རྒྱ་ནག་ནང་ (H7N9) རྟགས་ཅན་གྱི་བྱ་ནད་རིགས་ཤིག་བྱུང་སྟེ། མི་ ༩ འདས་གྲོངས་སུ་ཕྱིན་ཡོད་པ་དང་། མི་ ༢༠ ནད་གཞི་དེའི་དབང་གིས་མྱུར་སྐྱོབ་སྨན་བཅོས་བྱེད་ཀྱི་ཡོད་འདུག
ཉེ་ཆར་རྒྱ་ནག་ཧྲང་ཧེ་གྲོང་ཁྱེར་དུ་ (H7N9) རྟགས་ཅན་གྱི་བྱ་ནད་རིགས་ཤིག་བྱུང་སྟེ། ཟླ་འདིའི་ཕྱི་ཚེས་ ༩ བར་རྒྱ་ནག་ཧྲང་ཧེ་གྲོང་ཁྱེར་གྱི་མི་ ༡༣ དང་ཅཱང་སུའུ་གྲོང་ཁྱེར་གྱི་མི་ ༨ ། ཀྲེ་ཅང་གྲོང་ཁྱེར་གྱི་མི་ ༥ ། ཨན་ཝེ་གྲོང་ཁྱེར་གྱི་མི་ ༢ ། གཞན། ནན་ཅིན་སོགས་གྲོང་ཁྱེར་ཁག་ཅིག་བཅས་ཁྱོན་མི་ ༣༥ ལྷག་ལ་བྱ་ནད་བྱུང་སྟེ། མི་༩ འདས་གྲོངས་སུ་ཕྱིན་ཡོད་པ་དང་། མི་༢༠ ལྷག་ལ་མྱུར་སྐྱོབ་སྨན་བཅོས་བྱེད་ཀྱི་ཡོད་འདུག གནས་ཚུལ་དེ་བྱུང་རྗེས་རྒྱ་ནག་གཞུང་གིས་ཧྲང་ཧེ་གཙོས་པའི་གྲོང་ཁྱེན་ཁག་གི་འདབ་ཆགས་ཁྲོམ་རའི་བྱ་རིགས་ཁྲི་ ༢ ལྷག་དམར་གསོད་བཏང་ཡོད་པ་མ་ཟད། འདབ་ཆགས་ཀྱི་ཁྲོམ་ར་མང་པོ་ཞིག་སྒོ་རྒྱག་དགོས་བྱུང་འདུག་ལ། རྒྱ་ནག་གཞུང་གིས་ཕྱི་ཕྱོགས་ནས་ཆེད་ལས་མཁས་པ་སོགས་གདན་འདྲེན་གྱིས་བརྟག་དཔྱད་ཞིབ་འཇུག་བྱས་ཡོད་ཀྱང་། ད་ལྟའི་ཆར་ཡང་ན་ཚའི་འབྱུང་ཁུངས་དང་བྱུང་རྐྱེན་གསལ་བོ་ཤེས་རྟོགས་མ་ཐུབ་པར་ལྷག་འདུག
རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས། ཐེངས་འདིའི་ན་ཚ་དེ་ཧྲང་ཧེ་གྲོང་ཁྱེར་དུ་མི་མང་བ་དང་འདུ་འཛི་ཆེ་བའི་དབང་གིས་བྱུང་བ་ཞིག་དང་། ན་ཚ་དེ་རང་དགར་མི་མང་ནང་ཁྱབ་བརྡལ་དུ་འགྲོ་བའི་རིགས་ཤིག་མིན་ཚུལ་བསྒྲགས་ཡོད་པ་མ་ཟད། ཉེ་ལམ་རྒྱ་ནག་འཕྲོད་བསྟེན་སྡེ་ཚན་གྱིས་ཨ་རིའི་ ( Bio Cryst) ཞེས་པའི་སྨན་རྫས་བཟོ་གྲྭ་ཞིག་གིས་ཐོན་སྐྱེད་བྱས་པའི་འགོག་སྨན་ཞིག་ཧྲང་ཧེ་གཙོས་པའི་ཉེ་ཁུལ་གྱི་གྲོང་ཁྱེར་ཏུ་བཀྲམས་ཏེ། ན་ཚ་ཁྱབ་བརྡལ་དུ་མི་འགྲོ་བའི་ཐབས་ཤེས་བྱེད་བཞིན་ཡོད་ཀྱང་། ད་ལྟའི་ཆར་འགོས་ནད་དེའི་དབང་གི་རྐྱེན་ལམ་དུ་ཕྱིན་པ་དང་ཁྱབ་བརྡལ་དུ་འགྲོ་བཞིན་པའི་མིའི་གྲངས་འབོར་འཕར་སྣོན་བྱུང་བཞིན་ཡོད་སྟབས། ན་ཚ་ཐོག་མར་བྱུང་ཡུལ་གྱི་མི་མང་དང་ཉེ་ཁུལ་གྱི་མི་མང་པོ་ས་གནས་གཞན་དུ་ཉེན་ཡོལ་གནས་སྤོར་བྱེད་ཀྱི་ཡོད་འདུག་ལ། རྒྱ་ནག་རྒྱལ་ཡོངས་ཀྱི་གྲོང་ཁྱེར་དང་གནས་གཞན་དུ་འགོས་ནད་ཁྱབ་བརྡལ་དུ་འགྲོ་བར་བློ་འཚབ་བྱས་ཏེ་སྔོན་འའགོག་གི་བྱེད་ཐབས་འདྲ་མིན་སྤྱོད་བཞིན་ཡོད་འདུག
འདིའི་ཐད་འཛམ་གླིང་འཕྲོད་བསྟེན་རྩ་འཛུགས་ཀྱི་མགྲིན་ཚབ་པ་སྐུ་ཞབས་ཧཱ་ཐིར་ལགས་ཀྱིས། ཁོང་ཚོའི་ངོས་ནས་དོ་སྣང་ཆེན་པོ་བྱས་ཏེ་རྒྱ་ནག་ནང་ཁྱབ་བརྡལ་དུ་འགྲོ་བཞིན་པའི་ (H7N9 ) རྟགས་ཅན་གྱི་ནད་གཞིའི་འབྱུང་ཁུངས་དང་བྱུང་རྐྱེན་ལ་བརྟག་དཔྱད་བྱེད་ཀྱི་ཡོད་ཀྱང་། ད་ལྟའི་བར་མིའི་རིགས་ལ་འགོས་མྱོང་མེད་པའི་ན་ཚ་འདི་རྒྱ་ནག་ནང་ཐོག་མར་བྱུང་བར་བློ་འཚབ་ཡོད་སྐོར་དང་། ད་ལྟའི་བར་བརྟག་དཔྱད་བྱས་ཀྱང་ནད་གཞིའི་བྱུང་རྐྱེན་ཧ་ཅང་ལྐོག་གྱུར་ཡིན་སྟབས་གསལ་བོ་ཤེས་ཀྱི་མེད་ཚུལ་བརྗོད་འདུག
གསར་འགོད་པ། དོན་གོ
