ཉེ་ཆར་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག གངས་སྐྱིད་སྤྱི་ཐབ་ཚོགས་ཁང་དུ་༼རྒྱ་དམར་གྱི་མི་སྤྱོད་ལས་འདས་པའི་གདུག་རྩུབ་སྲིད་བྱུས་ལག་བསྟར་གྱིས་སྲེག་བཞིན་པའི་བོད་ནང་གི་ཛ་དྲག་གནས་སྟངས༽ཞེས་པའི་བརྗོད་གཞིའི་ཐོག་བོད་མཁས་པའི་བགྲོ་གླེང་ཞིག་ཚོགས་པ་དང་བསྟུན་ཏེ། རྩོམ་པ་པོ་སྤྱི་ཟུར་ཧོར་གཙང་འཇིགས་མེད་ལགས་སུ་བཅར་འདྲི་ཞུས་ཡོད།
དྲི་བ། བོད་མིའི་རང་ལུས་མེར་བསྲེགས་ཐོག་དགོངས་ཚུལ་གང་འདྲ་ཡོད་དམ།
ལན། བོད་མིའི་རང་ལུས་མེར་བསྲེགས་ཐོག་ང་ལ་བཤད་རྒྱུ་མང་པོ་ཞིག་རག་མ་སོང་། རྩོམ་ཡིག་འབྲི་མཁན་རེ་ཟུང་གིས་ལུང་པ་གཞན་དག་ནང་གི་རང་ལུས་མེར་བསྲེགས་དང་འབྲེལ་བའི་གནས་ཚུལ་དྲང་ཡོང་སྟེ་རྒྱུ་མཚན་བཤད་རྒྱུ་མང་པོ་འདུག ངས་དེ་དག་ང་ཚོ་དང་ཐད་ཀར་འབྲེལ་བ་ཡོད་པ་ཞིག་ལ་མཐོང་གི་མེད། དེ་དོན་དག་གཅིག་རེད། གཉིས་པ། རྒྱ་རིགས་རྩོམ་པ་པོ་ཝང་ལི་ཞོན་གྱི་རྩོམ་ཡིག་ཅིག་ཏུ། བོད་མིའི་རང་ལུས་མེར་བསྲེགས་སྐོར་ལ་དོན་ཚན་མང་པོ་དབྱེ་འདུག དོན་ཚན་གཅིག་གི་ནང་རང་ལུས་མེར་བསྲེགས་གནང་མཁན་སྐོར་ཞིག་གིས་དཔའ་སྤོབས་ངོམ་པ་རེད་ཟེར་བ་ལྟ་བུ་བཀོད་འདུག འདི་ལྟར་དཔྱད་བརྗོད་ཀྱི་རྣམ་པའི་ཐོག་ནས་མི་སྒེར་གྱི་བསམ་ཚུལ་ལྟར་དོན་ཚན་མང་པོ་དབྱེ་ན། རང་ལུས་མེར་བསྲེགས་ཀྱི་ནང་དོན་དེ་ཁ་འཐོར་འགྲོ་བ་དང་། དོན་དག་ཆུང་ཆུང་ཆགས་འགྲོ་བའི་ཉེན་ཁ་ཡོད་པ་རེད་དྲན་གྱི་འདུག
དྲི་བ། ད་རེབ་བགྲོ་གླེང་ཐོག་ཁྱེད་ཀྱིས་གཏམ་བཤད་ནང་དོན་གང་འདྲ་གྲ་སྒྲིག་གནང་ཡོད་དམ།
ལན། ངས་ད་ཐེངས་ག་རེ་བཤད་ཡོད་ཟེར་ན། བོད་ནང་དང་བཙན་བྱོལ་སྤྱི་ཚོགས། དེ་བཞིན་བཙན་བྱོལ་གྱི་བརྒྱུད་ལམ་ཁག་འདི་གསུམ་གྱི་བར་ན་ཁ་མ་གསང་བ་དང་། ར་མ་འཕྲོད་པའི་དོན་དག་ཆེན་པོ་ཞིག་ལྷག་འདུག་ཅེས་བཤད་པ་ཡིན། འདིའི་ཐོག་སྔོན་མ་ནས་ང་ལ་བློ་འཚབ་ཆེན་པོ་ཡོང་གི་འདུག དེ་གང་ཡིན་ཟེར་ན། བོད་ནང་གི་མི་མང་ལ་མཚོན་ན། ང་ཚོ་ཚང་མས་མཁྱེན་གསལ་རེད། རང་དབང་དང་ཐོབ་ཐང་གི་རྔ་རྡུང་ནས་འགྲོ་རྒྱུའི་གོ་སྐབས་ཡོད་པ་མ་རེད། བརྙན་འཕྲིན་དང་རླུང་འཕྲིན་དག་ལས་ཕྲན་བུ་རེ་གོ་བཞིན་ཡོད་པ་མ་གཏོགས། གཞན་ཁོང་ཚོས་འཛམ་གླིང་གི་གནས་ཚུལ་ཤེས་པའི་ལམ་ཁ་ཡོད་པ་མ་རེད། གནས་སྟངས་དེའི་འོག་ནས་ ༢༠༠༨ ལོའི་ཞི་རྒོལ་ཆེན་མོའི་སྐབས་ནས་བཟུང་ཕྱི་ལོགས་ཀྱི་ཚོགས་པ་ཁག་ཅིག་དང་ལས་འགུལ་བ་ཁག་ཅིག་གིས། བོད་ནང་གི་རྒྱ་ཆེའི་མི་མང་གི་སེམས་ཤུགས་ཧང་སང་བ་རེད། བསྔགས་བརྗོད་ཡོད། སྙིང་སྟོབས་དང་ཆོད་སེམས་ལ་འགྱུར་བ་མེད། ང་ཚོ་ཁྱེད་ཅག་གི་རྒྱབ་ཏུ་ཡོང་གི་ཡོད། ཅེས་པ་འདི་ཡང་ཡང་བསྒྲགས་པ་རེད། ཡིན་ནའང་རང་དབང་ལུང་པ་ནས་ངོ་རྒོལ་སྐད་འབོད་དང་། མར་མེ་ཁྲོམ་སྐོར། ཉིན་ཁ་ཤས་རེར་ཟས་བཅད་ངོ་རྒོལ་ཙམ་རེ་བྱེད་པ་ལས། དོན་ངོ་མས་ཐོག་ནས་ང་ཚོ་མི་གཅིག་ཁོང་ཅག་གི་རྗེས་སུ་ཕྱིན་མྱོང་ཡོད་དམ། མ་འོངས་པར་འགྲོ་ཐུབ་མཁན་ཡོང་གི་རེད་དམ། འདི་དྲི་བ་ཆེན་པོ་ཞིག་རེད། ངས་ད་རེབ་འདི་ལ་བསམ་བློ་ཏན་ཏན་གཏོང་དགོས་ཀྱི་འདུག་ཟེར་ནས་བཤད་པ་ཡིན།
དྲི་བ། ཉིད་ཀྱིས་བོད་ནང་དང་བཙན་བྱོལ་སྤྱི་ཚོགས། བཙན་བྱོལ་གྱི་བརྒྱུད་ལམ་ཁག་འདི་གསུམ་གྱི་བར་ན་ཁ་མ་གསང་བའི་དོན་དག་ཅིག་འདུག་ཟེར་བ་དེ་གང་ལ་བཤད་ཀྱི་ཡོད་དམ།
ལན། བོད་ནང་གི་བོད་མི་ཚོས་ཕྱི་ལོགས་ཀྱི་བོད་མི་གཅིག་པུར་རེ་བ་ཆེན་པོ་ཞིག་རྒྱག་གི་མེད་པ་གསལ་བོ་རེད། ཡིན་ནའང་ཁོང་ཅག་གི་སེམས་སུ་ནུབ་ཕྱོགས་ཀྱི་སྟོབས་ཤུགས་ཆེན་པོ་ཞིག་དང་། དྲག་ཆས་ཀྱི་དཔུང་རོགས་ཆེན་པོ་ཞིག་དྲང་ནས་ཡོང་གི་རེད་སྙམ་པའི་རེ་བ་ཞིག་དང་ཡིད་ཆེས་ཤིག་ཏན་ཏན་ཡོད་པ་རེད། སྔོན་མ་རིག་གནས་གསར་བརྗེ་སྐབས་སུ་ང་སྐྱེས་སའི་ཧོར་གཙང་ལུང་པར་མཱེ་ཀོ་ཏང་ཟེར་བ་ཞིག་བཙུགས་ཡོད། སྐབས་དེར་ག་རེ་བཤད་ཡོད་པ་རེད་ཟེར་ན་རྩ་འཛུགས་འདི་ལ་ཨ་རིའི་དྲག་ཚོན་གྱི་རྒྱབ་རོགས་ཡོང་གི་ཡོད་པ་རེད་ཟེར་ནས་བཤད་པ་རེད། རྗེས་སུ་མི་རྒྱུ་དང་གོ་མཚོན་གང་གི་རོགས་རམ་ཡང་བྱུང་ཡོད་པ་མ་རེད། དེའི་དབང་གིས་ས་གནས་ཀྱི་མི་དཔའ་བོ་མང་པོ་སྲོག་ཐོག་ལ་བཏང་བ་རེད། སྔོན་མ་དེ་འདྲ་བྱུང་བ་རེད། མ་འོངས་པར་ཡང་དེ་དང་ཆ་འདྲ་བོ་ཆགས་མི་སྲིད་པ་མ་རེད་ཟེར་གྱི་ཡོད། དྲང་བདེན། འཚེ་བ་མེད་པ། ཡང་དག་པ་གསུམ་གཞི་ལ་བཞག་སྟེ་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་གཏན་འབེབས་གནང་པ་རེད། ང་ཚོའི་དངོས་ཡོད་གནས་སྟངས་ཁ་གསང་བོས་ཐོག་ནས་ལ་ཕར་རྒྱབ་ལ་གསལ་བཤད་བྱེད་དགོས་ཀྱི་འདུག ང་ཚོར་ནུས་པ་དང་སྟོབས་ཤུགས། རྒྱབ་རོགས་སོགས་ག་རེ་ཡོད་མེད་ཁ་གསལ་བོ་མ་བཟོས་པར། མག་མོག་རབ་རིབ་ཏུ་བཞག་སྟེ། བོད་ནང་གི་བོད་མི་ཚོས་མུ་མཐུད་མེར་བསྲེགས་ཉེན་མཆོངས་བྱེད་བསྡད་ན། ཆབ་སྲིད་ཀྱི་ཐོག་ནས་ངས་ཤེས་ཀྱི་མེད་མོད། དྲང་བདེན། འཚེ་བ་མེད་པ་ཡང་དག་པ་གཞི་ལ་བཞག་པའི་གཞུང་ཞིག་གི་ངོས་ནས་ཀུན་སྤྱོད་ཏག་ཏག་བསྡད་མི་འདུག ཡ་རབས་བཟང་སྤྱོད་ཀྱི་ཐོག་ནས་འགྲིག་གི་མི་འདུག་ཟེར་གྱི་ཡོད།
དྲི་བ། ང་ཚོས་ཁྱོད་རང་གིས་བཤད་པ་ལྟར་གསལ་བཤད་བྱས་པ་ཡིན་ན། བོད་ནང་གི་བོད་མི་ཚོ་སེམས་ཤུགས་ཆག་གི་མ་རེད་དམ།
ལན། འདི་གནས་སྐབས་རིང་སེམས་ཤུགས་ཆག་དང་མི་ཆག་གི་གནད་དོན་ཞིག་མ་རེད། བོད་གཞིས་བྱེས་གཉིས་ཀྱི་ཕུགས་བསམ་མཛའ་འབྲེལ་དང་འཐབ་རྩོད་བརྟན་བརླིང་རྒྱུན་གནས་ལ་འབྲེལ་བ་ཡོད་པ་ཞིག་རེད། ང་ཚོར་གང་ཡོད་པ་དང་གང་མེད་པ་གཉིས་ཁ་གསང་དགོས། ང་ཚོ་བོད་ནང་ལ་སྐྱིད་སྡུག་མཉམ་མྱོང་བྱེད་དུ་འགྲོ་ཐུབ་ཀྱི་མེད་པ་དང་། བོད་བྱེས་པའི་རྒྱབ་ལོགས་ན་དམག་དང་མཚོན་ཆ། མི་དང་རྒྱུ་སོགས་ཀྱི་དཔུང་རོགས་སྟོབས་ཆེན་གང་ཡང་ཡོང་རྒྱུ་མེད་པ་གསལ་བོ་བཟོ་དགོས་པ་རེད། གཉིས་པ། ང་ཚོས་བྱེད་ཐུབ་པ་དེ་བོད་མི་རེ་འདས་གྲོངས་སུ་ཕྱིན་སྐབས། མར་མེ་ཁྲོམ་སྐོར་དང་མཆོད་འབུལ་སྨོན་ལམ། ཕྱི་རྒྱལ་ཁག་ཏུ་ཞུ་འབོད་སོགས་སྔོན་མ་ནས་བྱེད་ཀྱི་ཡོད་ལ་མ་འོངས་པར་ཡང་བྱེད་ངེས་ཡིན། དེ་ལས་ལྷག་པའི་ང་ཚོར་རེ་བ་དང་ཡིད་ཆེས་བྱེད་ས་མེད་པ་གསལ་བོ་བཟོ་དགོས། ཕྱི་ལོགས་རང་དབང་ལུང་པར་སྡོད་པའི་བོད་མི་ཚོས་གཞིས་པ་ཚོར་དྲང་མོ་མ་བྱས། གཞིས་པ་ཚོས་ཕྱི་སྡོད་བོད་མི་ཚོར་དྲང་མོ་མ་བྱས། ཕན་ཚུན་བར་གྱི་ཡིད་ཆེས་བརླག་པའི་ཉི་མ་ཞིག་འཆར་བ་ཡིན་ན། བོད་གཞིས་བྱེས་ལྷན་འཛོམས་ཟེར་བ་འདི་རིགས་རང་བཞིན་གྱིས་འགག་འགྲོ་བ་རེད།
དྲི་བ། བོད་ཕྱི་ནང་གི་རང་ལུས་མེར་བསྲེགས་ལས་འགུལ་འདིར་གྲུབ་འབྲས་འཐོན་མིན་ཐོག་གཟིགས་ཕྱོགས་གང་འདྲ་ཡོད་དམ།
ལན། རང་ལུས་མེར་བསྲེགས་ལ་གྲུབ་འབྲས་ཐོན་མིན་ཐོག་གླེང་སློང་མང་པོ་འགྲོ་བཞིན་འདུག ཡིན་ནའང་ཁ་ཤས་ཀྱིས་ཏུའུ་ནེ་ཤི་ཡ་ལྟ་བུའི་ལུང་པ་ཆུང་ཆུང་སྟོབས་ཤུགས་མེད་པ་དེ་འདྲ་དཔེ་མཚོན་ལ་དྲངས་ཏེ། བོད་མིའི་རང་ལུས་མེར་བསྲེགས་ལ་གྲུབ་འབྲས་མི་འདུག་ཟེར་མཁན་ཡོང་གི་འདུག དེ་དཔེ་མཚོན་ཡང་དག་ཅིག་མ་རེད། རྒྱ་ནག་གི་དམག་མིའི་གྲངས་འབོར་བོད་མི་ས་ཡ་དྲུག་གི་གྲངས་འབོར་ལས་ལྡབ་ཁ་ཤས་མང་བ་ཡོད། དེ་འདྲ་ཞིག་གི་འོག་ནས་མི་ཁ་ཤས་ཀྱིས་རང་ལུས་མེར་བསྲེགས་གནང་མ་ཐག་གྲུབ་འབྲས་དཀའ་ལས་ཁག་པོ་རེད། ཡིན་ནའང་ལྟོས་ས་ལྟོས་འཇོག་གིས་གྲུབ་འབྲས་ཆེན་པོ་ཐོན་ཡོད། རྒྱ་གཞུང་གིས་ད་བར་མེར་བསྲེགས་ཐད་སྐྱག་རྫུན་ག་ཚོད་བཤད་དགོས་ཐུག་སོང་། སྐད་ཆ་བཤད་སྟངས་ལ་འགྱུར་བ་ག་ཚོད་གཏོང་དགོས་བྱུང་ཡོད། དབུས་ཆེས་མཐོའི་མི་དམངས་ཁྲིམས་ཁང་ནས་ས་གནས་གྲོང་གསེབ་ཀྱི་དགེ་རྒན་དང་སྨན་པ་ཚུན་གྱིས་རང་ལུས་མེར་བསྲེགས་ཐོག་དོ་དམ་དང་ལས་ཀ་བྱེད་དགོས་བྱུང་བ་དེ་གྲུབ་འབྲས་ཆེན་པོ་ཞིག་ལ་ངོས་འཛིན་བྱེད་ཀྱིན་ཡོད།
དྲི་བ། དེང་སྐབས་བཙན་བྱོལ་སྤྱི་ཚོགས་ནང་བོད་རང་བཙན་ཤོད་མཁན་ཇེ་མང་དུ་འགྲོ་བཞིན་པའི་ཐོག་གཟིགས་ཚུལ་གང་འདྲ་ཡོད།
ལན། ང་ཚོ་ཐོག་མ་སྐྱབས་བཅོལ་དུ་སླེབས་པ་ནས་བཟུང་དམངས་གཙོའི་ལམ་དུ་འགྲོ་མགོ་ཚུགས་ཡོད་པ་རེད། འདས་པོའི་མི་ལོ་ལྔ་བཅུའི་རིང་དམངས་གཙོའི་འཕེལ་རིམ་ཚད་དགའ་རབ་ཅིག་ལ་བསླེབས་ཡོད། སོ་སོས་ག་རེ་བཤད་ན་རང་དབང་རེད། རང་བཙན་དང་ལམ་དབུ་མ་གང་ཡང་བཤད་ཆོག་གི་རེད། ཡིན་ནའང་གཙོ་ཆེ་ཤོས་དེ། ༧རྒྱལ་བ་རིན་པོ་ཆེ་འདི་བོད་མི་ས་ཡ་དྲུག་གི་སྟོབས་ཤུགས་ཆེན་པོ་ཞིག་རེད། ང་ཚོས་སྟོབས་ཤུགས་འདི་ལ་བརྟེན་ཏེ་སོ་སོའི་དཀའ་ངལ་སེལ་ཐུབ་པའི་ཕྱོགས་སུ་བསྐྱོད་ཐུབ་ཀྱི་མི་འདུག་སྙམ་པའི་བསམ་ཚུལ་དེ་སྔོན་མ་ནས་ཡོད། སྟོབས་ཤུགས་འདི་ཡོད་པའི་ཁ་ཐུག་ལ་ཡ་གས་ཡར་བཤད། མ་གས་མར་བཤད་དེ་སོང་བ་ཡིན་ན། ཉི་མ་ཞིག་ལ་སྟོང་ལྷང་ལྷང་ཆགས་དུས་གསབ་ཐབས་མེད་པའི་བློ་འགྱོད་ཆེན་པོ་ཞིག་ཆགས་མི་ཡོང་ངམ་སྙམ་པའི་སེམས་འཚབ་ཅིག་རྟག་པར་འཁོར་གྱི་འདུག ངའི་དྲན་ཚུལ་འདི་གཅིག་བྱས་ན་ཆབ་སྲིད་མ་ཤེས་པའི་ལྐུག་རྟགས་ཡིན་སྲིད་པ་རེད།
དྲི་བ། སྤྱི་འཐུས་གྲོས་ཚོཊ་ནང་མི་ཁ་ཤས་ཀྱིས་རང་བཙན་བཤད་སྐབས། དབུ་མའི་ལམ་གཏན་འབེབས་སྐབས་ཀྱི་སྤྱི་མོས་གྲོས་ཆོད་དང་། བཙན་བྱོལ་བོད་མིའི་བཅའ་སྒྲིག་སོཊ་ལ་འགལ་མིན་གྱི་གླེང་ཕྱོཊ་ཡོང་གི་ཡོད་པའི་ཐད་ངོས་འཛིན་གང་འདྲ་ཡོད་དམ།
ལན། ཁྲིམས་སྒྲིག་དང་འགལ་ཡོད་མེད་ངས་བཤད་ཤེས་ཀྱི་མེད། ང་ཚོ་བོད་པའི་སྤྱི་འཐུས་ཚོ་ཤིང་ནགས་གསེང་ལ་ཤོར་བའི་སྟག་དང་འདྲ་བོ་ཡོད། ཁོ་ལ་འོས་ཤོག་ཐོབ་ཚར་བའི་ཉི་མ་དེ་ནས་བཟུང་སྐེ་ཡི་ལྕགས་ཐག་བཀྲོལ་ནས་ཤིང་ནགས་གསེང་ལ་ཤོར་བ་དང་གཅིག་པ་རེད། ཁོ་ལ་སྐྲག་ས་འཇིགས་ས་དང་། བརྩི་དགོས་ས་གཅིག་ཀྱང་མེད་པ་ལྟ་བུ་ཆགས་ཡོད། དེ་འདྲའི་མི་ཞིག་ལ་ང་ཚོར་བྱེད་ཐབས་གང་ཡང་ཡོད་པ་མ་རེད། མང་ཚོགས་ནང་གྲོས་ཚོགས་འཐུས་མིས་བཤད་སྤྱོད་འགྲིག་གི་མེད་པའི་ལྟ་སྟངས་ཡོད་ན། ཨང་དང་པོ་འོས་ཤོག་ལྡུག་མཁན་མི་མང་གིས་དགོངས་པ་བཞེས་དགོས་པ་ཆགས་ཡོད།
དྲི་བ། མང་ཚོགས་ནང་དབུ་མའི་ལམ་ལ་གྲུབ་འབྲས་མེད་པའི་དགོངས་ཚུལ་ཤུགས་ཆེ་རུ་འགྲོ་བཞིན་ཡོད་པའི་ཐོག་ཁྱེད་རང་ལ་དགོངས་ཚུལ་གང་འདྲ་ཡོད་དམ།
ལན། ཁྱེད་རང་གསར་འགོད་པ་ཞིག་ཡིན་དུས་ཚིག་བེད་སྤྱོད་གཏོང་ཕྱོགས་ལ་གཟབ་དགོས་པ་རེད། མི་མང་ནང་བསམ་ཚུལ་ཤུགས་ཆེན་པོ་ཡོང་གི་འདུག་ཟེར་བ་དེར་ངོས་ལེན་མེད། བསམ་ཚུལ་ཡོད་མཁན་ཁ་ཤས་ཏན་ཏན་ཡོད་པ་རེད། ཡིན་ནའང་བོད་པའི་སྤྱི་ཚོགས་ཆེ་ཆུང་ལ་མ་ལྟོས་པར་བསམ་ཚུལ་སྣ་ཚོགས་ཡོང་སྲིད་པ་རེད། དབུ་མའི་ལམ་གྱི་གྲུབ་འབྲས་བཤད་དགོས་ན་དུས་ཚོད་ཐུང་ཐུང་ནང་རྫོགས་པ་ཞིག་མ་རེད། རྡོག་རྡོག་བཤད་ན། དེང་སྐབས་བོད་ཕྱི་ནང་གཉིས་སུ་སྒུལ་ཤུགས་དང་གཡོ་འཁྱོམ་ཆེན་པོ་ཡོང་གི་ཡོད་པ་དེ་དབུ་མའི་ལམ་ལ་བརྟེན་ཏེ་བྱུང་བ་རེད།
༧གོང་ས་མཆོག་གིས་འཛིན་སྐྱོང་དང་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་བདམས་པའི་མགོ་འཁྲིད་ཚོར་ཕུལ་ཚར་བ་རེད། ད་ལྟའི་སྲིད་སྐྱོང་སྔོན་མ་བཀའ་ཁྲིའི་འོས་གཞིར་ལངས་སྐབས། ངས་ལམ་དབུ་མར་ལུས་ངག་ཡིད་གསུམ་གྱིས་ཡིད་ཆེས་བྱེད་ཀྱི་ཡོད། མ་འོངས་པར་མུ་མཐུད་ནས་སྲིད་བྱུས་འདི་རྒྱུན་འཁྱོང་བྱེད་རྒྱུ་ཡིན་ཞེས་ཁས་ལེན་གནང་བ་རེད་མ་གཏོགས། ༧གོང་ས་མཆོག་གིས་སྲིད་བྱུས་འདི་ངེས་པར་དུ་མུ་མཐུད་དགོས་གསུངས་ཡོད་པ་མ་རེད། གལ་སྲིད་དབུ་མའི་ལམ་ལ་གྲུབ་འབྲས་མེད་པ་ཞིག་ལ་མཐོང་གི་ཡོད་ན། གཞུང་གི་མགོ་ཁྲིད་མི་མང་གིས་འདེམས་ཀྱིན་ཡོད་ལ། སོ་སོའི་ངོ་ཚབ་སྤྱི་འཐུས་ཀྱང་མི་མང་གིས་འདེམས་ཀྱིན་ཡོད་སྟབས། བརྒྱུད་ལམ་འདི་གཉིས་བརྒྱུད་དེ་ཁྲིམས་དང་སྒྲིག་གཞི་ལ་འགྱུར་བ་བཏང་སྟེ། ལམ་ཁ་ཡང་དག་པ་དེར་བསྐྱོད་ན་མ་འགྲིག་པ་ཡོད་པ་མ་རེད།
དྲི་བ། བཀའ་ཤག་སྐབས་བཅུ་བཞི་བའི་ཕྱག་ལས་མགོ་འཛུགས་གནང་སྟེ་ལོ་གཅིག་ལྷག་ཕྱིན་ཚར་བ་རེད། དུས་ཡུན་འདིའི་རིང་ཕྱག་ལས་གནང་སྟངས་དང་སྲིད་བྱུས་འཛིན་ཕྱོགས་ཐོག་དགོངས་ཚུལ་གང་འདྲ་ཡོད་དམ།
ལན། འདིའི་སྐོར་ངས་ཤེས་ཀྱི་མེད། གཞི་རྩའི་ང་ད་ལྟ་སྡོད་ས་ངྷ་རམ་ས་ལ་མ་རེད། ཡིན་ནའང་སོ་སོས་སྔོན་མ་ནས་བཀའ་ཤག་སྐབས་བཅུ་བཞི་བས་འདི་དང་དེ་གནང་དགོས་པ་རེད་བསམ་བསམ་ཁ་ཤས་ཡོད། ད་ལྟའི་སྲིད་སྐྱོང་སྔོན་མ་བཀའ་ཁྲིའི་འོས་མིར་བཞེངས་སྐབས། མི་མང་ལ་དོན་དག་མང་པོ་ཞིག་ཁས་ལེན་བྱས་པའི་ཁྲོད་ནས་གཙོ་བོ་ཞིག་གསར་གཏོད་དང་རང་ཁ་རང་གསོ། ཆིག་སྒྲིལ་གསུམ་རེད། དེ་མི་མང་གིས་ཀྱང་བློ་ལ་འབབ་པོ་བྱུང་སྟེ་ཁོ་ལ་རྒྱབ་སྐྱོར་ཐོབ་པ་རེད། ད་བར་གསར་གཏོད་ག་རེ་བྱས་ཡོད་མེད་གོ་ཐོས་མ་བྱུང་། གལ་སྲིད་བྱས་མེད་ན་ངེས་པར་དུ་བྱེད་དགོས་པ་རེད། དེ་བཞིན་རང་ཁ་རང་གསོ་དང་ཆིག་བསྒྲིལ་ལ་མཚོན་ནའང་གཅིག་པ་རེད། དེ་བས་གལ་ཆེ་ཤོས་ཤིག བོད་ནང་རིགས་གཅིག་རྐང་འཛིན་འབུམ་གཅིག་དང་། སྐྱབས་བཅོལ་ནང་ཁྲི་ལྔ་སྐྱེད་སྲིང་བྱེད་རྒྱུ་ཡིན་ཟེར་ནས་ཁས་ལེན་གནང་ཡོད་པ་རེད། ད་ལྟ་ལོ་གཉིས་མ་ཟིན་ཙམ་ཞིག་འགྲོ་ཚར་རེད། མ་མཐར་ཡང་ཁས་ལན་དེ་དག་གི་མཐའ་འབྲས་སྟོན་ཐུབ་མེད་ཀྱང་མགོ་འཛུགས་ཀྱི་ལམ་བུ་གསལ་གསལ་ཐང་ཐང་ཞིག་སྟོན་རྒྱུ་དགོས་པ་རེད།
དྲི་བ། བཀའ་ཤག་སྐབས་བཅུ་བཞི་བས་ཕྱི་རྒྱལ་ཁག་ཏུ་བོད་དོན་ཞུ་གཏུག་སྐོར་སྐྱོད་དང་། རྒྱ་གར་མི་མང་ནང་བོད་དོན་དྲིལ་བསྒྲགས་ཤུགས་ཆེན་པོ་གནང་གི་ཡོད་པའི་ཐོག་དགོངས་ཚུལ་གང་འདྲ་ཡོད།
ལན། ངས་མཐོང་སྟངས་བྱས་ན། བཀའ་བློན་རྣམ་པ་དང་བོད་མིའི་སྒྲིག་འཛུགས་ཀྱི་གནད་ཡོད་དེ་ཚོ་༧གོང་ས་མཆོག་གང་ལ་ཕེབས་ན། དེའི་རྗེས་སུ་འབྲང་སྟེ་རྒྱུག་བསྡད་པའི་བཟོ་འདྲ་ཞིག་མཐོང་སོང་། ངའི་ངོ་ཤེས་གྲོགས་པོ་ཚོར་ཡང་ལྟ་ཚུལ་དེ་འདྲ་འདུག དེ་ཡག་པོ་ཞིག་ལ་ཁྱོན་ནས་མཐོང་མ་སོང་། ༧གོང་ས་མཆོག་གིས་ཆབ་སྲིད་དང་འཛིན་སྐྱོང་གི་འགན་དབང་ཆ་ཚང་རྩིས་སྤྲད་ཚར་བ་རེད། ཆབ་སྲིད་ཀྱི་ལས་ཀ་བྱེད་མཁན་དེ་ཚོས་༧གོང་ས་མཆོག་དང་སྟབས་བསྟུན་བྱས་ཏེ་ལས་ཀ་བྱས་བསྡད་པ་ཡིན་ན། རྒྱལ་སྤྱིའི་ཐོག་ནས་ལྟ་སྣང་མཐོང་སྣང་ཡག་པོ་ཡོང་གི་མ་རེད། དེ་དོན་དག་གཅིག་རེད།
གཉིས་པ། ཕྱི་རྒྱལ་ཁག་ཏུ་ཕྱིན་ཏེ་གྲུབ་འབྲས་གང་འདྲ་ཐོན་ཡོད་མེད་དེ། བཀའ་ཤག་སྐབས་སྔོན་མ་ཚོ་ཡང་ཕྱི་ལོགས་སུ་མང་པོ་ཕེབས་ཚར་བ་རེད། མཉམ་འབྲེལ་རྒྱལ་ཚོགས་དང་ཨ་རིའི་ཁང་པ་དཀར་པོའི་ནང་ཐེངས་མང་ཕྱིན་ཡོད། རྒྱལ་ཁབ་ཁག་གི་གྲོས་ཚོགས་གོང་འོག་ལ་ཐུག་འཕྲད་མང་པོ་བྱས་པ་རེད། ཡིན་ནའང་དེང་གི་གོ་ལ་གཅིག་གྱུར་གྱི་དཔལ་འབྱོར་འགྲོ་སྟངས་འདིའི་ཐོག་ནས་རྒྱལ་ཁབ་སྟོབས་ཆེན་གང་འདྲ་ཡིན་རུང་སོ་སོའི་རྒྱལ་ཁབ་ཀྱི་མངོན་འདོད་དབྱིན་སྐད་ནང་(National Interest)འདི་ལས་ལྷག་གི་འགན་ཞིག་མཉམ་འཁྱེར་བྱེད་ཐུབ་ཀྱི་མེད་སྟབས། བོད་དོན་ཐོག་ལའང་དེ་ལས་ལྷག་གི་རོགས་རམ་དང་རྒྱབ་སྐྱོར་ཡོང་གི་རེད་བསམ་པའི་ཡིད་ཆེས་བྱེད་ཐུབ་ཀྱི་མི་འདུག
གསར་འགོད་པ། དོན་འགྲུབ་བཀྲ་ཤིས།
བཀའ་མོལ་འཐད་པོ་གསུངས་འདུག
དབུ་མ་པ་ཞིག་ཀྱང་ཡིན་ངེས་འདུག
དཔྱད་ཞིབ་དང་འགན་འཁུར་གྱི་གཏམ་འགའ་རེའང་མཇལ་སོང་ལ།
དོགས་བསུའི་རྨོངས་འཆལ་ཡང་རེ་འགའ་འདུག་སྙམ།
ཧོར་འཇིགས་ལགས་ཀྱིས་དངོས་ཡོད་ཀྱི་སྤྱི་ཚོགས་ཀྱི་གནས་བབ་ལ་གཞིགས་པའི་བཀའ་ལན་ཡག་པོ་གནང་འདུག འོན་ཀྱང་དེང་སང་སྤྱི་ཚོགས་སུ་འདི་འདྲའི་གཏམ་འགྲོ་རྒྱུ་ཁག་པོ་འདུག