རང་ཉིད་ལ་ལངས་ཕྱོཊ་ཡང་དག་ཅིག་དང་རྒྱ་གཞུང་ལ་ལྟ་སྟངས་གསལ་བོ་ཞིག་དགོས།

སྤྱི་ཟུར་བསྟན་འཛིན་མགོན་པོ་ལགས་སུ།  རྒྱ་ནག་གི་དཔོན་རིགས་གསར་རྙིང་གི་འགྱུར་བ་དང་བོད་རྒྱལ་འབྲེལ་མོལ་གྱི་གནས་སྟངས། བཙན་བྱོལ་སྤྱི་ཚོགས་ཀྱི་ཤེས་ཡོན་འཐུས་ཤོར་བཅས་ཀྱི་ཐད་བཅར་འདྲི་ཞུས་ཡོད།

            དྲི་བ། ལོ་སྔོན་མའི་ནང་རྒྱ་གཞུང་དཔོན་རིགས་གསར་རྙིང་གཉིས་བརྗེ་བོ་བརྒྱབ་ཚར་པ་རེད།  རྒྱ་གཞུང་གི་དཔོན་རིགས་གསར་པ་ཚོར་ཁྱོད་ལ་ལྟ་སྟངས་ག་རེ་ཡོད།  

ལན། སྤྱིར་རྒྱ་ནག་འགྱུར་བ་འགྲོ་མིན་དེ་དཔོན་པོ་རེ་གཉིས་ཀྱི་བསམ་བློ་ཁོ་ནར་ཐུག་མེད་པར་རྒྱུ་རྐྱེན་མང་པོ་ཞིག་ལ་རག་ལས་ཡོད་པ་རེད། ཞིས་ཅིན་ཕེན་དང་ལི་ཁི་ཆཱིང་གཉིས་ནི་གཞི་རིམ་གྱི་གྲོང་སྡེ་ནས་ལས་ཀ་མགོ་བཙུགས་ཏེ་ཡོང་མཁན་གྲས་རེད། གྲོང་གསེབ་ཀྱི་དཀའ་སྡུག་ཆ་ཚང་མཐོང་མྱོང་ཡོད་ལ། ལྷག་པར་དུ་ཞིས་ཅིན་ཕེན་ལ་མཚོན་ན། ཁོ་རང་ལོ་ ༩ སྐབས་ཕ་རྒན་གོ་ས་ནས་གཡུགས་ཏེ་བཙོན་འཇུག་བྱས་པ་སོགས་སྡུག་བསྔལ་སྣ་ཚོགས་མྱངས་པ་རེད།  གུང་ཁྲན་ཏང་གི་སྤྱི་ཚོགས་ལམ་ལུགས་ཡག་པོ་མེད་པའི་མྱོང་ཚོར་ཡོད་བསྡད་མཁན་གྱི་མི་ཞིག་ཆགས་ཡོད།  ཡིན་ནའང་། རྒྱ་ནག་ལ་སྒྱུར་བཅོས་གཏོང་བའི་དབང་ཆ་ཁོ་རང་གཅིག་པུའི་ལག་ན་ཡོད་པ་མ་རེད། ད་སྐབས་ཀྱི་ཞིས་ཅིན་ཕེན་དང་ལི་ཁི་ཆཱང་གཉིས་ཀྱི་གནས་སྟངས་ནི། ཧུའུ་ཡའོ་ཕང་དང་ཀྲའོ་ཙི་ཡང་གཉིས་ཀྱི་གནས་སྟངས་དང་འདྲ་བོ་རེད། དེ་སྔོན་རྒན་ཡོལ་བྱས་ཟིན་པའི་དཔོན་རིགས་བརྒྱད་ཀྱིས་རྒྱ་གཞུང་གི་ཆབ་སྲིད་ཁ་ལོ་སྒྱུར་ཏེ། ཀྲའོ་ཙི་ཡང་དང་ཧུའུ་ཡའོ་པང་གཉིས་གོ་གནས་ནས་མར་གཡུགས་པ་རེད། ད་སྐབས་ཀྱང་ཅཱང་ཙེ་མིན། ལི་ཕིན། ཀྲུའུ་རུང་ཅི་སོགས་རྒན་ཡོལ་བྱས་ཟིན་པའི་དཔོན་རིགས་ཁག་ཅིག་གིས་རྒྱ་གཞུང་གི་ཆབ་སྲིད་ལ་སྟངས་འཛིན་བྱས་ཡོང་གི་ཡོད་པ་རེད། རྒྱ་གཞུང་གི་གནས་སྟངས་ཤེས་མཁན་རྒྱ་རིགས་ཉམས་ཞིབ་པ་དག་གིས་ཀྱང་ཉུང་མཐར་ཡང་ལོ་གཉིས་ཀྱི་ནང་དུ།  ཞིས་ཅིན་ཕེན་དང་ལི་ཁི་ཆཱིང་གཉིས་འཕག་འཚག་རྒྱག་ཐུབ་ཀྱི་མིན་པའི་ཚོད་དཔག་བྱེད་བཞིན་ཡོད་པ་རེད། 

            དྲི་བ། དེང་སྐབས་ཨ་རབ་དང་ཨེ་ཤ་ཡའི་ནང་ཆབ་སྲིད་དང་དཔལ་འབྱོར་གང་ཐད་ནས་འགྱུར་བ་སྣ་ཚོགས་ཤིག་ཡོང་གི་ཡོད་པ་རེད། མ་འོངས་པར་རྒྱ་ནག་ནང་འགྱུར་བ་བསླེབས་ཐུབ་རྒྱུར་ཁྱེད་ཀྱིས་རེ་བ་ག་རེ་མཐོང་གི་འདུག 

ལན།  རྒྱ་ནག་ལ་འགྱུར་བ་ཡོང་རྒྱུའི་ཐད་རེ་བ་གཅིག་ག་རེ་འདུག་ཟེར་ན།   རྒྱ་གཞུང་ཚོགས་ཆེན་བཅུ་གཅིག་པའི་གྲོས་ཚོགས་ཐེངས་ ༦ པའི་ཐོག་མོ་ཙེ་ཏུང་གི་སྐོར་ལ་གྲོས་ཆོད་ཅིག་ཡོད་པ་རེད། ༡༩༩༣ ལོར་ཧྲང་ཧེ་ནས་ཆབ་སྲིད་ཅུའུ་རྒྱས་འཛོམས་ཚོགས་འདུའི་ཐོག  སྐབས་དེར་རྒན་ཡོལ་དུ་ཕྱིན་ཡོད་པའི་ཏིན་ཞོ་ཕིན་གྱིས། མའོ་ཙེ་ཏུང་གི་གནད་དོན་དེ་རྒན་པ་ཚོ་ཡོད་པའི་སྐབས་ཐོག་ལ་གླེང་སློང་མི་བྱེད་པར། དུས་རབས་རྗེས་མའི་ནང་མགོ་ཁྲིད་གསར་བ་ཚོ་བསླེབས་སྐབས་ལག་བསྟར་བྱེད་དགོས་པའི་སྐོར་བརྗོད་དེ།  དེ་དུས་ཧུའུ་ཅིན་ཐའོ་ཀྲུང་དབྱང་གི་རྒྱུན་ལས་ནང་ལ་གསར་དུ་བསླེབས་པའི་སྐབས་རེད།  ཧུའུ་ཅིན་ཐའོ་འགན་ཁུར་མཁན་བྱས་ཏེ་ཏིན་ཞོ་ཕིན་གྱི་སྐད་ཆ་དེ་མ་འོངས་པར་ལག་ལེན་བསྟར་བྱ་རྒྱུའི་གྲས་སུ་བཞག་ནས་གསང་བའི་ཐོག་ནན་བཞག་ཡོད་འདུག  ༢༠༠༤ ལོར་ཝན་ལཱི་ཡིས་ཧུའུ་ཅིན་ཐའོ་ལ་གྲོས་ཆོད་དེ་ལག་བསྟར་བྱེད་དགོས་སྐོར་ལབ་པར་ཧུའུ་ཅིན་ཐའོ་ཡིས་ཀྱང་མིན་ལབ་ཡོད་པ་མ་རེད། འོན་ཀྱང་། སྐབས་དེར་ཧུའུ་ཅིན་ཐའོ་ལ་དམག་ཁུལ་ཀྱི་དབང་ཆ་རག་མ་ཐག་ཡིན་སྟབས་འཕག་འཚག་རྒྱག་ཐུབ་ཡོད་པ་མ་རེད། དེ་བཞིན། ༢༠༠༩ ལོར་རྒྱ་ནག་ཏང་གི་སློབ་གྲྭས་རྒྱ་ནག་དབུས་གཞུང་ལ་སྙན་ཞུ་ཞིག་ཕུལ་ཏེ།  མའོ་ཙེ་ཏུང་གི་དགོངས་པ་རྩིས་མེད་གཏོང་དགོས་ཀྱི་འདུག  དེ་ནི་རྒྱ་ནག་གི་དངོས་ཡོད་གནས་ཚུལ་མི་མཐུན་པར་རྒྱ་ནག་ཡར་རྒྱས་འགྲོ་རྒྱུར་འགོག་རྐྱེན་ཐེབས་ཀྱི་ཡོད་སྐོར་བྲིས་ཡོད་པ་རེད།  སྐབས་དེར་སྙན་ཞུ་དེའི་ཐོག་རྒྱུན་ལས་བརྒྱད་ཀྱི་མཆན་བཀོད་ཐུབ་མི་འདུག ཧུའུ་ཅིན་ཐའོ་གཅིག་པུས་མཆན་བཀོད་འདུག  ཡིན་ནའང་། ཧུའུ་ཅིན་ཐའོ་ཡིས་དེ་ཡོངས་གྲགས་བྱས་ན་སྤྱི་ཚོགས་ནང་རྙོག་ཟིང་ཡོང་ཉེན་ཡོད་པར་བརྗོད་དེ་གསང་བའི་ཐོག་ནན་བཞག་ཡོད་པ་རེད་ཟེར། སྤྱིར་རྒྱ་ནག་ལ་འགྱུར་བ་འགྲོ་དགོས་ན་མའོ་ཙེ་ཏུང་རྩིས་མེད་གཏོང་དགོས་པ་དང་། དེ་རྩིས་མེད་གཏོང་བར་ཐོག་མར་ཏིན་ཞོ་ཕེན་རྩིས་མེད་གཏོང་དགོས་ཆགས་ཀྱི་ཡོད་པ་རེད།

དྲི་བ།  རྒྱ་གཞུང་གི་ཚོགས་ཆེན་བཅོ་བརྒྱད་པའི་སྐབས་སུའང་མའོ་ཡི་དགོངས་པ་དང་ཏིན་གྱི་རིག་པའི་གཞུང་ལུགས་བསྐྱར་ཟློས་བྱས་ཡོད་པ་རེད།  མ་འོངས་པར་ཏིན་གྱི་གཞུང་ལུགས་རྩིས་མེད་གཏོང་ཐུབ་རྒྱུར་རེ་བ་ཞིག་མཐོང་ཐུབ་ཀྱི་འདུག་གམ།    

ལན།  ཏིན་ཞའོ་ཕེན་རྩིས་མེད་གཏོང་རྒྱུའི་རྟགས་མཚན་གཅིག་ནི།  ༢༠༠༨ ལོ་རྒྱ་ནག་བསྒྱུར་བཅོས་བཏང་སྟེ་ལོ་ ༣༠ འཁོར་བའི་དུས་དྲན་སྐབས་ལ།  ཏིན་ཞོ་ཕིན་གྱི་བུ་མོ་ཆེ་བས་ཀུང་ཀྲིག་ཉིན་རེའི་ཚགས་པར་གྱིས་བཅར་འདྲིའི་སྐབས། ཁོ་མོའི་ཨ་ཕ་ལྷ་མ་རེད་ནོར་འཁྲུལ་ཡོང་སྲིད་པ་རེད། ངའི་ཨ་ཕ་ལྷ་འཇོག་སའི་ནང་མ་འཇོག་རོགས།  དབང་བོ་རྣམ་ལྔ་ཚང་བའི་སྤྱིར་བཏང་གི་མི་ཞིག་ཡིན་པའི་ངོས་ཐད་ནས་བསམ་བློ་གཏོང་དགོས་སྐོར་བཤད་ཡོད་ལ། ཧུའུ་ཅིན་ཐའོ་ཡིས་ཏིན་ཞོ་ཕིན་གྱི་བུ་ཆེ་བ་ཏིན་པུའུ་ཧྥང་སྲིད་གྲོས་ཀྱི་ཀྲུའུ་ཞི་གཞོན་པར་བསྐོ་འཐེན་བྱས་ཡོད་པ་རེད། ཏིན་པུའུ་ཧྥང་ནི་རྒྱལ་སྲས་ཚོགས་པའི་ཁྲོད་ཀྱི་བསམ་བློའི་དབུ་འཁྲིད་མཁན་གྱི་ཚབ་མཚོན་མི་སྣར་ངོས་འཛིན་བཞིན་ཡོད་ལ། དེ་སྔོན་ཐཱེན་ཨན་མཱེན་ཐང་ཆེན་དུ་ཏིན་ཞོ་ཕིན་གྱིས་སློབ་ཕྲུག་དམར་གསོད་གཏོང་སྐབས། ཁོའི་བུ་ཏིན་པུའུ་ཧྥང་ཡིད་འཐད་བྱུང་ཡོད་པ་མ་རེད། ཏིན་ཞོ་ཕིན་གྱི་བུ་ཕྲུག་ཚོས་ཏིན་ཞོ་ཕིན་མཐའ་གཅིག་ཏུ་རྩིས་མེད་གཏོང་སྲིད་ཀྱི་མ་རེད། ཡིན་ནའང་།  ཏིན་ཞོ་ཕིན་གྱི་གཞུང་ལུགས་སྐོར་ཅིག་རྩིས་མེད་བཏང་བ་ཡིན་ན།  ཧུའུ་དང་ཝུན་གཉིས་ཀྱིས་བཏོན་པའི་ཚན་རིག་དང་མཐུན་པའི་འཕེལ་རྒྱས་ཀྱི་ལྟ་བ་ཤུགས་ཆེ་རུ་ཡོང་ཐུབ།  དེ་ལྟར་ཏིན་ཞོ་ཕིན་གྱི་གཞུང་ལུགས་རྩིས་མེད་གཏོང་ཐབས་ཀྱི་ཆ་རྐྱེན་གཅིག་སྒྲིག་གི་ཡོད་པ་རེད། འོན་ཀྱང་། རྒྱབ་ལོགས་ན་ཡོད་པའི་རྒྱ་གཞུང་གི་དཔོན་རིགས་རྒན་པ་ཚོ་དང་སྤྱི་ཚོགས་ཀྱི་སྟོབས་ཤུགས་ཚང་མར་ལྟ་དགོས་པ་རེད། 

            དྲི་བ། ཆབ་སྲིད་དབྱེ་ཞིབ་པ་མང་པོ་ཞིག་གིས་ཞིས་ཅིན་ཕིན་ལ་རྒྱ་ནག་འགྱུར་བ་གཏོང་འདོད་ཀྱི་བསམ་བློ་དང་ནུས་པ་ཡོད་པར་ངོས་འཛིན་བྱེད་ཀྱི་འདུག  དེའི་ཐད་ཁྱེད་ལ་ལྟ་ཚུལ་ག་རེད་ཡོད།

ལན། ཧུའུ་ཅིན་ཐོ་དང་བསྡུར་བ་ཡིན་ན།  ཁོའི་ཕ་རྒན་ཞིས་ཀྲུང་ཞོན་དང་། ཁོའི་ཆུང་མ་ཕིན་ལིས་ཡཱོན། ཁོ་རང་ཉིད་ཚང་མ་དམག་ཁུལ་ནས་ལས་ཀ་བྱེད་མྱོང་མཁན་རེད། རྒྱ་ནག་དམག་ཁུལ་ནང་ཞི་ཅིན་ཕེན་ལ་རྒྱབ་སྐྱོར་བྱེད་མཁན་མང་པོ་ཡོད་པ་རེད། ཡིན་ནའང་། དམག་མིའི་ནང་མོ་ཙེ་ཏུང་དང་སྤྱི་ཚོགས་རིང་ལུགས་རྩིས་མེད་གཏོང་དགོས་སྐོར་བརྗོད་པ་ཡིན་ན། དེར་དམག་མིས་ནང་རྒྱབ་སྐྱོར་བྱེད་མཁན་དང་ངོ་རྒོལ་བྱེད་མཁན་ག་འདྲ་ཞིག་ཡོང་གི་ཡོད་མིན་དེ་དྲི་བ་ཞིག་རེད། ཡིན་ནའང་། ཞིས་ཅིན་ཕེན་དཔོན་པོར་མ་བསྡད་པའི་ཡར་སྔོན་གྱི་གནས་ཚུལ་ཞིག་ལ། ཞིས་ཅིན་ཕེན་གྱི་ཨ་ཅེ་ཞི་ཆོ་ཆོ་པེ་ཅིན་དུ་ཡོང་ནས། ཞིས་ཅིན་ཕེན་གྱི་ཚབ་བྱས་ཏེ་ཧུའུ་ཡོ་པང་ཚང་ལ་འབྲེལ་བ་བྱས་ཡོད་འདུག དེ་ནི་ཞི་ཡི་ཕ་རྒན་དང་ཀྲའོ་ཙི་ཡང་གཉིས་འབྲེལ་བ་དམ་པོ་ཡོད་པ་དང་། ཀྲའོ་ཙི་ཡང་དང་ཧུའུ་ཡའོ་པང་མི་ཚང་གཉིས་བར་ཕན་ཚུན་འགྲོ་འོང་མེད་པའི་འགལ་བ་ཡོད་པ་རེད།  དེར་བརྟེན།  ཞི་ཆོ་ཆོ་ཡིས་ཕན་ཚུན་བར་འབྲེལ་བ་བྱས་ཏེ་ཧུའུ་ཡོ་པང་ཚང་གི་སྐུ་ཚབ་ཏུ་ཧུའུ་ཏིག་ཧྭ་དང་ཀྲོ་ཙི་ཡཱང་ཚང་གི་སྐུ་ཚབ་ཏུ་ཝང་ཡཱང་ནཱན་གཉིས་བྱས་ཏེ།  ཁྱིམ་ཚང་གཉིས་ཞི་འགྲིག་ཡོང་འཇུག་གི་ཡོད་པར་བཤད། དེའི་དམིགས་ཡུལ་ནི་རྒྱལ་སྲས་ཚོགས་པའི་ནང་ནས་ཁོ་ཚོ་ཁྱིམ་རྒྱུད་གསུམ་གཙོ་བྱས་ཏེ། མའོ་ཙེ་ཏུང་གི་སྐབས་སྡུག་པོ་བཏང་བཞག་པ་དང་། ཏིན་ཞོ་ཕིན་གྱི་སྐབས་ལའང་གྱོང་རག་བསྡད་མཁན་གྱི་བཅོས་སྒྱུར་ཤོག་ཁག་ཅིག་འཛུགས་བཞིན་ཡོད་པ་རེད་ཟེར། ཡིན་ནའང་། དེ་ཚོའི་ཁ་གཏད་དུ་ཁྲིན་ཡོན་དང་ཧུའུ་ཆོ་མུའུ། ཏིན་ལའེ་ཆོན་བཅས་བུ་ཕྲུག་ཚོས་སྣེ་ཁྲིད་པའི་མཁྲེགས་འཛིན་ཤོག་ཁག་ཅིག་ཡོད་པ་དང་། དེར་ཀྲིག་ཨན་ལའེ་དང་ཏུང་པའེ་ཝུ་གཉིས་ཀྱི་ནང་མིས་ཀྱང་རྒྱབ་སྐྱོར་བྱེད་ཀྱིན་ཡོད་པ་རེད་ཟེར།  གནས་ཚུལ་དེ་དག་རྒྱ་ནག་ནང་ཡོངས་གྲགས་ལྟ་བུ་ཆགས་འདུག 

            དྲི་བ། བོད་མི་སྐོར་ཅིག་གིས་ཞིས་ཅིན་ཕེན་མགོ་ཁྲིད་ཆགས་རྗེས།  བོད་དོན་ཐོག་བཟང་ཕྱོགས་ཀྱི་འགྱུར་བ་ཞིག་ཐེབས་རྒྱུར་རེ་བ་རྒྱག་བཞིན་པའི་ཐད་ཁྱེད་ལ་དགོངས་ཚུལ་ཅི་ཞིག་ཡོད། 

ལན།  རྒྱ་ནག་ལ་བཟང་ཕྱོགས་ནས་འགྱུར་བ་མ་འགྲོ་བའི་སྔོན་ལ། བོད་ཐོག་འཛིན་པའི་སྲིད་ཇུས་ཇེ་སྡུག་ཏུ་འགྲོ་སྲིད་པ་རེད་མ་གཏོགས། བོད་གཅིག་པུར་སྲིད་ཇུས་ཡག་པོ་ཞིག་རྩ་བ་ཉིད་ནས་གཏོང་ཤེས་ཀྱི་མ་རེད། རྒྱ་ནག་གི་ནང་ནས་མཁྲེགས་པོ་བྱེད་མཁན་ཚོས་ག་རེ་བྱེད་ཀྱི་འདུག རྒྱ་ནག་ལ་སྒྱུར་བཅོས་གཏོང་འདོད་ཡོད་མཁན་ཚོར་ནུས་པ་དང་སྟོབས་ཤུགས་ག་འདྲ་ཞིག་འདུག རྒྱ་ནག་མི་དམངས་ནང་གོ་རྟོགས་སད་བསྡད་མཁན་མི་མང་ག་ཚོད་འདུག དེ་ལྟར་རྒྱ་ནག་གི་ཕྱོགས་མང་པོའི་འགྱུར་བ་ལ་བལྟས་ཏེ་རེ་བ་རྒྱག་དགོས་པ་རེད་མ་གཏོགས། ཞིས་ཅིན་ཕེན་གྱིས་སྐད་ཆ་ཡག་པོ་ཞིག་གཅིག་བཤད་པ་ཙམ་ལ་མགོ་འཁོར་བསྡད་ན་འགྲིག་གི་མ་རེད། ད་བར་དུ་བཙན་བྱོལ་སྤྱི་ཚོགས་ནང་ནས་ནོར་འཁྲུལ་ཆེ་ཤོས་ཤིག་ནི་རྒྱ་དཔོན་རེ་ཟུང་གི་སྐད་ཆར་མགོ་འཁོར་ནས་བསྡད་པ་དེ་རེད། གསར་ལམ་ཁག་ལ་མཚོན་ན་གནས་ཚུལ་བཟོས་ཏེ་ལྟ་མཁན་བྱུང་བ་ན་འགྲིག་གི་ཡོད་རེད། འཛམ་གླིང་གི་གསར་འགྱུར་བཤད་མཁན་ཚོའི་རྗེས་ལ་བརྒྱུགས་ཏེ། གསར་ལམ་ཁག་ནས་དགའ་སྐྱིད་བཤད་ན་དགའ་བ་སྒོམ་པ་དང་། སྡུག་སྤྱད་བཤད་ན་སྡུག་བསྔལ་བྱེད་པ་དེར་སྙིང་བོ་ཡོད་པ་མ་རེད། རྒྱ་ནག་གི་ལག་ནས་ཚུར་བརྒྱ་ཆ་ག་ཚོད་ཅིག་ལེན་ཐུབ་ཀྱི་འདུག གོ་སྐབས་ག་རེ་འདུག་མིན་གསལ་བོ་རྟོགས་པའི་སྒོ་ནས། ང་ཚོ་རང་ཉིད་ལ་ལངས་ཕྱོགས་ཡང་དག་ཅིག་དང་། རྒྱ་གཞུང་ལ་ལྟ་སྟངས་གསལ་བོ་ཞིག་དགོས་ཀྱི་འདུག 

            དྲི་བ། བོད་རྒྱ་འབྲེལ་མོལ་ལ་གྲུབ་འབྲས་ཐོན་ཡོད་མེད་ཐད་བཙན་བྱོལ་སྤྱི་ཚོགས་ནང་གླེང་སློང་འདྲ་མིན་ཡོང་གི་ཡོད་པ་རེད། ཁྱེད་ཀྱིས་བོད་རྒྱ་འབྲེལ་མོལ་ཐོག་ལྟ་སྟངས་གང་འདྲ་འཛིན་གྱི་ཡོད་དམ།

ལན། བོད་རྒྱ་འབྲེལ་མོལ་ལ་བསྐྱར་ཞིབ་བྱེད་དགོས་པ་རེད། སྤྱིར་བཏང་བོད་རྒྱའི་བར་འབྲེལ་ལམ་བཙུགས་པ་ལ་བརྟེན་ནས་ང་ཚོར་ཕན་ཐོགས་བྱུང་ཡོད་པ་རེད། ཐ་ན། རིག་གསར་རྗེས་སུ་༸པཎ་ཆེན་རིན་པོ་ཆེ་དང་ཕུན་ཚོགས་དབང་རྒྱལ་རྣམ་གཉིས་དཀར་འདོན་ཡོང་ཐབས་ཐད་ལའང་ནུས་པ་ཐོན་ཡོད་པ་རེད། ཡིན་ནའང་། ད་ལྟའི་བོད་རྒྱ་འབྲེལ་མོལ་ཚོགས་པས་རྒྱ་ནག་དང་འབྲེལ་བ་བྱེད་བཞིན་པ་འདིར། རྒྱ་ནག་གི་ངོས་ནས་འབྲེལ་གཏུག་དང་ང་ཚོའི་ངོས་ནས་འབྲེལ་མོལ་ཞེས་ལབ་ཀྱིན་ཡོད་ལ། འབྲེལ་མོལ་གྱིས་ཚད་མཐོན་པོ་ཞིག་དང་བྲེལ་གཏུག་གི་ཚད་དམའ་བོ་ཞིག་སྟོན་གྱི་ཡོད་རེད།  གང་ལྟར་ད་ལྟའི་འབྲེལ་མོལ་དེ་བརྒྱུད་ནས་དམིགས་བསལ་འདི་ཕན་ཐོགས་སོང་ཟེར་བ་ཞིག་སྟོན་རྒྱུ་ཡོད་པ་མ་རེད། ལྷག་པར་དུ་ ༢༠༠༢ ལོར་ནས་བཟུང་རྒྱ་གཞུང་ཇེ་མཁྲེགས་སུ་གྱུར་ཏེ། རྒྱ་ནག་ལ་འགྱུར་བ་གཏོང་དགོས་ཟེར་མཁན་གྱི་རྒྱ་རིགས་ཧྥང་ཆའོ་དང་ཝེ་ཅིན་ཧྲིན། ཝང་ཏཱན་སོགས་ཚང་མ་ཨ་རིར་ཕྱིར་འཕུད་གཏོང་བཞིན་ཡོད་པ་རེད། ད་དུང་། སྐབས་དེའི་ཀྲིན་ཧྥ་ཝེ་ཡི་ཧྲུའུ་ཅུ་ལོ་ཀཱན་དང་ཀྲུའུ་ཝེ་ཆོན་སོགས་ཚོགས་འདུ་ཚོགས་ཏེ། ༸གོང་ས་མཆོག་བཙན་བྱོལ་དུ་དགོངས་པ་རྫོགས་འཇུག་རྒྱུའི་འཆར་གཞི་བཏང་ཡོད་པ་རེད། སྐབས་དེ་འདྲ་ཞིག་ལ་ང་ཚོ་བཙན་བྱོལ་གཞུང་དང་སྐུ་ཚབ་ཚོས་༸གོང་ས་མཆོག་བོད་ནང་དུ་ཕེབས་འཇུག་རྒྱུ་ཡིན་ཟེར་ནས་འབྲེལ་མོལ་བྱེད་བཞིན་ཡོད་པ་རེད། རྒྱ་གཞུང་གིས་ཝང་ཏན་ལྟ་བུའི་ན་གཞོན་ཕལ་བ་ཞིག་ཀྱང་རྒྱ་ནག་ནང་འདུག་འཇུག་གི་མེད་དུས། དེ་ལས་ལྡབ་བརྒྱ་འགྱུར་སྟོང་འགྱུར་གྱི་ནུས་པ་ལྡན་པའི་༸གོང་ས་མཆོག་བོད་དུ་ཕེབས་འཇུག་རྒྱུ་དེ་མི་སྲིད་པ་ཞིག་རེད།  ཡིན་ནའང་། ང་ཚོས་རེ་བ་མེད་ས་དེར་རེ་བ་བརྒྱབ་སྟེ་མི་མང་ཁྲོད་ལས་འགུལ་རིགས་མ་སྤེལ་བ་ཡིན་ན། ཅིག་རེག་གི་ཡོད་མདོག་གི་བཟོ་བཏོད་དེ་ ༢༠༠༨ ལོའི་གོ་སྐབས་ཡག་ཤོས་དེའང་འཕྲོ་བརླག་བཏང་ཚར་བ་རེད།  དེ་ནི་ང་ཚོས་རྒྱ་ནག་གིས་བོད་ཐོག་འཛིན་པའི་དངོས་ཡོད་གནས་ཚུལ་མ་ཤེས་པར་རེ་བ་རྒྱག་སྟངས་ནོར་བ་རེད།

            དྲི་བ། བོད་ནང་རང་ལུས་མེར་བསྲེགས་གཏོང་བཞིན་པའི་ཐད།  བཙན་བྱོལ་བ་ཁག་ཅིག་གིས་དེ་མཚམས་འཇོག་དགོས་མིན་དང་ཆོས་དང་འགལ་མིན་གྱི་གླེང་སློང་ཡང་གི་འདུག  དེའི་ཐད་ཁྱོད་ལ་བསམ་ཚུལ་ག་རེ་ཡོད།

ལན། རྒྱ་ནག་གིས་འཇིགས་སྐུལ་རིང་ལུགས་པ་སོགས་ག་རེ་བཤད་ཀྱང་རུང་། བོད་ནང་རང་ལུས་མེར་བསྲེགས་གཏོང་མཁན་རྣམས་ནི་བླ་ན་མེད་པའི་དཔའ་བོ་རྐྱང་རེད། འཛམ་གླིང་འདིའི་སྒང་དེ་ལས་ལྷག་པའི་བློས་གཏོང་ཞིག་ཡོད་པ་མ་རེད།  ང་ཚོའི་ངོས་ནས་དེར་འགྲིག་གི་ཡོད་མེད་དང་མཚམས་འཇོག་དགོས་མིན་གྱི་སྐད་ཆ་བཤད་ས་ཡོད་པ་མ་རེད། ངས་དེ་སྔོན་རྒྱ་རིགས་ཁ་ཤས་ཤིག་ལའང་འདི་ལྟར་བཤད་པ་ཡིན།  གལ་སྲིད་བོད་པ་ཞིག་གིས་སོ་སོའི་ལུས་སྟེང་དུ་འགད་རྫས་བཅིངས་ཏེ་མེ་འཁོར་དང་རླངས་འཁོར་འབབ་ཚིགས་ནས་འགས་གཏོར་བྱས་པ་ཡིན་ན།  དེ་འཆི་བདེ་བོ་འདུག་གམ། ཡང་ན། སོ་སོའི་ལུས་སྟེང་ལ་སྣུམ་བླུགས་ཏེ་མེ་སྒྲོན་ན་དེ་འཆི་བདེ་བོ་འདུག  ཁྱོད་ཚོ་རྒྱ་རིགས་ཚོས་ཀྱང་བསམ་བློ་གཏོང་དགོས་པ་རེད་ཅེས་བཤད་པ་ཡིན།  མི་གཞན་ལའང་གནོད་པ་མ་བྱས་པར་སོ་སོར་སྡུག་སྦྱོང་མནར་གཅོད་གཏོང་མཁན་ཚོའི་བསལ་བློ་ལེགས་ཕྱོགས་སུ་འགྱུར་བ་གཏོང་ཆེད།  རང་ཉིད་བློས་བཏང་བྱས་པ་དེ་ཆོས་དང་མི་མཐུན་ན་ཆོས་དང་མཐུན་པ་ཞིག་ཅི་ལྟར་སྒྲུབ་དགོས་པ་རེད། སྔོན་ཆད་ཡིན་ནའང་། ང་ཚོས་ཆོས་བཤད་ས་ནས་སྲིད་བཤད། སྲིད་བཤད་ས་ནས་ཆོས་བཤད། ཚང་མ་དཀྲུགས་དཀྲུགས་བཏང་བ་ལ་བརྟེན་ནས། མཐའ་མར་སོ་སོར་གཅིག་ཀྱང་མེད་པ་ཆགས་བསྡད་ཡོད་པ་འདི་རེད། སྤྱིར་ང་ཚོའི་རང་དབང་འཐབ་རྩོད་ཀྱི་ལས་འགུལ་དེ་ཆོས་ལ་ཁག་འགེལ་རྒྱུ་ཡོད་པ་མ་རེད།

            དྲི་བ། དེང་བཙན་བྱོལ་སྤྱི་ཚོགས་ནང་རང་བཙན་གླེང་མཁན་རྣམས་ནི།  བོད་མིའི་སྒྲིག་འཛུགས་དང་དབུ་མའི་ལམ་ལ་ངོ་ལོག་རྒྱག་མཁན་གྱི་ལྟ་སྟངས་ཤིག་ཡོང་གི་ཡོད་པའི་ཐད་ཁྱེད་ལ་ལྟ་ཚུལ་ག་རེ་ཡོད།

ལན། ལྟ་སྟངས་དེ་ནོར་བ་རེད། བཙན་བྱོལ་སྤྱི་ཚོགས་ཀྱི་བྱེད་སྟངས་དེ་ནི་ཏག་ཏག་རྒྱ་གཞུང་ལ་དགོས་པ་དེ་ཆགས་ཀྱིན་ཡོད་པ་རེད། རྒྱ་གཞུང་འཐབ་ཕྱོགས་གཅིག་གྱུར་གྱི་ལས་འགན་གཙོ་ཡང་དཀྲུགས་ཤིང་རྒྱག་རྒྱུ་དེ་རེད། སྔོན་ཆད་གོ་མིན་ཏང་ལ་དཀྲུགས་ཤིང་བརྒྱབ་སྟེ་གོ་མིན་ཏང་ལོག་སྤྱོད་ཤོག་ཁག་དང་། གོ་མིན་ཏང་གསར་བརྗེ་ཨུ་ཡོན་ལྷན་ཁང་ཟེར་བ་གཉིས་བཟོས་པ་རེད། ༸གོང་ས་མཆོག་གིས་རང་བཙན་རྩོད་མཁན་ཚོར་འཆར་གཞི་དང་གོ་རིམ་མི་འདུག་གསུང་གི་ཡོད་པ་རེད་མ་གཏོགས། རང་བཙན་རྩོད་ཆོག་གི་མ་རེད་གསུང་ཡོད་པ་མ་རེད། རང་བཙན་བཤད་ན་དབུ་མའི་ལམ་ལ་གནོད་འགྲོ་བ་ཞིག་ཡིན་སྐོར་རྗོད་ཀྱིན་པ་དེ་ནི། དབུ་མའི་ལམ་ལ་འགྲོ་མཁན་ཡིན་ཟེར་བ་ཚོའི་སྐད་ཆ་རེད། ༸གོང་ས་མཆོག་གི་དབུ་མའི་ལམ་གྱི་དོན་ཚན་ཆེ་ཤོས་གཅིག་ནི་ཆོལ་ཁ་གསུམ་ཟླ་སྒྲིལ་གཏོང་རྒྱུ་དེ་རེད། ༢༠༠༨ ལོར་ཆོལ་ཁ་གསུམ་ཟླ་སྒྲིལ་གཏོང་བའི་གོ་སྐབས་ཤོར་འཇུག་མཁན་རྣམས་ཀྱང་དབུ་མའི་ལམ་ཡིན་ཟེར་མཁན་ཚོ་རེད།  ང་རང་ངོས་ནས་རང་བཙན་བཤད་མཁན་ཚོ་ལས་དབུ་མའི་ལམ་བཤད་མཁན་དེ་ཚོར་ཉེན་ཁ་མཐོང་གི་འདུག   ༸གོང་ས་མཆོག་གི་དགོངས་པ་ཁ་ལ་ཁྱེར་མི་མང་གི་མགོ་སྐོར་ནས་སོ་སོར་འོས་ཤོག་ཐོབ་ཐབས་བྱེད་བཞིན་ཡོད་པ་རེད།  དེ་བཞིན། རང་བཙན་འདོད་མཁན་ཚོར་མཚོན་ནའང་། སོ་སོའི་ངོས་ནས་འཆར་གཞི་དང་གོ་རིམ་ལྡན་པ་ཞིག་དགོས་པ་རེད་མ་གཏོགས།  ཁ་ནང་ནས་རང་བཙན་རྩོད་དགོས་པ་རེད་ཅེས་ཚིག་སྐམ་པོ་ལབ་བསྡད་ན་དེས་ནུས་པ་གང་ཡང་འཐོན་གི་མ་རེད། 

            དྲི་བ། རྒྱ་གཞུང་གིས་བོད་ནང་འབྲོག་པ་གྲོང་རྡལ་ཅན་དུ་གནས་སྤོར་བྱེད་བཞིན་པའི་སྲིད་ཇུས་ལག་བསྟར་བྱེད་བཞིན་པ་དེར་ཉེན་ཁ་ག་རེ་མཐོང་གི་འདུག 

ལན། འབྲོག་པ་རྒྱ་གྲོང་དུ་ཕབ་སྟེ་གཞི་རིམ་བོད་མིའི་གཏན་འཇགས་ཀྱི་འཚོ་བའི་གོམས་གཤིས་སྒྱུར་གྱིན་པ་དེ་ནི་ཧ་ཅང་ཉེན་ཚབས་ཅན་ཞིག་ཏུ་མཐོང་སོང་། མང་ཚོགས་ཁྲོད་རང་ཚིགས་ཐུབ་པའི་དེང་དུས་ཀྱི་སློབ་སྦྱོང་ཤུགས་ཆེན་པོ་མེད་པ་མ་ཟད། སོ་སོའི་ཆོས་དང་རིག་གནས་ཀྱི་སློབ་སྦྱོང་ཡང་གཏིང་ཟབ་མོ་མེད་པར་བརྟེན། བོད་མི་རིགས་ཀྱི་མི་ཚེ་སྐྱེལ་སྟངས་གཡུགས་ཏེ་གྲོང་ཁྱེར་ལ་ཡོང་ནས་མི་ཚེ་སྐྱེལ་སྐབས། གྲོང་ཁྱེར་གྱི་ལས་ཀ་དེ་དག་ལ་རྩ་བ་ནས་རྒྱུས་མེད་སྟབས།  འཚོ་བའི་ཐད་ཕྱོགས་མང་པོ་ནས་རང་བཞིན་གྱིས་དཀའ་ངལ་འཕྲད་ཡོང་གི་རེད། དེ་བཞིན།  སོ་སོའི་ཆོས་དང་རིག་གཞུང་གསལ་བོ་མ་ཤེས་པར་མང་ཚོགས་ཁྲོད་དད་ལོག་ཡོང་རྒྱུའི་ཉེན་ཁའང་ཡོད་པ་རེད། གྲོང་ཁྱེར་ལ་བསླེབས་རྗེས་གཞོན་སྐྱེས་མང་པོ་ཞིག་གིས་མིག་གིས་མཐོང་བཞིན་པ་དངོས་ཡོད་གནས་ཚུལ་དང་།  སྔོན་ཆད་ཕ་མས་བཤད་པའི་སྒྲུང་ལྟ་བུའི་ཆོས་གཉིས་མཐུན་གྱི་མེད་པར་བརྟེན། ཆོས་ངོ་མ་དེ་གསལ་བོ་མ་ཤེས་པར་ཆོས་ལ་ཡིད་ཆེས་མེད་པ་ཆགས་ཡོང་གི་ཡོད་པ་རེད། ད་དུང་མི་རིགས་འགྱུར་རྒྱུའི་ཉེན་ཁ་ཞིག་ཀྱང་འཕྲད་ཡོང་གི་འདུག  བོད་ནང་ཁྱིམ་ཚང་གི་ཕྱི་ལོགས་ལ་བུད་མ་ཐག་བོད་ཡིག་བོད་སྐད་བེད་མེད་ཆགས་འགྲོ་གི་ཡོད་དུས། སྤྱི་ཚོགས་ནང་འཚོ་བ་རོལ་བྱེད་ཀྱི་སྐད་ཡིག་གང་ཤུགས་ཆེ་བ་ཡོད་པ་ཡིན་ན།   དེས་རང་བཞིན་གྱིས་སྐད་ཡིག་གཞན་ལ་དབང་སྒྱུར་ཐེབས་ཡོང་གི་ཡོད་པ་རེད། རྒྱ་མང་པའི་གྲོང་ཁྱེར་ནང་བོད་ཡིག་གིས་ལྟོ་གོས་སྤྲོད་ཐུབ་ཀྱི་མེད་པར་བརྟེན། རྒྱ་ཡིག་རྒྱ་སྐད་ལ་དོ་སྣང་དང་ཤུགས་རྒྱག་དགོས་ཆགས་ཏེ།  རིམ་པས་བོད་ཡིག་ལ་དོ་སྣང་མེད་པ་ཆགས་འགྲོ་བ་རེད། སྤྱིར་མི་རིགས་རྩ་མེད་དུ་འགྲོ་བ་དང་མི་རིགས་ཤིག་དབང་སྒྱུར་འོག་ཚུད་མིན་དེ། མི་རིགས་དེའི་ཤ་ཁྲག་རིགས་རྒྱུད་རྩ་མེད་དུ་འགྲོ་མིན་ལ་ཐུག་ཡོད་པ་མ་རེད། སོ་སོའི་སྐད་ཡིག་རིག་གཞུང་དང་ཡུལ་གོམས་གཤིས་ལུགས། བསམ་བློ་གཏོང་སྟངས་བཅས་འགྱུར་འགྲོ་མིན་ལ་རག་ལས་ཡོད་པ་རེད།

            དྲི་བ། རྒྱ་གཞུང་གིས་བོད་ནང་ཚོང་ལས་ཀྱི་ཁེ་ཕན་བསྐྲུན་ཏེ་རྒྱ་རིགས་མང་པོ་གནས་སྤོར་ཐབས་བྱེད་བཞིན་ཡོད་པ་རེད།  བོད་ནང་གི་བོད་མི་ཚོས་དེར་གདོང་ལེན་ཅི་ལྟར་བྱ་དགོས་ཀྱི་འདུག་གམ། 

ལན།  གཅིག་ང་ཚོ་བོད་ཀྱི་ས་ཆར་གཏོར་སྐྱོན་ཐེབས་ཚེ། རྒྱ་ནག་མི་དམངས་ལའང་རང་བཞིན་གྱིས་གྱོང་རག་ཡོང་གི་ཡོད་པ། རྒྱ་ནག་ནང་ཆུ་ལོག་དང་ས་འགུལ་མང་པོ་འབྱུང་བཞིན་པ་དེ་ནི།  བོད་ཀྱི་ས་ཆར་གཏོར་སྐྱོན་ཐེབས་པའི་རྐྱེན་ཡིན་པའི་སྐོར།  ས་ཁམས་ཚན་རིག་དང་མཐུན་པའི་ཐོག་ནས་རྒྱ་མི་རིགས་ལ་འགྲེལ་བཤད་རྒྱག་དགོས་ཀྱི་འདུག  རྒྱ་གཞུང་གིས་བོད་ནང་བོད་མིའི་དགོས་མཁོར་མ་བལྟས་པར།  རྒྱ་གཞུང་གིས་བོད་ནང་དུ་གང་འདོད་གཏེར་ཁ་སྔོག་འདོན་དང་འཛུགས་སྐྲུན་བྱེད་པ་རྣམས་མཚམས་འཇོག་བཅུག་པ་ཡིན་ན། རྒྱ་མི་རིགས་བོད་ཀྱི་ས་ཐོག་ནས་རང་བཞིན་གྱིས་ལོག་འགྲོ་བ་རེད། གཉིས་པ། བོད་ནང་བོད་མི་རང་ངོས་ནས་འགྲོན་ཁང་དང་། ཚོང་ཁང་། ཟ་ཁང་སོགས་བཟུང་སྟེ། སོ་སོའི་ས་ཁོངས་ཀྱི་དཔལ་འབྱོར་ཁེ་ལས་རང་གིས་འཇུ་ཐུབ་པ་བྱ་དགོས་ཀྱི་འདུག  དེང་སྐབས་བོད་ནང་གི་བོད་མི་ཚོར་དཔལ་འབྱོར་ཏོག་ཙམ་ཡོད་ཚེ། རླངས་འཁོར་རྫིག་པོ་ཉོ་བར་འགྲན་སྡུར་བྱེད་པ་སོགས་དགོས་མེད་ཀྱི་རིགས་ལ་མགོ་འཁོར་ནས་སྡོད་ཉན་གྱི་མི་འདུག  ང་ཚོ་བོད་པ་ཚང་མས་རྒྱ་མིའི་ཆང་འཐུང་སྲོལ་དང་མཱ་ཅང་རྒྱག་སྟངས་ཤེས་བསྡད་ཡོད་པ་རེད། རྒྱ་མིས་ཟ་མ་བཟོ་སྟངས་དང་ཚོང་ལས་གཉེར་སྟངས་ཤེས་ཡོད་པ་མ་རེད།  སྤྱིར་ཚད་མཐོ་བའི་ཚན་རིག་གི་སྐོར་རྒྱ་གཞུང་གིས་བོད་མི་ཚོར་ལམ་ཁ་སྤྲད་མེད་སྟབས། སོ་སོས་རང་སྦྱོང་བྱས་ནས་ཤེས་ཐུབ་རྒྱུ་ཧ་ཅང་ཁག་པོ་རེད། ཡིན་ནའང་། ཟ་མ་བཟོ་སྟངས་དང་ཚོང་རྒྱག་སྟངས་ནི་སྦྱོང་ཐུབ་པ་ཞིག་རེད། དེ་དག་ལ་སློབ་སྦྱོང་བྱས་ཏེ་རང་ཡུལ་ནས་ས་ཟིན་ཐུབ་དགོས་རྒྱུ་གལ་ཆེན་པོ་རེད།

            དྲི་བ། ༸གོང་ས་མཆོག་གིས་བཙན་བྱོལ་བོད་མིའི་ཤེས་ཡོན་འཐུས་ཤོར་ལ་འགྲོ་བཞིན་ཡོད་པའི་སྐོར་ཡང་ཡང་གསུངས་ཡོད་པ་རེད། ཁྱོད་ཀྱི་ངོས་ནས་བཙན་བྱོལ་སྤྱི་ཚོགས་ཀྱི་ཤེས་ཡོན་འཐུས་དེ་གང་ལ་ངོས་འཛིན་བཞིན་ཡོད།

ལན།  ངས་བསམ་ན་བཙན་བྱོལ་སྤྱི་ཚོགས་ནང་བོད་ཡིག་རང་གི་ཐོག་ནས་ཤེས་ཡོན་གྱི་མ་ལག་ཅིག་བསྐྲུན་རྒྱུ་ཧ་ཅང་དཀའ་ལས་ཁག་པོ་རེད། དེར་བྱིས་པ་ཚོའི་མ་འོངས་པའི་ལས་ཀའི་ཕྱོགས་ནས་ཀྱང་བསམ་བློ་གཏོང་དགོས་པ་རེད། ཚན་རིག་སོགས་སློབ་ཚན་ཚང་མ་བོད་ཡིག་ཐོག་སྦྱང་བ་ཡིན་ན། བོད་པའི་སྤྱི་ཚོགས་ཀྱིས་ལས་རིགས་དེ་དག་གོ་སྒྲིག་བྱེད་ཐུབ་དགོས་པ་རེད། དབྱིན་ཇིས་སྐད་ཡིག་ཤེས་པ་ཙམ་གྱིས་ང་ཚོར་ཕན་ཆེན་པོ་ཐོགས་གི་མ་རེད།  སྤྱིར་བོད་ཡིག་གི་ཐོག་ནས་བོད་ནང་ལ་དོ་གི་མ་རེད། ཡིན་ནའང་། མ་འོངས་པར་བོད་ནང་འཛུགས་སྐྲུན་ཐད་ཞིང་ལས་དང་འབྲོག་ལས། ཚན་རྩལ་སོགས་རིག་གཅིག་རྐང་འཛིན་པ་ང་ཚོས་སྐྱེད་སྲིང་བྱེད་ཐུབ་དགོས་པ་རེད། མ་འོངས་པར་བྱིས་པ་ཚོ་ག་འདྲ་ཞིག་ཏུ་སྐྱེད་སྲིང་བྱེད་མིན་ཐད་འཆར་གཞི་གཅིག་ཀྱང་ཡོད་པ་མ་རེད།  ངས་བཙན་བྱོལ་གྱི་ཤེས་ཡོན་འཐུས་ཤོར་ཡང་འདི་ལ་ངོས་འཛིན་བྱེད་བཞིན་ཡོད། བཙན་བྱོལ་སྒྲིག་འཛུགས་ལ་མདུན་ལམ་སློབ་སྟོན་པ་གཅིག་ཡོད་པ་རེད། མདུན་ལམ་སློབ་སྟོན་པས་བོད་ལ་ཅི་ཞིག་མཁོ་མིན་ཀྱང་ཤེས་ཀྱི་ཡོད་པ་མ་རེད། བོད་ལ་ཅི་ཞིག་དགོས་མིན་དེ་ཤེས་པའི་ཐོག་ནས་དེར་འཆར་གཞི་ཡག་པོ་བཟོས་ཏེ། རྒྱ་གར་གཞུང་དང་ཨ་རི། ཡུ་རོབ་རྒྱལ་ཁབ་སོགས་ལ་འབོད་སྐུལ་ཞུས་པ་ཡིན་ན། དེའི་ཐད་ང་ཚོར་རོགས་པ་བྱེད་མཁན་ཏན་ཏན་རག་གི་རེད་བསམ། 

            དྲི་བ། གཞན་དབང་སྟབས་བསྟུན་འོག་ཡོད་པའི་བཙན་བྱོལ་སྤྱི་ཚོགས་ནང་། བོད་ཀྱི་སྐད་ཡིག་དང་རིག་གཞུང་རྒྱུན་འཛིན་བྱ་ཕྱོགས་ཐད་ཐབས་ཤེས་གང་དང་གང་འདུག

ལན།  བོད་ཡིག་ལ་ཉེན་ཁ་གཉིས་པ་རེད། བེད་སྤྱོད་གཏོང་ཐུབ་ཀྱི་མེད་པ་དེ་ཆབ་སྲིད་ཀྱི་གནད་དོན་རེད། དེར་ཉིན་ཞིག་རྒྱ་ནག་གི་སྲིད་ཇུས་ལ་འགྱུར་བ་ཕྱིན་པ་ཡིན་ན་འགྲིག་འགྲོ་བ་རེད། གཞན་དེ་བོད་ཡིག་ཐོག་དེང་རབས་ཀྱི་རིག་པའི་གཞུང་ལུགས་སྣ་ཚོགས་དང་ཐ་སྙད་ཀྱིས་འདང་གི་ཡོད་པ་མ་རེད། ལོ་ཙྭ་ཁང་བཙུགས་ཏེ་བཙན་བྱོལ་སྤྱི་ཚོགས་ནང་ཁྲིམས་དང་དཔལ་འབྱོར། ཚན་རིག་སོགས་འཛམ་གླིང་གི་རིག་པའི་གཞུང་ལུགས་རྣམས་བོད་ཡིག་ཐོག་ཚུར་ཡིག་སྒྱུར་བྱེད་དགོས་ཀྱི་འདུག དེ་སྒྱུར་བ་ལ་རིག་ཚན་དེ་དག་ལ་ཆེད་ལས་སློབ་སྦྱོང་ཐོན་མཁན་སྐྱེད་སྲིང་བྱ་དགོས་པ་རེད། གཞུང་ལུགས་མ་ཤེས་པར་བོད་ཡིག་ཤེས་པ་ཙམ་གྱིས་སྒྱུར་ཐུབ་ཀྱི་མ་རེད། ལས་དོན་འདིའི་རིགས་བཙན་བྱོལ་སྤྱི་ཚོགས་ནང་སྒྲུབ་ཐུབ་པའི་ལས་ཀའི་རིགས་རེད། དེ་ལྟ་བུའི་ལས་ཀ་མང་པོ་ཞིག་འཐུས་ཐོར་འགྲོ་བཞིན་ཡོད་པ་རེད། མ་གཞི་གཞུང་ལ་བརྩི་བཀུར་དང་རྒྱབ་སྐྱོར་བྱེད་དགོས་པ་རེད། ཡིན་ནའང་། གཞུང་གི་ནོར་འཁྲུལ་བཟོ་བཞིན་པ་དང་འཐུས་ཤོར་འགྲོ་བཞིན་པ་རྣམས་མ་མཐོང་མདོག་མདོག་བྱས་བསྡད་པ་ཡིན་ན། དེ་བོད་སྤྱི་བར་འགན་མ་ཁུར་བ་རེད། དམངས་གཙོའི་སྤྱི་ཚོགས་ཀྱི་ཁྱད་ཆོས་ཆེ་ཤོས་གཙོ་བོ་ཡང་གཞུང་གི་ནོར་འཁྲུལ་ཐེར་འདོན་གྱིས་ལེགས་བཅོས་གནང་ཐུབ་པ་དེ་རེད།

གསར་འགོད་པ། ཚེ་རིང་རྒྱལ།