བཀའ་ཤག་གི་རང་སྲེག་སྲིད་བྱུས་ལ་བསྐྱར་བལྟ་བྱས་པ།

ཤར་ཕྱོགས་ཁུག་རྟ། 

བཟང་ངན་གང་དུ་གཏོགས་མིན་མ་ཤེས་ཀྱང་། བཀའ་ཤག་གསར་པའི་དུས་སྐབས་ནི་རང་སྲེག་གི་དུས་སྐབས་ཤིག་ཡིན་ཞེས་བཤད་མཁན་མང་པོ་བྱུང་ཡོད། རང་སྲེག་གི་དུས་སྐབས་འདིར་ཕྱིར་བལྟས་ཤིག་བྱས་པ་ཡིན་ན། ད་གཟོད་ང་ཚོའི་གཞུང་འཛིན་བཀའ་ཤག་དང་། གྲོས་ཚོགས། མི་མང་། ཐ་ན་མི་སྒེར་རེ་རེ་ནས་རང་སྲེག་ལ་ངོས་འཛིན་གང་འདྲ་ཞིག་བྱས་ཡོད་མེད་དང་། དེའི་མཐའ་སྣེར་ཚོད་དཔག་སྡོམ་ཚིག་གང་འདྲ་ཞིག་བཀོད་པ་མཐའ་དག་ཤོག་བུ་དཀར་པོར་ནམ་མཁའི་སྐར་ཚོགས་བཞིན་ཕྲ་ལམ་མེར་གསལ་འདུག  

ད་ལྟ་ཡི་གེ་འབྲི་མཁན་གྱི་གང་ཟག་ཁོ་བོར་མཚོན་ན། རང་སྲེག་དང་འབྲེལ་བའི་གླེང་སློང་ཐད་བཙན་བྱོལ་ནང་གི་སྨྱུག་འཛིན་པའི་སྡེ་ནས་ཆེས་མང་ཤོས་ལྟ་བུར་ཆགས་ཡོད་ལ། རང་སྲེག་དང་འབྲེལ་བའི་ཚོགས་ཆེན་བསྡུ་སྐོང་བྱས་པ་སོགས། མདོར་ན་ཁོ་བོའི་རང་སྲེག་ངོས་འཛིན་དང་མདུན་ལམ་ལྟ་ཕྱོགས་ཐད་དགག་རྒྱག་བྱ་མཁན་མང་པོ་བྱུང་ཁར། ”ང་ཚོར་མཚམས་འཇོག་ལབ་རྒྱུའི་ཐོབ་ཐང་མེད་”ཅེས་པའི་ཚིག་འདི་འཕྱར་ནས་བསྲེགས་ཚད་ལ་བསྲེགས་སུ་བཅུགས་པ་མ་ཟད། “དཔའ་བོ་དེ་ཚོས་ཀྱང་ཚེ་སྲོག་རྩ་ཆེན་ཡིན་པ་ལོས་ཤེས། ཤི་རྒྱུ་བདམས་ཟིན་རྗེས་དེ་གྲུབ་འབྲས་ཡོད་པའང་གདེང་ཚོད་ཡོད་པ་རེད་”ཟེར་བ་སོགས། གང་ལྟར་མེ་མུ་མཐུད་དུ་འབར་འཇུག་པའི་བསམ་ཕྱོགས་འདི་ག་རེ་ཡིན་ན་བསམ་པའི་དངན་པ་དང་དབུགས་རིང་ཡང་ཡང་བཏང་མྱོང་མཁན་ཞིག་ཡིན།  

དམིགས་བསལ་རང་རེའི་གཞུང་འཛིན་ཕོ་བྲང་སྔོན་པོ་ནས་རང་སྲེག་ཐད་སྲིད་བྱུས་ཁ་གསལ་གནང་དགོས་ཀྱི་འདུག བོད་ནང་དུ་རང་སྲེག་ལ་རྒྱལ་སྤྱིའི་རྒྱབ་སྐྱོར་དང་ངོས་འཛིན་གང་འདྲ་ཞིག་བྱུང་ཡོད་མེད་ཉུང་མཐར་གསལ་བཤད་མ་གནང་དུས་ལོ་རྒྱུས་ཀྱིས་གང་ནས་གུ་ཡངས་ལ་གཏོང་གི་རེད། གཏན་ནས་གཏོང་གི་མ་རེད་ཅེས་རང་སྲེག་གཏོང་མཁན་གྱི་ཨ་ཕ་ཞིག་ལ་སེམས་གསོའི་ཁ་བརྡ་བྱས་རྗེས་ཀྱི་ཚོར་བ་དམར་བརྗོད་བྱས་ཡོད། ”མ་ཤི་བར་གྱི་ཟས་བཅད་ངོ་རྒོལ་” སོགས་ལ་༧གོང་ས་མཆོག་གིས་དེ་སྔ་བསྩལ་བའི་བཀའ་ཡིག་དགོངས་དོན་”བསྐྱར་ནན་”བྱས་ཡོད་ཅེས་བཀའ་ཤག་གིས་གསུངས་ཡོད་ལ། ”ཉེན་འཚབ་ཆེ་བའི་ལས་འགུལ་རིགས་མ་སྤེལ་”ཞེས་ཀྱང་གསུངས་ཡོད། ཕྱིས་སུ་”ཉེན་འཚབ་ཆེ་བའི་རང་སྲེག་ལས་འགུལ་སོགས་མ་སྤེལ་ཞུས་ཀྱང་མུ་མཐུད་དུ་རང་སྲེག་བཏང་བས་”ཞེས་གསུངས་མགོ་བརྩམས་ཡོད། ཕྱི་མ་འདི་ཐ་ན་”བོད་ཀྱི་བརྙན་འཕྲིན་གསར་འགྱུར་”ནང་མདོ་འཛིན་པས་མ་ཎི་སྐྱོར་སྐྱོར་ཡང་ཡང་ནས་ཡང་དུ་ཟློས་ཡོད།  

ཁོ་བོས་༼ བཀའ་ཤག་གིས་བཀའ་དེ་དྲངས་པ་མ་གཏོགས་བརྩི་ཡི་མི་འདུག་༽སོགས་རྩོམ་ཡིག་སྣ་ཚོགས་བྲིས་ཏེ། སྲིད་དོན་པས་ཚོད་བགམ་རང་བཞིན་གྱིས་མིའི་ཚེ་སྲོག་རྩེད་ཆས་བྱེད་མི་རུང་། གདེང་འཁེལ་བའི་མདུན་ལམ་འཁྲིད་སྟོན་གྱི་མཁས་མཛངས་མེད་ན་སོ་སོའི་མི་མང་གི་ཚེ་སྲོག་ལ་བདག་པོ་རྒྱག་དགོས། གནས་སྟངས་ཛ་དྲག་སྐབས་དབུ་འཁྲིད་ཚོས་མི་མང་ལ་སྐད་ཆ་དྲང་མོར་བཤད་དགོས་སོགས་ཡང་ནས་བསྐྱར་དུ་བཤད་ཀྱང་། དྲ་འབུ་ཚོའི་གླེང་ཕྱོགས་དེ་ལ་བསྟུན་པ་ཡིན་ནམ། གང་ལྟར་དོ་སྣང་ཅན་གྱི་བཀའ་ཤག་གིས་རྣམ་འགྱུར་གསར་པ་གང་ཡང་བསྟན་མ་སོང་། སྐབས་དེ་ཤེད་དུ་བཀའ་ཤག་རྙིང་པས་ས་བྱི་ཞི་རྒོལ་ཆེན་པོའི་ཐད་འཛིན་པའི་སྲིད་བྱུས་དང་བསྒྲགས་གཏམ་སོགས་ལ་ཡང་ནས་བསྐྱར་དུ་ཞིབ་ཅིང་གཟབ་མནན་གྱིས་བལྟས་ཏེ། ན་གཞོན་ཤེས་ཡོན་པའི་ཚོགས་ཆེན་ཐེངས་དང་པོའི་གོ་སྒྲིག་གཏམ་བཤད་ནང་”དབུས་བོད་མིའི་སྒྲིག་འཛུགས་ནས་རང་སྲེག་གི་མདུན་ལམ་དང་འཕེལ་རིམ། རྒྱབ་ལྗོངས་བཅས་ལ་གཞིགས་ཏེ་ལངས་ཕྱོགས་གསལ་བོ་ཞིག་བོད་དང་རྒྱ་ནག་ནང་དུ་གསལ་གཏོང་བྱ་དགོས་བསམས། དེ་ནི་ས་བྱི་ཞི་རྒོལ་ཆེན་པོའི་སྐབས་ཀྱི་དབུ་ཁྲིད་ཀྱི་གནང་ཕྱོགས་ལ་བལྟས་ཏེ་ཞུས་པ་ཡིན་”ཅེས་ཞུས་ཡོད།  

༢༠༡༢ ལོའི་དམིགས་བསལ་ཚོགས་སྐབས་སྲིད་སྐྱོང་གིས་རང་སྲེག་ཐད་” མི་ཡིན་པ་དང་། ནང་པ་ཡིན་པ། བོད་མི་ཡིན་པ”་ཞེས་པའི་སྲིད་བྱུས་ཤིག་བསྒྲགས་ཤིང་། དེ་ལ་རྒྱལ་སྤྱིའི་གཞུང་སྒེར་མང་པོས་ཀྱང་རྒྱབ་སྐྱོར་བྱས་སོང་ཞེས་སྤོབས་པ་ཆེན་པོས་གསུངས་སོང་། གཟིགས་ཕྱོགས་འདིས་༧གོང་ས་མཆོག་གི་”འགན་འཁུར་ཆེན་པོ་གསུམ་”ལ་མཚན་ཤོས་ཆགས་ངེས་པ་ཞིག་འདུག གང་ཡིན་ཞེ་ན། དྲང་བདེན་དང་ལྷག་བསམ་རྣམ་དག མཁས་མཛངས་ཆེན་པོ་བཅས་ཀྱིས་འཇིག་རྟེན་འདིར་སྲི་ཞུ་སྒྲུབ་པའི་འགན་འཁུར་ཆེན་པོ་གསུམ་ལ་དཔེར་བླངས་ཏེ། གདེང་ཚོད་དང་སྤོབས་པ་མེད་པའི་ཆབ་སྲིད་ཀྱི་བློ་མིག་དོགས་པོས་སྲིད་བྱུས་འདི་ལྟར་བཏོན་པ་ཡིན་ན། རྒྱལ་སྤྱིའི་ནང་དུའང་མིག་དཔེ་ངན་པ་ཆགས་སྲིད་ཁར། གལ་སྲིད་གདེང་ཚོད་ཁྱོན་ནས་མེད་པ་གཏན་འཁེལ་ན་༧གོང་ས་མཆོག་གི་”འགན་འཁུར་ཆེན་པོ་གསུམ་”ལ་སྲིད་སྐྱོང་གི་སྲིད་བྱུས་འདི་སྦྱར་ནས་ནག་འགེལ་བྱེད་རྒྱུ་ནི་ཡོང་ངེས་པ་རེད་ཅེས་ཁོ་བོས་དེ་དུས་ནས་བཤད་ཡོད། སྐབས་དེའི་ཁོ་བོའི་རྩོམ་ཡིག་ནང་”སྲིད་བྱུས་གསར་པ་འདི་༧གོང་ས་མཆོག་གིས་གསན་ན་ག་རེ་དགོངས་ཀྱི་ཡོད་དམ་”ཞེས་བློ་འཚབ་ཧ་ལས་པ་བྱུང་།  

ཉིན་འགའི་སྔོན་ལས་བྲེལ་གྱིས་གྲོས་ཚོགས་ལ་ཟུར་ཉན་བྱེད་ཁོམ་མ་བྱུང་ཡང་། དེ་རིང་གཟའ་ཉི་མར་གྲོས་ཚོགས་བསྐྱར་སྟོན་ལ་ལྟ་སྐབས། ”བཀའ་ཤག་གི་གསལ་བཤད་”ཆ་ཚང་མཇལ་སྐལ་བྱུང་། གཏམ་གྱི་སྙིང་དོན་རང་ལུས་མེར་སྲེག་དང་དབུ་མའི་ལམ། ཞིས་ཅིན་ཕིན་གཙོས་མགོ་ཁྲིད་གསར་པ་ཚོ་དང་། བོད་སློབ་འཛིན་ཚོགས་བཅས་ཀྱི་སྐོར་རེད། སྲིད་སྐྱོང་གི་བཀའ་མོལ་འདིར་བཙན་བྱོལ་བོད་མི་དོ་སྣང་ཅན་དང་ཤེས་ལྡན་པ་ཚང་མར་དམིགས་བསལ་དོ་སྣང་བྱུང་ཡོད་པ་ངས་ཐག་བཅད་ནས་ཞུ་ཐུབ་ཀྱི་འདུག གང་ཡིན་ཞེ་ན། རང་སྲེག་དང་འབྲེལ་བའི་བོད་མི་རིགས་ཀྱི་མདུན་ལམ་ལ་དྲང་པོར་ཞུས་ན་ང་ལྟར་གཉིད་ ཁུག་གི་མེད་པའི་རང་དོན་དོར་ནས་བསམ་བློ་གཏོང་མཁན་གྱི་གླེན་པར་བརྩི་བ་གྲངས་ཀྱིས་མི་ཟིན་པ་ཞིག་ཡོད་པར་ང་རང་ཡིད་ཆེས་གཙང་མ་ཡོད།  སྲིད་སྐྱོང་གིས་དོན་དངོས་གདེང་ཚོད་ཁྱོན་ནས་མེད་པའི་ཐོག རང་སྲེག་ཐད་འཛིན་པའི་སྲིད་བྱུས་ལ་རྟེན་གཞི་ཚད་ལྡན་མེད་པ་དང་། མདུན་ལམ་ལ་ཚོད་དཔག་མ་ཐུབ་པའི་ནོངས་འགྱོད་ཡོད་པ་ཁོང་གི་རྣམ་འགྱུར་ནས་ཚོར་ཀྱང་། ཕྱག་གིས་དཔྲལ་བའི་རྔུལ་ནག་ཐེངས་དུ་མར་འཕྱི་བཞིན། ༢༠༡༢། ཟླ ༡༢། ནས་བཀའ་ཤག་གི་རང་སྲེག་སྲིད་བྱུས་འགྱུར་ཟིན་པ་དང་། འགྱུར་བའི་རྒྱུ་མཚན་བཅས་གསུངས་སོང་།  

ཕྱོགས་ལྷུང་དད་པ་ཅན་རྣམས་ལ་སྲིད་སྐྱོང་གི་རྒྱུ་མཚན་འདིའང་རྒྱུ་མཚན་དུ་འགྲོ་སྲིད་མོད། རྒྱ་ནག་ནང་གི་ཨ་རིའི་གཞུང་ཚབ་པ་བོད་ཁུལ་དུ་བསྐྱོད་རྗེས་ཀྱི་བསྒྲགས་གཏམ་སོགས་ཀྱི་ཚིག་” འཇིགས་སྣང་ཅན་གྱི་གྲངས་ཀ་དང་། འཇིགས་སྣང་དང་ཉེན་འཚབ་ཅན་གྱི་ལས་འགུལ་”ཟེར་བ་དག་ལ་གཞི་བྱས་ཏེ། རང་སྲེག་ལ་རྒྱ་ནག་གིས་ཡ་ལན་བྱེད་ཀྱི་ཡོད་མེད་ཅི་ལྟར་ཡང་། རྒྱལ་སྤྱིའི་ནང་གནས་བབ་ལ་འགྱུར་གཞི་ཡོང་དོགས་ཀྱིས”ད་ནི་ང་ཚོ་ཚང་མས་བསམ་བློ་ཞིག་གཏོང་དགོས་ཀྱི་འདུག”་ཅེས་པ་དངོས་བདེན་ཡིན་དུ་ཆུགས་ཀྱང་། རྒྱལ་སྤྱིའི་ནང་གི་གཟུགས་བརྙན་གནད་འགག་ཡིན་པའི་བོད་དོན་ལ་མཚོན་ན་གནད་དོན་འདི་གཟབ་དགོས་ས་ཞིག་ཡིན་ཡང་། རྒྱལ་སྤྱི་དང་རྒྱ་ནག་གཉིས་ཀའི་ནང་རང་སྲེག་གི་མདུན་ལམ་གང་དུ་འགྲོ་མིན་གྱི་ གྲ་སྒྲིག་དང་བསམ་ཚུལ་གཟབ་ནན་ཞིག་མེད་པ་ནི་རང་བཞིན་གྱིས་གསལ་བཤད་བྱས་ཡོད་པས། འདི་ནི་སྤྱི་འཐུས་མཁན་པོ་ནོར་བུ་ཚེ་རིང་གིས་གསུངས་པ་ལྟར་རྔ་ལ་དཔགས་པའི་འཆམ་མིན་པར་དབུ་འཁྲིད་ཅིག་ཡིན་ན་ལེ་བར་ཁ་ཤས་ཀྱིས་མདུན་དུ་བསྐྱོད་ནས་སྣེ་འཁྲིད་དགོས་པ་རེད་ཅེས་པའི་རྩ་དོན་འདིའི་ཡོང་ཁུངས་ཀྱང་རེད་འདུག་པས། རང་སྲེག་བྱུང་མ་ཐག་ནས་རྒྱལ་སྤྱིར་རྒྱ་བསྒྲགས་སྟོང་བསྒྲགས་བྱ་བཞིན་པའི་རྣམ་འགྱུར་དམིགས་བསལ་བསྟན་མྱོང་བའི་སྲིད་སྐྱོང་མཆོག་དང་། བཀའ་ཤག་ནས་འགན་ཡོངས་རྫོགས་འཁུར་དགོས་པ་སུས་ཀྱང་ནག་བསུབ་གཏོང་བའམ་ཁ་རྩ་བ་ནས་བསྒྱུར་མི་ཐུབ་པ་ཁོ་བོས་སྡོམ་ཚིག་རྡོ་རྗེ་ཚིགས་སུ་བཀོད་འདོད་བྱུང་།  

༧གོང་ས་མཆོག་གིས་”རང་སྲེག་ཐད་ངོས་རང་ཤི་བ་ནང་བཞིན་འདུག་གི་ཡིན།” ཞེས་དང་། ཡང་”ད་ངས་སྲིད་འགན་རྩིས་སྤྲོད་ཟིན་པ་དང་འགན་འཁུར་མཁན་ཡོད་དུས་ངས་ཅིག་བཤད་ཀྱི་བསྡད་ན་དེ་ཕྱི་ནང་མི་མཚུངས་པའི་རྟགས་རེད། ཁྱེད་ཚོར་དྲི་བ་ཡོད་ན་བཀའ་ཤག་ལ་ཕེབས་”ཞེས་གཟིམ་མཇལ་སྐབས་ཐེངས་མང་གསུངས་འདུག སློབ་དཔོན་ཟམ་གདོང་རིན་པོ་ཆེས་ན་གཞོན་ཤེས་ཡོན་པའི་ཚོགས་ཆེན་ཐེངས་དང་པོར་བསྩལ་བའི་གསུང་འཕྲིན་ནང་”ཁོང་ཚོའི་བློས་གཏོང་ཆུད་ཟོས་སུ་མི་འགྲོ་བར་ཐབས་ལམ་ཇི་ཡོད་དང་། ་་་་་ཁོང་ཚོའི་རེ་འདུན་སྒྲུབ་ཐབས་ཇི་ཡོད་སྐོར་ཟབ་ཡངས་དཀྱེལ་ཆེའི་རྣམ་དཔྱོད་ཀྱི་ལམ་ནས་ཞིབ་འཇུག་བགྲོ་གླེང་གཏིང་ཟབ་ངོས། བྱེས་འབྱོར་བོད་རིགས་ཡོངས་ལ་ལམ་སྟོན་ཐུབ་པ་ཞིག་བྱུང་ན”་ཞེས་ཕེབས་པ་དང་། གསོག་སྒར་སློབ་གྲྭར་ཁོ་བོས་གདན་ཞུ་བྱ་སྐབས་ཀྱང་” ཁོང་ཚོའི་རེ་འདུན་ཆུད་ཟོས་སུ་མི་འགྲོ་བའི་སྤོབས་པ་དང་གདེང་ཚོད་གཉིས་ཀ་ང་ཚོར་ཡོད་དགོས། མེད་པ་རྣམས་ཀྱིས་ཡོད་པ་བྱེད་དགོས་”ཞེས་ཕེབས་སོང་།  བཀའ་སློབ་འདི་དག་ལ་གོ་བ་ཟབ་མོ་ལོན་ཕྱིར་སྐབས་དེ་དུས་ནས་བློས་གྲོགས་རེ་འགའི་མཉམ་བགྲོ་གླེང་ཐེངས་མང་བྱས་པས། གོ་བ་དེ་དག་གི་མཐིལ་དེ་རིང་སྲིད་སྐྱོང་གི་གདེང་ཚོད་མེད་པའི་རྣམ་པ་འདིས་དེ་བས་ཀྱང་གསལ་བོ་འདྲ་ཞིག་བཟོས་སོང་།  

སྤྱི་འཐུས་ཀརྨ་ཆོས་འཕེལ་གྱི་གྲོས་ཚོགས་ནང་གི་གཏམ་བཤད་ལ་གཞིགས་ན། རང་སྲེག་ཐད་ཀྱི་སྲིད་བྱུས་དང་པོར་བཀའ་སྤྱི་ལྷན་འཛོམས་གནང་ནས་གཅིག་གྱུར་གྱི་ཚིག་བརྗོད་ཅིག་གཏན་འབེབས་གནང་འདུག་ལ། སྐབས་དེར་མ་གཏོགས་”མཚམས་འཇོག་ཞུ་རྒྱུར་འབོད་སྐུལ་ཞུ་བའི་ཐོབ་ཐང་མེད་”ཅེས་པ་དེའང་གྲོས་བསྡུར་བྱས་ནས་ཐག་བཅད་པ་ཞིག་ཡིན་པ་གང་ནས་ཤེས། གྲོས་བསྡུར་ལོས་བྱེད། ཐག་གིས་ཀྱང་ལོས་གཅོད། ཡིན་ནའང་།  སྲིད་བྱུས་འཛིན་ཕྱོགས་དེ་ལམ་སེང་གྲོས་བསྡུར་གྱིས་ཐག་ག་ནས་ཆོད། མི་ཆོད་པའི་རྒྱུ་མཚན་ཡང་དེར་རྒྱ་ནག་གིས་ཡ་ལན་ཅི་ལྟར་གནང་རྒྱུར་ཚོད་དཔག་དང་དཔྱད་ཞིབ་གནང་ཐུབ་མཁན་ག་ཚོད་བྱུང་ཡོད་དམ། ངས་བལྟས་ན་བོད་ཀྱི་སྲིད་སྐྱོང་གིས་བཀའ་ཤག་གི་གསལ་བཤད་སྐབས་ཞིས་ཅིན་ཕིན་གྱི་ སྐོར་དཔྱད་པ་གནང་བ་དེ་ནི་གླེན་པ་ང་ལྟ་བུས་ཀྱང་མཐོང་ཟིན་པ་ཞིག་ཡིན་སྟབས། སྐབས་དེའི་ལྷན་འཛོམས་ནང་རང་སྲེག་གི་ཁ་གཏད་ནས་རྒྱ་ནག་གི་གདུག་རྩུབ་ཅི་འགྱུར་ལ་དཔྱད་ཞིབ་ཐོལ་བ་ཞིག་གནང་རྒྱུའི་གནས་བབས་དང་དུས་ཚོད། གྲ་སྒྲིག་གསུམ་ཀ་མེད་པ་གསལ་བོ་རེད། གཅིག་བྱས་ན་སྤྱི་འཐུས་རྒྱ་ནག་ཉམས་ཞིབ་པ་དེ་ཚོར་མཁྱེན་པ་རྒྱས་དྲག་ཙང་ལུང་བསྟན་འདྲ་རྒྱབ་ཡོད་སྲིད་པ་རེད།  

འོན་ཀྱང་ཁོ་བོས་བལྟས་ན། རྒྱལ་སྤྱིའི་སྒང་དུ་བློ་འཚབ་ཞེ་དྲག་ཡོད་མཚམས། རྒྱ་ནག་གཞུང་གིས་ཀྱང་གཞི་ནས་ཁ་གཏད་ལས་འཆར་འདིང་སྐབས། རང་རེའི་བོད་མི་རྣམས་ལའང་སྙིང་རླུང་སྟོད་ལ་འཚིང་ནས་གཉིད་ཀྱང་མ་ཁུགས་པའི་གནས་སྐབས་དེ་ཤེད་དུ། “རང་སྲེག་མཚམས་འཇོག་ལ་འབོད་སྐུལ་ཞུ་རྒྱུའི་ཐོབ་ཐང་ཡོད་པར“གྲོས་ཐག་བཅད་དེ། ཚོད་བགམ་དང་རེ་བ་ཁོ་ནས་ཚེ་སྲོག་རྩེད་སྤྱད་མ་བྱས་པར། རང་ལུས་མེར་སྲེག་མ་གཏོང་རོགས། སྒེར་གཅོད་སྲིད་གཞུང་ལ་ཚེ་སྲོག་གིས་ཞུ་འབོད་ཞུས་ཀྱང་གནས་སྐབས་འགྱུར་བ་ཡོང་གཞི་མི་མཐོང་སྟབས། རང་སྲེག་མཚམས་བཞག་སྟེ་རང་སྐྱོང་༼ བསམ་འཆར་༽གྱི་དགོངས་དོན་བཞིན། རྩ་ཁྲིམས་དང་བཅའ་ཁྲིམས་ཀྱི་འབྲུ་དོན་བཞིན་བོད་མིའི་ཐོབ་ཐང་འཚེ་མེད་ཞི་བའི་ལམ་ནས་རྩོད་ཐུབ་ན་ད་ལྟའི་གནས་སྟངས་དང་འཚམས་པོ་འདུག་གསུངས་ཡོད་ན། དེ་རིང་གི་ནོངས་འགྱོད་ཅན་གྱི་”བཀའ་ཤག་གི་གསལ་བཤད་”འདི་འདྲ་གནང་དགོས་དོན་ཡོད་པ་མ་རེད་ལ། དབུ་མའི་ལམ་མུ་མཐུད་རྒྱུར་ཆོད་སེམས་བརྟན་པོ་ཡིན་ཞེས་ཡང་ནས་བསྐྱར་དུ་གསུངས་དགོས་དོན་ཀྱང་ཡོད་པ་མ་རེད། དེ་བཞིན་བཀའ་ཤག་ནས་འཁྱེར་ཡོང་བའི་ཁྲིམས་འཆར་”སྲིད་སྐྱོང་”ཞེས་པའི་རླབས་ཆེན་མཚན་ཉིད་འདི་ལའང་གཟི་འོད་ཇེ་འཕྲོས་སུ་སོང་ཡོད་པ་ཐེ་ཚོམ་ནེམ་ནུར་གང་ཡང་མེད་པར་ཞུ་ཆོག་པ་ཞིག་ཡིན་ནའང་། བོད་ཀྱི་ཆབ་སྲིད་པ་ཞིག་གིས་རྩེད་མཚར་ངང་”དབུ་ཁྲིད་ཅིག་ཡིན་ན་མི་མང་གི་རྗེས་སུ་ཕར་རྒྱུག་དགོས་དུས་ད་ཚར་ཚར་བ་རེད་”ཅེས་བཤད་པ་དེའང་ལུང་བསྟན་ཞིག་གི་ཚུལ་དུ་དེ་རིང་བཀའ་ཤག་ལྷན་རྒྱས་དང་སྲིད་སྐྱོང་གི་སྤྱི་བོར་ཟགས་ཡོད་པ་འདྲ།།

༢༠༡༣། ༣། ༢༤། གཟའ་ཉི་མའི་ཉིན་ཤར་མར་བྲིས།