ཞི་ཅིན་ཕེན་གྱི་རྒྱ་ནག་གི་རྨི་ལམ་དེ་ཇི་ལྟ་བུའི་རྨི་ལམ་ཞིག་ཡིན།

ལིན་པོ་ཧ་ཡིས་བརྩམས། ལོ་མ་རྒྱལ་གྱིས་བསྒྱུར།

པེ་ཅིན་གྱི་ “ཚོགས་འདུ་གཉིས་པོ”མཇུག་སྒྲིལ་སོང་། ཞི་ཅིན་ཕེན་རྒྱ་ནག་གི་མགོ་ཁྲོད་མཐོ་ཤོས་དེ་ལ་བསྡད་སོང་། ཏང་དང་དམག་གི་དབང་ཆ་མཉམ་པོར་བཟུང་སོང་།

དེར་བརྟེན། མཇུག་སྡོམ་མཛད་སྒོའི་སྐབས་སུ་ཁོས་རང་ཉིད་ཀྱི་ལས་འཆར་གང་ཡིན་པ་དེ་བསྒྲག་དགོས་ཀྱི་ཡོད། ཁོས་གཏམ་བཤད་ཀྱི་ཁྲོད་ནས་ “རྒྱ་ནག་གི་རྨི་ལམ” ཞེས་ཐེངས་མང་ལ་བརྗོད་ཡོད། རྒྱུ་མཚན་ན་ནིང་ཚོགས་ཆེན་བཅོ་བརྒྱད་སྐབས་ཁོ་རང་སྲིད་འཛིན་དུ་བདམས་ཐོན་བྱུང་རྗེས། རྒྱ་ནག་གི་ཆབ་སྲིད་རྒྱུན་ལས་རྣམ་པ་དང་མཉམ་དུ་རྒྱ་ནག་གི་དེང་རབས་ལོ་རྒྱུས་ཀྱི་ “བསྐྱར་དར་ལམ་བུ”ལ་གཟིགས་སྐོར་དུ་ཕྱིན་ཏེ། “རྒྱ་ནག་གི་རྨི་ལམ” ཞེས་ཐོག་མར་གླེང་མགོ་ཚུགས། དེ་ནས་བཟུང་། “རྒྱ་ནག་གི་རྨི་ལམ” ནི་ཁོ་རང་གི་མཚོན་རྟགས་ཤིག་ཏུ་གྱུར། ཡང་ན། དེ་ནི “ཞི་ཅིན་ཕེན་གྱི་བསམ་བློའི” ཉིང་ཁུ་ཡང་རེད།

ཞི་ཅིན་ཕེན་གྱི་ “རྒྱ་ནག་གི་རྨི་ལམ་” ནི་ཅི་ཞིག་ཡིན་ནམ། ཁོ་རང་གི་གཏམ་བཤད་ཀྱི་ཁྲོད་ན་ “མི་རིགས་བསྐྱར་དར” ཅེས་ཐེངས་མང་ལ་གླེང་བར་གཞིགས་ན། ཁོ་རང་གི་ “རྒྱ་ནག་གི་རྨི་ལམ་”དེ་ནི་གཙོ་བོ་ “ མི་རིགས་བསྐྱར་དར་” གྱི་རྨི་ལམ་དེ་རེད། ཐེངས་འདིའི་གཏམ་བཤད་ཁྲོད་ནས་ཁོས་བསྐྱར་ནན་གྱིས་འདི་ལྟར་བརྗོད་ཡོད་། “ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཏེ། རྒྱ་ནག་གི་རྨི་ལམ་མངོན་འགྱུར་ནི། རྒྱལ་ཁབ་སྟོབས་ཆེན། མི་རིགས་འཕེལ་རྒྱས། མི་མང་བདེ་སྐྱིད་བཅས་ཀྱི་མངོན་འགྱུར་དེ་ཡིན། ” དེ་ནས། དེ་གསུམ་ཆའི་ཁྲོད་ན་ “མི་མང་”ནི་མཐའ་མ་ལ་བཞག་སྟེ། “རྒྱལ་ཁབ”་དང་”མི་རིགས་”སྔོན་ལ་བཞག་ཡོད། དེ་བས། ཕྱི་ཕྱོགས་ཀྱི་བརྒྱུད་ལམ་གཞན་པས་བསམ་པར། དོན་གྱི་ཞི་ཅིན་ཕེན་གྱི་བརྗོད་བཞིན་པ་ནི་ “དམག་སྟོབས་ཀྱི་རྨི་ལམ”ཡིན་པར་འདོད། འདི་ནི་ལོ་འདིའི་རིང་ལ་རྒྱ་ནག་གི་བརྒྱུད་ལམ་ཁག་ན་བསྐྱར་བསྒྲགས་ཡང་བསྒྲགས་བྱེད་བཞིན་པའི་དམག་འཐབ་སྟ་གོན་དང་ཡོངས་སུ་ཆ་མཚུངས་འོས་མཚུངས་སུ་ཆགས་ཡོད།

ཚོགས་འདུ་གཉིས་པོའི་རྗེས་ནས། ཞི་ཅིན་ཕེན་ཕྱིར་སྐྱོད་ཐོག་མ་བྱེད་ས་དེ་ཡང་ཨུ་རུ་སུ་རེད། དེ་ཡང་དམག་དོན་དང་འབྲེལ་ནས་ཡོད་པ་རེད། དེ་བས། ཐེངས་འདིའི་ཚོགས་འདུ་གཉིས་པོ་ནི་རྒྱ་ནག་གིས་རྒྱལ་ཁབ་རང་ལུགས་ཀྱི་མགོ་བོ་གནོན་པ་ཞིག་རེད་ལ། ལྟོས་ཡོང་ན་དེ་ཡང་ལྐོག་གྱུར་གྱི་ཐབས་ཇུས་ཤིག་རེད།

ངས་ཞི་ཅིན་ཕེན་གྱི་མཇུག་གི་གཏམ་བཤད་ལ་དོ་སྣང་བྱས་པ་ཡིན། ཁོས་བརྗོད་དོན། “རྒྱ་ནག་གི་རྨི་ལམ་ནི་རྩ་བའི་མི་མང་གི་རྨི་ལམ་ཡིན། དེ་ཡང་མི་མང་རང་གིས་མངོན་འགྱུར་བྱེད་དགོས་པ་ཞིག་ཡིན། ད་དུང་། ངེས་པར་དུ་མི་མང་གི་ཆེད་དུ་བདེ་སྐྱིད་བསྐྲུན་དགོས། ” ཞེས་བརྗོད་དེ་གཞི་ནས་མི་མང་གི་ཁེ་ཕན་གླེང་ཡོང་གི་ཡོད། གནད་དོན་ནི་རྒྱལ་ཁབ་དམངས་གཙོ་མིན་དུས། མི་མང་གི་ཁེ་ཕན་ནི་དབང་བསྒྱུར་མཁན་གྱི་སྙིང་རྗེ་ལ་རེ་དགོས་པར་ཆགས་བཞིན་ཡོད་པས། དེ་ནི་རྟེན་གཞི་བརྟན་པོ་ཞིག་ག་ལ་ཡིན། ལྐོག་ཟ་རུལ་སུངས་ཀྱི་མགོ་དཔོན་མང་པོ་འཕྱུར་ནས་ཡོང་སྲོལ་ལ་བལྟས་ན། དེ་ལྟ་བུའི་ “སྙིང་རྗེ”ལ་རེ་བ་མ་བརྒྱབ་ན་ཡག་ཤོས་རེད།

ལ་ལས་བཤད་ན། ཞི་ཅིན་ཕེན་གྱིས་ “གཡོན་གློག་སྦར་ཏེ། གཡས་ལ་དཀྱོག”གིན་འདུག་ཟེར། དེ་ནས་ང་ཚོ་མཐོང་ལམ་དུ་མངོན་པ་དེ་ནི། ཁོས་གསལ་བོར་སྦར་ཡོད་པའི་གཡོན་གློག་དེ་དང་། མི་རིགས་རིང་ལུགས་བརྒྱུད་སྒྲོག རྒྱ་ནག་མི་མང་གི་ལག་དམར་མོ་ཙེ་ཏུང་ལ་བསྟོད་གླུ་ལེན་པ་དེ་རེད། ཡིན་ན་ཡང་། ཁོས་”གཡས་དཀྱོག”བྱས་ཀྱང་ད་རུང་ཁུངས་སྣེ་ཞིག་ཅི་ཡང་མཐོང་ཐུབ་ཀྱི་མེད། དེ་བས། གཡས་གཡོན་འབྲེལ་མི་ཆགས་པར་རུལ་སུངས་ལ་རྒོལ་བ་བྱེད་པ་འདི་ཡང་ཕལ་ཆེར་ཁག་པོ་རེད། ཁྱད་པར་དུ་མཐོ་རིམ་ཚོགས་པའི་ཁེ་ཕན་ལ་གཡོ་སྐྱོམ་ཐེབས་དུས་དེ་བས་ཀྱང་ཁག་པོ་རེད།

ད་དུང་། ཆེ་ཆེས་བའི་གནད་དོན་ཞིག་ཡོད་པ་དེ་ནི། མ་འོངས་པར་རྒྱ་ནག་ཇི་ལྟ་བུའི་ལམ་ཁ་ཞིག་ཏུ་འགྲོ་འམ་ཟེར་བ་དེ་རེད། འདི་ནི་རྨི་ལམ་ཅི་ཞིག་མངོན་འགྱུར་ཡོང་མིན་དང་འབྲེལ་བ་ཡོད་པ་ཞིག་རེད། མིག་སྔར་རྒྱ་ནག་གི་བསྐྱར་ནན་གྱིས་བློ་རིག་སྒྲིམ་ས་དེ་ནི། ཁ་རུབ་སྒོ་བརྒྱབ་ཀྱི་ “ལམ་རྙིང་པ”དེར་མི་འགྲོ་བ་དང་། ཡང་ནུབ་ཕྱོགས་ཀྱི་ “ནོར་བའི་ལམ”དེར་སློབ་སྦྱོང་བྱེད་དུ་ཡང་མི་འགྲོ་བ། ཏག་ཏག་བརྗོད་བཞིན་པ་དེ་ནི། “ཁྱད་ཆོས་ལྡན་པའི་ཀྲུང་གོའི་སྤྱི་ཚོགས་རིང་ལུགས་ཀྱི་ལམ་ཁའོ།།”

ལམ་རྙིང་པ་ཟེར་བ་ནི། མོ་ཙེ་ཏུང་གི་ལམ་ཁ་རེད། ནོར་བའི་ལམ་ཟེར་བ་ནི། ནུབ་ཕྱོགས་ཀྱི་ཡོངས་ཁྱབ་རིན་ཐང་གི་ལམ་ཁ་དེ་རེད། དེ་ནས། ཁྱད་ཆོས་ལྡན་པའི་ཀྲུང་གོའི་སྤྱི་ཚོགས་རིང་ལུགས་ཀྱི་ལམ་ཁ་ཟེར་བ་དེ་ནི་ཏིན་ཞོ་ཕེན་གྱི་ལམ་ཁ་རེད། མོ་ཙེ་ཏུང་གི་ལམ་ཁ་ནི་ ༡༩༤༩ ནས་ ༡༩༧༩ བར་རེད། ཁྱོན་ལོ་ ༣༠ ། དེ་ནས། ཏིན་ཞོ་ཕེན་ ༡༩༧༩ ནས་ད་ལྟའི་བར་རེད། ཁྱོན་ལོ་ ༣༤ རེད། མོ་ཙེ་ཏུང་གི་ལམ་ཁ་ལས་ཅུང་རིང་བ་རེད།

ཡིན་ན་ཡང་། ལྐོག་ཟ་རུལ་སུངས་དང་དབུལ་ཕྱུག་ཁྱད་པར། ཟས་རིགས་སྐྱོན་ཅན། མི་མང་ཕན་ཚུན་གྱི་བར་ལ་ཡིད་ཆེས་མེད་པ། རྒྱ་རིགས་དང་གྲངས་ཉུང་མི་རིགས་བར་གྱི་ཛ་དྲག་གི་འབྲེལ་བ། ཕྱི་རྒྱལ་གྱི་རྒྱ་ནག་ལ་ལྟ་སྟངས་ཞན་པ། རྒྱ་ནག་དང་ཁྱིམ་མཚེས་རྒྱལ་ཁབ་བར་ཛ་དྲག་གི་གནས་སྟངས་ཆགས་པ་ལ་སོགས་ནི། “ཁྱད་ཆོས་ལྡན་པའི་ཀྲུང་གོའི་སྤྱི་ཚོགས་རིང་ལུགས་ཀྱི་ལམ་ཁ་” ཡིས་བཟོས་པ་ཤ་སྟག་མ་ཡིན་ནམ། ད་དུང་མུ་མཐུད་ནས་ལམ་ཁ་འདི་རྒྱུད་འཛིན་བྱས་ན། ཀྲུང་གོའི་རྨི་ལམ་ནི་ཡིད་དུ་འོང་བ་ཞིག་དང་། ཡང་ན་འཇིགས་སུ་རུང་བ་ཞིག་ཡིན་པ། ནམ་ལངས་ན་ཉི་མ་ཤར་ཤར་ལྟར་མ་ཡིན་ནམ།

ཏིན་ཞོ་ཕེན་གྱི་སྐབས་སུ་འདི་འདྲའི་བཤད་སྲོལ་ཞིག་ཡོད་དེ། “ལག་ལེན་ནི་བདེན་པ་འཇལ་བྱེད་ཀྱི་ཚད་གཞི་ཁོ་ནའོ།།” ཡིན་ན་ཡང་། རྒྱ་ནག་གིས་ད་ལྟའི་བར་དུ་ནུབ་ཕྱོགས་ཀྱི་ཡོངས་ཁྱབ་རིན་ཐང་གི་ལྟ་ཚུལ་དེ་ཅིའི་ཕྱིར་ནང་འདྲེན་དང་ལན་ལེག་ཅིག་བྱེད་ཀྱི་མེད་དམ། མ་ཟད་དེ་ནི་སྲིན་པོ་མོ་ཙེ་ཏུང་ལས་ཀྱང་འཇིགས་སུ་རུང་བའི་ “ནོར་བའི་ལམ”་ཞིག་ཏུ་ངོས་འཛིན་བྱེད་དོན་ཅི་ཡིན་ནམ།

ཞི་ཅིན་ཕེན་གྱིས་མི་མང་གི་ཆེད་དུ་བདེ་སྐྱིད་བསྐྲུན་བཞིན་ཡོད་པ་མ་ཡིན་ནམ། དེ་ན་རྒྱུ་ནོར་དང་སྟོབས་ཤུགས་བཀོད་དེ་ཉ་འཛིན་གླིང་ཕྲན་(钓鱼台)ཚུར་འཕྲོགས་དང་། མགོ་དཔོན་ཚོས་ལྐོག་ཟ་རུལ་སུངས་བྱེད་པའི་གནད་དོན་དེ་ཐག་གཅོད་བྱོས་དང་། མི་མང་གི་གཟུགས་པའི་འཕྲོད་བསྟེན་ལ་དོ་ཁུར་བྱོས་དང་། དེ་དག་གི་ནང་ནས་གང་ཞིག་མི་མང་ལ་ཁེ་ཕན་ཆེ་འམ། འོ་མ་སྐམ་པོ་ཞིག་ཀྱང་ཡག་པོ་བཟོ་མི་ཐུབ་ན། ཉ་འཛིན་གླིང་ཕྲན་ (钓鱼台) འཕྲོག་རྩོད་བྱས་ནས་ཅི་ལ་ཕན། དེ་བས་རྒྱ་ནག་གིས་ཀྱང་ཕྱི་བཏུམ་ནང་བཏུམ་མི་བྱེད་པར་འོས་ཤོག་གི་ལམ་ནས་འབངས་མི་སེར་ཚོས་རྨི་ལམ་གང་ཞིག་ལ་རེ་བ་བྱེད་བཞིན་ཡོད་པར་ལྟོས་ན་རེད།

ཚོགས་ཆེན་བཅོ་བརྒྱད་པ་འཚོགས་བཞིན་པའི་སྐབས་སུ། <མི་མང་དྲ་ཚིགས>ཀྱི་ངོས་ན་དྲ་མང་གིས་ཆེས་དོ་སྣང་བྱེད་བཞིན་པའི་གནད་དོན་བཅུ་ཡི་ཁྲོད་ན། ཆབ་སྲིད་དམངས་གཙོ་ལ་འོས་ཤོག་ལྡུག་མཁན་བརྒྱ་ཆ་ཡི་ ༣༢.༤% ཡིན་པས་ཆེས་མཐོ་ཤོས་དེ་ཆགས། དེ་ནས་རིམ་བཞིན་ལྐོག་ཟ་རུལ་སུངས་ལ་རྒོལ་བ་དང་མི་མང་གི་འཚོ་བ། དཔལ་འབྱོར་ཡར་རྒྱས་བཅས་ཀྱི་སྐོར་ལ་དོ་སྣང་བྱས་འདུག བརྒྱ་ཆ་ ༠.༣༡% ཙམ་གྱིས་འགྲན་གཉིས་གཅིག་གྱུར་གྱི་སྐོར་ལ་དོ་སྣང་བྱས་འདུག བརྒྱ་ཆ་ཅི་ཡང་སོན་མེད་པ་ནི་ཕྱི་འབྲེལ་གྱི་སྐོར་རེད། ན་ནིང་ཟླ་ ༣ པའི་ནང་ལ། <གོ་ལའི་དུས་བབ>ཀྱི་ལས་མི་ཞིག་གིས་ཉམས་ཞིབ་བྱས་པའི་མཐའ་འབྲས་ཤིག་ཁྱབ་བསྒྲགས་བྱས་པ་ལྟར་ན། བཅར་འདྲི་བྱེད་སའི་བརྒྱ་ཆ་ཡི་ ༦༣% གྱིས་རྒྱ་ནག་དམངས་གཙོ་ལ་འགྱུར་ན་བསམ་པའི་རེ་བ་བྱེད་བཞིན་ཡོད་པ་བརྗོད།

མང་ཚོགས་ཀྱིས་རེ་སྙེག་བྱེད་བཞིན་པའི་རྨི་ལམ་ནི། དབང་སྒྱུར་མཁན་ཚོ་དང་ཁྱོན་ནས་གཅིག་མཚུངས་ཆགས་ཀྱི་མེད་པ་གསལ་བོ་རེད། རྒྱ་ནག་གི་དབང་བསྒྱུར་ཚོགས་པས་དམངས་གཙོ་ནི་ “ནོར་བའི་ལམ” ཞིག་ལ་ངོས་འཛིན་བྱེད་པ་དེ་ནི། དོན་གྱི་རྒྱ་ནག་མི་མང་གི་བསམ་ཚུལ་ལ་བཙན་གནོན་བྱེད་བཞིན་ཡོད་པ་ཞིག་ཡིན། དེ་བས་མང་ཚོགས་ཀྱི་རེ་འདུན་ལ་མཐོང་ཆུང་བྱས་ན། ཞི་ཅིན་ཕེན་གྱིས་བསྐྲུན་པའི་རྨི་ལམ་དེ་ནི་གུང་ཁྲན་ཏང་གི་ཡིད་དུ་འོང་བའི་རྨི་ལམ་ཙམ་ཡིན་པ་ལས། མི་མང་ལ་མཚོན་ན་དེ་ནི་འཇིགས་སུ་རུང་བའི་རྨི་ལམ་ཞིག་རེད། གལ་ཏེ་དེ་ལྟར་མིན་ན། མང་ཚོགས་ཁྲོད་ན་ཅིའི་ཕྱིར་སྐད་གསེང་མཐོན་པོས་གསར་བརྗེ་ཡི་འབོད་སྒྲ་སྒྲོག་བཞིན་ཡོད་དམ། འབོད་སྒྲ་དེ་ནི་རྒྱ་ནག་མི་མང་ལ་གཉའ་གནོན་དང་བཤུ་གཞོག་བྱེད་མཁན་གྱི་ “ཁྱད་ཆོས་ལྡན་པའི་ཀྲུང་གོའོ་སྤྱི་ཚོགས་རིང་ལུགས” ཟེར་བའི་ལམ་ཁ་དེ་རྩ་སློག་བྱེད་པའི་འབོད་སྒྲ་དེའོ།།