བོད་
དབུ་མའི་ལམ་དང་རང་བཙན་ཟེར་བ་འདི་དེང་སྐབས་བོད་དོན་འཐབ་རྩོད་ཀྱི་ར་བ་ལས་བརྒལ་ཏེ་ཚོང་རྫས་དང་རྒྱུགས་ཤོག་ཅིག་གི་ངོ་བོར་འགྲོ་བཞིན་འདུག ཡར་བླ་མ་དང་དཔོན་པོ། མཁས་དབང་དང་ཕྱུགས་བདག་ཆགས་པའི་ལམ་ཁ་ཞིག་དང་། མར་ཐ་ཤལ་ནས་ཉེས་ཅན། རྒྱ་ནག་གི་སོ་པ་སོགས་སུ་བརྫང་བའི་གསང་ལམ་ཞིག་ཏུ་འགྱུར་འདུག དབུ་མ་དང་རང་བཙན་གཉིས་ཀྱི་རྩོད་གཞི་འདི་ལ་བརྟེན་ཏེ་ཡར་མཐོ་རིས་ཀྱི་གོ་འཕང་ཐོབ་ནས་སངས་རྒྱས་པའི་གོ་སྐབས་དང་། མར་དམྱལ་བ་ནས་མནར་མེད་འཁྱམས་ནས་ཚ་དམྱལ་གྲང་དམྱལ་བཅོ་བརྒྱད་དུ་ཟེགས་པའི་ཉེན་ཁ་ཡང་འདུག
༸གོང་ས་མཆོག་གིས་ཆབ་སྲིད་དང་འཛིན་སྐྱོང་གི་འགན་དབང་ཡོངས་རྫོགས་མི་མང་གིས་བདམས་པའི་དབུ་ཁྲིད་ཚོར་བགོ་བཤའ་བརྒྱབ་ཚར་བ་རེད། ཆབ་སྲིད་པ་དང་ལས་འགུལ་བ་རེ་ཟུང་གིས་ད་ལྟ་ད་དུང་ཨུ་ཚུགས་ཀྱིས་༧གོང་ས་མཆོག་ལ་འགན་བཀལ་ནས་དབང་སྐུར་གྱིན་འདུག འདི་ཐོབ་ཐང་མ་ཡིན་པའི་ཐོབ་ཐང་གཞན་ཞིག་གི་འཐབ་རྩོད་བྱེད་སྟངས་གསར་ཤོས་དེ་རེད། སྔོན་མ་༧གོང་ས་མཆོག་ལྗིད་ཅིག་གེར་འོད་ཆེམ་མེར་ཆོས་སྲིད་ཀྱི་ཁྲི་འཕང་མཐོན་པོར་བཞུགས་སྐབས། ༧གོང་ས་མཆོག་གིས་ངལ་གསོ་རྒྱག་དགོས་སྐོར་དང་། ཆོས་དང་ཆབ་སྲིད་མཉམ་འཁྱེར་མི་འོས་རབས། ཁོང་སྐུ་མ་འདས་བར་བོད་པར་དམངས་གཙོ་ཡང་དག་པའི་ལམ་ཁ་ཞིག་ཡེ་ནས་ཡོང་ཐབས་མེད་སྐོར་བརྗོད་ཡོད།
ཉེ་ལམ་སྤྱི་འཐུས་གྲོས་ཚོགས་ནང་མི་སྒེར་གྱི་ལྟ་བའི་རྒྱབ་སྣོན་ལ་༧གོང་ས་མཆོག་གི་བཀའ་རྩོམ་ལུང་འདྲེན་བྱས་ཏེ་སྐབས་བཅུ་བཞི་བའི་སྤྱི་འཐུས་གྲོས་ཚོགས་ནང་ཕམ་ཉེས་ཕྱིན་ཚར་བ་ཞིག་བསྐྱར་དུ་གླེང་། ༸གོང་ས་མཆོག་གིས་རང་དབང་གསུངས་པ་དེ་དོན་ལ་རང་བཙན་ཡིན་ཚུལ་ནན་གྱིས་བསྒྲུབ། དེ་ལ་དགའ་ལྡན་ཕོ་བྲང་གིས་ “༸གོང་ས་མཆོག་སྐུ་ངོ་མ་ཉེ་འགྲམ་དུ་བཞུགས་བཞིན་དུ་ཁོང་གི་གསུང་གི་ཚིག་དོན་ལ་དངོས་དོན་མིན་པའི་འགྲེལ་བཤད་གནང་བ་དེ་ལ་འདི་གའི་འབྲེལ་ཡོད་ནས་གསལ་བཤད་ཅིག་མ་ཞུས་ན། བློ་གྲོས་ཞན་པ་འགའ་ཞིག་མགོ་བོ་རྨོངས་གཞི་དང་། རྒྱ་རིགས་རྣམས་ལ་དྭོགས་འདྲོགས་བསླང་གཞི།”ཞེས་རྒྱལ་བའི་དགོངས་པ་འགྲེལ་སྟངས་ནོར་ཡོད་པ་གསལ་བཤད་བྱས།
མ་གཞི་བོད་སྤྱི་བའི་ལས་དོན་ཐོག་སྒེར་སོ་སོར་ཡང་དག་པའི་ལྟ་བ་ཞིག་དང་། བརྟན་བརླིང་གི་བཞེངས་ཕྱོགས་ཤིག་ཡོད་ན་ནི། མི་སྒེར་ལ་སྒལ་ཚིགས་ཡོད་པའི་ཟིལ་ཤུགས་ངོམ་ཆོག་པ་ཞིག་དང་། སྤྱི་ཚོགས་དང་མི་རིགས་ཀྱིས་ཀྱང་རྒྱན་དུ་འཕྱར་ཆོག་པ་ཞིག་རེད། ལངས་ཕྱོགས་དེའི་རྒྱབ་དཔུང་ལ་ལུང་དང་རིགས་པ་གཞན་ནས་འཚོལ་དགོས་དོན་མེད་ལ། ལྷག་པར་དུ་༧གོང་ས་མཆོག་གིས་ཞལ་གསལ་བོར་གསུངས་ཡོད་པ་ཞིག་ཀྱོག་ཀྱོག་གུག་གུག་བཟོས་ཏེ། བོད་སྐད་ནང་གི་གསུང་ཚིག་ཅིག་ལ་དབྱིན་སྐད་ནང་ནས་འགྲེལ་བཤད་བཙལ་ནས་རང་གི་མངོན་འདོད་བསྒྲུབ་ཐབས་བྱེད་པ་ནི་དེ་བས་ཀྱང་གླེན་ནོ།།
སྔོན་ཆད་སངས་རྒྱས་ཀྱི་བཀའ་དང་དགོངས་པ་འགྲེལ་སྟངས་མ་འདྲ་བའི་དབང་གིས་དབུ་མ་དང་སེམས་ཙམ་པ། བྱེ་བྲག་པ་དང་མདོ་སྡེ་བ་སོཊ་གྲུབ་མཐའ་སྣ་ཚོཊ་དར་ཡོད། དེ་ནི་སྟོན་པ་སངས་རྒྱས་ཞལ་མ་བཞུགས་པའི་རྗེས་སུ་རྒྱན་དྲུག་མཆོག་གཉིས་ནས་བརྒྱུད་པའི་སངས་རྒྱས་ཆོས་ལུགས་ལྟ་གྲུབ་ཀྱི་ངོ་བོར་འཕེལ་སྟངས་ཤིག་ཡིན། ༸གོང་ས་ཏཱ་ལའི་བླ་སྐུ་འཚོ་བཞུཊ་རིང་ཆོས་ཀྱི་དགོངས་པ་ཆབ་སྲིད་དུ་བསྲེས་ཤིང་། སྲིད་ཀྱི་ཚིག་དོན་ཆོས་ལུགས་ནས་འཚོལ་གྱིན་པ་འདིས། ༧གོང་ས་མཆོག་དགོངས་པ་གཞན་དོན་དུ་གཤེགས་པའི་ཉིན་དེར། ཉན་ཐོས་སྡེ་བ་བཅོ་བརྒྱད་ཀྱི་ནང་འཛིང་ལས་ཀྱང་སྐྱི་གཡའ་བ་ཞིག་ལ་སྟ་གོན་བྱས་ཡོད་པ་བསྟན་ཡོད།
