འཇམ་དབྱངས་ནོར་བུའི་ལོག་རྩོམ་ལ་དཔྱད་པ།

ཐུབ་བསྟན་ལུང་རིགས།

༄༅།།  བཙན་བྱོལ་བོད་མིའི་སྤྱི་ཚོགས་ནང་དོན་དམ་གྱི་རང་དབང་དང་། འདྲ་མཉམ། དྲང་བདེན། ཆིག་བསྒྲིལ་ལྡན་པའི་དམངས་གཙོའི་ལམ་སྲོལ་ཚད་ལྡན་འདི་འདྲ་ཞིག་བྱུང་བ་ནི་༧གོང་ས་སྐྱབས་མགོན་ཆེན་པོ་སྐུ་རྐྱང་གིས་ཐུགས་བརྩོན་ལྷོད་མེད་མུ་མཐུད་གནང་བ་ཁོ་ནའི་དྲིན་ལས་བྱུང་བ་མ་གཏོགས། ༧གོང་ས་མཆོག་གིས་ཐུགས་བརྩོན་དེ་ལྟ་བུ་ཞིག་གནང་མེད་ཚེ་མང་ཚོགས་རང་ངོས་ནས་གསར་བརྗེ་དང་ལེགས་བཅོས་ཐུབ་མིན་རང་རེའི་སྤྱི་སྒེར་གྱི་བསམ་སྤྱོད་ལ་དཔག་ན་ཚེགས་མེད་དུ་རྟོགས་ནུས། ༧གོང་ས་མཆོག་ལ་གཞི་མེད་ཀྱི་སྐྱོན་བརྗོད་དང་མཚན་སྨོད་ཞུ་མཁན་གྱི་བོད་མི་རྣམས་ཀྱིས་ཀྱང་བདེན་རྫུན་ཁྱད་མེད་ཀྱི་གང་དྲན་སྨྲ་བརྗོད་བྱེད་པའི་ནུས་བ་དང་རང་དབང་དེ་ཡང་༧གོང་ས་མཆོག་གི་ཐུགས་རྗེ་ལས་བྱུང་བ་དཔྱོད་ལྡན་རྣམས་ཀྱིས་མི་ཤེས་པ་ཅི་ལ་སྲིད།

དེ་ཙམ་ལ་བསམས་ནའང་སེམས་ལྡན་ཞིག་ཡིན་ཕྱིན་༧གོང་ས་མཆོག་ལ་ཟུར་ཟ་དང་སྐྱོན་བརྗོད་ཞུ་བའི་གཞི་རྩ་བྲལ་བ་མ་ཟད། མཚན་སྨོད་ནི་དེ་བས་ཀྱང་ཞུ་ཐབས་ག་ལ་ཡོད། འོན་ཀྱང་སྙིགས་ལྔའི་རྒུད་ཚོགས་ལྷག་པར་བདོ་བའི་མཚོན་རྟགས་ལྟ་བུར་བོད་མིའི་ཁྲོད་དུའང་ལས་བསོད་དམན་པའི་སྐྱེ་བོ་ཧ་ཅང་ཉུང་ཤས་ཤིག་གིས། འཇམ་མགོན་ས་པཎ་གྱིས། “ཁྭ་ཏས་མི་གཙང་ཟོས་པའི་མཆུ།། ས་གཙང་དག་ལ་འབད་དེ་འཕྱིས།།” ཞེས་དང་། རྗེ་གུང་ཐང་པས་ཀྱང་”སྐྱེས་བོ་དམ་པར་ཕྲག་དོག་གིས།། སྨོད་པ་རང་གི་དམའ་འབེབས་ཡིན།།” ཞེས་གསུངས་པ་ལྟར་རང་སྐྱོན་གཞན་འགེབས་ཀྱི་གནས་ཚུལ་ངོ་ཚ་བྲལ་བ་ཞིག་ཡིནཔས། སློབ་དཔོན་ཆེན་པོས། “བོད་ལ་དྲིན་ཆེན་བྱས་ཀྱང་དྲིན་མི་གོ།” ཞེས་པའི་ངང་ཚུལ་ཐོག་ཏུ་བབས་པར་སྣང་།

དམངས་གཙོའི་ལམ་སྲོལ་དང་ཁྲིམས་ཀྱི་དབང་སྒྱུར་གཉིས་ཁ་བྲལ་མི་རུང་བ་ཞིག་ཡིན་པ་དང་། ཡུལ་མི་མི་རེ་ངོ་རེས་རང་དབང་གི་ཐོག་ནས་ཐོབ་ཐང་དང་། དེས་ཟླས་དྲངས་པའི་ལས་འགན་གཉིས་ཀ་ལེགས་པར་ངོས་ཟིན་ཞིང་། ལག་ལེན་དུ་བསྟར་བ་ཞིག་མ་བྱུང་ན་ཁ་ཙམ་གྱི་དམངས་གཙོ་ལས་དོན་དམ་གྱི་དམངས་གཙོ་ཡོང་ཐབས་མེད། སྨྲ་བརྗོད་ཀྱི་རང་དབང་ཞེས་པ་གཞི་མེད་རྫུན་གཏམ་དང་། གང་ཟག་ལ་དམའ་འབེབས། སྤྱི་ཚོགས་ནང་ཅལ་འདྲོགས་ཡོང་གཞིའི་རིགས་སྨྲ་བརྗོད་ཀྱི་རང་དབང་ཡིན་པའི་དོན་དུ་མི་གོ དེར་བརྟེན་དམངས་གཙོའི་རིང་ལུགས་ (Democracy) དང་། ཁྲིམས་མེད་རིང་ལུགས་ (Anarchy)གཉིས་ཀྱི་ཁྱད་པར་འབྱེད་ཤེས་པ་དགོས་རྒྱུ་ཤིན་ཏུ་གལ་ཆེ།

རང་གི་འདོད་བློ་མ་ཁེངས་པའི་འཁང་ར་དམངས་གཙོའི་སྨྲ་བརྗོད་རང་དབང་དུ་བསྙད་དེ་༧གོང་ས་མཆོག་སྐུ་སྒེར་དང་ཁོང་གི་མཛད་བྱུས་གཉིས་ཀར་སྐྱོན་བརྗོད་དང་། ཟུར་ཟ། མཚན་སྨོད་བཅས་ཞུ་མཁན་ཆེས་ཉུང་ཤས་ཤིག་ཡོད་པའི་ནང་ནས་རྩོམ་པ་པོ་གྲགས་ཅན་འཇམ་དབྱངས་ནོར་བུ་ལགས་ནི་འདས་པའི་ལོ་ངོ་ ༣༠ཡས་མས་ཀྱི་རིང་༧གོང་ས་མཆོག་དང་ཁོང་གི་མཛད་བྱུས་གཉིས་ཀར་སྐྱོན་བརྗོད་མུ་མཐུད་གནང་མཁན་ཞིག་ཡིན་པ་དང་། ཁོང་གི་སྐྱོན་བརྗོད་ཁག་ལ་སྐབས་རེ་ཟུང་ཙམ་ལ་ལན་འདེབས་འགྲེལ་བརྗོད་ཐོན་པ་ལས། མང་ཆེ་ཤོས་རང་བཞིན་སྣང་མེད་དུ་ལུས་འདུག དཔྱོད་ལྡན་རྣམས་ཀྱིས་ལན་འདེབས་བགྲོ་གླེང་བྱ་འོས་སུ་མ་གཟིགས་པའམ། ཡང་ན་དོན་མེད་ཀྱི་ཁ་དམག་ཏུ་ཞུགས་འདོད་མེད་པ་ཅི་རིགས་ཡིན་སྲིད། འོན་ཀྱང་གལ་གནད་ཆེ་བའི་གནས་ཚུལ་རེ་ཟུང་ཙམ་ལ་སྤྱི་ཚོགས་ཀྱིས་ངོ་ཤེས་པ་དང་དེབ་ཐེར་དུ་འཇོག་ཆེད་གསེད་བཀྲོལ་ཞིག་མ་བྱས་ན་གནའ་བོའི་བོད་ཀྱི་གཏམ་དཔེར། ”མི་གཅིག་བཤད་ན་བདེན་བདེན་འདྲ། རྟ་གཅིག་རྒྱུགས་ན་མགྱོགས་མགྱོགས་འདྲ།།” ཟེར་བ་ལྟར་ཐོས་བརྩོན་ཉུང་བའི་སྐྱེ་བོ་གཡམ་རྒྱུགས་པ་རེ་ཟུང་གིས་ཡ་མཚན་ཚད་མར་མི་འཛིན་པའི་ངེས་པ་མེད་པར་བརྟེན། འབྱུང་འགྱུར་མི་རབས་རྣམས་ཀྱི་ཆེད་གནས་ཚུལ་རེ་ཟུང་མ་སྤེལ་ཐབས་མེད་བྱུང་།

རྩོམ་པ་པོ་འཇམ་དབྱངས་ནོར་བུ་ལགས་ཀྱི་གསུང་བཤད་དང་། རྩོམ་ཡིག བཅར་འདྲི་སོགས་ཤིན་ཏུ་མང་བས་ཡོངས་སུ་རྫོགས་པ་བརྗོད་ཀྱིས་མི་ལངས་མོད། དཔེ་མཚོན་རེ་ཟུང་ཟུར་འདོན་གྱིས་དཔྱད་གླེང་བྱ་རྒྱུ་ཡིན།

༡       ཕྱི་ལོ་ ༡༩༩༧ ལོར་འཇམ་དབྱངས་ནོར་བུ་ལགས་ཀྱིས་བཅར་འདྲི་ཞིག་གི་ནང་ “…Who is speaking for them? And I don’t think His Holiness is speaking for them. Neither is Richard Gere nor His Holiness, his friends out in the West. They are talking about a very specific Tibet; they’re talking about the monks and nuns. Yes, of course, we love the monks and nuns and we respect them. But, we are the ones who pay the taxes in the end. We are the ones who support the monasteries. You know, when the monasteries are attacked, we are ones who fight.”  ཞེས་༧གོང་ས་མཆོག་བོད་མིའི་མགྲིན་ཚབ་པ་མིན་པ་དང་། ༧གོང་ས་མཆོག་དང་། ༧གོང་ས་མཆོག་གི་ནུབ་ཕྱོགས་པའི་གྲོགས་པོ་ཚོས་གྲྭ་བཙུན་རྣམས་ཀྱི་ཆེད་མ་གཏོགས། བོད་རིགས་ཡོངས་རྫོགས་ཀྱི་སྐོར་བཀའ་མོལ་གནང་གི་མེད་ཚུལ་བཅར་འདྲིའི་ལན་དུ་བཀོད་འདུག དེ་ནི་མངོན་སུམ་ལ་བསྙོན་པ་ཞིག་ཡིན་སྟབས། རིགས་པས་དཔྱད་གླེང་བྱེད་འོས་སུ་མ་མཐོང་། བོད་རིགས་སྤྱི་དང་། ཁྱད་པར་གཞིས་བཞུགས་བོད་མི་ཡོངས་ཀྱིས་༧གོང་ས་སྐྱབས་མགོན་ཆེན་པོ་ཉག་གཅིག་བོད་མིའི་མགྲིན་ཚབ་པ་ཡིན་པར་རྒྱུ་མཚན་གྱི་ལམ་ནས་ཡིད་ཆེས་བློ་གཏད་བྱེད་ཀྱི་ཡོད་ཅིང་། དེ་ནི་དངོས་དོན་དང་མཐུན་ལ། རྒྱལ་སྤྱིའི་སྤྱི་ཚོགས་ནས་ངོས་འཛིན་ཡང་ཐོབ་ཡོད།

བཙན་བྱོལ་བོད་མིའི་བརྒྱ་ཆ་དྲུག་ཆ་བརྒལ་བ་ནས་བོད་མིའི་རྩ་དོན་འཐབ་རྩོད་ཀྱི་ལངས་ཕྱོགས་༧གོང་ས་མཆོག་ནས་དུས་ནས་དུས་སུ་རྒྱལ་སྤྱིའི་ནང་དང་། རྒྱ་ནག་གི་འགྱུར་འགྲོས་བཅས་ལ་གཟིགས་ཏེ་ཐུགས་ཐག་གཅོད་རྒྱུའི་གསོལ་འདེབས་དང་དེ་ལ་སྤྱི་འཐུས་གྲོས་ཚོགས་ནས་སྤྱི་མོས་ཀྱིས་མང་མོས་ཐག་གཅོད་འོས་བསྡུ་དང་ཁྱད་མེད་ཡིན་པའི་གྲོས་ཆོད་གཏན་ལ་ཕབས་པ་དེས་ཀྱང་བཤད་ཐུབ་པ་ཡིན། ད་ཆ་༧གོང་ས་ཆེན་པོས་ཆབ་སྲིད་ཀྱི་འགན་དབང་ཆ་ཚང་རྩིས་སྤྲོད་གནང་ཟིན་ནའང་། བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དོན་ཚན་དང་པོ་གཞི་རྩའི་ལམ་སྟོན་ནང་” ༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་བོད་མི་ཡོངས་ཀྱི་རང་དབང་ལྡན་པའི་མགྲིན་ཚབ་པ་བཅས་ཡིན་”ཞེས་གསལ་བཀོད་ཡོད་པ་འདིས་ཆབ་སྲིད་ཀྱི་ཐུགས་འགན་བཞེས་པའི་སྐབས་ཙམ་དུ་མ་ཟད། ཆབ་སྲིད་ཀྱི་ཐུགས་འགན་བཤོལ་བའི་རྗེས་སུའང་བོད་མི་ཡོངས་ཀྱི་མགྲིན་ཚབ་པ་ཡིན་པའི་ངོ་བོ་ལ་འགྱུར་བ་མེད་པའི་གནས་བབ་བསྐྱར་ནན་གྱིས་གསལ་སྟོན་བྱས་ཡོད།

༢       ཕྱི་ལོ་ ༢༠༠༢ ལོར་ “After the Dalai Lama”༧གོང་ས་མཆོག་གི་རྗེས་སུ་” ཞེས་པའི་རྩོམ་ཡིག་ནང་“Yet, in truth, the absence of the Dalai Lama would not altogether be a bad thing for the Tibetan struggle…… The Dalai Lama’s presence in Tibetan political life is somewhat like the giant Banyan tree, whose shade is pleasant but under which little grows. Tibetan ministers give the appearance of being no more than messenger boys, and members of Parliament fall over each other in their eagerness to agree with him. The Dalai Lama himself has remarked upon the dilemma of his omniscient leadership, but has done little to resolve it. His absence might be just the thing that allows mature democratic institutions to take root. To be sure, without His Holiness’s presence there is danger of dissension within refugee society. But exiled Tibetans already have a half-century of experience in the rough-and-tumble of India’s robust democracy. Surely they are ready for their own. …… Tibetans genuinely love the Dalai Lama, but his lofty ideas on world peace and universal compassion probably find more enthusiastic subscribers in California than in Tibet.” “ཞེས་བདེན་དོན་དུ་༧གོང་ས་མཆོག་མ་བཞུགས་པའི་དུས་སྐབས་ནི་བོད་མིའི་འཐབ་རྩོད་ལ་ཁྱོན་ཡོངས་ནས་ཞན་ཆ་ཞིག་མིན་” ཞེས་དང་། “བོད་མི་མང་པོས་ཁོང་གིས་བསྟན་པའི་ལམ་ལ་དྲི་རྟགས་བཀོད་ཟིན་ཅིང་། འགའ་ཤས་ཀྱིས་ཁོང་མ་བཞུགས་ན་བོད་མིའི་སྤྱི་ཚོགས་ཟོས་བདེ་ལྷོད་དལ་གྱི་འཁྲུལ་སྣང་ལས་སད་པར་བྱེད་པའི་ཡིད་ཆེས་བྱེད་ཀྱི་ཡོད་” ཅེས་དང་། མུ་མཐུད་དེ་ “བོད་མིའི་ཆབ་སྲིད་ཀྱི་མི་ཚེའི་ནང་༧གོང་ས་མཆོག་ངོ་བཞུགས་ཡོད་ན་བྱང་ཆུབ་ལྗོན་ཤིང་ཆེན་པོ་ལྟ་བུ་ཞིག་ཡིན། དེའི་གྲིབ་བསིལ་ཡིད་དུ་འོང་བ་ཞིག་ཡོད་ཀྱང་། དེའི་འོག་གང་ཡང་སྐྱེ་འཚར་མི་ཐུབ་” སོགས་བཀོད་འདུག་པ་ནི་དངོས་ཡོད་གནས་ཚུལ་དང་གཏན་ནས་མི་མཐུན་པ་མ་ཟད། ལུང་འདྲེན་བསྐྱར་བརྗོད་བྱེད་རྒྱུའང་འཇིགས་སྣང་སྐྱེ་གཞིའི་བརྗོད་ཚིག་ཅིག་ཏུ་སྣང་། བོད་མི་དང་རྒྱལ་སྤྱིའི་བསམ་པར་༧གོང་ས་མཆོག་ངོ་བཞུགས་མེད་པའི་དུས་སྐབས་ལ་རེ་སྒུག་བྱེད་མཁན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་རེ་ཟུང་ཙམ་ལས། དེ་མིན་འགྲོ་བ་མིའི་སྤྱི་ཚོགས་ནང་དེ་འདྲའི་བསམ་བློ་ཡོད་མཁན་ཡོད་སྲིད་པའི་ཚོད་དཔག་བྱས་མེད་མོད། བོད་རིགས་མཁྱེན་ཡོན་ཅན་ཞིག་གིས་དགོངས་པར་དེ་ལྟར་འཁོར་བ་ནི་བསམ་བློའི་ཡིད་ལ་ཤོང་དཀའ་བ་ཞིག་རེད།

རྨོངས་ཞེན་དོར་ཏེ་རྒྱུ་མཚན་ཡང་དག་གི་ངོས་ནས་དཔྱད་ན་བོད་མི་རིགས་ཀྱི་མིང་དང་། ངོས་འཛིན། ཕུགས་འདུན་རེ་བའི་འབྱུང་ཁུངས་༧གོང་ས་མཆོག་ཉག་གཅིག་ཡིན་པ་བོད་མི་ཙམ་མ་ཟད། རྒྱ་མི་མང་པོ་ཐེ་བའི་འཇིག་རྟེན་སྐྱེ་འགྲོ་ཡོངས་ཀྱིས་ངོས་འཛིན་དང་ཡིད་ཆེས་བྱེད་ཀྱི་ཡོད། འཇམ་ནོར་གྱི་གསུང་བབ་དེ་རིགས་ནི་གཞི་མེད་ཀྱི་རྟོག་བཟོ་འབའ་ཞིག་ཡིན་པ་མ་ཟད། གཞིས་བྱེས་བོད་མི་མང་ཚོགས་སྤྱི་དང་། ཁྱད་པར་བསྟན་སྲིད་ཀྱི་དོན་དུ་རང་སྲོག་མཆོད་སྦྱིན་དུ་འབུལ་མཁན་ཡོངས་ཀྱི་ལྷག་བསམ་དང་མངོན་འདོད་གཉིས་ཀར་རྩིས་མེད་རྡོག་རོལ་དང་། དམའ་འབེབས་གནང་བ་ཞིག་ལས་འོས་མེད་པ་ཡིན། རྒྱ་དམག་གིས་བོད་དུ་བཙན་འཛུལ་བྱས་པ་ནས་བཟུང་ད་ལྟའི་བར་འདས་ལོ་ ༦༠ བརྒལ་བའི་རིང་བོད་མི་རིགས་དང་། བསྟན་སྲིད་ཀྱི་དོན་དུ་ལུས་སྲོག་དོར་བའི་དཔའ་བོ་དཔའ་མོ་སྤྱི་དང་། ཁྱད་པར་འདས་ལོ་ཁ་ཤས་ནང་རང་ལུས་མེ་མཆོད་དུ་འབུལ་མཁན་གྱི་དཔའ་བོ་དཔའ་མོ་ཡོངས་ཀྱི་ཕུགས་བསམ་དང་། མངོན་འདོད་ཅི་ཡིན་ཉི་ཤར་སྦར་མོས་ཁེབས་ཐབས་མེད་པ་ཡོངས་གྲགས་སུ་གྱུར་ཡོད།

རྩོམ་པ་པོའི་དགོངས་ཚུལ་ལྟར་ན། འདས་ལོ་ ༥༠ བརྒལ་བའི་རིང་བཙན་བྱོལ་སྤྱི་ཚོགས་སུ་བོད་རིགས་ནུས་ལྡན་སུའང་སྐྱེད་སྲིང་མ་བྱུང་བ་ལྟ་བུར་སྣང་རུང་། དངོས་དོན་དུ་ཆབ་སྲིད་དང་། དཔལ་འབྱོར། རིག་གནས་གང་ཅིའི་ཐོག་གཞན་དྲིང་མི་འཇོག་པའི་ཁྱད་ལས་པ་དང་། མགོ་ཁྲིད་མི་ཉུང་བ་ཞིག་༧གོང་ས་མཆོག་གི་ཐུགས་རྗེའི་གྲིབ་བསིལ་འོག་འཚར་ལོངས་བྱུང་ཡོད་པ་ཀུན་གྱིས་མཁྱེན་གསལ་མ་ཟད། དེང་སྐབས་བཙན་བྱོལ་བོད་མིའི་གཞུང་མང་གཉིས་ཀའི་ནང་གི་དབུ་ཁྲིད་དང་སྣེ་མོ་ཕལ་ཆེར་འདས་ལོ་ ༥༠ ནང་འཚར་ལོངས་བྱུང་བ་རྣམས་ཡིན།

༧གོང་ས་མཆོག་བོད་མིའི་ཆབ་སྲིད་ཀྱི་འཚོ་བའི་ནང་ངོ་བཞུགས་མེད་པར་ད་ཆ་ལོ་གཉིས་ལ་ཉེ་བ་སོང་ཡོད་པ་དེའི་རིང་བོད་མི་རྣམས་ཟོས་བདེའི་འཁྲུལ་སྣང་ལས་ཇི་ཙམ་སད་ཡོད་མེད་ཀྱང་མངོན་ཐུབ་པ་དགོས་རྒྱུར་སྣང་། རྩོམ་པོ་པོ་འཇམ་ནོར་ལགས་ཀྱིས་ཡུན་རིང་ནས་རེ་སྒུག་གནང་བའི་ཐུགས་འདུན་༧གོང་ས་མཆོག་བོད་མིའི་ཆབ་སྲིད་ཀྱི་དབུ་ཁྲིད་དུ་མ་བཞུགས་པའི་དུས་སྐབས་དངོས་སུ་ཤར་ཟིན་སྟབས། ད་ཆ་དམིགས་བསལ་རྩལ་འདོན་ཇི་འདྲ་ཞིག་གནང་རྒྱུ་ཡོད་རུང་གནང་རན་པའི་དུས་ལ་བབས་ཡོད། 

གོང་དུ་ཞིབ་བརྗོད་ཟིན་པ་ལྟར། དམངས་གཙོའི་སྤྱི་ཚོགས་ནང་ཡུལ་མི་མི་རེ་ངོ་རེས་རང་འཁྲིའི་འཁུར་འགན་བླངས་ཏེ་ཆབ་སྲིད་དང་། སྤྱི་ཚོགས་ཀྱི་ཞབས་འདེགས་སྒྲུབ་དགོས་པ་ལས། བོད་མི་དང་འབྲེལ་བ་མེད་སའི་ཁུག་ཀྱོག་ཅིག་ཏུ་འགན་ཁུར་མེད་པའི་སྨྲ་ལྕེ་ཚོད་མེད་གཡུག་པ་ཙམ་གྱིས་ཡུལ་མིའི་མཚན་ཉིད་ཚང་བ་དང་ལས་འགན་སྒྲུབ་པར་མི་བརྩི།

༣       ཡང་རྩོམ་པ་པོ་འཇམ་དབྱངས་ནོར་བུ་ལགས་ཀྱིས་ཕྱི་ལོ་ ༢༠༠༥ ལ་བཏོན་པའི་རྩོམ་ཡིག་ཅིག་གི་ནང་ Of course, people must be allowed their beliefs no matter how ridiculous or wrong we may perceive them. I believe people have the right to worship Shugden or any other deity they want, while the Dalai Lama as a spiritual leader certainly has the right to object to this on theological grounds and ask people to refrain from such practices. But that is not the problem. The trouble is that the Tibetan government has been inducted to implement the Dalai Lama’s proscription of Shugden worship. The Tibetan government claims it has not issued any orders or appeals to people to harass or fight Shugden worshippers. Yet it has produced and distributed literature and videos demonizing Shugden worshippers. It has furthermore made no effort to discourage or condemn attacks on Shugden groups.ཞེས་མི་རྣམས་ཀྱི་རང་རང་གི་ཡིད་ཆེས་རྣམས་ང་ཚོའི་ངོས་ནས་ཇི་ཙམ་ནོར་འཁྲུལ་དང་བཞད་གད་ཀྱི་གནས་སུ་མཐོང་ནའང་། ཁོང་ཚོར་དེ་འདྲའི་ཡིད་ཆེས་བྱེད་རྒྱུའི་ཐོབ་ཐང་སྤྲོད་དགོས།

མི་ཚོར་ཤུགས་ལྡན་བསྟེན་གསོལ་བྱེད་རྒྱུའི་ཐོབ་ཐང་ཡོད་པ་ངས་ཡིད་ཆེས་བྱེད་ཀྱི་ཡོད་ལ། མཉམ་དུ་༧གོང་ས་༧སྐྱབས་མགོན་ཆེན་པོ་མཆོག་ལའང་ཆོས་ཀྱི་དབུ་ཁྲིད་ཡིན་པའི་ཆ་ནས་ཆོས་ཀྱི་རིག་པའི་གཞུང་ལུགས་ལ་བརྟེན་ནས་བསྟེན་གསོལ་མི་རུང་བའི་བཀའ་སློབ་གནང་རྒྱུའི་ཐོབ་ཐང་ངེས་པར་དུ་ཡོད།” ཅེས་སོགས་དང་། ཡང་མུ་མཐུད་དེ། Now more than ever, Tibetans absolutely need to move away from the world of superstition, oracles and magic into the real world of the 21st century.” ཞེས་ད་ཆ་ནི་བརྒྱ་ཕྲག་ཉེར་གཅིག་པའི་དངོས་དོན་གྱི་འཇིག་རྟེན་འདིའི་ནང་བོད་མི་རྣམས་རྨོངས་དད་དང་། ལྷ་ཁོག་ཞུགས། མིག་འཕྲུལ་སོགས་ལས་ངེས་པར་དུ་ཐག་རིང་དུ་བསྐྱོད་དགོས།” སོགས་ཇི་སྙེད་ཅིག་བྲིས་འདུག་པ་དེ་དག་རང་ཚིག་དངོས་ཤུགས་དང་། ཁས་བླངས་སྔ་ཕྱི་འགལ་བ་ཤ་སྟག་འདུག་པ་ནི།གནད་དོན་གང་ཞིག་གསལ་སྟོན་གནང་འདུན་ཡིན་པ་རྟོགས་དཀའ་བར་སྣང་། མི་ཚོར་བཞད་གད་བྱ་ཡུལ་གྱི་ནོར་འཁྲུལ་ལའང་ཡིད་ཆེས་བྱེད་རྒྱུའི་ཐོབ་ཐང་དགོས་ཚུལ་གསུངས་མ་ཐག་པའི་མཇུག་ཐོག་ཏུ། བརྒྱ་ཕྲག་ཉེར་གཅིག་པའི་དུས་ཀྱི་དངོས་དོན་དང་བསྟུན་ཏེ་རྨོངས་དད་སོགས་ལས་ཐག་བསྲིང་དགོས་པའི་འགལ་འདུའི་གནས་ཚུལ་གཉིས་ཀྱིས་རང་གི་དམ་བཅའ་རང་གིས་བཤིགས་པ་དང་། བཙན་བྱོལ་བོད་གཞུང་གི་ངོས་ནས་དོལ་རྒྱལ་རྗེས་འབྲང་པར་དྲང་བདེན་མིན་པའི་དབྱེ་འབྱེད་དང་། ཆད་གཅོད་སོགས་གང་ཡང་གནང་མེད་པ་ཁུངས་སྐྱེལ་རྭ་སྤྲོད་ཡོངས་ཁྱབ་ཏུ་གནང་ཟིན་ཡང་། ད་དུང་དེ་ལྟར་ཡོད་པའི་བསྙོན་འཛུགས་དང་། དོལ་རྒྱལ་རྗེས་འབྲང་བ་རྣམས་ཀྱིས་མི་གསོད་ཁྲག་སྦྱོར་འཇིགས་སྐུལ་རིང་ལུགས་ཀྱི་བྱ་སྤྱོད་ཇི་ཙམ་སྤེལ་བ་ཀུན་གྱིས་མངོན་སུམ་དུ་གྲུབ་པ་དེ་དག་སྣང་མེད་སྦས་བཀབ་གནང་ཕྱོགས་ལ་གཞིགས་ན་རྩོམ་ཡིག་འདི་དག་གཟུ་བོའི་བློས་རྒྱུ་མཚན་ལ་བརྟེན་པའི་དཔྱད་གཏམ་ཞིག་མ་ཡིན་པར། ༧གོང་ས་མཆོག་ལ་མཚན་སྨོད་སྐྱོན་བརྗོད་ཞུ་རྒྱུ་ཉག་གཅིག་དམིགས་ཡུལ་དུ་བཟུང་སྟེ། མཁྲིས་ནད་ཅན་གྱིས་དུང་སེར་པོར་མཐོང་བའི་ངང་ཚུལ་ལས་མ་འདས།

མཚམས་འདིར་བོད་གཞིས་བྱེས་གཉིས་ཀྱི་མགྲིན་ཚབ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མཛད་འཕྲིན་མུ་མཐའ་མེད་པ་ནས་ཆུ་ཐིགས་ཙམ་ཞིག་དགག་དགེའི་དབང་གིས་འགོད་པར་བྱེད་པ་ལ། འཇིག་རྟེན་སྤྱི་དང་། ཁྱད་པར་བོད་མི་ཡོངས་ལ་བཟོད་དཀའི་དཀའ་རྙོག་སེལ་ཐབས་དཀའ་བ་འདི་ལྟ་བུ་ཞིག་བྱུང་བའི་དུས་སྐབས་སུའང་། བཟང་ཕྱོགས་ནས་བལྟས་ན་༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་ཀྱི་ཆབ་སྲིད་ཀྱི་མངའ་དབང་བདག་གིར་བཞེས་ཏེ་བོད་རྒྱ་མི་རིགས་གཉིས་ཀྱིས་མཚོན་འཇིག་རྟེན་སྤྱིའི་བདེ་ཐབས་ལ་ཐུན་མོང་དང་ཐུན་མོང་མིན་པའི་རླབས་ཆེན་གྱི་མཛད་པ་བསམ་བརྗོད་ཀྱི་ཡུལ་ལས་འདས་པ་ཞིག་སྐྱོང་གནང་མཛད་པ་ནི་སེམས་ཅན་སྤྱི་མཐུན་གྱི་ལས་བསོད་ཁྱད་པར་བ་ཞིག་གི་འབྲས་བུ་ཡིན་ངེས་ཀྱང་། བོད་མི་རེ་ཟུང་གིས་གནད་དོན་འདི་མ་རྟོགས་པར་གོ་བ་ལོག་སྒྲུབ་ཏུ་སོང་བ་དེ་ནི་ཞུ་མར་འོག་གི་གྲིབ་ནག་ལྟ་བུ་རང་ཉིད་ཀྱི་ལས་བསོད་དམན་པ་ཁོ་ན་ལས་མ་འདས། 

འོན་ཀྱང་མ་རྟོགས་པ་དང་ལོག་པར་རྟོག་པའི་གཞན་དབང་དུ་སོང་བའི་བོད་མི་རེ་ཟུང་གིས་༧གོང་ས་སྐྱབས་མགོན་ཆེན་པོའི་ཡོངས་ཁྱབ་ཀུན་ཕན་གྱི་མཛད་བཟང་ལ་རང་འདོད་དང་མ་མཐུན་པའམ། རང་དོན་མ་འགྲུབ་པ་ཁོ་ན་རྒྱུ་མཚན་དུ་བྱས་ཏེ་ཟུར་ཟ་སྐྱོན་བརྗོད་ཞུ་མཁན་དེ་དག་ནི་སྙིང་རྗེའི་ཡུལ་ལས་མ་འདས་མོད། གཟུར་གནས་མང་ཚོགས་ཀྱིས་དེ་དག་སྣང་མེད་དུ་བཞག་ན་ངན་པ་ལང་ཤོར་འགྲོ་གཞི་མ་ཟད། ཅང་མི་སྨྲ་བས་དང་དུ་ལེན་པ་ལྟ་བུའི་འཕྲལ་རྐང་འཁྱོག་བཤད་ཀྱི་གཞི་རྩ་དང་། དུས་ཡུན་རིང་པོའི་རྗེས་བྱུང་རབས་གསལ་ཆ་མེད་པའི་སྐྱོན་ཅན་བཅས་སུ་འགྱུར་ཉེན་ཡོད་སྟབས། སྐབས་མཚམས་སོ་སོར་འགྲེལ་བརྗོད་གསལ་བཤད་དགོས་གལ་ཆེ་ཡང་། རང་རེ་མང་ཚོགས་གསེར་བོང་མཉམ་གཟིགས་ཀྱིས་ཆགས་བྲལ་བ་ལྟ་བུར་བཞུགས་པ་ནི་ཞན་ཆ་ཞིག་ལས་བཟང་སྤྱོད་ག་ལ་ཡིན། ཆགས་སྡང་མེད་པའི་གཟུ་བོའི་བློས་ལེགས་ཉེས་གནས་ལུགས་དངོས་དོན་རྣམས་འགྲེལ་བརྗོད་བྱེད་དགོས་པ་ནི་ཡུལ་མིའི་ལས་འགན་གལ་ཆེ་ཞིག་ཡིན་པས་བདག་གིས་འབད་པ་ཡིན། མཚམས་འདིར་༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ཅི་ཙམ་བོད་བསྟན་སྲིད་མི་རིགས་དང་བཅས་པར་བཀའ་དྲིན་བསམ་གྱིས་མི་ཁྱབ་པ་ཡིན་པ་རྩོམ་པ་པོའི་དགོངས་པར་མཁྱེན་བཞིན་མ་མཁྱེན་པའི་ཚུལ་གྱི་སྨག་རུམ་ལ་མཛད་པའི་འཕྲིན་ལས་ཀྱིས་འོད་སྣང་ཅུང་ཞིག་སྤྲོ་རྒྱུ་ཡིན།

༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་རྒྱ་ཆེ་མུ་མེད་ཀྱི་འཕྲིན་ལས་ནམ་མཁའ་དང་མཉམ་པ་དེ་དག་ནི་སར་གནས་སེམས་དཔའ་རྣམས་ཀྱིས་ཀྱང་དཔོག་པར་དཀའ་ན་སོ་སྐྱེ་རང་ག་བ་རྣམས་ཀྱིས་ཆ་ཙམ་ཡང་དཔོག་མི་ནུས་མོད། ཐུན་མོང་གདུལ་བྱའི་སྣང་ངོར་གྲགས་ཤིང་གྲུབ་པའི་མཛད་འཕྲིན་རེ་ཟུང་རྒྱ་མཚོ་ནས་ཆུ་ཐིགས་བླངས་པ་ལྟ་བུ་ཟུར་ཙམ་སྨོས་ན། ཆབ་སྲིད་ཀྱི་མངའ་དབང་བཞེས་མ་ཐག་དབུས་གཙང་ཆོས་ཀྱི་ཞིང་སར་དྲག་གནོན་དམག་འཁྲུགས་མི་བཟད་པའི་འོག་སྐྱ་སེར་མང་ཚོགས་ཕལ་མོ་ཆེ་ལུས་སྲོག་འཇིག་པའི་ཉེན་ཁ་ལས་བསྐྱབས་ཏེ་ཞི་མཐུན་གྱི་འགྲིགས་ཆགས་དང་། ༧གོང་ས་སྐུ་ཕྲེང་བཅུ་གསུམ་པ་ཆེན་པོའི་མཛད་འཕྲིན་གྱི་འཕྲོ་བསྐྱངས་ཏེ་བོད་མིའི་ཆབ་སྲིད་དམངས་གཙོའི་ལམ་དུ་སྒྱུར་ཐབས་སུ་བོད་ལྗོངས་ལེགས་བཅོས་ལྷན་ཚོགས་ཆེད་འཛུགས་ཀྱིས་ཆབ་སྲིད་ལེགས་བཅོས་དང་། ཆབ་འབངས་བདེ་བར་འཚོ་ཐབས་ཀྱི་ཐབས་ལམ་དུ་མ་ཕྱག་བཞེས་སུ་བསྟར་བ་དང་། ཕྱི་ལོ་ ༡༩༥༤ ། ༡༩༥༥ ལོར་རྒྱལ་ས་པེ་ཅིང་དུ་ཞབས་སོར་འཁོད་དེ་མའོ་ཙེ་ཏུང་གིས་གཙོས་པའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆེས་མཐོའི་དབུ་ཁྲིད་ཁག་དང་མཇལ་འཛོམས་བཀའ་བསྡུར་གྱིས་བོད་ལྗོངས་དམག་སྲིད་ལྷན་ཁང་འཛུགས་འཆར་དེ་དག་བོད་རང་སྐྱོང་ལྗོངས་གྲྭ་སྒྲིག་ཨུ་ཡོན་ལྷན་ཁང་གི་ངོ་བོར་བསྒྱུར་ཏེ། སྐབས་འཕྲལ་ཛ་དྲག་གི་ཉེན་ཁ་དུ་མ་ལས་གཡོལ་ཐུབ་པ་དང་། སྐབས་དེར་རྒྱ་གར་གྱི་སྲིད་བློན་ནེཧ་རུ་མཆོག་དང་མཇལ་འཕྲད་ཀྱིས་བོད་ལ་ནུས་ལྡན་གྱི་དབུ་ཁྲིད་མེད་པའི་ལོག་རྟོག་བསལ་ནས་བོད་མིའི་འབྱུང་འགྱུར་གྱི་མདུན་ལམ་ལ་རེ་བ་གསར་པ་ཞིག་གི་ས་བོན་རྒྱ་གར་གྱི་མགོ་ཁྲིད་རྣམས་ཀྱི་བསམ་བློར་ཐེབས་པ་དང་། ཕྱི་ལོ་ ༡༩༥༦ ། ༡༩༥༧ ལོར་རྒྱ་གར་འཕགས་པའི་ཡུལ་དུ་༧ཞབས་སོར་འཁོད་དེ་རྒྱལ་སྤྱིའི་ནང་བོད་དང་བོད་མིའི་ངོ་སྤྲོད་གསར་བསྐྲུན་དང་། རྒྱ་གར་གྱི་ཆེས་མཐོའི་དབུ་ཁྲིད་རྣམ་པ་དང་ནང་མོལ་ཞིབ་ལྷུག་གི་ལམ་ནས་འབྱུང་འགྱུར་དགོས་གལ་སྐབས་ཐུགས་བློ་གཏད་ཡུལ་གསར་བསྐྲུན་མཛད་པ། ཕྱི་ལོ་ ༡༩༥༩ གསུམ་བཅུའི་གྱེན་ལངས་རྗེས་༧གོང་ས་མཆོག་དང་བོད་གཞུང་བཀའ་ཤག་བཅས་འཕགས་ཡུལ་དུ་བཙན་བྱོལ་གྱི་བོད་མིའི་ཁྲིམས་མཐུན་གྱི་གཞུང་དགའ་ལྡན་ཕོ་བྲང་གི་ཆབ་སྲིད་ཀྱི་རྒྱུན་ཉམས་ཆག་མེད་པར་བཙན་བྱོལ་གཞུང་གི་ངོ་བོར་འཛིན་སྐྱོང་མཛད་ཐུབ་པ། ༧གོང་ས་མཆོག་གི་ཕེབས་རྗེས་སུ་འབྲང་བའི་བོད་མི་སེར་སྐྱ་ཕོ་མོ་དྲག་ཞན་རྒན་བྱིས་འབུམ་ལ་ཉེ་བར་གནས་སྐབས་ཟས་གོས་གནས་མལ་གྱི་དཀའ་རྙོག་བསལ་ཅིང་། རིམ་བཞིན་ཕུགས་བརྟན་འཚོ་ཐབས་གཞིས་ཆགས་ཁག་མང་གསར་བསྐྲུན་གྱིས་བཙན་བྱོལ་བའི་གནས་བབ་གཞན་དང་མི་འདྲ་བར་བོད་རིགས་བཙན་བྱོལ་བ་སུ་ཡང་ཟས་གོས་གནས་མལ་འཕྲོད་བསྟེན་གྱིས་ཕོངས་པ་མེད་པར་རང་དབང་ལྡན་པའི་རྒྱལ་ཁབ་ཁག་གི་ཡུལ་མི་དང་འདྲ་མཚུངས་སུ་འཚོ་གནས་ཐུབ་པ་བྱུང་བ། ལྷག་པར་བོད་རིགས་ན་གཞོན་ཡོངས་ལ་བོད་ཀྱི་གནའ་སྲོལ་དང་། དེང་རབས་ཀྱི་ཤེས་ཡོན་གཉིས་ལྡན་གྱི་སློབ་གྲྭ་ཁག་མང་གསར་འཛུགས་མཛད་དེ་བོད་མི་ན་གཞོན་གཅིག་ཀྱང་སློབ་སྦྱོང་གི་གོ་སྐབས་མ་ཐོབ་པ་མེད་པར་མཛད་པ་དང་། ཆོས་དང་། རིག་གཞུང་། ལེགས་བྱང་། ལྷག་པར་ནང་དོན་རིག་པའི་གཞུང་ལུགས་སློབ་གཉེར་གྱི་ལམ་སྲོལ་ཁག་ཉམས་མེད་རྒྱུན་གནས་ཐུབ་ཆེད་རིས་མེད་ཆོས་ལུགས་ཆོས་བརྒྱུད་ཚང་མའི་བཤད་གྲྭ་སྒྲུབ་གྲྭ དགོན་སྡེ་སོགས་རང་དབང་དུ་རང་འདོད་བཞིན་གསར་སྐྲུན་ཐུབ་པ་དེ་དག་ནི་ཡུལ་དུས་གནས་སྐབས་གང་ནས་གཞིགས་རུང་བསམ་ཡུལ་ལས་འདས་པའི་ངོ་མཚར་དངོས་བྱུང་ཞིག་ཡིན་པ་དང་། ཁྱད་པར་བོད་མིའི་ཆབ་སྲིད་ཀྱི་རང་བཞིན་ཡང་དག་པའི་དམངས་གཙོའི་ལམ་སྲོལ་དུ་བཙན་ཐབས་སུ་བསྒྱུར་འཁྲིད་མཛད་རྒྱུའི་དགོངས་བཞེད་བླ་མེད་ཀྱིས་སྐབས་དེའི་བོད་མིའི་བསམ་སྤྱོད་དང་འཚམས་མིན་ལ་མ་ལྟོས་པར་ཕྱི་ལོ་ ༡༩༦༡ ལོར་ཆོལ་གསུམ་ཆོས་ལུགས་དང་བཅས་པའི་དམངས་ཚོགས་ནས་འོས་འདེམས་བྱས་པའི་སྐུ་ཚབ་ཡོད་པའི་བོད་མི་མང་སྤྱི་འཐུས་ལྷན་ཚོགས་གསར་འཛུགས་ཀྱིས་དམངས་གཙོའི་ལ་སྲོལ་དབུ་བརྙེས་པ་མ་ཟད། ཆོལ་གསུམ་ཆོས་ལུགས་དང་བཅས་པའི་གོང་བུའི་ནུས་པ་སླར་གསོ་མཛད་དེ། བོད་མིའི་ཆབ་སྲིད་ཀྱི་བྱུང་རབས་ནང་ལེའུ་གསར་པ་ཞིག་གསར་གཏོད་དང་འབྲེལ། དེ་ནས་བཟུང་མང་ཚོགས་ཀྱི་བསམ་སྤྱོད་དང་འཇོན་ཐང་གིས་ལྕོགས་མིན་ལ་མ་ལྟོས་པར་༧གོང་ས་ཆེན་པོ་སྐུ་ཉིད་ཀྱིས་བྱིས་པ་མཛུབ་ཁྲིད་ལྟ་བུས་ལོ་ནས་ལོ་བསྟུད་ཀྱིས་སྤྱི་འཐུས་ལྷན་ཚོགས་རིམ་པས་རྒྱ་བསྐྱེད་དང་འབྲེལ་ཕྱི་ལོ་ ༡༩༩༠ ལོར་སྲོལ་རྒྱུན་བཀའ་ཤག་ཕྱིར་བསྡུའི་ཐོག་བར་བརྒལ་བཀའ་ཤག་དམིགས་བསལ་ཚོགས་ཆེན་ནས་འོས་བསྡུ། ཕྱི་ལོ་ ༡༩༩༡ ལོར་སྐབས་བཅུ་གཅིག་པའི་སྤྱི་འཐུས་ལྷན་ཚོགས་སྤྱི་འཐུས་ ༤༦ བར་གྲངས་སྤར་གྱིས་བཙན་བྱོལ་བོད་མིའི་བཅའ་ཁྲིམས་གཏན་ལ་ཕབ་སྟེ་བོད་མི་མང་སྤྱི་འཐུས་ལྷན་ཚོགས་ཁྲིམས་མཐུན་ཁྲིམས་བཟོ་ལྷན་ཚོགས་ཀྱི་ངོ་བོར་བསྒྱུར་བར་མཛད་པ།

ཕྱི་ལོ་ ༢༠༠༡ ལོར་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་ཀྱིས་བོད་མིའི་ཆབ་སྲིད་ཀྱི་དབུ་ཁྲིད་བཀའ་བློན་ཁྲི་པ་ཐད་ཀར་མང་ཚོགས་ནས་འོས་འདེམས་བྱེད་སྲོལ་གཏོད་དེ་བོད་མིའི་དམངས་གཙོའི་འཕེལ་རིམ་གོང་མཐོར་གཏོང་བ་དང་། ༧གོང་ས་མཆོག་གསེར་ཞལ་འཚོ་གཞེས་སྐབས་སྲོལ་རྒྱུན་ཆབ་སྲིད་ཀྱི་མངའ་དབང་ཡོངས་རྫོགས་འོས་འདེམས་བྱས་པའི་དབུ་ཁྲིད་ལ་རྩིས་སྤྲོད་གནང་རྒྱུའི་སྟ་གོན་ལེགས་པར་མཛད་དེ། མཐའ་དོན་ ༢༠༡༡ ཕྱི་ཟླ་ ༥ ཚེས་ ༢༩ ཉིན་སྲིད་ཕྱོགས་ཀྱི་སྐུ་དབང་ཡོངས་རྫོགས་འོས་ཐོན་མགོ་ཁྲིད་ལ་རྩིས་སྤྲོད་ཀྱིས་རིང་ནས་ཐུགས་ལ་བརྣགས་པའི་བཞེད་དགོངས་ཡང་དག་པའི་དམངས་གཙོའི་ལམ་སྲོལ་ཡོངས་སུ་རྫོགས་པར་མཛད་པ་སོགས་ནི་ཀུན་གྱི་བློ་ཡུལ་དུ་ཤོང་དཀའ་བའི་ངོ་མཚར་རྨད་བྱུང་གི་མཛད་རྗེས་ཡིན་ཞིང་། ༧གོང་ས་མཆོག་གི་དབུ་ཁྲིད་མེད་ན་བོད་མིའི་ཆབ་སྲིད་ཀྱི་ལམ་སྲོལ་ཡང་དག་པའི་དམངས་གཙོའི་ལམ་དུ་ལོ་གྲངས་ ༥༠ ཙམ་གྱི་ནང་དཀའ་ཚེགས་མེད་པར་བསྒྱུར་རྒྱུའི་རེ་བ་གཏན་བྲལ་ཡིན་པ་ཀུན་གྱི་བློས་ཆོད་ཡིན། ལྷག་པར་ཆོལ་གསུམ་བོད་རིགས་ཡོངས་རྫོགས་ཆིག་བསྒྲིལ་དང་། ཆོས་ལུགས་ཆོས་བརྒྱུད་ཡོངས་རྫོགས་དམ་ཚིག་འོ་ཆུ་གཅིག་འདྲེས་འདི་ལྟ་བུ་བོད་ཀྱི་བྱུང་རབས་ནང་སྔར་མ་བྱུང་བ་ཞིག་ཡིན། 

གཞན་ཡང་འཇིག་རྟེན་འདིའི་ཤར་ནུབ་ལྷོ་བྱང་གི་ཡུལ་གྲུ་ཀུན་ཏུ་བོད་བརྒྱུད་ནང་བསྟན་གྱིས་ཁྱབ་ཅིང་། བོད་ཀྱི་ཆོས་དང་ལེགས་བྱང་བོད་ཡུལ་དུ་རྩ་བརླགས་སོང་ཡང་། རྒྱལ་སྤྱིའི་ནང་རྒྱུན་གནས་ཐུབ་པའི་ལམ་ཆེན་གསར་པ་ཞིག་རྙེད་པ་དང་། དེ་ལ་བརྟེན་ནས་བོད་དང་བོད་མིའི་ངོས་འཛིན་དང་། བོད་མི་རིགས་ཀྱི་ཆེ་མཐོང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་འཛིན་པ་ཚོས་ཁྲིམས་འགལ་གདུག་རྩུབ་མི་སྤྱོད་ལས་འདས་པ་ཇི་བྱས་དང་། ཁོང་ཚོའི་དབང་སྒྱུར་ཁྲིམས་མཐུན་མིན་པའི་གནས་བབ་རྒྱལ་སྤྱིའི་སྤྱི་ཚོགས་ཡོངས་ཀྱིས་བདེ་བླག་ཏུ་རྟོགས་ནུས་པ་བྱུང་བ་འདི་དག་ནི་བོད་མི་སྒེར་དང་། སྒྲིག་འཛུགས། གཞུང་སུས་ཀྱང་བསྒྲུབ་པར་དཀའ་བའི་གྲུབ་འབྲས་རླབས་ཆེན་ཞིག་འབད་མེད་རང་བྱུང་དུ་གྲུབ་པའང་༧གོང་ས་མཆོག་གི་མཚན་སྙན་དང་མཛད་འཕྲིན་གྱི་གཟི་བྱིན་ཉག་གཅིག་གི་དབང་ལས་བྱུང་བ་འཇིག་རྟེན་ཀུན་གསལ་དང་། ལྷག་པར་དུ་འགྲོ་བ་མིའི་བཟང་སྤྱོད་ཀྱི་རིན་ཐང་དང་། བྱམས་བརྩེའི་དགོས་དམིགས། འཇིག་རྟེན་སྤྱི་ཡོངས་ལ་འཁྲི་བའི་ལས་འགན། ཆོས་ལུགས་དང་མ་འདྲེས་པའི་ལེགས་སྤྱོད། ཆོས་ལུགས་ཁག་མཛའ་མཐུན་མཉམ་འབྲེལ་གནས་ཐབས་སོགས་འཇིག་རྟེན་ཡོངས་ཀྱི་ཕན་བདེ་སྒྲུབ་པའི་ཐབས་ལམ་གཞན་འགྲན་མ་མཆིས་པ་གསལ་སྟོན་མཛད་པ་འདིས་འཇིག་རྟེན་སྐྱེ་རྒུ་ཡོངས་ལ་འཕྲལ་ཕུགས་ཀྱི་ཁེ་ཕན་རླབས་ཆེན་བསྐྲུན་པའི་ཞོར་དུ་བོད་དང་བོད་མིའི་རྩ་དོན་ལའང་གོ་རྟོགས་དང་གདུང་སེམས་མཉམ་སྐྱེད་གནང་མཁན་གྲངས་ལས་འདས་པ་ཞིག་བྱུང་ཡོད། 

དེ་བཞིན་ནང་ཆོས་དང་ཚན་རིག་དབར་གྱི་འབྲེལ་ལམ་དང་བགྲོ་གླེང་གི་སྒོ་ནས་ཕན་ཚུན་བློ་བསྐྱེད་སྤེལ་རེས་མཛད་པའི་རླབས་ཆེན་གྱི་མཛད་བཟང་ལ་བརྟེན་ནས་དེང་རབས་གོང་མའི་གནས་སྐབས་འདིར་ཡང་ཚན་རིག་པས་ཆོས་ལུགས་ལས་བློ་བསྐྱེད་ལེན་པའི་དུས་ཚིགས་གསར་པ་ཞིག་བསྐྲུན་གནང་མཛད་པ་འདི་ནི་ད་ཕན་འཇིག་རྟེན་འདིའི་ཆོས་དང་སྲིད་ཀྱི་དབུ་ཁྲིད་སུས་ཀྱང་སྒྲུབ་མ་ནུས་པ་ཞིག་༧གོང་ས་མཆོག་གིས་བདེ་བླག་ཏུ་འགྲུབ་པར་མཛད་པ་དེ་ནི་འབྱུང་འགྱུར་འགྲོ་བ་མིའི་བྱུང་རབས་ཀྱི་ནང་གཟི་བརྗིད་ལྡན་པའི་ལེའུ་ཞིག་ཏུ་གྱུར་ཡོད། དེ་དང་དེ་འདྲའི་རླབས་ཆེན་གྱི་མཛད་འཕྲིན་སྐྲ་གྲངས་ཆུ་གཉེར་ལྟ་བུ་མཐའ་ལས་འདས་པ་བརྗོད་ཀྱིས་མི་ལངས་མོད། གོང་སྨོས་དེ་དག་ནི་དཔེ་མཚོན་ཙམ་ཡིན་པ་དང་། མདོ་དོན་མཛད་བཟང་དེ་དག་སྤྱིར་སེམས་ཅན་ཐམས་ཅད་ལ་འཕྲལ་ཕུགས་གཉིས་སྨན་ཡིན་པ་མ་ཟད། ཡང་སྒོས་བོད་དང་བོད་མི་ཡོངས་ལ་དངོས་ཤུགས་བརྒྱུད་གསུམ་ནས་ཕན་ཐོགས་རླབས་ཆེན་བྱུང་དང་ཡོང་བཞིན་པ་ཀུན་གྱིས་མཐུན་སྣང་དུ་གྲུབ་པ་དེ་ཡིན། 

བྱས་པ་དྲིན་མེད་བྱེད་པའི་བག་བྲལ་གྱི།།

འཕྲལ་ཕུགས་གཉིས་མེད་རྣམ་རྟོག་འཕྱོན་མའི་གཟུགས།། 

གཟུར་གནས་མཁས་པའི་བུ་ཡིས་མི་སྤྱོད་ཀྱང་།། 

བདེན་དོན་དེབ་ཐེར་འགོད་ཕྱིར་གཏམ་འདི་བྲིས།།

བར་སྐབས་ཀྱི་ཚིགས་སུ་བཅད་པས་བརྒྱན་ཏེ།། ༢༠༡༣། ༤། ༢༥། རེས་གཟའ་ཕུར་བུ་ལ།།