ཁ་སང་ཕྱི་ཚེས་ ༡༦ ཉིན་སུད་སི་རྒྱལ་ཡོངས་གྲོས་ཚོགས་ཀྱི་ཚོགས་གཙོ་ལྕམ་མཱ་ཡ་གྷི་ར་ཧྥི་མཆོག་གིས་གདན་ཞུ་ལྟར། ༧གོང་ས་མཆོག་སུད་སི་གྲོས་ཚོགས་ནང་ཆིབས་བསྒྱུར་བསྐྱངས་ཏེ་གསུང་བཤད་གནང་ཡོད།
ཉེ་བའི་ཟླ་ཤས་གོང་ནས་༧གོང་ས་མཆོག་སུད་སིར་ཆིབས་བསྒྱུར་བསྐྱང་རྒྱུ་གཏན་ཁེལ་བྱུང་མ་ཐག སུད་སི་བོད་དོན་རྒྱབ་སྐྱོར་ཚོགས་པའི་འཐུས་མི་དང་། སུད་བོད་མཐུན་གྲོགས་ཚོགས་པ་སོགས་ཀྱིས་༧གོང་ས་མཆོག་སུད་སི་གཞུང་གི་གནད་ཡོད་མི་སྣར་མཇལ་འཕྲད་ཞུ་ཐུབ་ཐོག་འབད་བརྩོན་གནང་ཡོད་པ་དང་། དེའི་རྗེས་སུད་སི་རྒྱལ་ཡོངས་གྲོས་ཚོགས་ཀྱི་ཚོགས་གཙོ་ལྕམ་མཱ་ཡ་གྷི་ར་ཧྥི་(Maya Graf)མཆོག་གིས་༧གོང་ས་མཆོག་གྲོས་ཚོགས་ནང་གདན་ཞུ་གནང་རྒྱུ་ཡིན་པའི་གསལ་བསྒྲགས་བསྐྱངས་པ་ལྟར། ཕྱི་ཚེས་ ༡༦ ཉིན་གྱི་ཉིན་གུང་ཆུ་ཚོད་ ༡ ཐོག་གྲོས་ཚོགས་འཐུས་མི་རྣམས་ཀྱི་ཕེབས་བསུའི་ཁྲོད་༧གོང་ས་མཆོག་སུད་སི་རྒྱལ་ས་སྦརན་ནང་བརྟེན་གཞི་བྱས་པའི་(Bundeshaus)ཞེས་པའི་གྲོས་ཚོགས་ར་བའི་ནང་ཆིབས་བསྒྱུར་བསྐྱངས་ཏེ། གྲོས་ཚོགས་ཀྱི་གསར་འགོད་ཚོགས་ཁང་ནང་གྲོས་ཚོགས་འཐུས་མི་ཚོ་དང་བོད་དོན་ཐད་དྲི་བ་དྲིས་ལན་བཅས་གནང་ཡོད་འདུག
དེ་རིང་སུད་སི་གྲོས་ཚོགས་ཀྱི་ཚོགས་གཙོ་ལྕམ་མཱ་ཡ་གྷི་ར་ཧྥི་མཆོག་གིས་གསུངས་དོན། “༧གོང་ཏཱ་ལའི་བླ་མ་མཆོག་གྲོས་ཚོགས་ནང་གདན་ཞུ་གནང་ཐུབ་པ་ང་ཚོ་གྲོས་ཚོགས་ཀྱི་གཟི་བརྗིད་ཡིན་པ་དང་། ༧གོང་ས་མཆོག་སུད་སི་རྒྱལ་ཡོངས་གྲོས་ཚོགས་ནང་གདན་འདྲེན་ཞུས་པ་གསལ་བསྒྲགས་བྱས་རྗེས། ཕྱོགས་མཐའ་ཁག་གིས་མི་མང་དང་གནད་ཡོད་མི་སྣ་གང་མང་ཞིག་གིས་དགའ་བསུའི་འཚམས་འཕྲིན་མང་པོ་འབྱོར་བྱུང་ལ། དམིགས་བསལ་དེ་རིང་འདིར་༧གོང་ས་མཆོག་གདན་འདྲེན་ཞུ་སྐབས་ཕྱི་ལོགས་ལ་བོད་རིགས་སུད་སི་མི་མང་ཧ་ཅང་ཕོན་ཆེན་པོས་དགའ་ཚོར་ཆེན་པོས་ཕེབས་བསུ་ཞུ་བཞིན་པ་མཐོང་ན། དེ་བས་དགའ་སྤོབས་སྐྱེས་སོང” ། ཅེས་དང་། “ བོད་ནང་གི་གནས་སྟངས་ཛ་དྲག་པོ་ཡིན་པ་དང་། དམིགས་བསལ་ཆོས་དང་རིག་གཞུང་རྡོག་རོལ་གྱི་ཉེན་ཚབ་ཆེན་པོར་འཕྲད་ཀྱིན་པའི་དུས་སྐབས་འདིར། བོད་ནང་གི་བོད་པ་ཚོས་རེ་བ་ཡོད་ཚད་༧གོང་ས་མཆོག་དང་ཕྱི་ལོགས་སུ་ཡོད་པའི་བོད་པ་རྣམས་ལ་བརྒྱབ་ཡོད་པ་ང་ཚོས་ཤེས་ཀྱི་ཡོད” ཅེས་བོད་ཀྱི་གནས་བབ་ཛ་དྲག་ཏུ་འགྲོ་བཞིན་པའི་སྐབས་འདིར་བོད་པ་རྣམས་ལ་གདུང་སེམས་མཉམ་སྐྱེད་ཡོད་ཅེས་སོགས་གསུངས་འདུག
ཐེངས་འདི་ནི་༧གོང་ས་མཆོག་སུད་སིའི་གྲོས་ཚོགས་ནང་གཞུང་འབྲེལ་ཐོག་གདན་འདྲེན་ཞུས་པ་ཐེངས་དང་པོ་ཡིན་པ་དང་། སུད་སིའི་བོད་རིགས་ ༥༠༠ ལྷག་དང་བོད་དོན་རྒྱབ་སྐྱོར་བ་དང་ཕྱི་རྒྱལ་མི་རིགས་མང་པོ་གྲོས་ཚོགས་ཀྱི་མདུན་ཐང་དུ་འཛོམས་ཏེ། ༧གོང་ས་མཆོག་གྲོས་ཚོགས་ར་བར་ཕེབས་པར་དགའ་བསུ་དང་། ལྷག་དོན་མི་མང་གིས་དགའ་ཚོར་ཆེན་པོ་༧གོང་ས་མཆོག་སྐུ་ཚེ་བརྟན་པར་ཤོག ཅེས་དགའ་ཚོར་གྱི་སྐད་འབོད་ཤུགས་ཆེན་གནང་ཡོད་འདུག
ལྕམ་མཱ་ཡ་གྷི་ར་ཧྥི་མཆོག་ནི་ནམ་རྒྱུན་བོད་དོན་ཐད་ཐུགས་སྣང་གནང་མཁན་ཞིག་ཡིན་ལ། གྲོས་ཚོགས་ཀྱི་ཚོགས་གཙོ་མ་ཆགས་པའི་གོང་། ཕྱི་ལོ་ ༢༠༡༡ ལོའི་ཟླ་ ༡༡ ནང་སྲིད་སྐྱོང་བློ་བཟང་སེང་གེ་མཆོག་དང་མཇལ་འཕྲད་གནང་སྟེ་བོད་དོན་ཐོག་གླེང་སློང་གནང་ཡོད།
ལྕམ་མཱ་ཡ་གྷི་ར་ཧྥི་མཆོག་བཀའ་དྲིན་ཆེ། དེ་བཞིན་དཔལྡན་སྲིད་སྐྱོང་མཆོག་ནས་སྐབས་དང་དུས་འཇུས་ནས་ལྕམ་མཱ་ཡ་གྷི་ར་ཧྥི་མཆོག་དང་འབྲེལ་བ་གནང་ཐུབ་པ་དེ་དགའ་བསུ་ཡོད།
བཀྲ་ཤིས་སོ།།
སུད་གཞུང་ལ་བཀའ་དྲིན་ཆེ་འོ།།
ད་དུང་འཛམ་གླིང་མཐའ་ཁུག་ན་ལུས་པའི་མི་རིགས་ཚོས་ཀྱང་། ༧གོང་ས་མཆོག་གི་གསེར་ཞལ་མ་མཇལ་ཞིང་། བྱམས་བརྩེའི་མཉེན་གཤིན་གྱི་ཐུགས་དགོངས་མ་གཏོགས་པ་རྣམས་ཀྱིས་གང་མྱུར་གཏོགས་ནས་བོད་ཀྱི་འཚེ་མེད་རང་དབང་བདེ་སྐྱིད་ཀྱི་དུས་སྐབས་བཟང་པོ་ཛ་དྲག་ཏུ་འཆར་པར་སྨོན་ནོ།།
གཞིས་ལུས་དཔའ་བོ་དཔའ་མོ་རྣམས་རྒྱལ་འགྱུར་ཅིག