མངོན་དགའ་སློབ་གྲྭའི་བོད་ཕྲུག་ཚོ་སྤྱི་ཚོགས་ཀྱི་ལོགས་སུ་མ་འཇོག་རོཊ།

རྡེ་ར་རྡུན་མངོན་དགའ་སློབ་གྲྭའི་སློབ་མ་ཚོ་ས་གནས་དེའི་བོད་མི་ཚོས་སྤྱི་ཚོགས་ཀྱི་ཟུར་དུ་འཇོག་གི་ཡོད་པའི་རྣམ་པ་ཡོད་སྟབས། འདིའི་ཐད་དབུས་བཀའ་ཤག་རང་གིས་ས་གནས་ཁག་ལ་བཀའ་བཏང་སྟེ། དམིགས་གསལ་མཐུན་འགྱུར་གནང་དགོས་པ་སོགས་ཀྱི་ལམ་སྟོན་གསལ་བོ་ཞིག་གནང་པ་ཡིན་ན་ཡག་པོ་འདུག་ཟེར།

རྡེ་ར་རྡུན་མངོན་དགའ་སློབ་གྲྭ་ནི་༧གོང་ས་མཆོག་གི་དགོངས་གཞིའི་འོག བོད་ཕྲུག་དབང་བོ་སྐྱོན་ཅན་ཚོར་དམིགས་ཏེ་ ༢༠༠༠ ཟླ་ ༣ ཚེས་ ༨ ཉིན་ཐོག་མར་སྒོ་འབྱེད་གནང་ཡོད་པ་དང་། སྐབས་དེར་བོད་དང་རྒྱ་བལ་འབྲུག་གསུམ་བཅས་ཀྱི་དབང་བོ་སྐྱོན་ཅན་བོད་ཕྲུག་ ༢༦ ནས་མགོ་འཛུགས་ཀྱིས་ད་བར་སློབ་ཕྲུག་ ༨༧ ཙམ་སློབ་ཞུགས་གནང་ཡོད་པ་དང་། ད་ལྟ་བོད་དང་རྒྱ་བལ་འབྲུག་གསུམ། ཧི་མ་ལ་ཡའི་རི་རྒྱུད་བཅས་ཀྱི་དམིགས་བསལ་དགོས་མཁོ་ཅན་གྱི་སློབ་ཕྲུག་ཕོ་མོ་རང་ལོ་ ༩ ནས་ ༢༨ ཡིན་པ་གྲངས་ ༤༤ ཙམ་ལ་བདག་སྐྱོང་བྱེད་མུས་ཡིན་འདུག

སློབ་གྲྭའི་དབུ་འཛིན་ཀརྨ་དར་རྒྱས་ལགས་ཀྱིས་ངོ་སྤྲོད་གནང་བ་ལྟར་ན། དང་ཐོག་སློབ་གྲྭའི་མིང་ལ་མངོན་དགའ་བོད་ཕྲུག་དབང་བོ་སྐྱོན་ཅན་གྱི་སློབ་གྲྭ་ཟེར་ཡང་། དེང་སྐབས་ ༼མངོན་དགའ་བོད་ཕྲུག་དམིགས་བསལ་དགོས་མཁོ་ཅན་གྱི་སློབ་གྲྭ་༽ཞེ་བར་མིང་བསྒྱུར་བྱས་ཡོད་པ་དང་། སློབ་གྲྭ་འདི་ནི་བོད་མིའི་སྒྲིག་འཛུགས་ཀྱི་གཞུང་འབྲེལ་དམིགས་བསལ་དགོས་མཁོ་ཅན་གྱི་སློབ་གྲྭ་ཐོག་མ་དང་། འཕྲོད་བསྟེན་ལས་ཁུངས་ཀྱི་ཐད་ཀའི་སྟངས་འཛིན་འོག་གི་སློབ་གྲྭ་གཅིག་པུ་དེ་ཆགས་ཡོད་འདུག གཏན་འབེབས་གྲངས་ཚད་ནི་ཕོ་ ༢༠ དང་མོ་ ༣༠ བཅས་ཁྱོན་སློབ་ཕྲུག་ ༥༠ ཡིན་ཞིང་། བུའི་ཁྱིམ་ཚང་གཉིས་དང་བུ་མོའི་ཁྱིམ་ཚང་གསུམ། ཁྱིམ་ཚང་རེར་ཕྲུ་གུ་ ༡༠ རེའི་ཚད་གཞིའི་སྟེང་ཕ་ཚབ་མ་ཚབ་གཉིས་རེ་གཏན་སྡོད་ཀྱིས་ཕྲུ་གུ་ཚོར་ལྟ་རྟོག་གནང་གི་ཡོད་འདུག

ཀརྨ་དར་རྒྱས་ལགས་ཀྱིས་བརྗོད་པ་ལྟར་ན། སློབ་གྲྭ་མགོ་བཙུགས་ནས་ད་ལྟའི་བར་ཁྱོན་སློབ་ཕྲུག་ ༨༧ སློབ་འཇུག་བྱས་ཡོད་པ་ལས། སྨན་སྦྱོར་དྲག་སྐྱེད་བྱུང་རིགས་ཁག་ཅིག་འཆར་ལྡན་གྱི་སློབ་གྲྭར་འགྲོ་ཐུབ་ཡོད་པ་དང་། ཁག་ཅིག་འབྲེལ་ཡོད་སློབ་ཕྲུག་གི་དབང་ནུས་ལ་བསྟུན་པའི་དམིགས་བསལ་སློབ་གྲྭ་སོགས་ཡར་མར་བཏང་ཡོད་འདུག འདས་གྲོངས་སུ་ཕྱིན་པ་ ༩ དང་། རབ་ཏུ་བྱུང་མཁན་ ༡ ། ཕ་མ་ནང་མིས་ཕྱིར་འཐེན་སློབ་མཚམས་བཞག་པ་ ༡༧ བཅས་བྱུང་ཡོད་འདུག

སློབ་གྲྭའི་ནང་འཛིན་སྐྱོང་སྡེ་ཚན་དང་ཤེས་ཡོན་སྡེ་ཚན། འཕྲོད་བསྟེན་སྡེ་ཚན། གསོ་སྐྱོང་སྡེ་ཚན་བཅས་ཀྱི་ནང་ཁྱོན་ལས་བྱེད་ ༤༠ ཙམ་ཡོད་པ་དང་། ཤེས་ཡོན་ཐད་སློབ་ཕྲུག་ཚོའི་ལོ་དང་དམིགས་བསལ་དགོས་མཁོར་གཞིགས་ཏེ་འཛིན་གྲྭ་ཆ་བགོས་ཐོག ཚོར་ཤེས་དང་གཟུགས་པོའི་གནས་སྟངས་ཅུང་ལེགས་པ་ཚོར་བོད་ཡིག་དང་ཨང་རྩིས། དབྱིན་ཡིག་བཅས་སློབ་ཁྲིད་དང་། གཞན་གཞས་སྣ། ཟ་མ་བཟོ་སྟངས། འཚེམ་བཟོ། རི་མོ། ཡང་ལ་བཟོ་སྟངས་དང་མེ་ཏོག་འདེབས་ལས་སོགས་ཀྱི་སྦྱོང་བརྡར་སྤྲོད་ཀྱིན་ཡོད་པ་དང་། གནས་སྟངས་ཧ་ཅང་ཞན་པ་ཁག་ཅིག་ལ་ཚོར་ཤེས་ཡར་རྒྱས་ཆེད་དམིགས་འཛིན་གྲྭ་དང་། ཉེ་འཁོར་གྱི་སྤྲོ་གསེང་བྱ་ཡུལ་ཁག་ལ་སྐོར་སྐྱོད་སོགས་བྱེད་ཀྱི་ཡོད་འདུག

གསར་འགོད་པས་མངོན་དགའ་སློབ་གྲྭའི་སློབ་འཇུག་གནང་ཕྱོགས་སྐོར་དྲིས་པར། སྤྱིར་སློབ་འཇུག་གི་ཐག་གཅོད་དབུས་འཕྲོད་བསྟེན་ལས་ཁུངས་ནས་གནང་གི་ཡོད་པ་དང་། དབང་བོ་སྐྱོན་ཅན་རིགས་གང་འདྲ་ཞིག་ཡིན་ཡང་སློབ་འཇུག་བྱེད་ཀྱི་ཡོད་པའི་ཁྲོད། གོ་སྐབས་དང་པོ་བོད་ནས་ཡོང་མཁན་ཚོར་སྤྲོད་ཀྱི་ཡོད་པ་དང་། གཉིས་པ་རྒྱ་བལ་འབྲུག་གསུམ་ནང་གི་བོད་ཕྲུག་ཚོར་སྤྲོད་ཀྱི་ཡོད་པ་དེ་ཕ་མ་ནང་མིའི་དཔལ་འབྱོར་གནས་སྟངས་དང་ཕྲུ་གུའི་ནད་གཞིའི་ཛ་དྲག་རང་བཞིན་བཅས་ལ་གཞིགས་ཏེ། སློབ་ཕྲུག་གི་ས་མིག་སྟོང་པ་ཐོན་རིམ་བཞིན་སློབ་འཇུག་བྱེད་ཀྱི་ཡོད་འདུག

ཁོང་ལ་དཀའ་ངལ་ག་རེ་ཡོད་མེད་དྲིས་པར་གདོང་ལ་སྐྱོ་ཉམས་ཤིག་དང་བཅས་“ དཀའ་ངལ་ཆེ་ཤོས་ཕྲུ་གུའི་འཕྲོད་བསྟེན་རེད། ཉིན་ལྟར་སློབ་གྲྭའི་སྨན་ཁང་དང་ཕྱི་ལོགས་ཀྱི་རྒྱ་གར་སྨན་ཁང་ནང་བརྟག་དཔྱད་སྨན་བཅོས་སུ་འཁྲིད་དགོས་པ་མ་ཟད། མང་པོ་ཞིག་གི་ཚོར་ཤེས་དང་དབང་ནུས་སོགས་རྒྱུན་ལྡན་མིན་སྟབས་ཛ་དྲག་རིགས་ནམ་ཡོང་ངེས་མེད་རེད། སློབ་གྲྭའི་ལས་བྱེད་ཚང་མས་སོ་སོའི་བུ་ཕྲུག་ནང་བཞིན་ལྟ་རྟོག་བྱེད་ཀྱི་ཡོད་རེད། སློབ་གྲྭ་འདིའི་ལས་བྱེད་ཚོའི་གླ་ཆ་སློབ་གྲྭ་གཞན་དག་ལས་དམའ་བ་ཡིན་སྟབས། ལས་བྱེད་མ་རག་པ་དང་སྔོན་མ་ཡོད་པ་ཁག་ཅིག་ཐོན་ཕྱིན་པའི་དཀའ་ངལ་འོག་ཡོད་ཅིང་། ད་ཡོད་ཕལ་ཆེ་བས་ཕྲུ་གུ་ཚོར་བསམ་བློ་བཏང་སྟེ་ཞབས་ཞུ་སྒྲུབ་ཀྱི་ཡོད་”ཅེས་བརྗོད་བྱུང་།

ཁོང་གིས་མུ་མཐུད་ “དཀའ་ངལ་ཆེ་ཤོས་གཉིས་པ་བོད་པའི་སྤྱི་ཚོགས་དང་ཉེ་འཁོར་བོད་མིའི་གཞིས་ཆགས་ཁག་གིས་རོགས་འདེགས་རྒྱབ་སྐྱོར་དཀོན་པོ་འདུག དཔེར་ན། དུས་ཆེན་དང་མཛད་སྒོ་སོགས་ཀྱི་སྐབས་གཞས་སྣ་འཁྲབ་སྟོན་དང་མཉམ་ཞུགས་སོགས་ཀྱི་གོ་སྐབས་སྤྲད་པ་ཡིན་ན་རང་བཞིན་གྱིས་ཕྲུ་གུ་ཚོར་དགའ་ཚོར་དང་། སོ་སོ་སྤྱི་ཚོགས་ཤིག་གི་ནང་སླེབས་ཐུབ་ཀྱི་ཡོད་པའི་སེམས་ཚོར་དང་གདེང་སྤོབས་སྐྱེད་ཐུབ་པར་ཕན་ཐོགས་ཡོད་ཀྱང་། དེ་འདྲའི་གོ་སྐབས་སྤྲོད་མཁན་ཉུང་ཉུང་ཡིན་པ་དང་། ཁོ་ཚོ་དབང་བོ་སྐྱོན་ཅན་རེད་ཟེར་ནས་སྤྱི་ཚོགས་ལས་ལོགས་སུ་འཇོག་པའི་དཀའ་ངལ་ཆེན་པོ་ཞིག་འདུག སྤྱི་ཚོགས་ཀྱིས་ཅིག་མ་བྱས་ན། ཕྲུ་གུ་ཚོའི་ངོས་ནས་ང་ཚོར་གོ་སྐབས་སྤྲོད་རོགས། ཆེ་མཐོང་སྤྲོད་རོགས་ཟེར་ཤེས་ཀི་མ་རེད། འདིའི་ཐད་དབུས་བཀའ་ཤག་རང་གིས་ས་གནས་ཁག་ལ་བཀའ་བཏང་སྟེ། དམིགས་བསལ་དགོས་མཁོ་ཅན་གྱི་ཕྲུ་གུ་ཚོར་གོ་སྐབས་སྤྲོད་དགོས་པ་དང་། ཆེ་མཐོང་སྤྲོད་དགོས་པ། དམིགས་གསལ་མཐུན་འགྱུར་གནང་དགོས་པ་སོགས་ཀྱི་ལམ་སྟོན་གསལ་བོ་ཞིག་གནང་པ་ཡིན་ན། ཏན་ཏན་འགྱུར་པ་འགྲོ་ངེས་རེད་དྲན་གྱི་འདུག་”ཅེས་བརྗོད་བྱུང་།

ཡང་གསར་འགོད་པས་མ་ཚབ་སྡེ་འགན་ཨ་མ་ཡེ་ཤེས་ཆོས་སྒྲོན་ལགས་སུ་ཕྲུ་གུ་ཚོར་ལྟ་རྟོག་གསོ་སྐྱོང་བྱེད་སྐབས་ཀྱི་མྱོང་ཚོར་དྲིས་པར་ཁོང་མོས། ཕྲུ་གུ་ཕལ་ཆེ་བ་ཞིག་ནང་ལ་འགྲོ་ས་མེད་པ་དང་དབང་བོའི་ན་ཚ་འདྲ་མིན་ཡིན་སྟབས། ཁྱིམ་ཚང་ཕ་ཚབ་མ་ཚབ་ཚོས་དུས་རྒྱུན་ཕྲུ་གུ་ཚོར་ཁྱིམ་ཚང་སོ་སོའི་ནང་ཡིན་པའི་ཚོར་བ་སླེབས་ཐབས་བྱེད་ཀྱི་ཡོད་སྐོར་དང་། མོ་རང་ཉིད་ཀྱིས་འདས་པའི་ལོ་ ༥ ཙམ་གྱི་རིང་བོད་ཕྲུག་དཀའ་ངལ་ཅན་དེ་ཚོར་ལྟ་རྟོག་གསོ་སྐྱོང་བྱེད་རྒྱུ་བྱུང་པ་ནི་སོ་སོས་བསོད་ནམས་བསགས་པའི་ལས་ཞིག་ཡིན་པར་ངོས་འཛིན་བྱེད་ཀྱི་ཡོད་པར་བརྗོད་བྱུང་།

གསར་འགོད་པ། བནྡེ་སྐྱབས།