ཚེ་རིང་རྡོ་རྗེས་བྲིས།
བོད་གཞིས་པའི་གནས་སྟངས་ཛ་ཇེ་དྲག་ཏུ་འགྱུར་ཐེངས་རེར། བཙན་བྱོལ་བ་ཚོའི་བོད་དོན་ཞུ་གཏུག་གི་འབོད་སྒྲའང་འུར་ཟིང་ཆེ་རུ་འགྲོ་བ་དང་། ཕལ་ཆེ་བའི་སེམས་ལ་ཐུན་མོང་དུ་འཆར་བའི་ཐབས་ལམ་ནི་རྒྱལ་སྤྱིའི་རྒྱབ་སྐྱོར་ལ་བརྟེན་ནས་རྒྱ་ནག་ལ་གནོན་ཤུགས་ཆེ་ཙམ་སྤྲོད་འདོད་པ་དེ་ཡིན། ལྷག་པར་དུ་བཙན་བྱོལ་གྱི་ཆབ་སྲིད་པར་ཁས་འཆེས་པ་དག་ལ་མཚོན་ན། ཞུ་གཏུག་གི་ཐབས་ལམ་འདི་ནི་མེད་དུ་མི་རུང་བའི་ཁ་གཡེང་ཞིག་ཡིན་ལ། དེ་དང་བྲལ་ན་ཁོ་ཚོའི་ཆབ་སྲིད་ཀྱི་འཇོན་ཐང་ངོམ་སའི་སྡིངས་ཆ་ཤོར་བ་དང་མཚུངས། དེའི་ཕྱིར་ཁོ་ཚོ་སུས་ཀྱང་ཐབས་ལམ་དེ་ཉིད་འགག་པའི་ཕམ་ཁ་གླེང་འདོད་མེད་པ་དང་། ཐབས་ལམ་དེའི་ཁ་གཏད་དུ་ལངས་པའི་རྒྱ་ནག་གི་སྟོབས་ཤུགས་ནི་དེ་བས་ཀྱང་གླེང་འདོད་མེད། སྤྱིར་བཏང་གི་ཆ་ནས་ཀྱང་བཙན་བྱོལ་གྱི་ཆབ་སྲིད་པ་དག་གིས་མི་མང་གི་མདུན་ནས་རང་གི་ཕམ་ཁ་ངོས་བླངས་པའི་ལོ་རྒྱུས་ཞིག་ད་སྔ་ཕན་ཆད་ལ་བྱུང་མྱོང་མེད་པར་སྣང་།
དེང་སྐབས་དབྱིན་ཡིག་གི་བྱང་ཚད་རན་པར་ལྡན་ཞིང་སྲིད་དོན་ལ་དོ་སྣང་ཡོད་པ་ཞིག་ཡིན་ཚེ། རྒྱལ་སྤྱིའི་སྲིད་འབྱོར་དམག་གསུམ་གྱི་བརྡ་འཕྲིན་ཁོར་ཡུག་ནས་རྒྱ་ནག་གི་སྟོབས་ཤུགས་ནི་འཆར་ཅན་དུ་མཐོང་ཐུབ། ཆེས་མངོན་གསལ་དུ་མཐོང་བ་ནི་རྒྱ་ནག་གི་དཔལ་འབྱོར་གྱི་སྟོབས་ཤུགས་ཡིན་པ་དང་། དེས་འཛམ་གླིང་གི་སྲིད་གཞུང་དང་། ཚོགས་པ་དང་། སྒེར་བ་བཅས་མང་པོ་ཞིག་གི་རྒྱུ་འབྲས་ཀྱི་བློ་མིག་ལོང་བར་བཏང་། སྟོབས་ལྡན་རྒྱལ་ཁབ་ཚོས་ཁ་ནས་འཛམ་གླིང་ཆིག་སྒྲིལ་ཟེར་ཡང་། དོན་དུ་ཆིག་སྒྲིལ་གྱི་སྙིང་བོ་ནི་དཔལ་འབྱོར་གྱི་ཁེ་བཟང་ལས་མ་འདས། དེ་ཡང་རྒྱ་ནག་གི་དཔལ་འབྱོར་དེ་འདྲའི་སྟོབས་ཤུགས་ཆེན་པོ་ཆགས་པའི་རྒྱུ་མཚན་རགས་ཙམ་བཤད་ན། རྒྱ་ནག་གི་མི་གྲངས་དང་། ས་བབ། སྒེར་གཅོད་ཆབ་སྲིད་བཅས་ཀྱིས་ནུས་པ་གལ་ཆེན་ཐོན་པར་འདོད། རྒྱ་ནག་ལ་མི་གྲངས་ཐེར་འབུམ་གཅིག་དང་དུང་ཕྱུར་གསུམ་ལྷག་ཡོད་པ་དང་། དེས་འཛམ་གླིང་སྤྱིའི་མི་འབོར་གྱི་བརྒྱ་ཆའི་ ༡༩ ་༡༣ ཟིན་ཅིང་མི་གྲངས་ཆེས་མང་ཤོས་ཀྱི་རྒྱལ་ཁབ་ཡིན། མི་གྲངས་མང་ན་ངལ་རྩོལ་གྱི་ཐོན་ཁུངས་ཆེ་བ་དང་འགྲོ་འདུག་ཉལ་འཆག་གི་མཐུན་རྐྱེན་མང་པོ་དགོས། རྒྱ་ནག་གིས་ཕྱི་རྒྱལ་ནས་ཐད་ཀར་བཞག་པའི་མ་རྩ་དང་དམངས་ཀྱི་ངལ་རྩོལ་རིན་གོང་ཁེ་བ་ལ་བརྟེན་ནས་ཚོང་ཟོག་བཟོས་ཏེ་ཕྱི་འཚོང་བྱེད་པ་དང་། ནང་གི་དཔལ་འབྱོར་ཡར་རྒྱས་དང་འཛུགས་སྐྲུན་རྒྱ་བསྐྱེད་པར་ནུས་པའི་ཐོན་ཁུངས་ཀྱིས་མི་ལྡང་བས་ཕྱི་ཕྱོགས་ནས་ནང་འདྲེན་བྱེད་དགོས། ཕྱི་རྒྱལ་ནས་རྡོ་སྣུམ་དང་རྡོ་སོལ། གཏེར་རྫས་སོགས་ནང་འདྲེན་བྱེད་པར་མ་དངུལ་གཏོང་བ་དང་། རྒྱལ་ཁབ་གཞན་གྱིས་དེའི་གོ་སྐབས་ལོངས་སུ་སྤྱོད་པ་དང་ཕན་ཚུན་གཅིག་ལ་གཅིག་རྟེན་གྱི་ཚོང་འབྲེལ་བྱུང་། རྒྱ་ནག་གིས་ཕྱི་དངུལ་གསོག་འཇོག་གིས་འཛམ་གླིང་སྤྱིའི་ཕྱི་དངུལ་གསོག་འཇོག་གི་ཆ་ཤས་ངེས་ཅན་ཞིག་ཟིན། ལོ་ཤས་སྔོན་དུ་འཛམ་གླིང་ལ་དཔལ་འབྱོར་ཉམས་ཉེས་བྱུང་བའི་དུས་སུ། རྒྱལ་ཁབ་མང་པོས་རྒྱ་ནག་ལ་བརྟེན་ནས་དཔལ་འབྱོར་སླར་གསོའི་ཐབས་ལམ་བཙལ་དགོས་བྱུང་།
དུས་རབས་ཕྱེད་ལྷག་གི་སྔོན་དུ་འཇར་པན་གྱིས་ཨ་མེ་རི་ཁ་དང་ཚོང་འབྲེལ་བཟུང་ནས་དཔལ་འབྱོར་ཡར་རྒྱས་བཏང་སྟེ་རང་གི་དཔལ་འབྱོར་འཛམ་གླིང་དུ་ཁ་ཕྱོགས་པ་དང་། རིམ་གྱིས་དཔལ་འབྱོར་འཕེལ་ཚད་ཤིན་ཏུ་རྒྱས་ནས་ཨེ་ཤ་ཡའི་མངའ་ཁུལ་དང་འཛམ་གླིང་གི་སྔོན་ཐོན་གྱི་གྲས་སུ་སླེབས། དེ་ནས་ལྷོ་ཀོ་རི་ཡ་དང་། སིན་ག་ཕོར། ཐའེ་ཝན། ཧོང་ཀོང་བཅས་ཀྱིས་ཀྱང་འཇར་པན་གྱི་དཔལ་འབྱོར་འཕེལ་རྒྱས་ཀྱི་ལམ་ཁ་དེ་ལྟ་བུར་བསྙེགས་ནས་རིམ་བཞིན་ཡར་རྒྱས་ལེགས་པའི་གྲས་སུ་སླེབས། ཡུན་རིང་མ་འགོར་བར་རྒྱ་ནག་ཀྱང་དཔལ་འབྱོར་དར་སྤེལ་གྱི་ལམ་བུར་ཞུགས་ཏེ་ནང་ཁུལ་དུ་དཔལ་འབྱོར་བཅོས་སྒྱུར་སྒོ་འབྱེད་དང་། རྒྱལ་སྤྱི་དང་མངའ་ཁུལ་གྱི་ཚོང་དོན་ལ་སོགས་པའི་སྒྲིག་འཛུགས་སྣ་ཚོགས་སུ་ཞུགས། བགྲང་བྱ་ཉི་ཤུ་ལྷག་གི་འབད་རྩོལ་ལ་བརྟེན་ནས་ཕྱི་འཚོང་དང་ནང་འདྲེན། མངའ་ཁུལ་དང་འཛམ་གླིང་གི་དཔལ་འབྱོར་འབྲེལ་ལམ་བཙུགས་པ་དང་། དཔལ་འབྱོར་ཡར་རྒྱས་ཀྱི་གྲུབ་འབྲས་བློ་ཡུལ་ལས་འདས་པ་ཐོབ། དེང་སྐབས་རྒྱ་ནག་གི་དཔལ་འབྱོར་ནི་ཨེ་ཤ་ཡའི་མངའ་ཁུལ་ཙམ་དུ་མ་ཟད། ནུབ་ཕྱོགས་ཀྱི་སྟོབས་ལྡན་རྒྱལ་ཁབ་དག་གིས་ཀྱང་མ་བརྟེན་རང་བརྟེན་ཡིན་པའི་དཔལ་འབྱོར་གྱི་མ་ལག་ཅིག་ཆགས། འདིར་རྒྱ་ནག་གི་ཚོང་དོན་དང་འབྲེལ་བའི་གྲངས་འབོར་གནད་འགག་ཆེ་བ་འགའ་བཀོད་ན། ང་ཚོས་རྒྱ་ནག་གི་དཔལ་འབྱོར་སྟོབས་ཤུགས་དེ་རོབ་ཙམ་ཧ་གོ་ཐུབ། འཛམ་གླིང་ཚོང་དོན་སྒྲིག་འཛུགས་ཀྱིས་བཏོན་པའི་སྡོམ་རྩིས་ཞིག་ན། ༢༠༡༡ ལོར་རྒྱ་ནག་གིས་ཕྱི་འཚོང་དང་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་འདི་འདྲ་འདུག ༢༠༡༡ ལོའི་ནང་དུ། རྒྱ་ནག་གིས་བྱང་ཨ་མེ་རི་ཁ་ལ་ཕྱི་འཚོང་བྱས་པའི་ཚོང་རྫས་སྤྱིའི་རིན་འབབ་ཨ་སྒོར་ཐེར་འབུམ་ ༣༧༤་ ༦༡ དང་། བྱང་ཨ་མེ་རི་ཁ་ནས་རྒྱ་ནག་ལ་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༡༥༤་ ༦༧ ཟིན། ལྷོ་དང་དབུས་ཨ་མེ་ཁར་ཕྱི་འཚོང་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༩༤་ ༠༥ དང་། དེ་ནས་རྒྱ་ནག་ལ་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༡༠༩ ་༢༦ ཟིན། ཡུ་རོབ་ཏུ་ཕྱི་འཚོང་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༣༨༡ ་༨༩ དང་། དེ་ནས་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༢༤༥་༨༥ ཟིན། རང་བཙན་རྒྱལ་ཁབ་མཐུན་ཚོགས་ལ་ཕྱིར་འཚོང་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༦༧་༢༣ དང་། དེ་ནས་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༦༥་༥༣ ཟིན། ཨ་ཧྥེ་རི་ཁ་ལ་ཕྱི་འཚོང་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༦༩་༡༤ དང་། དེ་ནས་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༩༣་༢༤ ཟིན། དཀྱིལ་ཤར་ས་ཁུལ་ལ་ཕྱི་འཚོང་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༧༩་༦༩ དང་། དེ་ནས་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༡༣༤་༡༡ ཟིན། ཨེ་ཤ་ཡའི་ཁུལ་དུ་ཕྱི་འཚོང་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༨༢༤་༨༨ དང་། དེ་ནས་ནང་འདྲེན་བྱས་པའི་ཚོང་རྫས་སྤྱིའི་རིན་འབབ་ནི་ཨ་སྒོར་ཐེར་འབུམ་ ༩༣༤་༧༠ ཟིན། ཡང་སྡོམ་རྩིས་དེར་རྒྱ་ནག་གི་ཚོང་གྲོགས་ཆེ་ཤོས་ཁག་ནི། ཡུ་རོབ་མཐུན་ཚོགས་དང་པོ། ཨ་རི་གཉིས་པ། འཇར་པན་གསུམ་པ། ཧོང་ཀོང་བཞི་བ། ཐའེ་ཝན་ལྔ་བ་ཡིན་པར་བཤད།
རྒྱ་ནག་གི་དཔལ་འབྱོར་སྟོབས་ཤུགས་ཆེ་རུ་སོང་བ་དང་མཉམ་དུ། དེའི་རྒྱལ་སྤྱིའི་ཆབ་སྲིད་དང་འཐབ་ཇུས་ཀྱི་སྟོབས་ཤུགས་ཀྱང་ཆེ་རུ་གྱུར། ད་ལྟ་ཨེ་ཤ་ཡའི་མངའ་ཁུལ་དུ་རྒྱ་ནག་གི་སྟོབས་ཤུགས་ལ་འགྲན་ནུས་པའི་རྒྱལ་ཁབ་གཞན་མེད། རྒྱ་ནག་གི་ཨེ་ཤ་ཡའི་མངའ་ཁུལ་གྱི་སྟོབས་ཤུགས་དེས་ཨ་རི་སྲིད་གཞུང་ལའང་བློ་འཚབ་སྐྱེས་སུ་བཅུག རྒྱ་ནག་གི་སྟོབས་ཤུགས་ཨེ་ཤ་ཡའི་མངའ་ཁུལ་དུ་ཡར་འགྱིངས་པ་ན། འཛམ་གླིང་ན་ཨང་དང་པོར་ཆགས་པའི་ཨ་རིའི་སྟོབས་ཤུགས་ཀྱང་ཨེ་ཤ་ཡའི་མངའ་ཁུལ་ནས་རེ་ཞིག་ཉམས་ཞན་པའི་གནས་སུ་ལྷུང་། ད་ལྟ་དཔལ་འབྱོར་གྱི་སྟོབས་ཤུགས་ཙམ་དུ་མ་ཟད། རྒྱལ་སྤྱིའི་གནད་དོན་གལ་ཆེན་གྱི་ཕྱོགས་ནས་རྒྱལ་ཁབ་སྟོབས་ལྡན་ཚོས་རྒྱ་ནག་གི་གདོང་ལ་ལྟ་དགོས། ཁྱིམ་མཚེས་རྒྱལ་ཁབ་ཁ་ཅིག་གིས་རྒྱ་ནག་གི་རོགས་སྐྱོབ་ལ་བརྟེན་ནས་ནང་ཁུལ་གྱི་བདེ་འཇགས་བསྲུང་དགོས་པ་དང་། གཏེར་ཁ་ཡིས་ཕྱུག་པའི་ཨ་ཧྥེ་རི་ཁ་གླིང་དང་ལ་ཏྲིན་ཨ་མེ་རི་ཁ་གླིང་གི་རྒྱལ་ཁབ་ཁག་ཅིག་དང་། ར་ཤི་ཡ། ཨོ་སི་ཁྲི་ལི་ཡ་ལ་སོགས་ཀྱིས་རྒྱ་ནག་ལ་རྡོ་སྣུམ་དང་། གཏེར་རྫས། སོལ་རླངས་སོགས་བཙོང་ནས་ཁེ་བཟང་ཕར་ཟ་ཚུར་ཟ་བྱེད།
མདོ་དོན་གཅིག་ཏུ་དྲིལ་ན། ཨེ་ཤ་ཡ་མངའ་ཁུལ་དང་འཛམ་གླིང་ལ་དཔལ་འབྱོར་ཆིག་སྒྲིལ་བྱས་པ་བརྒྱུད་ནས་ད་ཆར་རྒྱ་ནག་ནི་འཛམ་གླིང་གི་དཔལ་འབྱོར་མ་ལག་གལ་ཆེན་ཞིག་དུ་གྱུར་བ་དང་། རྒྱལ་ཁབ་ཆེ་འབྲིང་ཆུང་གསུམ་གྱི་དཔལ་འབྱོར་ཡར་རྒྱས་ནི་རྒྱ་ནག་དང་གཅིག་ལ་གཅིག་རྟེན་གྱི་འབྲེལ་བ་དམ་ཟབ་ཆགས། དམངས་གཙོ་དང་སྟོབས་ལྡན་གྱི་རྒྱལ་ཁབ་ཚོས་འགྲོ་བ་མིའི་ཐོབ་ཐང་གི་གནས་སྟངས་དང་དྲང་བདེན་གཙིགས་སུ་འཛིན་པའི་རྣམ་འགྱུར་ལ་གཡོ་འགུལ་ཐེབས་པ་དང་། སྟོབས་ལྡན་རྒྱལ་ཁབ་ཚོས་རང་གི་མི་དམངས་ཀྱི་ཐོབ་ཐང་དང་དཔལ་འབྱོར་གྱི་ཁེ་ཕན་ནི་བླ་ན་མེད་པའི་དོན་ཆེན་དུ་བརྩི་ནའང་། བཙན་གནོན་མྱོང་བཞིན་པའི་ཉམ་ཆུང་བོད་མི་ལྟ་བུར་རྒྱབ་སྐྱོར་བྱ་དགོས་ཚེ། གཡོལ་ཐབས་དང་རྣམ་འགྱུར་ཤི་མ་གསོན་ཙམ་སྟོན་པ་ཡིན། རྒྱ་ནག་གཞུང་གིས་ཆབ་སྲིད་སྒེར་གཅོད་ལ་བརྟེན་ནས་རྒྱ་མི་རིགས་དང་མི་རིགས་གཞན་ལ་བཙན་གནོན་དང་བཤུ་བཞོག་བྱས་པ་ལས་བྱུང་བའི་དངུལ་སྒོར་མི་གཙང་བ་དེ་ལ་རྒྱལ་ཁབ་མང་པོས་ཧབ་ཐོབ་བྱེད་པ་དང་། ཁོ་ཚོས་རང་ལ་རག་པའི་དངུལ་སྒོར་ཡོང་ཁུངས་མི་གཙང་བ་དེའི་ཆ་ཤས་ཉུང་ངུ་ཉུང་ངུ་ཙམ་ཞིག་ཉམ་ཆུང་མི་རིགས་དང་འགྲོ་བ་མིའི་ཐོབ་ཐང་ལྟ་རྟོག་ཚོགས་པ་རྣམས་ལ་གནང་སྦྱིན་གྱི་ཚུལ་དུ་སྤྲད་དེ་རོགས་སྐྱོར་ཀྱི་རྣམ་འགྱུར་ཆེན་པོ་སྟོན། བོད་མི་བཙན་བྱོལ་བ་ཉམ་ཆུང་ཚོས་ཀྱང་རོགས་དངུལ་དེའི་ཡ་ང་བའི་འབྱུང་ཁུངས་ལ་དོགས་སྣང་མེད་པར་དྲིན་ཚོར་གྱི་མིག་ཆུ་ཤོར་གྲབས་བྱེད་པ་དང་། རྒྱལ་ཁབ་དེ་ཚོས་བོད་དོན་ལ་བདེན་པའི་རྒྱབ་ལངས་བྱེད་པར་རེ་ལྟོས་ཆེན་པོ་འཆང་། བརྡ་འཕྲིན་དང་ཤེས་ཚད་ཀྱི་མཐུན་རྐྱེན་མེད་པ་ཚོས་དངོས་ནས་མ་ཤེས་ན་ཅི་ཁག འོན་ཀྱང་། བཙན་བྱོལ་གྱི་ཆབ་སྲིད་པ་ཚོས་ད་ལྟའི་རྒྱ་ནག་གི་སྟོབས་ཤུགས་དང་བོད་དོན་ཞུ་གཏུག་གི་འགག་ས་གང་ཡིན་དམར་རྗེན་དུ་མཐོང་ཡང་མི་མང་ལ་དྲང་པོར་བརྗོད་རྒྱུ་ལྟ་ཞོག ད་དུང་འཇོན་མདོག་མདོག་གི་ཆབ་སྲིད་ཟློས་གར་ཞིག་འཁྲབ་པ་འདི་ཇི་འདྲའི་ཐབས་སྐྱོ་ཨང་།།
འདི་ནི་དངོས་ནས་ཡག་པོ་ཞིག་བྲིས་འདུག། བདེན་པ་རེད། ༸གོང་ས་༸མཆོག་ནས་དེང་སྐབས་ཁ་གསལ་སྟབས་བདེའི་ཆེད་བོད་པ་དེང་ཐབ་ཤེས་ཡོད་རྒུ་བྱས་ནས་ཕྱི་རྒྱལ་ཁག་ཡོ་རོབ་དང། ཨ་མི་རི་ཁ་འགྲོ་གི་འདུག་ག་དེ་ཚོ་ཆོས་དང་མི་རིགས་ཀྱི་དོན་དུ་མ་ཡིན་པར་ཌོ་ལ་ཆེད་ཡིན་ཞེས་གསུངས་བཞིན་པ་དེ་ཡིན། མདོ་བསྡུས་ན་དེང་དུས་དངུལ་མེད་ན་ནང་མེད་པ་གཅིག་པ་ཡིན་ལ། མི་རིགས་དང། རྒྱལ་ཁབ། ངའི་ལྟ་བ་དང། ཁྱོད་ཀྱི་ལྟ་བ། བརྗོད་རྒྱུ་ལྷགས་མེད།
ཐེངས་གཉིས་ལ་བཀླགས་ཟིན། ངོ་མ་དོན་སྙིང་ལྡན་པ་ཞིག་བྲིས་འདུག ཐུགས་རྗེ་ཆེ།
རྒྱ་གཞུང་དང་དེའི་སྲིད་བྱུས་བསྔོག་འདོད་ན། ང་ཚོའི་ཕྱོགས་ནས་གྲ་སྒྲིག་ག་རེ་བྱེད་དགོས་སམ།
རྒྱ་ནག་གི་སྟོབས་ཤུགས་ངོ་མ་དེ་གང་ཞིག་གི་ཕྱོགས་སུ་མཆེད་ཡོད་དམ།
ང་ཚོས་རྒྱ་ནག་ལ་འཐབ་རྩོད་བྱེད་སྟངས་དེ་རྒྱ་གཞུང་གི་སྟོབས་ཤུགས་འགུལ་ཐུབ་རྒྱུ་རེད་དམ།
རྒྱ་གཞུང་དང་དེའི་སྲིད་བྱུས་ལ་བསྐྱར་ཞིབ་ཚོགས་ཆུང་ཞིག་ཨེ་ཡོད་དམ།
དེ་རིང་ཚེ་རིང་རྡོ་རྗེ་ཞུ་བས་བསམ་བློ་གཏོང་རྒྱུ་ཡོད་པ་ཞིག་བྲིས་འདུག ཡིན་ནའང། བཙན་བྱོལ་ནང་གི་དེང་དུས་ཆབ་སྲིད་པ་དབུ་མ་ཁ་ཨ་ཝ་ཌི་བློ་བཟང་སེང་གེ་དང། རང་བཙན་ཁ་ཚོགས་གཙོ་ཟུར་པ་ཀརྨ་ཆོས་འཕེལ་གཙོས་ཆབ་སྲིད་པ་དབུ་མ་བ་དང་རང་བཙན་པ་ཚང་མས་དཔལ་འབྱོར་ཐད་ཀྱི་རྒྱ་ནག་གི་འགྱིངས་ཉམས་འདི་དང། དེར་ཨ་རི་དང་ཡོ་རོབ། གཙོས་རྒྱལ་ཁབ་ཁག་གིས་རྐུབ་ལྡགས་རྐྱང་ལྕེ་སྣར་རྐྱང་བྱེད་ཀྱི་ཡོད་པ་ཚོར་ཡོད་པ་རེད། ཆབ་སྲིད་པ་རང་བཙན་པ་ཚོས་རྒྱ་ནག་གི་བརྟན་བརླིང་ལ་ཉེན་ཁ་ཡོད་པ་ནས་དཔལ་འབྱོར་གྱི་གནས་བབ་འདིར་ཞེད་སྣང་མི་བྱེད་པ་དང། ཆབ་སྲིད་པ་དབུ་མ་པ་ཚོས་དཔལ་འབྱོར་གནས་སྟངས་འདིར་བསྟོད་བསྔགས་གཏོང་ཞོར་རྒྱ་ནག་རྒྱལ་སྤྱིའི་ནང་ཆེ་མཐོང་ལྡན་པ་ཞིག་ཡོང་རྒྱུར་འབོད་སྐུལ་བྱེད་བཞིན་ཡོད་པ་རེད། འབོད་སྐུལ་དེའི་ནང་དུ་བོད་ཀྱི་དཀའ་ངལ་རང་སྐྱོང་གི་ལམ་ནས་ཐག་གཅོད་བྱེད་འདོད་ཡོད་པ་དེ་རེད།
གང་ལྟར་རྒྱ་ནག་གི་གནས་བབ་ངོ་མ། རྒྱ་ནག་མི་མང་གི་རྒྱལ་ཞེན་དམར་རྗེན། བཙན་བྱོལ་ཆབ་སྲིད་པ་རྣམས་ཕར་ཟད། རྒྱ་ཆེའི་དད་ལྡན་མི་མང་གིས་ཡག་པོ་ཞིག་ཤེས་ཐུབ་ན། ང་ཚོས་ཏན་ཏན་འགྲོ་ས་ཅིག་རེག་གི་རེད། དེའི་ཆ་ནས་རྒྱལ་སྤྱིའི་ཚོང་དོན་སྤྱི་ཆིངས་ནང་གི་གྲངས་ཐོ་འདིར་དྲངས་ནས་ཕྱོགས་སྟོན་བྱས་པ་ཡག་པོ་བྱུང་འདུག