ཟླ་འདིའི་ཕྱི་ཚེས་ ༡༧ ཉིན་ཀྲུང་གོའི་བོད་ཀྱི་དྲ་བའི་སྟེང་། ཟླ་འདིའི་ཕྱི་ཚེས་ ༡༠ ཉིན་གྱི་སྔ་དྲོའི་ཆུ་ཚོད་ ༡༠ བ་ཡས་མས་སུ་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གུང་ཧོ་རྫོང་མི་དམངས་ཁྲིམས་ཁང་གིས། སྔར་ལོའི་ཕྱི་ཟླ་ ༡༡ པའི་ཚེས་ ༢༦ ཉིན་གྱི་མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་སློབ་ཕྲུག་གི་ངོ་རྒོལ་ཁྲོམ་སྐོར་གྱི་གྱོད་དོན་ལ་འདྲི་གཅོད་བྱས་ཏེ། སློབ་གྲྭའི་སློབ་ཕྲུག་སངས་རྒྱས་འབུམ་ལ་ལོ་ ༤ དང་། ཀུན་བཟང་འབུམ་དང་ལྷ་བརྟན། བྱམས་པ་ཚེ་རིང་གསུམ་ལ་ལོ་ ༢ དང་ཟླ་ ༦ ། དབང་རྒྱལ་ཚེ་རིང་དང་ཆོས་སྐྱོང་སྐྱབས་གཉིས་ལ་ལོ་ ༣ དང་ཟླ་ ༣ རེའི་དུས་བཀག་བཙོན་འཇུག་བཅས་ཀྱི་ཁྲིམས་ཐག་བཅད་ཡོད་སྐོར་བསྒྲགས་ཡོད་པ་མ་ཟད། ཁྲིམས་ཆད་ཕོག་པའི་སློབ་ཕྲུག་ ༨ པོས་ནག་ཉེས་ཁས་བླངས་པའི་རྣམ་འགྱུར་དང་སྤྱི་ཚོགས་སྟེང་གནོད་པ་བཟོས་པའི་ཚད་གཞི་ལྟར་ཁྲིམས་གཅོད་བྱས་ཡོད་ཚུལ་དང་། གྱོད་དོན་འདྲི་གཅོད་སྐབས་མཚོ་ལྷོ་ཁུལ་གྱི་ཁོངས་གཏོགས་སློབ་གྲྭ་ཁག་ཅིག་དང་། གུང་ཧོ་རྫོང་ཁོངས་ཀྱི་སློབ་གྲྭའི་དགེ་སློབ་འཐུས་མི། སློབ་ཕྲུག་ཚོའི་ཁྱིམ་བདག་བཅས་མི་ ༡༠༠ ལྷག་ཡོད་སྐོར་བསྒྲགས་འདུག
རྒྱ་ནག་གཞུང་གིས་ཕྱིར་བསྒྲགས་བྱས་པའི་གནས་ཚུལ་ནང་སློབ་ཕྲུག་ ༦ མ་གཏོགས་གཞན་གཉིས་ཀྱི་མིང་དང་ཁྲིམས་ཆད་ཀྱི་ལོ་གྲངས་བཅས་གསལ་བོ་བཀོད་མེད་ཀྱང་། དེ་སྔོན་ཕྱི་ཕྱོགས་ཀྱི་གསར་ལམ་དུ་ཐོན་པའི་མིང་གཞུང་ནང་། རྒྱ་ནག་གིས་འདྲི་བརྩད་བཀག་ཉར་བྱས་པའི་སློབ་ཕྲུག་ ༨ ཡོད་པའི་ཁྲོད་མིང་ལ་བཀྲ་ཤིས་ཀུན་བཟང་ཞུ་བ་དང་། རྡོ་ལ་ཚེ་རིང་ཞུ་བའི་སློབ་ཕྲུག་གཉིས་ཀྱང་སྐབས་དེར་བཀག་ཉར་བྱས་ཡོད་པའི་གནས་ཚུལ་ཐོན་ཡོད།
འདི་ལོའི་ཕྱི་ཟླ་ ༢ ཚེས་ ༡ ཉིན་མཚོ་ལྷོ་ཁུལ་ཆབ་ཆ་གྲོང་རྡལ་དུ་ཁྲིམས་ར་ཚོགས་ཏེ་ཁྲིམས་ཐག་གཅོད་རྩིས་བྱས་ཀྱང་། སྐབས་དེར་སློབ་ཕྲུག་ཚོའི་ཉེ་འབྲེལ་དང་མཚོ་ལྷོ་ཁུལ་གྱི་ཁོངས་གཏོགས་རྫོང་ཁག་ལྔ་ནས་བསླེབས་པའི་མང་ཚོགས། སློབ་ཕྲུག་དང་གྲྭ་བ་ཚོས་སློབ་ཕྲུག་ཚོར་ཁྲིམས་ཐག་གཅོད་པའི་ནག་ཉེས་ཆེན་པོ་གང་ཡང་བསགས་མེད་པ་དང་། གལ་སྲིད་ཁོ་ཚོར་ཁྲིམས་ཐག་བཅད་པ་ཡིན་ན། རྫོང་ཁག་ལྔའི་ས་གནས་བོད་རིགས་ཡུལ་མི་ཚོས་མུ་མཐུད་ངོ་རྒོལ་བྱ་རྒྱུ་ཡིན་སྐོར་བརྗོད་བརྗོད་སྟབས། ཉིན་དེར་ཁྲིམས་ཐག་གཅོད་མ་ཐུབ་པར་ཁྲིམས་ར་གྲོལ་ཡོད།
