བྷེལ་ཇམ་གནས་སྡོད་ཆབ་འགག་དཔལ་ལྡན།
ཉེ་ལམ་རྒྱ་ནག་དབུས་གཞུང་གིས་བོད་མདོ་སྨད་རེབ་གོང་གི་ཁུལ་དང་རྫོང་རིམ་པ་སོ་སོར་བོད་རང་བཙན་གྱི་ངོ་བོ་ལྡན་པའི་ཁྲིམས་འགལ་གྱི་བྱ་སྤྱོད་བཅུ་གསུམ་ཞེས་པའི་ཡིག་ཆ་ཞིག་བཀྲམས་ཡོད་སྐོར་བོད་ཀྱི་དུས་བབ་ལས་མཐོང་། ཡིག་ཆ་དེའི་ནང་དོན་གཙོ་བོ་སྤྱི་ཚོགས་བདེ་སྐྱོང་གི་སྒྲིག་ལམ་ལ་ཤུགས་ཆེན་པོས་སྲུང་སྐྱོང་བྱེད་པ་དང་། ཁྲིམས་འགལ་ཉེས་བསགས་མཁན་ལ་རྡུང་རྡེག་དྲག་པོ་གཏོང་བ། མང་ཚོགས་ཀྱིས་བོད་རང་བཙན་གྱི་བྱ་སྤྱོད་ལ་འཐབ་རྩོད་བྱེད་པར་རོགས་རམ་བྱེད་དགོས་པའི་སྐོར་རེད། དེ་ནི་དོན་དངོས་དང་མི་མཐུན་པའི་དཀྱོག་བཤད་ཤ་སྟག་ཡིན་པས་དེ་ལ་ལན་འདེབས་ཤིག་བྱ་དགོས་པ་ལས་དབང་གིས་གནང་བའི་འོས་འགན་ཞིག་ཏུ་འཁུམས། ཡིན་ཡང་དོན་ཚན་རེ་རེ་བཞིན་ལན་འདེབས་གནང་གལ་མ་མཐོང་། འདིར་ཁྲིམས་འགལ་བྱ་སྤྱོད་བཅུ་གསུམ་ལས་དང་པོ་དང་། གཉིས་པ། ལྔ་བ། དྲུག་པ། བདུན་པ། བཅུ་གཅིག་པ་བཅས་ལ་ལན་འདེབས་གནང་ཡོད། འདི་ལྟར་འདེམས་དོན་ནི་གལ་འགངས་ཆེ་བར་སྣང་བས་སོ།།
ཁྲིམས་འགལ་བྱ་སྤྱོད་ཀྱི་མཚོན་དོན་དང་ལན་འདེབས།
ཁྲིམས་འགལ་བྱ་སྤྱོད་བཅུ་གསུམ་གྱི་དང་པོ་ནི། ༼མི་གཞན་རང་སྲེག་བྱེད་པར་སྐུལ་སློང་དང་ངན་སྐུལ་བྱེད་པ། མགོ་སྐོར་གཏོང་བ།༽ཟེར་བ་དེས་ང་ཚོ་བོད་མི་ཚོའི་བསམ་བློ་དང་རྣམ་དཔྱོད། སྨྲ་བརྗོད་ཀྱི་རང་དབང་བཅས་ལ་སྔར་ལས་ལྷག་པའི་ཚད་བཀག་ཆེན་པོ་བཟོས་པར་མཚོན། རང་གི་རྒྱལ་ཁབ་ཧམ་བཟུང་བྱས་པའི་ཕྱི་མི་སུ་ཞིག་ཡིན་རུང་དེ་ལ་རྒོལ་ལན་སློག་རྒྱུ་ནི་མི་རིགས་དེའི་ལས་འགན་ཨང་དང་པོ་ཆགས་ཡོད། རང་མི་རིགས་ཀྱི་དོན་དུ་ཕ་རོལ་དགྲ་བོར་རྒོལ་ལན་སློག་པར་གཞན་སུ་ལའང་སྐད་ཆ་འདྲི་མི་དགོས་པར་རང་ཉིད་ཀྱིས་རང་བསྲེག་པའི་སྙིང་སྟོབས་དང་སྤོབས་སེམས་ལྡན་ཡོད་པས་ངན་སྐུལ་བྱེད་མཁན་སུ་ཡང་མེད། རྒྱ་ནག་དམར་གཞུང་ནི་རྐུན་བཅོམ་འཕྲོག་གསུམ་བྱེད་པའི་ཇག་ཚོགས་ཤིག་དང་མི་གསོད་ཁྲག་སྦྱོར་གྱི་བཤས་ཁང་ཞིག་ལས་འགྲོ་བ་མི་ལ་མཁོ་བའི་གཞུང་ཞིག་གཏན་ནས་མིན།
ཁྲིམས་ འགལ་བྱ་སྤྱོད་བཅུ་གསུམ་གྱི་གཉིས་པ་ནི། ༼རང་སྲེག་གི་གྱོད་དོན་བྱུང་རྗེས། སྲིད་གཞུང་ལས་ཁུངས་ཀྱིས་མྱུར་སྐྱོབ་བྱེད་པ་དང་སྤྱི་བདེ་མི་སྣས་བདེན་དཔང་ འཚོལ་བར་བར་ཆད་བྱེད་པ་དང་། གོ་སྐབས་ལ་བརྟེན་ནས་འདུ་ཚོགས་བྱེད་པ་དང་བེམ་པོ་འཁུར་ནས་ཁྲོམ་སྐོར་བྱེད་པ། ཁྲིམས་འགལ་གྱིས་བལྟ་རུ་འགྲོ་བ་དང་འཚམས་འདྲི་བྱེད་པ། ཞལ་འདེབས་འབུལ་བ།༽ ཞེས་པ་དེས་པེ་ཅིན་ཇག་གཞུང་གིས་རང་སྣང་གང་དྲན་གྱིས་བོད་མི་ཚོར་དྲག་གནོན་དང་ འཛིན་བཟུང་བྱེད་ཀྱི་ཡིན་པའི་སྔོན་བརྡ་བཏང་བར་མཚོན། ཕྱི་ལོ་ ༢༠༠༨ ཀྱི་ལོར་བོད་དུ་ས་བྱི་ཞི་རྒོལ་ཆེན་པོ་བྱུང་བ་ནས་ད་ལྟའི་བར་བོད་མི་བརྒྱ་ཕྲག་ ལྷག་གིས་རང་གི་ལུས་སྲོག་མེ་རུ་བསྲེགས་པ་དེ་ཉེན་ཚབས་ཆེ་བའི་གྱོད་དོན་ཞིག་ཏུ་གྱུར་མེད་ལ། སྐུ་ཕུང་འཁུར་ནས་ཁྲོམ་སྐོར་དེ་བས་ཀྱང་གནང་མེད། བོད་མི་ཕན་ཚུན་དབར་བལྟ་རུ་འགྲོ་བ་དང་འཚམས་འདྲི་བྱེད་པ། ཞལ་འདེབས་འབུལ་བ་ནི་མདོ་དབུས་ཁམས་གསུམ་སྔར་ལས་ལྷག་པའི་ཆིག་སྒྲིལ་རང་བཞིན་ཅན་དུ་འགྲོ་བའི་དུས་ཀྱི་འགྱུར་འགྲོས་དང་མཐུན་པའི་ལེགས་སྐྱེས་གྱ་ནོམ་པ་ཞིག་ ཏུ་གྱུར་བ་མ་ཟད། དོན་དངོས་སུ་གཞན་གྱི་སྡུག་བསྔལ་རང་སྟེང་དུ་བླངས་པའི་རང་གཞན་སྙོམས་འཇུག་གི་ བྱེད་ཐབས་ཉམས་སུ་བསྟར་བའི་སྤྱི་སྙོམས་རང་བཞིན་གྱི་བདེ་སྐྱིད་འཚོལ་བའི་ལམ་བུ་གསར་བ་ཞིག་ཏུ་བསྐྱོད་པ་ལས་ཁྲིམས་འགལ་གཏན་མིན།
ཁྲིམས་འགལ་བྱ་ སྤྱོད་བཅུ་གསུམ་གྱི་ལྔ་བ་ནི། ༼བོད་རང་བཙན་གྱི་རྒྱབ་ལྗོངས་ཡོད་པའི་ཁྲིམས་འགལ་གྱི་རྩ་འཛུགས་དང་བོད་རང་བཙན་ གྱི་ཆེད་དུ་ཟིང་ཆ་སློང་བའི་ངོ་བོ་ལྡན་པའི་ཁྲིམས་འགལ་གྱི་སྤྱི་ཚོགས་རྩ་ འཛུགས་ཀྱི་བྱ་འགུལ་དུ་ཞུགས་པ།༽ཞེས་པ་དེས་ཕྱོགས་ལྷུང་གི་སྲིད་ཇུས་འོག་བོད་ མི་ཚོར་དྲག་པོའི་ཁྲིམས་གཞི་བསྡམས་ཏེ་མེ་མདའི་སྟོབས་ཤུགས་ངོམ་སྟེ་རྒྱལ་ཕམ་ འགྲན་རྩོད་ཀྱི་གཡོ་ཐབས་ཤིག་འཁྲབ་སྟོན་བྱེད་ཀྱིན་པ་མཚོན། ད་ལྟའི་དུས་ནི་མཚོན་ཆའི་ཁ་ནས་རྒྱལ་ཕམ་འགྲན་རྩོད་བྱེད་པའི་ཚབ་ཏུ་ཞི་མཐུན་ གྱི་བསམ་བློ་བརྗེ་རེས་ཀྱིས་མཉམ་གནས་དང་མཉམ་འབྲེལ་བྱེད་རྒྱུ་དེ་རེད། མཉམ་གནས་དང་མཉམ་འབྲེལ་གྱི་ལྟ་བ་གཞི་རྩར་བཟུང་བའི་སྤྱི་ཚོགས་ཤིག་ལ་མཚོན་ན་ གཞན་སྡུག་རང་ལེན་དང་རང་བདེ་གཞན་གཏོང་གི་སྤྱི་མཐུན་གྱི་བྱ་འགུལ་ཁོ་ན་སྤེལ་བ་ ལས་མི་རིགས་ཁ་བྲལ་གཏོང་བའི་བཀོད་ཇུས་ནམ་ཡང་འཐེན་མི་སྲིད། དེ་བཞིན་སྤྱི་ཚོགས་སམ་རྒྱལ་ཁབ་གང་དང་གང་ཡིན་ཡང་ཁེར་ཚུགས་དང་རྟག་བརྟན་ཐེར་ ཟུག་ཏུ་གནས་ཐབས་བྲལ་བ་ནི་དུས་རབས་ཀྱིས་སྤྲད་པའི་མངོན་གསལ་གྱི་བརྡ་མཚོན་ཞིག་ ཡིན་པ་རྒྱ་ནག་ཇག་ཚོགས་ཀྱིས་ཤེས་དགོས།
ཁྲིམས་འགལ་བྱ་སྤྱོད་བཅུ་གསུམ་གྱི་དྲུག་པ་ནི། ༼ཕ་སྐད་ལ་སྲུང་སྐྱོབ་བྱེད་པ་”དང་”ཁོར་ཡུག་བསྲུང་སྐྱོབ་བྱེད་པ་” སོགས་ལ་ཁ་གཡར་ཏེ། མི་གཞན་རྣམས་སྲང་དུ་སོང་ནས་ཁྲིམས་འགལ་གྱི་ཁྲོམ་སྐོར་བྱེད་པ་དང་ངོ་རྒོལ་གྱི་ སྦྱར་ཡིག་སྦྱོར་བར་བཙན་སྐུལ་བྱེད་པ།༽ཞེས་པ་དེས་འུ་ཐུག་དང་གཡོ་ཐབས། རྫུན་བཟོའི་བྱིས་སྒྲུང་ཞིག་ཕྱིར་སྟོན་བྱས་པ་ཙམ་མཚོན། བོད་གྲངས་ཉུང་མི་རིགས་ཀྱི་ཕ་སྐད་དང་ཁོར་ཡུག་སྲུང་སྐྱོབ་ཀྱི་དོན་དུ་བོད་མི་ རྣམས་ཀྱི་ཟུངས་ཁྲག་གིས་འགྲོ་གྲོན་བཏང་སྟེ་ཁ་སང་དེ་རིང་བར་དུ་རྒྱུན་མཐུད་ཡོད། རྒྱ་ནག་པེ་ཅིན་ཇག་གཞུང་གིས་བོད་གྲངས་ཉུང་མི་རིགས་ཀྱིས་རང་གི་ཕ་སྐད་གཅེས་སྐྱོང་གི་ལས་འགུལ་སྣ་མང་སྤེལ་བར་ཐད་ཀར་འགོག་རྐྱེན་བཟོ་མ་ཕོད་བར་ངོ་རྒོལ་ སྦྱར་ཡིག་ཙམ་ལ་ཁག་དཀྲིས་ནས་ཕ་སྐད་རྨེག་མེད་དུ་གཏོང་བའི་ངན་ཇུས་འཐེན་པ་ཙམ་ ལས་བོད་མི་རིགས་ཀྱིས་རང་གི་ཕ་སྐད་དང་ཁོར་ཡུག་ལ་ཁ་གཡར་ནས་རྒྱ་རིགས་སུ་གཅིག་ ལ་གནོད་སྐྱེལ་མེད་པ་ཞི་བདེ་ལ་དགའ་བའི་འཛམ་གླིང་ཤར་ནུབ་ཀྱི་རྒྱལ་ཁབ་ཁག་གི་ གསར་འགྱུར་བརྒྱུད་ལམ་ལས་བདེན་པ་ར་སྤྲོད་གནང་ཡོད། དེས་མི་རྣམས་ལ་གོ་རྟོགས་ཟབ་མོ་ཞིག་སྤྲད་ཡོད་པས་པེ་ཅིན་ཇག་གཞུང་གིས་ཅི་ཞིག་ བཤད་ཀྱང་ཡོད་ཚད་རྫུན་གཏམ་ཁོ་ན་ལས་བདེན་གཏམ་ཞིག་ཡིན་པའི་སྣང་བ་འཆར་མི་སྲིད་ པའི་དུས་ལ་བསླེབས་ཡོད།
ཁྲིམས་འགལ་བྱ་སྤྱོད་བཅུ་གསུམ་གྱི་བདུན་པ་ནི། ༼ཁ་བྲལ་རིང་ལུགས་ཀྱི་གཏམ་བརྗོད་སྒྲོག་པ་དང་། ཁ་བྲལ་རིང་ལུགས་ཀྱི་གཏམ་བརྗོད་ཡོད་པའི་རི་མོ་དང་སྒྲ་བརྙན་བཟོ་བ་དང་འཚོང་བ། བརྒྱུད་སྒྲོག་བྱེད་པ།༽ཞེས་པ་དེས་དོན་དངོས་སུ་ཚེ་འདི་ཕྱི་གཉིས་ཀྱི་སྐྱབས་ མཆོག་༧ གོང་ས་༧ རྒྱལ་བ་རིན་པོ་ཆེ་དང་། རྡ་སའི་བཙན་བྱོལ་བོད་གཞུང་། དེ་བཞིན་གཞུང་འབྲེལ་མིན་པའི་ཚོགས་སྡེ་ཁག་པེ་ཅིན་ཇག་གཞུང་གིས་བློ་ཚབས་བྱ་ ཡུལ་དུ་གྱུར་བར་མཚོན། གདོད་མ་ནས་མཐོ་སྒང་གི་འཇིག་རྟེན་དེར་ཁྱིམ་གཞི་བསྐྲུན་པའི་མཐོ་སྒང་བ་དག་གིས་ རང་ས་གཞན་གྱིས་བཙན་བཟུང་བྱས་པའི་དགྲ་ཇག་རྣམས་མཐར་སྐྲོད་གཏོང་རྒྱུ་ནི་ལས་ དབང་གིས་གནང་བའི་འོས་འགན་ཞིག་ལས་གཞན་གྱི་བརྒྱུད་སྒྲོག་ལ་བལྟ་དགོས་དོན་ཡེ་ ནས་མེད། ཡང་གཅིག་བཤད་ན་རང་ས་གཞན་གྱིས་བཙན་བཟུང་བྱེད་མཁན་ནི་ཁ་བྲལ་བ་ཡིན་པ་ལས་རང་ས་ རང་བདག་གནང་མཁན་ཁ་བྲལ་བ་མིན། པེ་ཅིན་ཇག་གཞུང་གིས་སྔོན་དུས་ཉི་ཧོང་གི་བཙན་འཛུལ་ལ་རྒོལ་ལན་སློག་མཁན་གྱི་ རྒྱ་རིགས་རྣམས་ལ་ཁ་བྲལ་བ་ཞེས་འབོད་ཀྱིན་ཡོད་དམ། རྒྱ་མི་རིགས་ཀྱིས་ཉི་ཧོང་ལ་རྒོལ་ལན་སློག་ཆེད་གཏམ་བརྗོད་ཡོད་པའི་རི་མོ་དང་ གློག་བརྙན་བཟོས་ཏེ་དུས་ད་ལྟའང་བརྒྱུད་སྟོན་བྱེད་པ་དག་ཁྲིམས་མཐུན་ཡིན་ན་བོད་ གྲངས་ཉུང་མི་རིགས་ཀྱིས་དེ་ལྟར་གནང་བ་ཁྲིམས་འགལ་དུ་ཇི་ལྟར་འགྱུར།
ཁྲིམས་འགལ་བྱ་སྤྱོད་བཅུ་གསུམ་གྱི་བཅུ་གཅིག་པ་ནི། ༼བསང་ཕུད་པ་དང་ཆོས་འདོན་པ། ཚེ་ཐར་དུ་གཏོང་བ། ལཱ་སྒྲོན་བཀར་པ་སོགས་ཀྱི་བྱེད་ཐབས་ལ་བརྟེན་ནས། རང་སྲེག་མཁན་ལ་བསྔོ་སྨོན་བྱེད་པ་དང་ཡང་ན་བོད་རང་བཙན་ཚོགས་པར་རྒྱང་རིང་ནས་ གཞོགས་འདེགས་བྱེད་པ།༽ ཞེས་པ་དེས་པེ་ཅིན་ཇག་གཞུང་གིས་རྒྱུན་གཏན་ནས་བཤད་ཀྱིན་པའི་ཆོས་དད་རང་དབང་ ཡོད་ཅེས་པ་དེའི་རྫུན་རྐུབ་བརྡོལ་བར་མཚོན། བོད་གྲངས་ཉུང་མི་རིགས་ལ་མཚོན་ན་བསང་ཕུད་བསྔོ་སྨོན་དང་ཆོས་འདོན་ཚེ་ཐར་གཏོང་ བ་སོགས་ནི་སྤྱི་སྒེར་གྱི་མི་བུ་སུ་ཞིག་དཀའ་སྡུག་གི་གནས་སུ་ལྷུངས་ནས་ཞི་མཐུན་དང་འདོད་བདེ་། མཉམ་འབྲེལ་གྱི་སྟོབས་ཤུགས་བཅས་ཉམས་ཏེ་ཅི་བྱ་གཏོལ་མེད་དུ་གྱུར་བར་ཆོས་ཀྱིས་རོགས་འདེགས་ཞུས་པ་ཙམ་ཞིག་ལ་ཟེར་བ་རེད། དེ་ཡང་གཙོ་བོ་རང་སྲེག་གནང་མཁན་གྱི་དམ་པ་དེ་ཉིད་ཕྱི་མར་དལ་བརྒྱད་འབྱོར་བཅུ་ཚང་བའི་མི་ལུས་འཐོབ་ཆེད་དུ་གནང་བ་ཞིག་ཡིན་པས་ཆབ་སྲིད་དང་གཏན་ནས་འབྲེལ་བ་མེད། རྒྱ་ནག་གི་མགོ་ཁྲིད་དཔོན་ངན་ཚོའི་མིག་ནང་གི་ཚེར་མ་ལྟར་གྱུར་བའི་བོད་རང་བཙན་ ཚོགས་པས་ཉིན་ཞིག་ཁྱེད་ཅག་གི་མིག་རིལ་འདོན་ངེས་པ་ནི་ལོ་རྒྱུས་ཀྱིས་བཅིངས་པའི་འབྲེལ་ཐག་གིས་མི་རབས་གསར་བའི་སྙིང་རྩར་བསྡམས་ཡོད་པ་ཤེས་དགོས།
པེ་ཅིན་ཇག་གཞུང་གིས་ཁྲིམས་འགལ་བཅུ་གསུམ་ཞེས་པ་དེ་དོན་དངོས་སུ་གོང་ཞུས་ལྟར་བོད་གྲངས་ཉུང་གི་སྲོལ་རྒྱུན་རིག་གནས་དང་ཡུལ་གོམས་གཤིས་ལུགས་རྣམས་རྩ་མེད་དུ་གཏོང་བའི་ཐབས་ལམ་ཞིག་ཏུ་འཁུམས། ཐབས་ལམ་འདི་བེད་སྤྱད་ནས་སྐད་ཡིག་རིག་གཞུང་ཁོར་ཡུག་དང་བཅས་པ་མེད་བརླག་ཏུ་གཏོང་སྲིད། འདི་ནི་གཏིང་རིང་ཞིང་མགོ་རྨོངས་པའི་ལས་ཐབས་ཉེན་ཚབས་ཆེ་བ་ཞིག་རེད། འུ་བུ་ཅག་གིས་ཅི་ཞིག་ལས་པ་ཐམས་ཅད་པེ་ཅིན་ཇག་གཞུང་གིས་ཁྲིམས་འགལ་གྱི་རྣམ་པར་བཙན་བསྒྱུར་གྱིས་ཡོན་ཏན་པ་དང་། བསམ་བློ་བ། སྣེ་ཁྲིད་པ། རིགས་ཞེན་ཅན་དག་ལྐོག་གསོད་བཙོན་འཇུག་གིས་མི་ཚེ་འཛད་བཅུག་པ་འདིར་དྲང་བདེན་ལ་དགའ་བའི་རྒྱལ་ཁབ་བམ་སྤྱི་ཚོགས་གང་གིས་ཀྱང་ཐེ་གཏོགས་བྱས་ཐུབ་མེད་པ་འདིས་བོད་ མི་རིགས་ཀྱི་རིག་གཞུང་རྨེག་མེད་དུ་གཏོང་བའི་ཁོར་ཡུག་གཞི་རྒྱ་ཆེ་རུ་བཏང་ཡོད། ང་ཚོས་རྒྱ་ནག་ཇག་གཞུང་གི་ལྐོག་ཇུས་ཐམས་ཅད་ཕྱིར་བསྒྲགས་གནང་སྟེ་གཞིས་བཞུགས་ སྤུན་ཟླ་རྣམས་ལ་འཕྲད་བཞིན་པའི་ཡ་ང་བའི་དཀའ་སྡུག་ཡོད་དོ་ཅོག་དང་། ཕྱི་མའི་ལྔ་ལམ་དུ་གཤེགས་ཟིན་པའི་དཔའ་བོ་དཔའ་མོ་རྣམས་ཀྱི་ཞལ་ཆེམས་ཀྱི་དགོངས་ དོན་ལྟར་ཆིག་སྒྲིལ་ངང་སྐད་ཡིག་སྲུང་སྐྱོབ་ཀྱི་ལས་གཞི་རྒྱ་ཆེ་གཏིང་ཟབ་ཏུ་གཏོང་བའི་དུས་སུ་སླེབས།
བོད་རྒྱལ་ལོ།
