བོད་ནང་གཉེན་འཕྲད་དུ་སྐྱོད་མཁན་ཞིག་གིས་བརྗོད་པ་ལྟར་ན། དེང་སྐབས་རྒྱ་གཞུང་གིས་བོད་ནང་གི་ས་གནས་གང་སར་དམ་དྲག་བྱེད་ཀྱི་ཡོད་པ་མ་ཟད། རྒྱ་གར་སོགས་ནས་ཡོང་མཁན་ཚོར་ལྷག་པར་དོགས་ཟོན་བྱས་ཏེ་འགྲོ་ས་སྡོད་ས་མེད་པ་བཟོ་བཞིན་ཡོད་འདུག
སྔར་ལོ་བོད་ནང་གཉེན་འཕྲད་དུ་བསྐྱོད་དེ་ཟླ་འགའི་རྗེས་ཕྱིར་རྒྱ་གར་ངྷ་རམ་ས་ལར་འབྱོར་ཡོད་ཅིང་། མིང་བརྗོད་འདོད་མེད་པའི་ཨ་མདོ་བླ་བྲང་ཕྱོགས་ཀྱི་བུད་མེད་ཅིག་ལ། གསར་འགོད་པས་ཁོང་མོའི་ཕ་ཡུལ་ཕྱོགས་ཀྱི་གནས་སྟངས་སྐོར་གླེང་མོལ་བྱས་སྐབས་ཁོང་མོས་བརྗོད་དོན་ལ་བོད་ནང་འཛུགས་སྐྲུན་གྱི་ཕྱོགས་ནས་སྔོན་མ་དང་བསྡུར་ན། གྲོང་ཁྱེར་གྲོང་གསེབ་གཉིས་ཀར་འགྱུར་བ་ཆེན་པོ་ཕྱིན་ཡོད་པ་དང་། ལྷག་པར་དུ་མདོ་སྨད་གཙོད་གྲོང་ཁྱེར་ལ་མཚོན་ན་དྲ་ཁང་དང་ཆང་ཁང་། ཇ་ཁང་སོགས་ཀྱི་རྒྱས་སྤྲོས་གཏོང་ས་ཧ་ཅང་མང་པོ་བཙུགས་ཡོད་འདུག བོད་རིགས་ན་གཞོན་ཚོར་དངུལ་ཏོག་ཙམ་རེ་རག་མ་ཐག་བག་མེད་ལོངས་སྤྱོད་བྱེད་པ་དར་སྲོལ་ཆེན་པོ་བྱེད་ཀྱི་ཡོད་འདུག
བོད་ནང་གི་འབྲོག་ས་མང་པོ་ཞིག་རྒྱ་གཞུང་གི་བཙན་དབང་འོག་གྲོང་ཁྱེར་དུ་གནས་སྤོར་བྱེད་འཇུག་གི་ཡོད་པ་དང་། ཡང་ས་ཆ་ལ་ལར་རང་འགུལ་ཐོག་སྒོ་ཕྱུགས་བཙོང་པ་དང་ཞིང་ས་བདག་མེད་དུ་གཡུགས་ཏེ་གྲོང་ཁྱེར་དུ་གནས་སྤོར་བྱེད་ཀྱི་ཡོད་ཅིང་། གཞོན་སྐྱེས་ཕལ་ཆེ་བ་དཔལ་འབྱོར་འགྲན་རྩོད་ནང་དུ་ཞུགས་ཏེ་རླངས་འཁོར་དང་ཁང་པ། ཁ་པར། གྱོན་ཆས་སོགས་ཀྱི་འགྲན་བསྡུར་ཤུགས་ཆེན་པོ་ཡིན་འདུག རྒན་པ་ཚོས་སྒོ་ཕྱུཊ་དང་ས་ཞིང་། སྲོལ་རྒྱུན་འཚོ་བ་སྐྱེལ་ཕྱོགས་སོགས་མེད་པ་བཟོས་པར་བློ་འགྱོད་དང་། མི་རབས་རྗེས་མ་ཚོར་དཀའ་ངལ་ཆེན་པོ་འཕྲད་རྒྱུར་སེམས་འཚབ་བྱེད་ཀྱི་ཡོད་འདུག
བོད་ནང་གི་རང་ལུས་མེར་བསྲེཊ་བྱུང་སྐབས་ས་གནས་ཀྱི་གནས་སྟངས་གང་འདྲ་ཡིན་མིན་སྐོར་ལ་གླེང་མོལ་བྱས་སྐབས། ཁོང་མོ་ཕ་ཡུལ་དུ་ལོག་སྐབས་ཧ་ཅང་ལྷིང་འཇགས་ཡིན་ཡང་། རྗེས་སུ་རང་ལུས་མེར་བསྲེཊ་སྔ་རྗེས་སུ་བྱུང་སྟབས། དགོན་གྲོང་གཉིས་ལ་དམ་དྲག་ཆེ་རུ་བཏང་བ་མ་ཟད། ལམ་ཁ་ཡོངས་རྫོགས་བཀག་འགོག་གིས་ཐོབ་ཐང་ལག་འཁྱེར་ལ་ཞིབ་བཤེར་དང་། ཁ་པར་ནང་ཏཱ་ལའེ་རུ་ཚོགས་དང་ཕྱི་རྒྱལ་དུ་ཡོད་པའི་བོད་པ་ཚོས་སྐུལ་སློང་བྱས་ཏེ། བོད་མི་འདི་དང་འདིས་མེར་བསྲེཊ་བཏང་ཡོད་ཚུལ་དང་། མ་འོངས་པར་མེར་བསྲེཊ་སྐུལ་སློང་བྱེད་མཁན་ཡོད་ཚེ་ཁོང་ཚོར་རྩིས་སྤྲོད་བྱ་དགོས་སྐོར། སྐུལ་མ་བྱེད་བཞིན་པ་དང་གྲ་སྒྲིག་ཡོད་མཁན་ཤེས་ན་རྒྱ་སྒོར་ཁྲི་ ༣༠ ལྷག་གི་བྱ་དགའ་ཡོད་པ་མ་ཟད། ཁོའི་མ་འོངས་པའི་བདེ་འཇགས་ལ་འགན་ལེན་ཡོད་སྐོར་སོགས་ཀྱི་འཕྲིན་ཐུང་རིམ་བསྟུད་དུ་གཏོང་གི་ཡོད་འདུག
ཁོང་མོར་ཐེངས་འདིར་ཕ་མ་ནང་མི་ཚོ་དང་མཉམ་དུ་སྡོད་རིང་ཚོར་བ་གང་འདྲ་བྱུང་ཡོད་མེད་དྲིས་པའི་ལན་དུ་ཁོང་མོས། “ ང་འདི་ནས་ལམ་ལ་ཆས་པའི་གནམ་ཐང་དང་པོ་ནས་བཟུང་ང་ཚོའི་སྤ་སེ་མཐོང་མ་ཐག་ལམ་སེང་ཁང་པ་ཞིག་ཏུ་འཁྲིད་དེ་ཅ་དངོས་དང་ལུས་ཡོངས་ལ་སྔོག་བཤེར་བྱས་པ་མ་ཟད། རྒྱ་གར་ལ་ག་དུས་སོང་མིན་དང་ག་རེ་བྱེད་དུ་སོང་མིན། ཕ་ཡུལ་ལ་ལོག་དགོས་པའི་རྒྱུ་མཚན་དང་ས་ཆ་གང་དུ་འགྲོ་མིན་སོགས་འདྲི་རྩད་བྱེད་པ་དང་པར་རྒྱག་པ་སོགས་བྱས་སོང་། ཕ་ཡུལ་དུ་སྡོད་རིང་ལའང་རྒྱ་ནག་གི་ཐོབ་ཐང་ལག་འཁྱེར་མེད་སྟབས། ས་ཆ་ཁུག་ཀྱོག་ཅིག་ཏུ་འཛུལ་སྡོད་པ་ལས་ཡར་མར་འགྲོ་སྐྱོད་བྱེད་པར་དཀའ་ངལ་ཆེན་པོ་འདུག རྒྱ་གར་ནས་ཡོང་མཁན་ཚོ་རྒྱ་ནག་ཁོ་རང་ཚོས་བཤད་བཞིན་པའི་མི་རིགས་ང་དྲུག་གི་ཁོངས་སུ་མི་བརྩི་བར། དགྲ་ཁ་གཏད་རང་ལ་ངོས་འཛིན་བྱེད་ཀྱི་འདུག
རང་ལུས་མེར་བསྲེཊ་ཀྱི་གནས་ཚུལ་རེ་རེ་བྱུང་སྐབས་རྒྱ་གར་དང་ཡོང་མཁན་ལ་དོགས་པ་བྱས་ཏེ། ས་གནས་དཔོན་རིགས་ཚོས་ཉེས་མེད་བོད་མི་གསུམ་རྩིས་སྤྲོད་བྱས་པའི་གནས་ཚུལ་ཡང་གོ་རྒྱུ་འདུག ལག་འཁྱེར་ཁ་པར་སོགས་ལ་རྒྱ་གཞུང་གིས་ལྐོག་ཉན་བྱེད་ཀྱི་ཡོད་ས་རེད། སྒྲུང་ཞིག་བཤད་རྒྱུ་འདུག བཟའ་ཟླ་གཉིས་ཀྱི་ཁྱོ་ག་མཱ་ཅིང་རྩེད་སར་ཕྱིན་ཏེ་ནང་དུ་མ་ལོག་སྟབས། སྐྱེས་དམན་གྱིས་ཁ་པར་བཏང་སྟེ་ཁྱེད་རང་མ་ལོག་ཚེ་ངས་རང་ལུས་མེར་བསྲེཊ་གཏོང་རྒྱུ་ཡིན་ཞེས་ཀུ་རེ་རྩེད་ཡོད་འདུག སྐར་མ་བཅུ་གྲངས་རྗེས་ལ་ཉེན་རྟོག་པ་འབྱོར་ཏེ་ཁོ་རང་གཉིས་ཀ་འཛིན་བཟུང་བྱས་ཡོད་པ་མ་ཟད། རྗེས་སུ་རྒྱ་སྒོར་ཁྲི་ ༡༠ ཡི་ཆད་པ་དང་ལས་གནས་ནས་གནས་དབྱུང་བཏང་འདུག ” ཅེས་བརྗོད་བྱུང་།
ཡང་ཁོང་མོར་ཕྱིར་རྒྱ་གར་ནང་ལོག་དོན་གང་ཡིན་དྲིས་པར། “ སྤྱིར་བཏང་ང་རང་ཡུལ་ནས་འདུག་རྩིས་ཡོད་ཀྱང་། རང་ལུས་མེར་བསྲེགས་བསྟུད་མར་བྱུང་སྟེ་རླངས་འཁོར་ཞིག་བསླེབས་ནའང་ནང་མི་ཚང་མ་ཞེ་སྣང་སྐྱེས་ཀྱི་འདུག་ལ། ང་རང་ཉིད་ལ་མཚོན་ནའང་དོགས་མི་བདེ་བ་ཡོང་གི་འདུག དེ་ནས་བོད་ནང་གི་བོད་མི་ཚོ་དང་བསམ་བློའི་ཕྱོགས་ནས་ཀྱང་མི་མཐུན་པ་ཡོང་གི་འདུག་སྟབས་ཕྱིར་མི་ཡོང་ཐབས་མེད་ཆགས་སོང ” ཞེས་བརྗོད་བྱུང་།
མཇུག་ཏུ་ཁོང་མོར་གཞིས་བཞུགས་བོད་མི་ཚོས་བོད་བྱེས་ལ་གཟིགས་ཚུལ་གང་འདྲ་ཡོད་མེད་དྲིས་པར “ བྱེས་སྡོད་བོད་མི་ཚོར་རེ་བ་ཆེན་པོ་རྒྱག་གི་འདུག ཧ་ལམ་ཟླ་བ་འགའི་རྗེས་སུ་བྱེས་སྡོད་བོད་མི་ཚོས་བོད་ལ་རང་དབང་ཞིག་འཁྱེར་ནས་ཡོང་གི་ཡོད་པ་ལྟ་བུའི་བསམ་ཚུལ་བཟུང་འདུག མེར་བསྲེཊ་གནང་མཁན་ཚོར་བསྔོ་སྨོན་ཆོད་འབུལ་བྱེད་སྐབས། ༧གོང་ས་མཆོག་དང་སྲིད་སྐྱོང་། ཟམ་གདོང་རིན་པོ་ཆེ་གསུམ་གྱི་སྐུ་པར་བཤམས་ཡོད་ཡོད་པ་འདྲ་བོ་རེད། དེང་སྐབས་ཕྱི་ཕྱོགས་ཀྱི་གནས་ཚུལ་གོ་རྒྱུར་དཀའ་ངལ་ཆེན་པོ་མེད་སྟབས། མ་འོངས་པར་བྱེས་བཞུགས་བོད་མི་ཚོས་ཁོང་ཚོའི་འཚོ་བ་སྐྱེལ་སྟངས་དང་བསམ་བློ་གཏོང་ཕྱོགས་ཐོག་ལམ་སྟོན་གནང་རྒྱུ་གལ་ཆེན་པོ་ཆགས་འདུག་བསམ་པ་བྱུང་སོང་། ” ཞེས་བརྗོད་བྱུང་།
གསར་འགོད་པ།དོན་གོ
ང་ཚོ་མི་རིགས་ ༥༦ གི་གྲལ་ནས་ཕུད་ཟིན་ན་ཡག་པོ་རེད། ང་ཚོས་ནམ་རྒྱུན་བོད་ཟེར་བ་དེ་མི་རིགས་༥༦ ལས་གྲུབ་པའི་རྒྱ་ནག་གི་ཆ་མིན་ཟེར་གྱིན་ཡོད་པ་མ་རེད་དམ།
ད་ཁྱེད་རང་བཙན་གཤོལ་བ་འགའ་རེ་ལ་འགྱོད་པ་གསར་བ་ཞིག་སྐྱེ་ཀྱིན་ཡོད་པ་འདྲ།
འདི་བོད་ནང་གི་དངོས་ཡོད་གནས་སྟངས་ཞིག་ཡིན་བདེན་པ་རེད་འདུག། སྐབས་རེ་ངས་བོད་ནང་རང་གི་ཕ་མ་སྤུན་མཆེད་དང་ཁ་བརྡ་བྱེད་དུས་འདི་འདྲ་རང་བཤད་ཀྱི་འདུག།
བོད་ནང་གི
ཞིང་པས་ཞིང་ཚོང་འབྲུ་རིགས་ཆད་རྟགས་རེད། །
འབྲོག་པས་ཕྱུགས་ཚོང་ཕྱུགས་རིགས་ཆད་རྟགས་རེད། །
དགོན་པ་སྟོང་པ་གྲྭ་རྒྱུན་ཆད་རྟགས་རེད། །
སློབ་གྲྭ་ཕན་མེད་ཤེས་རིག་ཆད་རྟགས་རེད། །
བོད་མི་ཚོས།
ཞིང་པས་ཞིང་ས་མི་རབས་རྗེས་མར་སྤྲོད། །
འབྲོག་པས་ཕྱུགས་རིགས་སྔར་ལྷག་མང་དུ་སྤེལ། །
དགོན་པར་སྡོམ་གཙང་གྲྭ་རྒྱུན་ཉུང་ཡང་འགྲིགས། །
སློབ་གྲྭར་དགེ་རྒན་ཚད་ལྡན་འཚོ་སྐྱོང་གྱིས། །