ཡེ་ཤུ་བླ་ཆེན་གསར་འདེམས།

ཁ་སང་གཟའ་ལྷག་པའི་ཕྱི་དྲོར་ཡེ་ཤུའི་ཆོས་པ་ཇོར་ཇི་མ་རོ་བྷིར་གྷོ་ལོ་(Jorge Mario Bergoglio)མཆོག་ཡེ་ཤུ་གནམ་བདག་ཆོས་ལུགས་ཀྱི་ཁྲི་འཛིན་ ༡༧ པར་བདམས་ཐོན་བྱུང་ཡོད་པ་དང་། འདི་ནི་ཡེ་ཤུའི་ཁྲི་རབས་ལོ་རྒྱུས་ནང་གི་ཟིན་ཐོ་གསར་བ་ཞིག་ཆགས་ཡོད་འདུག

ཚེས་ ༡༣ ཉིན་གྱི་ཕྱི་དྲོར་ཨེ་ཊ་ལིའི་(Italy)རྒྱལ་ས་རོམ་( Rome)གྱི་སེ་ཊི་པེ་ཊར་(St. Peter’s Square)ཐང་ཆེན་དུ་མི་མང་ཁྲི་ཕྲག་མང་པོ་འཛོམས་ཏེ་ཡེ་ཤུའི་བླ་ཆེན་གསར་པར་དགའ་བསུ་ཞུས་ཡོད།

ཉེ་ལམ་ཕྱི་ཟླ་ ༢ ཚེས་ ༡༡ ཉིན་ཡེ་ཤུ་བླ་ཆེན་པོབ་( Pope Benedict)མཆོག་གིས་དགོངས་པ་ཞུ་རྒྱུ་ཡིན་པ་གསལ་བསྒྲགས་བསྐྱངས་མ་ཐག འཛམ་གླིང་གི་ཡེ་ཤུ་བ་རྣམས་ཧང་སང་དུ་བཅུག་ཡོད་པ་དང་། གནས་ཚུལ་དེ་བྱུང་མ་ཐག་རྒྱལ་སྤྱིའི་གསར་ལམ་ཁག་ཏུ་གླེང་སློང་དང་ཚོད་དཔག་སྣ་ཚོགས་བྱས་ཡོད། དེ་ནི་ཡེ་ཤུ་བླ་ཆེན་(Pope)གྱི་འདས་པའི་ལོ་ངོ་ ༦༠༠ ལྷག་གི་ལོ་རྒྱུས་ནང་། སྐུ་འདས་གྲོངས་ཕྱིན་པའི་རྗེས་ལ་ཡེ་ཤུ་བླ་ཆེན་གསར་པ་བསྐོ་བཞག་བྱེད་པའི་ལམ་སྲོལ་ཡོད་ཀྱང་། སྐུ་འཚོ་བཞིགས་རིང་དགོངས་པ་ཞུས་ཏེ་ཡེ་ཤུ་བླ་ཆེན་གསར་པ་བསྐོ་བཞག་བྱེད་དགོས་བྱུང་བ་དེ་ནི་ཐེངས་དང་པོ་དེ་ཆགས་ཡོད་འདུག

ད་རེབ་གསར་དུ་བདམས་ཐོན་བྱུང་བའི་དགུང་གྲངས་ ༧༦ ལ་སླེབས་པའི་ཇོར་ཇི་མ་རོ་བྷེ་གྷོ་ལོ་(Jorge Mario Bergoglio)ནི་ཨར་ཇན་ཊེ་ན་ (Argentina) ནས་ཡིན་པ་དང་། ཁོང་ནི་ལོ་ངོ་གཅིག་སྟོང་ལྷག་གི་རྗེས་ཀྱི་ཡུ་རོབ་ནས་མ་ཡིན་པའི་ཡེ་ཤུ་བླ་ཆེན་ཕེབས་པ་ཐོག་མ་དེ་ཆགས་ཡོད་འདུག

ཁོང་ཡེ་ཤུའི་བླ་ཆེན་གསར་བར་བདམས་རྗེས་མི་མང་ལ་བཀའ་སློབ་ཐེངས་པོ་དེ་གནང་ཡོད་ཅིང་། སྐབས་དེའི་ཁོང་གི་རྣམ་འགྱུར་དང་བཀའ་སློབ་ཀྱི་ནང་དོན་བཅས་ལ་གཞིགས་ན། ཁོང་གིས་མི་མང་གི་བདེ་སྡུག་ལ་དོ་འཁུར་ཆེན་པོ་གནང་མཁན་ཞིག་ཡིན་པའི་ཚོད་དཔག་བྱེད་ཀྱིན་ཡོད་འདུག        

 ཇོར་ཇི་མ་རོ་བྷེ་གྷོ་ལོ་ནི་འགྲོ་བ་མིའི་ཐོབ་ཐང་ལ་གཙི་སྲུང་དང་། སྒེར་གཅོད་རིང་ལུགས་ལ་མངོན་ལྐོག་མེད་པར་ངོ་རྒོལ་ཁ་རྡུང་གཏོང་མཁན་ཞིག་ཀྱང་ཡིན་འདུག