁན་ཁྱེད་ཀྱིས་ཤེས་མདོག་གིས་ཅིའི་ཕྱིར་གླེང་གི་ཡོད། ད་དུང་གླིང་ཚ་ཡང་དྲུད་ནས་ཡོང་གིན་འདུག རྙོག་གླེང་གི་བསམ་ཚུལ་དྲ་ངོས་སུ་མ་བཀོད་ན་བཟང་གི་འདོད།