སྲིད་འཛིན་གསར་པའི་ཕྱག་འཇུ་དང་པོ།

ཟླ་འདིའི་ཕྱི་ཚེས་ ༢༢ ཉིན་རྒྱ་ནག་གི་སྲིད་འཛིན་གསར་པ་ཞི་ཅིན་ཕེན་ཨུ་རུ་སུའི་རྒྱལ་ས་མའོ་སུ་ཁའོ་རུ་འབྱོར་ཏེ། ར་ཤི་ཡའི་སྲིད་འཛིན་པུ་ཊེན་དང་མཇལ་འཕྲད་ཐོག་མ་བྱས་ཡོད།

ཉེ་ལམ་རྒྱ་ནག་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྟེང་ཞི་ཅིན་ཕེན་རྒྱ་ནག་གི་སྲིད་འཛིན་དུ་བསྐོ་བཞག་བྱས་རྗེས། ཟླ་འདིའི་ཕྱི་ཚེས་ ༢༢ ཉིན་ཨུ་རུ་སུར་གཞུང་འབྲེལ་གཟིགས་སྐོར་ཐོག་མ་དེ་གནང་ཡོད་པ་དང་། སྐབས་དེར་ཪ་ཤི་ཡའི་སྲིད་འཛིན་པུ་ཊེན་གྱིས། སྲིད་འཛིན་ཞི་ཅིན་ཕེན་གྱིས་ཐོག་མར་འཚམས་འདྲི་བྱེད་ས་ཨུ་རུ་སི་བདམས་པ་ལས་ཕྱོགས་གཉིས་ཀྱིས་ཨུ་རུ་སུ་དང་ཀྲུང་གོའི་འབྲེལ་བ་འཕེལ་རྒྱས་སུ་གཏོང་བར་ཧ་ཅང་མཐོང་ཆེན་བྱེད་བཞིན་ཡོད་པ་མ་ཟད། འབྲེལ་བ་དེའི་དམིགས་བསལ་རང་བཞིན་དང་འཐབ་ཇུས་རང་བཞིན་མཚོན་ཡོད། འདི་ནི་ལོ་རྒྱུས་ཀྱི་དོན་སྙིང་ལྡན་པའི་འཚམས་འདྲི་ཞིག་ཡིན་སྟབས། གྲུབ་འབྲས་གཡུར་དུ་ཟ་བ་ཐོབ་ངེས་ལ། ཨུ་རུ་སུ་དང་ཀྲུང་གོའི་ཕྱོགས་ཡོངས་ཀྱི་འཐབ་ཇུས་མཉམ་ལས་གྲོགས་པོའི་འབྲེལ་བ་འཕེལ་རྒྱས་སུ་གཏོང་ཐུབ་པར་ཡིད་ཆེས་ཡོད་ཟེར།

སྲིད་འཛིན་ཞེ་ཅིན་ཕེན་དང་པུ་ཊེན་གཉིས་ཐུག་འཕྲད་གནང་པ་དང་སྦྲགས་ཕྱོགས་གཉིས་ཀྱི་ཚོང་འབྲེལ་དང་གྲོགས་པོའི་འབྲེལ་ལམ་ཇེ་བཟང་དུ་གཏོང་སྐོར་ལ་གྲོས་བསྡུར་མིང་རྟགས་བཅས་བཀོད་ཡོད། ཆབ་སྲིད་དཔྱད་བརྗོད་པ་ཚོས་བརྗོད་ན་ཞེ་ཅིན་ཕེན་གྱིས་ཨུ་རུ་སུ་ཕྱིར་སྐྱོད་བྱེད་སའི་རྒྱལ་ཁབ་ཆེས་ཐོག་མ་དེ་བདམས་དགོས་དོན་ནི་རྒྱ་ནག་གི་ངོས་ནས་ཆེད་དུ་ཨུ་རུ་སུ་རྒྱ་ནག་གིས་རྒྱལ་ཁབ་གལ་ཆེན་ཞིག་ཏུ་རྩི་བཞིན་པའི་རྣམ་འགྱུར་སྟོན་པ་ཞིག་ཡིན་པ་དང་། མ་འོངས་བར་རྒྱལ་ཁབ་གཉིས་ཀྱི་ཚོང་ལམ་ཐད་འབྲེལ་བ་ཟབ་ཏུ་གཏོང་འཆར་ཡིན་པ་བརྗོད་འདུག

ད་རེབ་སྲིད་འཛིན་ཞེ་ཅིན་ཕེན་ཨུ་རུ་སུ་ (Russia) གཙོ་བྱས་པའི་ལྷོ་ཨ་ཧྥེ་རི་ཁ་(South Africa)དང་། ཏན་ཛན་ནེ་ཡ་(Tanzania)ཁོན་གོ་སྤྱི་མཐུན་རྒྱལ་ཁབ་(the Republic of Congo)བཅས་རྒྱལ་ཁབ་ ༤ ནང་ཟླ་འདིའི་ཚེས་ ༣༠ ཉིན་བར་གཟིགས་སྐོར་ཏུ་ཕེབས་འཆར་ཡོད་པ་དང་། ཐེངས་འདིའི་གཟིགས་སྐོར་འདི་ནི་ཞེ་ཅིན་ཕེན་རྒྱ་ནག་གི་སྲིད་འཛིན་ལ་བསྡད་རྗེས་ཀྱི་གཟིགས་སྐོར་ཐོག་མ་དེ་ཆགས་ཡོད།

ཨུ་རུ་སུ་ནི་འཛམ་གླིང་གི་ནུས་ཤུགས་(energy)མཁོ་འདོན་བྱེད་མཁན་ཆེས་ཆེ་ཤོས་དེ་ཡིན་པ་དང་། དེ་བཞིན་རྒྱ་ནག་ནི་ནུས་ཤུགས་བེད་སྤྱོད་བྱེད་མཁན་མང་ཤོས་དེ་ཡིན་པ་རེད་འདུག རྒྱལ་ཁབ་འདི་གཉིས་རྒྱལ་སྤྱིའི་སྤྱི་ཚོགས་ཁྲོད་ཆབ་སྲིད་ཀྱི་ལངས་ཕྱོགས་ལ་ལྟ་བ་གཅིག་པ་འཛིན་མཁན་ཞིག་ཡིན་པ་དང་། མཉམ་སྦྲེལ་རྒྱལ་ཚོགས་ནང་དུ་ཨུ་རུ་སུའི་སྣེ་ཁྲིད་འོག་རྒྱ་ནག་གིས་སེ་རི་ཡའི་(Syria)ནང་འཁྲུག་ལ་ཕྱི་ཕྱོགས་ནས་ཇུས་གཏོགས་བྱེད་པར་ངོ་རྒོལ་བྱས་ཡོད་འདུག       

རྒྱ་ནག་དང་ཨུ་རུ་སུ་གཉིས་ནི་འདས་པའི་ལོ་རྒྱུས་ནང་དམར་ཤོག་ལྟ་བ་ཤུགས་ཆེན་འཛིན་མཁན་རྒྱལ་ཁབ་སྟོབས་ལྡན་གཉིས་ཡིན་པ་དང་། འཛམ་གླིང་ཆེན་གཉིས་པ་མཚམས་བཞག་རྗེས་གྲང་དམག་མགོ་བཙུགས་པ་དང་། ༡༩༩༡ ལོའི་བར་ཨུ་རུ་སུ་(USSR)དམར་པོའི་སྲིད་གཞུང་མགོ་རྟིང་མ་སློག་བར་རྒྱལ་ཁབ་འདི་གཉིས་དམར་ཤོག་པའི་རྒྱལ་ཁབ་ཆེས་ཆེ་ཤོས་ཏེ་ཡིན་པ་དང་། ཨ་མེ་རི་ཁ་གཙོ་བྱས་པའི་དམངས་གཙོའི་རྒྱལ་ཁབ་ཁག་གི་ཁ་གཏད་གཅོག་ཡུལ་གཙོ་གྲས་དེ་ཆགས་ཡོད།