བོད་ཡིག་ཡོངས་སུ་ཉམས་ཀྱི་རེད།

ཨ་འདུས་མིག་ཆུ། 

སྐད་ཡིག་གི་ཚེ་སྲོག་ཡུན་གནས་ཐུབ་མིན་ནི། སྐད་ཡིག་གི་བཀོལ་སྤྱོད་ཁོར་ཡུག་དང་། འདུ་ཤེས་བསམ་བློ་གཉིས་ལ་རག་ལས་འདུག་སྙམ། སྐད་ཡིག་བཀོལ་སྤྱོད་བྱེད་པའི་ཁོར་ཡུག་གང་འདྲ་ཞིག་ཡིན་རུང་དེ་ཉིད་གནས་ཐུབ་པའི་འགག་རྩ་ཕྱོགས་གཅིག་ནི། དེ་ཉིད་བཀོལ་སྤྱོད་བྱེད་པའི་ཁྱབ་རྒྱ་ཡིན་ལ། དེ་ལས་ལྡོག་ཏེ་ཕྱིན་ན་མི་རིགས་གང་ཞིག་གི་ངོ་བོ་མཚོན་བྱེད་དང་། རིག་གཞུང་གི་གཞི་རྟེན་དུ་གྱུར་བའི་སྐད་ཡིག་ཡོངས་སུ་ཉམས་ངེས་པ་རེད་འདོད།

དེ་ལྟར་ན་འུ་ཅག་བཙན་བྱོལ་སྤྱི་ཚོགས་ཀྱི་གཞུང་གི་ལས་ཁུངས་ཁག་དང་། འཚོ་བའི་སྤྱོད་སྒོ་གང་ལ་བལྟས་ཀྱང་བོད་ཀྱི་སྐད་ཡིག་བཀོལ་སྤྱོད་ཀྱི་ལས་དབང་ཅུང་ཞན་པའི་དབང་གིས་བོད་ཀྱི་སྐད་ཡིག་འདི་ཉིད་ཡོངས་སུ་ཉམས་དམས་སུ་འགྲོ་བར་ཐེ་མི་ཚོམ་སྙམ། 

སྐད་ཡིག་གི་བཀོལ་སྤྱོད་ཆུང་བའི་ས་ཆ་གང་ཞིག་ཡིན་ནའང་སྐད་ཡིག་དེ་ཉིད་ལ་མཁས་པ་དང་། སྐད་ཡིག་དེ་ཉིད་ལ་ཞེན་པའི་མི་ལ་རིན་ཐང་མེད་པ་ནི་འཇིག་རྟེན་གྱི་ཆོས་ཉིད་ཡིན་པས་སྐད་ཡིག་གང་ཉིད་ཀྱི་རིན་ཐང་རྩིས་མེད་དུ་འགྲོ་བ་དང་། སྐད་ཡིག་རྒྱུན་འཛིན་བྱེད་པའི་མི་སྣ་གསོ་སྐྱོང་བྱེད་པའི་བགྱི་བ་དང་ལེན་བྱེད་པའི་བྱ་འགུལ་ཧ་ཅང་ཉམ་ཞན་དུ་འགྲོ་ངེས་པ་རེད།

དེ་ལྟར་ན་སྐད་ཡིག་བཀོལ་སྤྱོད་ཀྱི་ཁོར་ཡུག་གུ་དོག་ཅིང་། སྐད་ཡིག་གི་རིན་ཐང་མཐོང་བའི་ནང་སེམས་ཀྱི་དཔལ་ཡོན་མེད་སོང་ཚེ། སྐད་ཡིག་ནི་ནམ་ཡང་དགོས་མེད་ཕན་མེད་ཀྱི་གད་སྙིགས་ཙམ་ལས། མི་རིགས་ཤིག་གི་ཚེ་སྲོག་དང་། རིག་གནས་ཤིག་གི་བླ་སྲོག་ཏུ་གྱུར་བའི་རྣམ་དག་གི་སེམས་རྒྱ་ཞིག་ག་ལ་འཁྲུངས་ཨང་སྙམ།

བོད་མི་རིགས་ལ་མཚོན་ན། བོད་ཀྱི་སྐད་ཡིག་འདིའི་རིན་ཐང་ཡང་དག་ཅིག་མཐོང་མཁན་ཉུང་ཞིང་། བོད་ཀྱི་སྐད་ཡིག་བེད་སྤྱོད་བྱ་སའི་ཁོར་ཡུག་ཧ་ཅང་གུ་དོག་པོ་ཡིན་པའི་ཆ་ནས། ངས་བསམས་ན་བོད་གངས་ཅན་པའི་བླ་དང་སྲོག་ཏུ་གྱུར་བའི་སྐད་ཡིག་འདི་ངེས་པར་ཉམས་ངེས་རེད་འདོད།

བོད་སྐད་བོད་ཡིག་ལ་ནང་བྱན་ཆུད་ཅིང་བོད་སྐད་བོད་ཡིག་ལ་དུངས་ཞེན་བླ་ནས་འབར་བའི་མི་ཞིག་ཡིན་ནའང་དགེ་རྒན་དང་། གཞུང་གི་ལས་དོན་བྱེད་པར་འགྲོ་དུས། བོད་སྐད་ལས་གཞན་པའི་ལག་འཁྱེར་གཞན་ཞིག་ཆ་རྐྱེན་འདོན་ཞིང་། སྐབས་དེར་ལག་འཁྱེར་མེད་པའི་རླབས་ཆེན་གྱི་བོད་ཡིག་མཁས་པ་གང་མང་ཞིག སྤྱི་ཚོགས་ཐོག་མར་འཁྱམས་ཤིང་། ཟ་ཁང་སོགས་ཀྱི་ལས་གཡོག་བྱས་ཏེ་རང་ཉིད་ཀྱི་འཚོ་ཚིས་ལ་མི་འབད་ཐུ་མེད་དུ་འགྱུར་བཞིན་ཡོད།

སྐབས་དེར་བོད་ཡིག་འབྲི་བ་ལ་ལག་པ་ཞ་བོར་གྱུར་ཅིང་། བོད་ཀྱི་རིག་གཞུང་འཆད་པར་ངག་ལྐུག་པ་ཆགས་པའི་མི་བུ་འགར་འདབ་གཤོག་གཉིས་ལྡན་གྱི་མིང་གི་ཆོ་ལོ་ཕུལ་ཏེ། ལས་དོན་རུ་ཁག་གི་མཐོ་ས་དང་མཛེས་སར་བསྐོ་བཞག་བྱེད་མོད། དོན་དངོས་ཉི་མ་དེ་ནས་བཟུང་མི་རིགས་ཀྱི་རིག་གནས་ཉམས་པའི་མགོ་བརྩམས་ཤིང་། སྐད་ཡིག་གི་ཚེ་སྲོག་ཆད་པའི་རྩ་བ་ཚུགས་པ་མ་ཡིན་ནམ།

རྒྱལ་ཁབ་དང་མི་རིགས་གང་འདྲ་ཞིག་ཡིན་རུང་རང་ཉིད་ཀྱི་ཚེ་སྲོག་ཡུན་གནས་ཐུབ་པ་དང་། མི་རིགས་ཀྱི་ངོ་བོ་མཚོན་པར་བྱེད་པའི་ཆ་རྐྱེན་གཙོ་བོ་ནི། མི་རིགས་ཀྱི་རིག་གནས་དང་། དེ་བརྟེན་སའི་སྐད་ཡིག་འབའ་ཞིག་ཡིན་པར་འདོད།

ཕྱིའི་སྐད་ཡིག་ནི་མི་རིགས་གང་དེའི་རིག་གནས་ཕུན་སུམ་ཇེ་ཚོགས་སུ་གཏོང་བ་དང་། ཡང་ན་མི་རིགས་གང་དེའི་རིག་གཞུང་མཛེས་པར་བྱེད་པའི་རྒྱན་ཆ་རུ་འཛིན་དགོས་པ་ལས། མི་རིགས་ཀྱི་བླ་དང་སྲོག་ཏུ་འཛིན་ག་ལ་རུང་ཨང་སྙམ།

མི་རིགས་རང་གི་སྐད་ཡིག་བཀོལ་སྤྱོད་བྱེད་པར་དབང་ཆུང་ཞིང་། སྐད་ཡིག་གི་རིན་ཐང་བསམ་བློ་ཡོངས་སུ་རྒུད་ཏེ། མི་རིགས་གཞན་གྱི་སྐད་ཡིག་རྒྱལ་ཁབ་ཀྱི་སྲིད་དོན་དང་། མི་སྒེར་གྱི་འཚོ་ཚིས་བསྒྲུབས་པའི་གཙོ་རྒྱུག་སྐད་ཡིག་ཏུ་བཟུང་ཕྱིན་ཆད། མི་རིགས་དེ་ཉིད་ཀྱི་སྐད་ཡིག་ཡོངས་སུ་ཉམས་ཟིན་པ་རེད་འདོད་བཞིན་ཡོད།

མཐོ་བ་དབུ་ཁྲིད་ལ་སྐད་ཡིག་གི་རིན་ཐང་ལྟ་ཚུལ་དང་། སྐད་ཡིག་གི་དགེ་མཚན་ཁྱད་ཡོན་མཐོང་བའི་བསམ་བློ་མེད་པ་དང་། དམའ་བ་སློབ་ཕྲུག་ཡོད་ཚད་ལ་སྐད་ཡིག་གི་གལ་ཆེའི་རང་བཞིན་དང་། སྐད་ཡིག་གི་ཕན་ཡོན་ནུས་སྟོབས་སོགས་འཆད་པའི་སློབ་གསོ་མེད་སོང་ཚེ། སྐད་ཡིག་དེ་ནི་མཆོད་སྒྲོམ་དུ་བཤམས་ཤིང་སྤོས་དང་བསུང་གི་དུད་ཞགས་ཁྲོད་ནས་སྨྲ་མེད་ལྐུག་པའི་ངང་ཚུལ་གྱི་ཚེ་སྲོག་འགྲོ་དགོས་ངེས་རེད།

དེ་ལྟར་ན་སྐད་ཡིག་ཡར་རྒྱས་གཏོང་དགོས་ན། སྐད་ཡིག་ལ་བཅངས་པའི་འདུ་ཤེས་བསམ་བློ་ཡོད་པའི་མི་བུ་གང་མང་གསོ་སྐྱོང་དང་། སྐད་ཡིག་བཀོལ་སྤྱོད་བྱ་སའི་ཁོར་ཡུག་རྒྱ་ཆེ་དང་ཁོད་ཇེ་ཡངས་སུ་གཏོང་ཐུབ་ན། ད་གཟོད་བོད་སྐད་བོད་ཡིག་མི་ཉམས་ཡུན་གནས་ཐུབ་པའི་དགེ་མཚན་ཞིག་ཡོད་པར་མཐོང་ངོ་།།