བོད་ཀྱི་བང་ཆེན་གསར་ཤོག་འགྲེམས་སྤེལ་བྱས་ཏེ་ལོ་བཅུ་འཁོར་ཡོད།

དེ་རིང་ངྷ་ས་བོད་ཀྱི་གསོལ་མགྲོན་ཁང་དུ་བོད་ཀྱི་བང་ཆེན་གསར་ཤོག་འགྲེམས་སྤེལ་བྱས་ཏེ་ལོ་བཅུ་འཁོར་བའི་མཛད་སྒོ་ཞིག་ཚོགས་ཏེ་ཆོས་རིག་བཀའ་བློན་མཆོག་གིས་ཁོང་ཐེངས་གཉིས་ངྷ་རམ་ས་ལར་འབྱོར་སྐབས་བོད་མི་ཚོ་ཤེས་ཡོན་སོགས་ཕྱོགས་གང་ཐད་ནས་ཡར་རྒྱས་ཆེན་པོ་ཕྱིན་ཡོད་སྐོར་གསུངས་སོང་།

དེ་རིང་ཕྱི་ཚེས་ ༡༤ ཉིན་གྱི་ཞོགས་པའི་ཆུ་ཚོད་ ༩།༣༠ ཐོག་བཞུགས་སྒར་བོད་ཀྱི་གསོལ་མགྲོན་ཁང་དུ་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གསར་འཛུགས་དང་བོད་ཀྱི་བང་ཆེན་གསར་ཤོག་འདོན་སྤེལ་བྱས་ཏེ་མི་ལོ་ཧྲིལ་བོ་ ༡༠ འཁོར་བའི་མཛད་སྒོ་ཚོགས་སོང་། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུཊ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། སྤྱི་འཐུས་རྒྱུན་ལས་ཀྱི་སྐུ་ཚབ་སྤྱི་འཐུས་ཀརྨ་ཆོས་འཕེལ་ལགས། ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་གཙོས། སྤྱི་འཐུས་རྒྱུན་ལས་དང་བཞུགས་སྒར་ཉེ་འཁྲིས་ཀྱི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་རྩོམ་སྒྲིག་པ་བཅས་མི་ ༥༠ ཙམ་འཛོམས་སོང་།

མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་ནས་སྣང་གསལ་མར་མེ་ཞལ་འབྱེད་གནང་རྗེས། ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་འགན་འཛིན་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་ ༢༠༠༣ ལོའི་ཕྱི་ཟླ་ ༤ ཚེས་ ༡༨ ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གསར་འཛུཊ་བྱས་རྗེས་བོད་ཀྱི་ཆོས་དང་རིག་གཞུང་སྐད་ཡིག་རྒྱུན་འཛིན་དང་བོད་དོན་བདེན་མཐའ་སེལ་ཐབས། མི་རིགས་གཞན་གྱི་རིག་གཞུང་གི་ལེགས་ཆ་ནང་འདྲེན་བཅས་ལ་དམིགས་ཡུལ་གཙོ་བོར་བཟུང་ཡོད་པ་མ་ཟད། ལངས་ཕྱོགས་གཙོ་བོ། དང་པོ། རྒྱལ་སྤྱིའི་ཁྲིམས་དང་གནས་ཡུལ་གཞུང་གི་ཁྲིམས། ལྷག་པར་དུ་བཙན་བྱོལ་བོད་མིའི་ཁྲིམས་སྒྲིག་ཁག་ལ་སྙིང་ནས་བརྩི་བཀུར་ཞུ་རྒྱུ་དང་། གཉིས་པ། དཔལ་འབྱོར་གྱི་མཐུན་འགྱུར་གནང་མཁན་དང་ཚོགས་སྡེ་ཁག་དང་མི་སྒེར་གྱི་བཀོད་བྱུས་འོག་མི་འགྲོ་བར་སྲི་ཞུ་ཁང་རང་ཉིད་ཀྱི་དམིཊ་ཡུལ་དང་ལྟ་གྲུབ་ཚད་ཐིག་ཏུ་བཟུང་སྟེ་ལས་ཀ་བྱ་རྒྱུ། གསུམ་པ། ལས་དོན་གྱི་སྦྱོར་དངོས་རྗེས་གསུམ་ཐམས་ཅད་བདེན་དོན་གཞིར་རྩར་བཟུང་བའི་ཐོག་ལས་བྱེད་སུ་ཡང་བློ་ཐག་རིང་དུ་མི་འགྲོ་བར་སྲི་ཞུ་ལས་འཆར་ལ་རྒྱབ་སྐྱོར་དང་ཡིད་ཆེས་བྱ་རྒྱུ། བཞི་བ། གཞན་གྱི་དགོངས་ཚུལ་དང་ལམ་སྟོན་བྱུང་བར་སྙན་གསན་དང་གུ་ཡངས་ཀྱི་སྒོ་ནས་ལེཊ་ཆ་ལེན་རྒྱུ་གལ་ཆེ་ཡང་། སྲི་ཞུ་ཁང་གི་དམིགས་ཡུལ་དང་བརྟན་གནས་ལ་གནོད་པའི་ལམ་སྟོན་རིགས་ལ་ཉན་འཇོག་མི་བྱེད། ལྔ་བ། དོན་མེད་སྐྱོན་བརྗོད་རིཊ་དང་སྲི་ཞུ་ཁང་གི་ལས་དོན་མཚམས་འཇོག་ཡོང་ཆེད་གནོན་ཤུཊ་རིཊ་ལ་ཆིག་སྒྲིལ་གྱིས་གདོང་ལེན་བྱས་ཏེ་ལངས་ཕྱོཊ་བརྟན་སྲུང་མཐའ་འཁྱོངས་བྱ་རྒྱུ་བཅས་ཡིན་སྐོར་བརྗོད་བྱུང་།   

ཡང་སྲི་ཞུ་ཁང་གི་དཔལ་འབྱོར་དངུལ་རྩིས་དང་ལས་དོན་ཐད་ཁོང་གིས། ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་དཔལ་འབྱོར་ཡོངས་ཁུངས་གཙོ་ཆེ་ཤོས་རོཊ་ཚོཊ་ལ་བརྟེན་ཡོད་པ་དང་།  ༢༠༠༦ ལོ་ནས་བཟུང་ཨ་རིའི་རྒྱལ་ཡོངས་དམངས་གཙོ་ཐེབས་རྩའི་མཐུན་འགྱུར་གནང་བཞིན་པ་དང་། ༢༠༡༠ ལོ་ནས་བཟུང་སུད་སི་གནས་བཞུཊ་ནམ་མཁའ་རིན་པོ་ཆེ་མཆོག གཞན་ཡང་སྔ་ཕྱིར་དཔལ་འབྱོར་གྱི་རོཊ་རམ་གནང་མཁན་ཕྱི་ནང་གི་མི་སྣ་མང་ཙམ་བྱུང་ཡོད་པ་དང་། གསར་ཤོག་དང་དཔེ་དེབ། གླ་ཡོད་གསལ་བསྒྲགས་སོགས་ལ་བརྟེན་ནས་ཡོང་འབབ་ཡོང་གི་ཡོད་ཅིང་། རྩིས་ཁྲ་ཁག་ཕྱི་ལུགས་ལྟར་ཉར་ཚགས་ཀྱིས་ལོ་ལྟར་རྒྱ་གར་ངོས་ལེན་ཡོད་པའི་རྩིས་ཞིབ་པས་རྩིས་ཞིབ་བྱེད་ཀྱི་ཡོད་སྐོར་དང་། དེ་སྔོན་བལ་ཡུལ་ནང་བོད་ཀྱི་བང་ཆེན་དང་ཧི་མ་ལ་ཡའི་བང་ཆེན་ཞེས་པའི་གསར་ཤོག་སྔ་ཕྱི་འགྲེམས་སྤེལ་བྱས་ཀྱང་དཀའ་ངལ་གྱི་རྐྱེན་པས་མཚམས་འཇོག་བྱས་ཡོད་ཀྱང་། ཕྱིས་སུ་རྒྱ་གར་ལྷོ་ཕྱོགས་ཀྱི་མོན་གྷོ་དང་བྷེལ་ཀོལ་བཅས་སུ་ཡན་ལག་ལས་ཁུངས་གསར་རྒྱག་གནང་ཡོད་པ་མ་ཟད།  བདུན་རེའི་གསར་ཤོག་བོད་བང་ཆེན་རྒྱ་གར་དབུས་དྲིལ་བསྒྲགས་ལས་ཁུངས་ལ་ཁྲིམས་མཐུན་དེབ་སྐྱེལ་བྱས་ཏེ། ད་ཆར་རྒྱ་གར་གཙོས་འཛམ་གླིང་གི་རྒྱལ་ཁབ་ ༢༠ ལྷག་གི་ནང་ཚགས་ཤོག་ ༤༥༠༠ ཡས་མས་འགྲེམས་སྤེལ་བྱས་ཀྱི་ཡོད་ཚུལ། དེ་བཞིན་བོད་ཀྱིོ་བང་ཆེན་ཐོག་རྒྱ་དབྱིན་གསུམ་སྐད་ཡིག་གསུམ་གྱི་ནས་གནས་ཚུལ་མཁོ་གཏོང་དང་། ད་ལྟའི་བར་དཔེ་དེབ་འདྲ་མིན་རྩོམ་སྒྲིག་འགྲེམས་སྤེལ་བྱས་ཡོད་པ་མ་ཟད། ད་ཆར་ཟླ་གསུམ་དུས་དེབ་༼ ཁ་བ་དཀར་པོ༽ དུས་དེབ་འགྲེམས་སྤེལ་བྱེད་ཀྱི་ཡོད་པ་དང་། ད་ལྟའི་བར་སྲི་ཞུ་ཁང་དུ་ཁྱོན་ལས་བྱེད་ ༣༢ བྱུང་ཡོད་པ་དང་། ད་ཆར་དབུས་ས་གཉིས་སུ་ལས་བྱེད་ ༡༢ ། དང་བླངས་གནས་ཚུལ་མཁོ་གཏོང་བ་ ༢ བཅས་ཡོད་སྐོར་སོགས་ངོ་སྤྲོད་གནང་སོང་།

དེའི་རྗེས་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོཊ་ལགས་ཀྱིས།  རིག་གཞུང་དང་གསར་འགོད་ལས་དོན་དེ་རྒྱལ་སྤྱིའི་ཁྱོན་ཡོངས་དང་བཙན་བྱོལ་སྤྱི་ཚོགས་ཕྱོགས་ཡོངས་ནས་གཞི་རིམ་དགོས་མཁོ་ཆེ་ཤོས་ཆགས་ཡོད་པ་དང་། ལྷག་པར་དུ་དམངས་གཙོའི་སྤྱི་ཚོགས་ནང་གསར་འགོད་བརྒྱུད་ལམ་དེ་དམངས་གཙོའི་ཀ་བ་བཞི་བ་ཞེས་འབོད་པ་དང་། དམངས་གཙོའི་སྤྱི་ཚོགས་ཀྱི་ཆ་རྐྱེན་མེད་དུ་མི་རུང་བ་ཞིག་ཆགས་ཡོད་སྟབས།  བཙན་བྱོལ་ནང་ཡོད་པའི་བོད་མི་ཚོས་བོད་ནང་རང་དབང་མེད་པའི་གནས་སྟངས་ལ་གཞིགས་ཏེ་རང་དབང་ལུང་པའི་ནང་གསར་འགོད་རང་དབང་གི་ལས་དོན་ལོངས་སྤྱོད་ཆོག་པའི་གོ་སྐབས་དམ་འཛིན་བྱ་རྒྱུ། གསར་འགོད་ལས་རིགས་ཀྱིས་སྤྱི་ཚོགས་ནང་ཤུགས་རྐྱེན་ཆེན་པོ་དང་ནུས་པ་ཆེན་པོ་ཆགས་ཡོད་པའི་སྐབས་འདིར། གསར་འགྱུར་བརྒྱུད་ལམ་གྱིས་ད་ལྟའི་བོད་མིའི་གནས་སྟངས་ལ་གཞིགས་ཏེ་གསར་འགྱུར་འགོད་སྤེལ་སོགས་བྱ་རྒྱུ་གལ་ཆེན་ཡིན་སྐོར་བརྗོད་སོང་།

སྤྱི་འཐུས་ཀ་རྨ་ཆོས་འཕེལ་ལགས་ཀྱིས་དམངས་གཙོའི་སྤྱི་ཚོགས་ནང་མི་མང་གིས་སྤྱི་ཚོགས་ཀྱི་གནད་དོན་དང་འབྲེལ་བའི་ལེགས་ཉེས་དང་། བླངས་དོར་དབྱེ་འབྱེད་བྱེད་སའི་ཁུངས་དང་། མི་མང་གི་གཞི་འཇོག་ས་གཙོ་བོ་གསར་འགྱུར་བརྒྱུད་ལམ་བཅོལ་གྱི་ཡོད་སྟབས། གསར་འགྱུར་བརྒྱུད་ལམ་ཁག་གིས་གནས་ཚུལ་དྲང་པོར་མ་བཀོད་པའི་རིགས་བྱུང་བ་ཡིན་ན། མི་མང་གི་ངོས་འཛིན་བྱེད་སྟངས་ལ་དོ་ཕོག་དང་ཤུགས་རྐྱེན་ཐེབས་ཀྱི་ཡོད་པ་དང་། གལ་སྲིད་རྐྱེན་ངན་པ་ཞིག་ཐེབས་པ་ཡིན་ན་སྐྱོན་ཆ་གཙོ་བོ་བརྒྱུད་ལམ་གྱི་སྐྱོན་ཆགས་ཀྱི་ཡོད་སྟབས། གསར་འགྱུར་བརྒྱུད་ལམ་ཁག་གི་ལས་དོན་ཁྲོད་གནད་དོན་གང་ཡིན་ཡང་། སྤྱི་ཚོགས་ལ་འགན་འཁུར་བའི་ཐོག་བདེན་པར་གཞི་བཅོལ་ཏེ་ལས་ཀ་བྱ་རྒྱུ་ཧ་ཅང་གལ་ཆེན་ཡིན་པ་དང་། མ་འོངས་པར་གསར་འགོད་ལས་རིགས་གཉེར་མཁན་ཚོས་ཕུལ་བྱུང་གི་འཆར་སྣང་དང་སྙིང་སྟོབས་སོགས་ཀྱི་ཆ་རྐྱེན་འཛོམས་པའི་ཐོག ཆ་འཇོག་འཕེར་བའི་ཕྱག་ལས་གནང་རྒྱུ་གལ་ཆེན་ཡིན་སྐོར་བརྗོད་བྱུང་།

མཇུག་ཏུ་ཆོས་རིག་བཀའ་བློན་པདྨ་ཆོས་འབྱོར་མཆོག་གིས། སྔོན་མ་བཙན་བྱོལ་ནང་གསར་ཤོག་མང་པོ་ཡོད་ཀྱང་། མཇུག་སྐྱོང་མ་ཐུབ་པར་སྒོ་བརྒྱབ་ཡོད་པའི་རིགས་མང་པོ་བྱུང་སྟེ། ད་ཆར་སྤྱི་ཚོགས་ནང་ཤུཊ་ཆེ་ཤོས་བོད་ཀྱི་དུས་་བབ་དང་བང་ཆེན་གཉིས་ཆགས་ཡོད་པ་དང་། ཁོང་གིས་བདེ་སྲུང་བཀའ་བློན་གྱི་ལས་ཡུན་འཁྱོལ་ཏེ་ལོ་ ༡༡ རྗེས་སུ་ཡང་བསྐྱར་ངྷ་སར་ཡོང་སྐབས། སྔར་དང་མི་འདྲ་བར་མིའི་གཞི་རྩའི་ཤེས་ཡོན་སོགས་ཕྱོགས་ཡོངས་ནས་ཡར་རྒྱས་ཕྱིན་ཡོད་པ། ལྷག་པར་དུ་གཞོན་སྐྱེས་ཚོས་བོད་བསྟན་སྲིད་ཆེད་ཕྱག་ལས་གནང་བཞིན་ཡོད་ཀྱང་། ང་ཚོའི་སྤྱི་ཚོགས་ནང་རིགས་གཅིག་གིས་འགན་འཁུར་ཏེ་ཕྱག་ལས་གནང་བ་དང་། རིགས་གཅིག་གིས་གང་ཡང་མ་བྱས་པར་སྐྱོན་བརྗོད་རྐྱང་བྱེད་པ། རིགས་གཅིག་གིས་བར་ལམ་དུ་ཅི་ཡང་མ་བྱེད་པར་བསྡད་པ་དེ་སྤྱི་ཚོཊ་ཀྱི་འགྲོ་སྟངས་ཡིན་ཡང་། ཚང་མ་མཉམ་རུབ་ཀྱིས་ལས་ཀ་བྱེད་རྒྱུ་ཧ་ཅང་གལ་ཆེན་ཡིན་སྐོར་གསུངས་སྟེ། གསར་འགྱུར་བརྒྱུད་ལམ་གྱི་གལ་ཆེན་རང་བཞིན་དང་མ་འོངས་ལས་དོན་བྱེད་ཕྱོགས་ཐད་གསུང་དོན། “  སྤྱིར་དམངས་གཙོའི་སྤྱི་ཚོགས་ནང་དམངས་གཙོའི་ཀ་བ་གསུམ་ཞེས་ཡོངས་གྲགས་ཡིིན་ཡང་། ད་ཆར་བརྒྱུད་ལམ་དེ་ཀ་བ་བཞི་པ་རེད་ཅེས་བཤད་བསྡད་ཀྱི་ཡོད་པ་རེད། བརྒྱུད་ལམ་དེ་དམངས་ཚོགས་ཀྱི་ལྟ་བའི་མིག་དང་ཉན་པའི་རྣ་ཅོག་ལྟ་བུ་ཆགས་བསྡད་ཡོད་སྟབས། དེར་བདེན་པ་དང་བློ་ཁོག སེམས་ཤུགས་བཅས་ཧ་ཅང་གལ་ཆེན་ཆགས་ཡོད་པ་རེད་ལ། གནས་ཚུལ་གང་ཡིན་ཡང་འགན་འཁུར་ཏེ་བཀོད་རྒྱུ་དང་དྲང་བདེན་གྱི་ལམ་ནས་བཀོད་རྒྱུ་གལ་ཆེན་ཆགས་ཡོད། ད་ལྟའི་བར་བརྒྱུད་ལམ་ཁག་གིས་བཀའ་ཁྲིའི་འོས་འདེམས་དང་འབྲེལ་བའི་གནས་ཚུལ་ཁག བོད་ནང་དང་བོད་མིའི་སྤྱི་ཚོགས་ནང་ཁྱབ་ཏེ་སེམས་ཤུགས་སྤར་གཞི་ཆགས་ཡོད་པ་རེད། བར་ལམ་བོད་ནང་རྒྱལ་གཅེས་དཔའ་བོ་དཔའ་མོ་ ༡༡༤ བོད་བསྟན་སྲིད་ཆེད་རང་སྲོག་བློས་གཏོང་བྱས་ཡོད་ཀྱང་། འཛམ་གླིང་གི་སྡིངས་ཆར་དེ་ཚོད་ཀྱིས་འཇོག་ཐུབ་མེད་སྟབས། མ་འོངས་པ་དེ་གལ་ཆེན་དུ་བརྩིས་ཏེ་ཁྱབ་བསྒྲགས་བྱ་རྒྱུ་ཧ་ཅང་གལ་ཆེན་པོ་རེད། ཕྱི་རྒྱལ་དུ་ཡོད་པའི་བོད་པའི་སྤྱི་མཐུན་ཚོགས་པ་ཁག་ལ་པར་རིས་སོགས་མཁོ་སྤྲོད་ཀྱིས་འཕྱར་གྲུ་མཉམ་འདེབས་བྱ་རྒྱུ་ཧ་ཅང་གལ་ཆེན་རེད། ” ཅེས་གསུངས་བྱུང་།

དེ་རིང་གི་མཛད་སྒོའི་ཐོག་སྐུ་མགྲོན་གཙོ་བོ་ཆོས་རིག་བཀའ་བློན་པདྨ་ཆོས་འབྱོར་མཆོག་ནས་བོད་ཀྱི་བང་ཆེན་གསར་ཤོག་གི་རྩོམ་སྒྲིག་ལས་རོགས་ཆོས་ཉིད་འོད་ཟེར་ལགས་སུ་ “ ཤེས་བརྩོན་ཟུང་ལྡན་གྱི་ཕུལ་བྱུང་ལས་བྱེད ” ཅེས་པའི་གཟེངས་བསྟོད་ཕྱག་འཁྱེར་དང་ཧིན་སྒོར་ ༢༠༠༠༠ གྱི་གསོལ་རས་གནང་སོང་ལ། ཉིན་གུང་རྗེས་ཚོགས་ཞུགས་པ་དག་གིས་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་ལས་དོན་སྤྱི་དང་། བོད་ཀྱི་བང་ཆེན་གསར་ཤོག་དང་དྲ་རྒྱ་བཅས་ཡར་རྒྱས་གཏོང་ཕྱོགས་ཐོག་བགྲོ་གླེང་གནང་ཡོད།

གསར་འགོད་པ། དོན་གོ