དེ་རིང་ངྷ་ས་ཀིརྟི་དགེ་རྩ་ཚོགས་པའི་ཚོགས་ཁང་དུ་མདོ་སྨད་དམིགས་བསལ་ཚོགས་ཆེན་དབུ་འཛུགས་གནང་སོང་ལ། ཉིན་གཉིས་རིང་གི་ཚོགས་ཐོག་ཏུ་མ་འོངས་པར་༧གོང་ས་མཆོག་དགུང་གྲངས་བརྒྱད་ཅུར་བཞེས་སྐབས་གྱ་སྟོན་གནང་ཕྱོགས་དང་། ད་ལྟའི་བོད་ནང་གི་ཛ་དྲག་གནས་སྟངས་ལ་གདོང་ལེན་བྱེད་སྟངས་བཅས་ཀྱི་ཐོག་བགྲོ་གླེང་གནང་རྒྱུ་རེད།
དེ་རིང་ཕྱི་ཚེས་ ༡༤ ཉིན་གྱི་ཞོགས་པའི་ཆུ་ཚོད་ ༩ སྟེང་མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག ངྷ་ས་ཀིརྟི་དགེ་རྩ་ཚོགས་པའི་ཚོགས་ཁང་དུ། ཉིན་གཉིས་རིང་གི་མདོ་སྨད་ཆོལ་ཁའི་དབུས་རྒྱུན་སྐབས་ ༡༥ པའི་དམིགས་བསལ་ཚོགས་ཆེན་གྱི་དབུ་འབྱེད་མཛད་སྒོ་མགོ་འཛུགས་གནང་ཡོད། སྐུ་མགྲོན་གཙོ་བོར་བཀའ་ཟུར་བོད་མི་མང་སྤྱི་འཐུས་ཐུབ་བསྟན་ལུང་རིག་མཆོག་དང་། དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་མཆོག གཞན་མདོ་སྨད་སྤྱི་ཟུར་དང་ལས་ཐོག་སྤྱི་འཐུས་ཁག་ཅིག མདོ་སྨད་དབུས་ས་གཉིས་ཀྱི་རྒྱུན་ལས་བཅས་ཕེབས་འདུག
མཛད་སྒོ་དབུ་འབྱེད་ཀྱི་ཐོག་མར་སྐུ་མགྲོན་གཙོ་བོ་མཆོག་གིས་སྣང་གསལ་སྒྲོན་མེ་ཞལ་འབྱེད་དང་༧སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་མཚམས། ཚོགས་བཅར་པ་ཡོངས་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་བཏང་རྗེས། བོད་བསྟན་པ་ཆབ་སྲིད་ཆེད་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་ཀྱི་ངག་བཅད་སྐར་མ་གཅིག་རིང་གནང་པ་དང་། མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་བསྟན་པའི་དངོས་གྲུབ་ལགས་ཀྱིས་ཐེངས་འདིའི་ཚོགས་ཆེན་གྱི་ཉིན་གཉིས་རིང་གི་ཚོགས་འདུའི་ལས་རིམ་ངོ་སྤྲོད་གནང་བའི་ནང་། ༧གོང་ས་མཆོག་དགུང་གྲངས་བརྒྱད་ཅུར་ཕེབས་པར་གྱ་སྟོན་དང་། བོད་ནང་གི་ཛ་དྲག་ཐད་ལས་འགུལ་སྤེལ་ཕྱོགས། བོད་མིའི་སྒྲིག་འཛུགས་ཀྱི་ལངས་ཕྱོགས་ལ་རྒྱབ་སྐྱོར་བྱ་ཕྱོགས། དབུས་སའི་འབྲེལ་མལ་ཡར་རྒྱུས་གཏོང་ཕྱོགས་སོགས་བརྗོད་སོང་།
ཁོང་གིས་༧གོང་ས་མཆོག་ཐོག་མར་བཙན་བྱོལ་དུ་འབྱོར་སྐབས་ཕྱོགས་གང་ཐད་ནས་དཀའ་ངལ་ཆེན་པོ་འཕྲད་སྐབས་མདོ་སྨད་ཀྱི་རྒན་རབས་པ་ཚོས་རྒྱག་གཅིག་མཆོང་གཅིག་ཐོག་ ༧གོང་ས་མཆོག་དང་བོད་གཞུང་གི་ལངས་ཕྱོགས་ལ་རྒྱབ་སྐྱོར། བཙན་བྱོལ་ནང་མདོ་སྨད་ཀྱི་མི་འབོར་ཉུང་ཤོས་དང་དབུས་རྒྱུན་ལས་ཁང་ལ་མཚོན་ན་དཔལ་འབྱོར་སྐྱོ་ཤོས་ཆགས་ཡོད་ཀྱང་། བོད་མིའི་སྤྱི་དོན་ཐད་འབུར་དུ་ཐོན་མེད་ན་རྗེས་སུ་ལུས་མེད་སྟབས། མདོ་སྨད་ཀྱི་རྒན་རབས་པ་ཚོར་བཀའ་དྲིན་རྗེས་དྲན་ཞུས་པ་དང་སྦྲགས། ༧གོང་ས་མཆོག་གིས་གཏན་འབེབས་གནང་པའི་དབུ་མའི་ལམ་དང་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་ལངས་ཕྱོགས་བཅས་ལ་མཐའ་གཅིག་ཏུ་རྒྱབ་སྐྱོར་ཡོད་སྐོར་བརྗོད་བྱུང་།
དེའི་རྗེས་མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་དྲུང་ཆེ་རྒྱ་རིག་ཐར་ལགས་ཀྱིས་ལས་བསྡོམས་སྙན་སྒྲོན་ཞུས་སྐབས། སྔ་ལོའི་དུས་དབང་སྐབས་མདོ་སྨད་རྔ་པ་ཕྱོགས་ཀྱི་མཇལ་སྐོར་པ་ཁག་ཅིག་རྒྱ་གར་དང་བལ་ཡུལ་མཐའ་མཚམས་ནས་རྒྱལ་མཚམས་རྒལ་བའི་ཉེས་མིང་འོག་རྒྱ་གར་གྱི་བཙོན་ཁང་དུ་ལྷག་ཡོད་པ་རྣམས་བཙོན་གྲོལ་དང་བལ་ཡུལ་ནས་བོད་བར་ལམ་འཇུག་རོགས་རིམ་བྱས་པ། འབྲུག་ཡུལ་མ་གཏོགས་རྒྱ་གར་དང་བལ་ཡུལ་ནང་གི་ས་གནས་ཁག་ཚང་མར་ཕྱོགས་སྐྱོད་ཐོག་བོད་བསྟན་སྲིད་དང་ཆོལ་གསུམ་མཐུན་སྒྲིལ་གྱི་ལས་དོན་སྒྲུབ་ཕྱོགས་ཐད་མཇུག་སྣོན། རྒྱ་གར་ནང་ཡོད་པའི་མདོ་སྨད་པ་ཉམས་ཐག་རིགས་ལ་འཚོ་སྣོན་དང་ཛ་དྲག་ནད་མནར་སོགས་ཀྱི་ཐད་རོགས་འདེགས། མདོ་སྨད་ཀྱི་ཉམས་ཐག་སློབ་ཕྲུག་རེ་ཟུང་ཞིག་ལ་སློབ་ཡོན་ཐད་རོགས་རིམ་བྱས་ཡོད། སྔ་ལོའི་གླིང་ཚ་ཚེ་བརྟན་རྡོ་རྗེའི་བོད་སྐྱོད་གོམ་བགྲོད་སྐབས་མཐུན་འགྱུར་རོགས་རིམ་བྱས་ཡོད་སྐོར་སོགས་བརྗོད་སོང་།
དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་མཆོག་གིས་ཁོང་རང་ཉིད་ཀྱང་མདོ་སྨད་པའི་ཆ་ཤས་ཤིག་ཡིན་སྐོར་དང་། སྔོན་མ་མདོ་སྨད་པ་མི་གྲངས་ཉུང་ཉུང་ཡིན་ཡང་ཆིག་སྒྲིལ་ཧ་ལས་པ་ཡོད་པས་མུ་མཐུད་མཐུན་སྒྲིལ་དགོས་སྐོར། རྒྱ་གཞུང་གིས་བོད་པར་གླགས་ཁེལ་གྱི་མེད་པ་དེ་བོད་མིའི་མཐུན་སྒྲིལ་ལ་བརྟེན་ནས་བྱུང་གི་ཡོད་པ་དང་ད་ལྟའང་སྤྱི་ཚོགས་ནང་རྡོག་རྩ་ཆིག་སྒྲིལ་ཡོང་རྒྱུར་ཚང་མས་ཡིད་གཟབ་བྱ་དགོས་སྐོར། སྨྲ་བརྗོད་རང་དབང་ཡོད་པ་ལྟར་དེ་ལ་འགན་ཁུར་ཏེ་སྤྱི་ལ་ཕན་པ་ཞིག་གི་ཐད་སྨྲ་བརྗོད་རང་དབང་བེད་སྤྱོད་བྱ་དགོས་པ་དང་། རང་དབང་བེད་སྤྱོད་བྱ་རྒྱུ་དེ་རང་དབང་མེད་པ་ལས་དཀའ་ལས་ཁག་ཚུལ། ད་ལྟའི་བོད་ནང་གི་བོད་མི་ཚོས་རང་ལུས་མེར་བསྲེགས་གནང་པའི་རྒྱུ་མཚན་བཙན་བྱོལ་བོད་མི་ཚོས་ཅིག་གནང་གི་རེད་དགོངས་ཏེ་བློས་གཏོང་གནང་གི་ཡོད་སྟབས། ཁོང་ཚོའི་བློས་གཏོང་སྟོང་ཟད་དུ་འགྲོ་འཇུག་རྒྱུ་ཡིན་ནམ་གྲུབ་འབྲས་ལྡན་པ་ཞིག་བཟོ་རྒྱུ་བཙན་བྱོལ་བོད་མི་ཚོའི་ལག་ཏུ་ཡོད་སྐོར། རང་བཙན་རྩོད་མཁན་ཚོའི་ཐད་ཁོང་གིས་“རང་བཙན་གསུང་ན་གསུང་སྟངས་ཡོད་རེད། རང་བཙན་ལེན་ཐུབ་པ་ཡིན་ན་སུ་ལ་ཡིན་ན་དགོས་ངེས་རེད་མོད། ཅིག་གིས་འཇོན་མི་འདུག་མདོག་མདོག་དང་ང་ཚོས་ཅིག་བྱ་རྒྱུ་ཡིན་མདོག་མདོག་བཤད་མཁན་གྱི་གྲས་དེ་ཚོ་སྣང་བར་འགྲོ་ཡི་མི་འདུག” ཅེས་གསུངས་སོང་།
མཐར་སྐུ་མགྲོན་གཙོ་ཐུབ་བཀའ་ཟུར་སྤྱི་འཐུས་ཐུབ་བསྟན་ལུང་རིག་མཆོག་གིས། ༧གོང་ས་མཆོག་དགུང་གྲངས་བརྒྱད་ཅུར་ཕེབས་པའི་གྱ་སྟོན་གནང་འཆར་དེ་འཇིག་རྟེན་ཆོས་བརྒྱད་ཀྱི་ངོ་བོར་མ་སོང་པའི་ཐོག ༧གོང་ས་མཆོག་ལ་མཆོད་པ་འགྲོ་བའི་དོན་དམ་གྱི་གྱ་སྟོན་ཞིག་ཡོང་ཐབས། བོད་ཀྱི་སྲོལ་རྒྱུན་རང་བཞིན་གྱི་གྱ་སྟོན་རྒྱ་ཆེན་པོ་ཞིག་གོ་སྒྲིག་བྱ་རྒྱུའི་ཐག་གཅོད་དེ་མདོ་སྨད་དབུས་རྒྱུན་ནང་བྱུང་ཡོད་པ་ལྟར། རབ་བྱུང་ན་ཐེངས་འདིའི་ཚོགས་ཆེན་སྟེང་འགྲོ་ལུགས་བྱེད་ཕྱོགས་ཐད་གྲོས་བསྡུར་གནང་མཐར་ཆོལ་ཁ་གཞན་གཉིས་ལ་གྲོས་མགོ་བཏོན་ཏེ། ཆོལ་གསུམ་མཉམ་རུབ་ཀྱི་གྱ་སྟོན་གནང་ཐུབ་པ་ཡིན་ན་བོད་པ་ནང་ཁུལ་ཡིན་ན་འདྲ་ལ། ཕྱིའི་དགྲ་བོ་ཡིན་ནའང་འདྲ་ཕྱོགས་གང་ཐད་ནས་རྣམ་དཔྱོད་ལྡན་པ་དང་དགེ་མཚན་ཆེན་པོ་ཡོད་སྐོར། ༧གོང་ས་མཆོག་གི་སྐུ་ཕྱཱར་ཚང་མས་སེམས་ཁུར་བྱེད་ཀྱི་ཡོད་ཀྱང་དེ་རྒྱ་གར་གཞུང་ལ་བློ་འགེལ་ཆོག་ཅིང་། གཙོ་བོ་ནང་དུ་འགལ་རྐྱེན་མ་བྱུང་པ་དང་༧གོང་ས་མཆོག་གི་དགོངས་བཞེད་ལམ་སྟོན་ལག་བསྟར་བྱེད་ཐུབ་པ་ཡིན་ན། གྱ་སྟོན་ཟེར་ན་འདྲ་སྐུ་ཕྱཱའི་ཞབས་རིམ་དེ་ལས་ལྷག་པ་མེད་སྐོར་གསུངས་ཡོད།
ཡང་ཁོང་གིས་རང་བཙན་རྩོད་མཁན་དང་ལམ་དབུ་མ་རྩོད་མཁན་གང་ཡིན་ཡང་མཛུབ་མོ་ནང་ལ་མ་བཙུགས་པར། ཚང་མའི་ཁ་ཕྱོགས་རིའི་ཕ་རོལ་དུ་གཏད་དེ་འགྲོ་དགོས་སྐོར། དེང་སྐབས་བོད་ནང་གི་གནས་སྟངས་ཛ་དྲག་ཆགས་ཡོད་པ་དང་། བོད་མི་རང་ལུས་མེར་བསྲེགས་གནང་མཁན་ཚོའི་ཉིང་དགོས་ “རང་དབང་” ཡིན་པ་ལྟར། དེང་སྐབས་རྒྱལ་སྤྱིའི་སྟེང་ག་རེ་བཤད་ཀྱི་ཡོད་མེད་ལ་མ་བལྟས་པར་གཙོ་བོ་ཁོང་ཚོའི་ཉིང་དགོས་དེ་བསྒྲུབ་ཐུབ་ཀྱི་ཡོད་མེད་ལ་བལྟས་ཏེ་བཙན་བྱོལ་གཞུང་དམངས་གཉིས་ཀྱིས་འགན་འཁུར་དགོས་པ་དང་ཤུགས་རྒྱག་རྒྱུ་གལ་ཆེན་པོ་ཡིན་སྐོར། བོད་པའི་གསར་འགྱུར་བརྒྱུད་ལམ་ཁག་དང་སྨྱུག་ཐོག་པ་ཚོ་ཡིན་ནའང་སོ་སོ་གསར་འགོད་པ་ཞིག་དང་སྨྱུག་ཐོག་པ་ཞིག་ཡིན་པ་དང་མཉམ་དུ་སྐྱབས་བཅོལ་ཞིག་དང་འཐབ་རྩོད་པ་ཞིག རྒྱ་ནག་ལ་བརྡ་ལན་སྤྲོད་མཁན་ཞིག་ཡིན་པའི་ཐོག་འགྲོ་རྒྱུ་གལ་ཆེན་པོ་ཡིན་སྐོར་བཅས་གསུངས་སོང་།
ཐེངས་འདིའི་ཚོགས་ཆེན་དབུ་འབྱེད་མཛད་སྒོའི་རྗེས་སུ་མདོ་སྨད་ཀྱི་གནད་ཡོད་མི་སྣ་དང་དབུས་སའི་རྒྱུན་ལས་ལྷན་འཛོམས་ཐོག ཉིན་གཉིས་རིང་གོང་གི་གྲོས་གཞི་དག་གི་ཐད་གོ་བསྡུར་ཐག་གཅོད་གནང་རྒྱུ་ཡིན་འདུག
གསར་འགོད་པ། བནྡེ་སྐྱབས།
དཀྲོག་གཏམ་དང་འགལ་བ་ཞིག་བཟོ་བར་གང་ཞིག་ཇི་ལྟར་བཤད་རྒྱུ་འབད་པས་འཚོལ་བཞིན་པའི་ནོར་ལགས། འདི་ནི་སྔ་ས་ནས་བསྒྲོག་ཟིན་པ་ཞིག་རེད། ཞར་ལ་མདོ་སྨད་པའི་ཐུན་མིན་ལུགས་སྲོལ་ཡིན་པས། ཡིན་གཅིག་མིན་གཉིས་ཆོལ་ཁ་གསུམ་མཉམ་དུ་གནང་དགོས་དོན་མི་འདུག་སྙམ།
མདོ་སྨད་ཀྱི་གསང་བའི་ཚོགས་ཆེན་དེ་རིང་ཚོགས་བཞིན་པ་འདི། དེ་རིང་གསར་འགྱུར་བརྒྱུད་ལམ་ཁག་ཏུ་མ་ཐོན་པའི་ཡར་སྔོན་དུ་མདོ་སྨད་མི་མང་གིས་གཅིག་ཀྱང་གོ་ཡོད་པ་མ་རེད། གནས་སྟངས་འདིའི་རྒྱབ་ལྗོངས་ནས་གནས་ཚུལ་མང་པོ་ཞིག་སྦོས་སྐུང་བྱས་ཡོད་པ་རེད། ད་དེ་གཡུགས་ཞོག
སྤྱིར་ཆོལ་གསུམ་ཆིག་སྒྲིལ་ཐོག་གྱ་སྟོན་ཞུས་པ་ཡིན་ན་ཡག་ཐོག་ཡག་ལྟ་བུ་ཞིག་རེད། ཡིན་ནའང་། ལོ་བརྒྱད་ཅུར་བུད་སྐབས་གྱ་སྟོན་ཞུ་ལུགས་འདི་ཆོལ་ག་གཞན་གཉིས་ལ་སྲོལ་ཡོད་མེད་དེའང་གནས་སྟངས་གཞན་ཞིག་རེད་བསམ། ཡིན་ནའང་། ཐུབ་བསྟན་ལུང་གི་སྐད་ཆ་དེ་འཁྲབ་སྟོན་རང་རེད། གནས་ཚུལ་འདི་ནི་སྐབས་བཅུ་བཞི་པའི་མདོ་སྨད་ཚོགས་ཆེན་ཐོག་༸གོང་ས་མཆོག་ལ་གྱ་སྟོན་ཞུ་རྒྱུ་དེ་གྲོས་འདོན་ཐག་གཅོད་བྱུང་བ་ཞིག་ཡིན་པ་མ་ཟད། ཡར་༸གོང་ས་མཆོག་ལ་སྙན་ཞུ་གནང་སྟེ་ངོས་བཞེས་གྲུབ་ཟིན་ནས། ད་ལྟའི་ཆར་ཚོགས་ཆུང་དང་ལས་དོན་གོ་སྒྲིག་གི་མཐའ་མའི་རིམ་པ་ལྟ་བུར་བསླེབས་ཚར་ཡོད་པ་རེད། ད་རེས་གློ་བུར་དུ་བྱུང་བ་ཞིག་མ་རེད། སྐབས་སྔོན་མ་ནས་གནས་ཚུལ་འདི་ཐུབ་བསྟན་ལུང་རིག་གིས་གསལ་བོ་ཐང་བོ་ཤེས་ཡོད་པ་རེད། དེ་དུས་ནས་ག་རེ་བྱས་ནས་མ་བཤད་པ་རེད། ཁོས་དེ་དུས་ནས་མ་བཤད་པར་ད་རེས་གློ་བུར་དུ་བཤད་པ་དེ་ནི་སྒེར་དོན་ཁོག་བཅངས་ཀྱི་འཁྲབ་སྟོན་ཞིག་རེད།