བོད་
རྒྱ་གར་ནང་གི་བོད་མི་སྐྱབས་བཅོལ་པའི་སྡོད་གནས་ངྷ་རམ་ས་ལ་དང་ལྡི་ལི། རྒྱ་གར་ལྷོ་གཞིས་ཁག་བཅས་སུ་གནས་ཚུལ་ཡ་མཚན་ཅན་མང་པོ་མཐོང་རྒྱུ་ཡོད། དེའི་ནང་གི་གཅིག་དོན་དངོས་དང་བར་ཐག་རིང་བའི་རྒྱ་གར་ཡུལ་མི་དང་བོད་མི་སྐྱབས་བཅོལ་བའི་ཕྱི་ཚུལ་ལྟར་སྣང་དང་། བོད་པ་གསར་འབྱོར་རྙིང་འབྱོར་དབུལ་ཕྱུག་གི་བར་ཁྱད་དེ་རེད། གནས་སྟངས་འདི་སྐྱབས་བཅོལ་བོད་མི་གནས་ཡུལ་ཚང་མ་གཅིག་མཚུངས་ཡིན་མོད། ངྷ་རམ་ས་ལ་འདི་གསར་འབྱོར་བ་མང་ཤོས་སྡོད་ས་ཞིག་ཡིན་སྟབས་ཧ་ཅང་མངོན་གསལ་ཡིན།
ངྷ་རམ་ས་ལའི་སྐྱབས་བཅོལ་བོད་མི་དང་། དེའི་ནང་ནས་ཀྱང་གསར་འབྱོར་བ་ཚོའི་ཁྲོད། གཏོང་ས་ཡོད་མེད་གཉིས་ཀའི་ལག་ཏུ་གཅིག་ལས་གཅིག་རྫིག་གི་ལག་ཐོགས་ཁ་པར་དང་། སློབ་སྦྱོང་ཡོད་མེད་གཉིས་ཀའི་རྒྱབ་ཏུ་གཅིག་ལས་གཅིག་གོང་ཆེ་བའི་ལག་འཁྱེར་གློག་ཀླད་ཡོད། དེ་དག་མང་ཆེ་བ་ཀུ་ཤུ་དང་སཱེམ་སཱེང་རྟགས་ཅན་ཡིན་ལ། ད་དུང་རྒྱབ་ཀྱི་ལ་ཡང་ནུབ་ལྭ་ཐོན་གསར་དང་། འོག་གི་ཞོན་རྟ་ཡང་རྒྱ་གར་ནང་སྐད་གྲཊ་ཆེ་རུ་ཆེ་ཚད་ཀྱི་སྦག་སྦག་དག་ཡིན།
དོན་དངོས་ཐོག་ངྷ་རམ་ས་ལའི་བོད་མི་གསར་འབྱོར་བ་ལས་རྙིང་འབྱོར་ཚོ་ཕྱུག་པོ་ཡིན་ལ། བོད་མི་རྙིང་འབྱོར་ལས་རྒྱ་གར་བ་ཚོ་ཕྱུག་པོ་ཡིན། རྒྱ་གར་ས་གནས་ཡུལ་མི་ལས་ཕྱོགས་ཡོང་ཚོང་པ་ཚོ་ཕྱུག་པོ་ཡིན། ཡུལ་སྐོར་སྤྲོ་འཆམ་པ་དང་གནས་མཇལ་བ་ལྟ་བུའི་ངྷ་རམ་ས་ལར་རྒྱུས་མངའ་ཆེན་པོ་མེད་མཁན་ཚོར། རྒྱ་གར་ཡུལ་མི་ལས་སྐྱབས་བཅོལ་བོད་མི་ཕྱུག་པ་དང་། བོད་མི་རྙིང་འབྱོར་ལས་གསར་འབྱོར་ཚོ་ཕྱུག་པོ་ཡིན་པའི་གོ་ལྡོག་གི་ཚོར་སྣང་སྟེར་ངེས།
ངྷ་སའི་གསར་འབྱོར་ཚོའི་ཆ་རྐྱེན་སྔོན་མ་དང་བསྡུར་ན་ཇེ་བཟང་དུ་ཕྱིན་ཡོད་མོད། དོན་དངོས་ཐོག་ད་དུང་ཞོགས་ཇ་རག་ན་དགོང་ཟས་རག་གི་མེད་མཁན་དང་། དབྱར་ལྭ་རག་ན་དགུན་ལྭར་སེམས་ཁྲལ་ཡོད་མཁན། ཁང་གླ་འདང་ཡང་ཆུ་རིན་གློག་རིན་འདང་གི་མེད་མཁན་མང་པོ་ཡོད། ངྷ་རམ་ས་ལའི་སྦྲང་འཁྱམ་གྱི་བྲོ་བ་མྱོང་མཁན་གསར་འབྱོར་ཚོ་ཡིན་ལ། མྱོང་བ་མངོན་སུམ་མཐོང་མཁན་ཡང་གསར་འབྱོར་ཁོ་ན་ཡིན།
བོད་མི་གཞིས་ཆགས་ཁག་ནང་སྡོད་མཁན་ཚོར་སྡོད་ཁང་དང་ཞིང་ས་ཡོད་ལ། ཚོང་ལས་ཆེན་པོ་གཉེར་མཁན་དག་ཨ་ཅང་ཅང་། བལ་གོས་ཙག་ཙིག་འཚོང་མཁན་ཚོར་ཡང་དངུལ་བྱང་སྟེང་ཧིན་སྒོར་འབུམ་བཅུ་གྲངས་མེད་མཁན་ཧ་ལམ་མེད། ངྷ་ས་གངས་སྐྱིད་ཁུལ་དུ་སྡོད་མཁན་མང་ཆེ་བ་ལས་བྱེད་ཡིན། ཟླ་རེར་ཉུང་མཐར་ཧིན་སྒོར་བདུན་སྟོང་བརྒྱད་སྟོང་གི་ཟླ་ཕོགས་ཀྱི་སྟེང་ལ། ཁང་པ་དང་ཁང་དོད་སོགས་ཀྱི་ཐོབ་ཐང་ཡང་མང་དག་ཅིག་ཡོད།
ངྷ་རམ་ས་ལའི་རྒྱ་གར་ཡུལ་མི་འདི་དག་ཅི་ཙམ་སྐྱོ་བོ་ཡིན་ཡང་། མགོ་ན་རིན་པ་སྤྲོད་མི་དགོས་པའི་འཛུལ་སའི་ཁང་པ་དང་སྒོ་ཁར་བ་ཕྱུགས། ད་དུང་རང་ཁ་རང་གསོ་ཐུབ་པའི་ཞིང་ས་སོགས་ཡོད་ལ། ངྷ་སའི་སྲང་ལམ་གཡས་གཡོན་དུ་སྔོ་ཚལ་དང་མངར་ཇ་འཚོང་མཁན་ཚོའི་ཁྲོད་དུའང་ཧིན་སྒོར་འབུམ་ལྔ་དྲུག་སེམས་ཕུགས་སུ་བཅུག་མེད་མཁན་དཀོན། འདི་དག་གི་རྒྱབ་ཏུ་གློག་ཀླད་དང་ལག་ཏུ་ཁ་པར་རྫིག་པོ་ཕར་ཞོག ཐ་ན་ལུས་ལ་གྱོན་ཆས་དང་རྐང་མགོར་ལྷམ་གཙང་མ་གྱོན་མཁན་ཡང་ཉུང་ཉུང་ཡིན།
སྣོད་ན་ཡོད་ཚུལ་ལུས་ལ་གྱོན་ཏེ་ཉམས་སང་རྒྱག་པའི་གོམས་སྲོལ་དང་། ཁྱིམ་ན་ཡོད་ཚད་མདུན་ལ་སྤུངས་ནས་རྒྱས་སྤྲོས་གཏོང་བའི་ལམ་སྲོལ་འདི། མཐོ་སྒང་བོད་མིའི་གཉུག་གཤིས་ངོས་ཀྱི་རང་མཚང་ཞིག་མིན་ཡང་། གནའ་བོའི་སྐུ་དྲག་རྙིང་པའི་ཟིལ་ཤུགས་འགྲན་པའི་ང་རྒྱལ་ལྷག་མ་དང་། བགས་ཀྱིས་ཟིན་པའི་ཕྱི་རབས་རྒྱ་མི་སྔོན་པོའི་རིག་གཞུང་རུལ་བའི་བཙན་འཛུལ་རེད།
