ཚན་རིག་ཤེས་ཡོན་འགན་འཛིན་རྒྱལ་མཚན་གྱིས་བརྩམས།
བསོད་ནམས་བཟང་པོས་བསྒྱུར།
བཙན་བྱོལ་བོད་མིའི་སྤྱི་དམངས་ཀྱི་འདུན་ས་དང་གསར་འགོད་བརྒྱུད་ལམ་ཁག་ཏུ་དུས་རྒྱུན་བགྲོ་གླེང་བྱེད་སའི་གླེང་གཞི་གཙོ་བོ་ནི་ཆབ་སྲིད་ཀྱི་སྐོར་འབའ་ཞིག་ལས། སློབ་གསོའི་སྐོར་ལ་གླེང་སློང་བྱ་མཁན་རྩ་བ་ནས་མེད་པའམ་ཧ་ཅང་དཀོན་པའི་གནས་སུ་གྱུར་ཡོད། ཁྱེད་ཀྱིས་བོད་ནང་གི་གནས་སྟངས་དང་བཙན་བྱོལ་བོད་མིའི་ཆབ་སྲིད་འཛིན་སྐྱོང་སྐོར་གྱི་རྩོམ་ཡིག་སྤེལ་སའི་གྲགས་ཆེའི་དྲ་རྒྱ་དང་གསར་ཤོག་སོགས་ལ་བལྟ་ཀློག་བྱེད་སྐབས། དེང་སྐབས་ང་ཚོར་ཤེས་ཡོན་དང་འབྲེལ་བའི་དཀའ་རྙོག་ཅི་ཞིག་འཕྲད་མིན་སྐོར་ལ་རྩོམ་ཡིག་ཅི་ཙམ་བཀླགས་མྱོང་ངམ། དཔེར་ན་གོ་བ་གཏིང་ཟབ་ལོན་ཡོད་མེད་ཇི་ལྟར་རུང་། བཙན་བྱོལ་བོད་མི་ཕལ་ཆེ་བས་དབུ་མའི་ལམ་ལ་རྒྱུས་མངའ་གང་འཚམ་ཡོད་པ་མ་ཟད། དེ་ནི་བོད་མིའི་སྒྲིག་འཛུགས་ཀྱི་གཞུང་འབྲེལ་ལང་ཕྱོགས་ཤིག་ཡིན་པའི་ངེས་ཤེས་རྙེད་ཡོད། འོན་ཀྱང་ང་ཚོས་བོད་མིའི་སྒྲིག་འཛུགས་ཀྱི་གཞི་རིམ་ཤེས་ཡོན་སྲིད་བྱུས་དང་དེའི་ནང་དོན་ཁག་ལ་རྒྱུས་མངའ་ཅི་ཙམ་ལོན་ཡོད།
བོད་ཀྱི་སློབ་གསོའི་ཐོག་བྱ་གཞག་བསྒྲུབ་མཁན་ཞིག་ཡིན་པའི་ཆ་ནས། ངས་ག་དུས་ཡིན་ཡང་སློབ་གྲྭའི་དགེ་རྒན་དང་སློབ་ཕྲུག འཛིན་སྐྱོང་། ཕ་མ་སོགས་དང་ལྷན་དུ་གཞི་རིམ་ཤེས་ཡོན་སྲིད་བྱུས་སྐོར་ལ་གྲོས་བསྡུར་བྱ་ཐབས་བྱེད་ཀྱི་ཡོད། འོན་ཀྱང་ཆེས་ཧང་སངས་བ་དང་སྤ་བཀོང་བའི་གནད་དོན་ཞིག་ལ། བོད་མིའི་སྒྲིག་འཛུགས་ཀྱིས་གཞི་རིམ་ཤེས་ཡོན་སྲིད་བྱུས་ཀྱི་བཀའ་རྩ་ཡོངས་བསྒྲགས་གནང་ནས་ལོ་ངོ་བཅུ་ཙམ་སོང་བའི་དུས་འདིར་ཡང་། རང་རིགས་མང་པོ་ཞིག་ལ་སྲིད་བྱུས་འདིའི་རྨང་གཞིའི་གོ་རྟོགས་ཙམ་ཡང་མེད་པ་འདི་རེད། དེ་ལས་ཡིད་སྐྱོ་བ་ཞིག་ལ་མི་མང་པོ་ཞིག་གིས་སྲིད་བྱུས་ཀྱི་དགོངས་དོན་ལ་ལོག་འགྲེལ་བྱས་ནས་སྐད་གསང་མཐོན་པོས་སྐྱོན་བརྗོད་བྱེད་ཀྱི་ཡོད། རྩོམ་ཡིག་འདིའི་ནང་ཁོ་བོས་སྲང་ལམ་གྱི་སྐད་ཆ་དང་ཚོགས་ཐོག་གི་གཏམ་བཤད་སོགས་ལས་ཐོས་པའི་གཞི་རིམ་ཤེས་ཡོན་སྲིད་བྱུས་ལ་འཛིན་པའི་ཐུན་མོང་གི་ལོག་རྟོག་ཁག་གསུམ་གཙོ་བོར་དམིགས་ཏེ། དེ་དག་གསེད་བཀྲོལ་བྱ་བའི་ཐབས་ལ་འབད་པར་བྱེད།
ལོག་རྟོག་དང་པོ། གཞི་རིམ་ཤེས་ཡོན་སྲིད་བྱུས་དེ་བཞིན་སློབ་ཁྲིད་བརྒྱུད་ལམ་བོད་སྐད་དུ་བསྒྱུར་རྒྱུ་ཙམ་ལ་ངོས་འཛིན་པ།
འདི་ནི་ང་ཚོའི་སྤྱི་ཚོགས་ཀྱིས་གཞི་རིམ་ཤེས་ཡོན་སྲིད་བྱུས་ལ་འཛིན་པའི་ཐུན་མོང་གི་ལོག་རྟོག་ཟབ་ཤོས་དེ་རེད། གཞི་རིམ་ཤེས་ཡོན་སྲིད་བྱུས་ནང་སློབ་གྲྭའི་བསླབ་གཞི་ཡོངས་རྫོགས་བོད་ཀྱི་སྐད་ཡིག་ཐོག་བསྒྱུར་རྒྱུའི་དོན་ཚན་ཞིག་ངེས་པར་འཁོད་ཡོད་ཀྱང་། དོན་ཚན་དེ་ཁོ་ནས་གཞི་རིམ་ཤེས་ཡོན་སྲིད་བྱུས་མཚོན་མི་ཐུབ་པ་མ་ཟད། དེ་ནི་ཤེས་ཡོན་སྲིད་བྱུས་ཀྱི་དགོངས་དོན་གཙོ་བོ་ནི་དེ་བས་ཀྱང་མིན།
སྤྱིར་ཚན་རིག་གི་ཉམས་ཞིབ་གྲུབ་དོན་ནང་མ་སྐད་བརྒྱུད་ལམ་ནས་སློབ་ཁྲིད་བྱས་ན་སློབ་ཕྲུག་ཚོས་གོ་དོན་བདེ་ལྷག་ངང་རྟོགས་ཐུབ་པའི་ར་སྤྲོད་གསལ་པོ་བྱུང་ཡོད་ཀྱང་། མ་སྐད་བརྒྱུད་ལམ་ནས་སློབ་ཁྲིད་བྱེད་ན་འོས་འཚམ་ཡིན་མིན་སྐོར་ལ་བགྲོ་གླེང་བྱས་ཆོག འོན་ཀྱང་རང་གི་མཐོང་ཚུལ་འབའ་ཞིག་ལ་གཞིགས་ཏེ་སྲིད་བྱུས་ཀྱི་འབྲུ་དོན་ཡོངས་རྫོགས་ལ་མག་མོག་གིས་རིགས་འགྲེའི་དགག་གཞག་བྱེད་པ་ནི་བཞད་གད་ཀྱི་གནས་ལགས།
ཁོ་བོས་བལྟས་ན་གཞི་རིམ་ཤེས་ཡོན་སྲིད་བྱུས་ཀྱི་ཐུན་མོང་མ་ཡིན་པའི་ཁྱད་ཆོས་ཀྱི་སྙིང་པོ་ནི་ཤེས་ཡོན་སློབ་སྦྱོང་སྤྲོད་པའི་དམིགས་ཡུལ་བཞི་དེ་ཡིན། དེ་ཡང་སློབ་ཕྲུག་རྣམས་རང་རང་གི་རྣམ་འབྱེད་ཀྱི་ཤེས་རབ་ཡོངས་སུ་སད་དེ་བླང་དོར་གྱི་གནས་ལ་རང་སྟོབས་ཀྱིས་ལེགས་ཉེས་འབྱེད་པའི་བསམ་སྤྱོད་ཀྱི་རང་དབང་དང་། སློབ་ཕྲུག་ཚོས་རང་ལས་གཞན་གཅེས་པར་བཟུང་སྟེ་གཞན་གྱི་དོན་དུ་རང་ཉིད་བློས་བཏང་ནས་སྲི་ཞུ་སྒྲུབ་ནུས་པའི་གཞན་ཕན། ཕ་མེས་ནས་བྱུང་བའི་བོད་ཀྱི་རིག་གཞུང་བཟང་པོ་རྣམས་དང་། ཁོར་ཡུག་སྲུང་སྐྱོབ་རྒྱུན་གནས་ཐུབ་པའི་རྒྱུན་འཛིན། འཇིག་རྟེན་སྤྱིའི་ཕན་བདེ་དང་འབྲེལ་ཞིང་ཡུལ་དུས་ཀྱི་དགོས་མཁོ་དང་འཚམས་པའི་ལྟ་གྲུབ་དང་ལམ་ལུགས། ལས་འགུལ་སོགས་གསར་གཏོད་བྱེད་ནུས་པའི་གསར་གཏོད་བཅས་ཡིན།
དམིགས་ཡུལ་བཞི་པོ་འདི་དག་གཙོས་གཞན་ཡང་གཞི་རིམ་ཤེས་ཡོན་སྲིད་བྱུས་ནང་སློབ་མ་དབུས་བཞག་གི་སློབ་ཁྲིད་ཐབས་ལམ་དང་། ཆུ་ཚོད་༣ ཅན་གྱི་ཡིག་རྒྱུགས་ལམ་སྲོལ་མེད་པ་བཟོ་ཐབས། ཚད་མཐོའི་བསམ་བློའི་རིག་རྩལ་སྐྱེད་སྲིང་། ཡོངས་སྒྲིལ་སློབ་གསོ། བོད་ཀྱི་སྲོལ་རྒྱུན་རིག་གནས་(ཚད་མ་རིག་པ་)སོགས་ལ་གཙོ་གནད་དམ་འཛིན་བྱས་ཡོད།
མདོར་བསྡུས་ན་གཞི་རིམ་ཤེས་ཡོན་སྲིད་བྱུས་ཀྱིས་ང་ཚོའི་སྤྱི་ཚོགས་ནང་ཆེད་ལས་པ་མེད་པ་དང་། ལས་མེད་མང་བ། གཞོན་སྐྱེས་ཚོར་རིག་གཞུང་བརྒྱུད་སྤྲོད་མ་ཐུབ་པ་སོགས་འཕྲལ་གྱི་དཀའ་ངལ་རྣམས་ལ་གདོང་ལེན་བྱེད་ཐབས་དང་། ལྷག་པར་བོད་མི་ཚོའི་མཐར་ཐུག་གི་དགོས་མཁོ་བསྒྲུབ་ཐབས་ཀྱི་སློབ་གསོའི་ཁ་ཕྱོགས་གསར་པ་ཞིག་བསྟན་ཡོད།
ལོག་རྟོག་འདི་ཉིད་སྤྱི་ཚོགས་ནང་བརྒྱུད་སྤེལ་བྱེད་པར་ཤེས་རིག་ལས་ཁུངས་ལའང་འགན་འཁྲི་ཅུང་ཟད་ཡོད་པའི་ཚོར་སྣང་བྱུང་། འདས་པའི་ལོ་ཤས་ནང་ཤེས་ཡོན་སྲིད་བྱུས་དང་འབྲེལ་བའི་ལས་འཆར་ཕལ་ཆེ་བའི་ནང་སློབ་ཁྲིད་བརྒྱུད་ལམ་བོད་ཀྱི་སྐད་ཡིག་ཏུ་བསྒྱུར་རྒྱུ་ཁོ་ནར་དོ་སྣང་བྱེད་པའི་ཕྱོགས་སུ་ལྷུང་སྟེ། གལ་ཆེའི་གནད་དོན་གཞན་ཁག་ལ་(དགེ་རྒན་གྱིས་འཛིན་གྲྭའི་ནང་སློབ་ཁྲིད་བྱེད་པར་བཟང་ཕྱོགས་ཀྱི་འགྱུར་བ་གཏོང་ཐབས་སོགས་)དོ་སྣང་ཕལ་ཆེར་བྱས་མེད། གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་བཞིན། ཅི་སྟེ་དགེ་རྒན་རྣམས་ཀྱིས་འཛིན་གྲྭའི་ནང་སློབ་ཁྲིད་གནང་ཕྱོགས་སོགས་ལ་འགྱུར་བ་ཤུགས་ཆེན་ཞིག་བཏང་མ་ཐུབ་ཚེ། སྲིད་བྱུས་དེ་བཞིན་ཡིག་ཆ་ཙམ་ཞིག་ལས་མ་འདས་སོ།།
ལོག་རྟོག་གཉིས་པ། གཞི་རིམ་ཤེས་ཡོན་སྲིད་བྱུས་ལག་བསྟར་བྱས་པ་དེས་སློབ་མའི་དབྱིན་ཡིག་ཆུ་ཚད་ལ་གེགས་སྐྱོན་བྱེད་པ།
བློ་གྲོས་འོལ་སྤྱི་ཙམ་གྱིས་སྐབས་རེ་ཤེས་རབ་ཀྱི་སྒོ་མོ་དབྱེ་བར་གེགས་སྐྱོན་བྱེད་ཀྱི་ཡོད། ལོག་རྟོག་གཉིས་པ་དེ་ནི་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་ལྟར་སློབ་ཁྲིད་བརྒྱུད་ལམ་བོད་སྐད་དུ་བསྒྱུར་བ་དང་། འཛིན་རིམ་གསུམ་པའི་རྗེས་སུ་མ་གཏོགས་སྐད་ཡིག་གཉིས་པ་སློབ་ཁྲིད་མ་བྱས་ཚེ་དབྱིན་ཡིག་གི་ཆུ་ཚད་རང་བཞིན་གྱིས་ཞན་དུ་འགྲོ་བའི་སྐོར་རེད། འོན་ཀྱང་མ་སྐད་བརྒྱུད་ལམ་ལ་བརྟེན་པའི་སློབ་གསོའི་ལམ་སྲོལ་ཐོག་ཚན་རིག་གིས་ཉམས་ཞིབ་བྱས་པའི་གྲུབ་དོན་ནི་གོང་འཁོད་གནད་དོན་ལས་ཡོངས་སུ་ལྡོག་སྟེ། ཕྲུ་གུར་མ་སྐད་ཀྱི་གཞི་རྩ་བརྟན་པོ་ཞིག་བསྐྲུན་པ་དེས་སྐད་ཡིག་གཉིས་པ་སྦྱོང་རྒྱུར་འགོག་རྐྱེན་མི་སྤྲད་པ་མ་ཟད། མ་སྐད་བརྒྱུད་ལམ་གྱི་ལམ་སྲོལ་ལག་བསྟར་ལེགས་པོ་བྱས་ཚེ་སྐད་ཡིག་གཉིས་པ་སྦྱོང་རྒྱུར་ཕན་ཐོགས་ཤུགས་ཆེན་བྱེད་པའི་བདེན་དཔང་བྱས་ཡོད།
རྒྱ་གར་ནང་བཙན་བྱོལ་བོད་མིའི་སློབ་གྲྭ་ཐོག་མར་བཙུགས་ནས་མི་ལོ་ ༥༠ ཙམ་སོང་བའི་བྱུང་རབས་ལ་ཕྱིར་མིག་ཅིག་བལྟས་ཚེ། སློབ་གྲྭ་ཡོངས་ཀྱིས་འཛིན་རིམ་དང་པོ་ནས་བཅུ་གཉིས་བར་གྱི་སློབ་ཁྲིད་བརྒྱུད་ལམ་ལ་དབྱིན་ཡིག་བེད་སྤྱད་པའི་སྲིད་བྱུས་ལག་བསྟར་བྱས་ཡོད། དེར་བརྟེན། ལོག་རྟོག་འདི་དང་འབྲེལ་ནས་བསྒྲུབ་བྱེད་ཅིག་བཀོད་ན། (ཚན་རིག་དང་མཐུན་མིན་ཇི་ལྟར་ཡང་རིག་ཤེས་ཀྱི་དབང་དུ་བྱས་ཚེ།) སྔོན་མའི་ལམ་སྲོལ་འོག་ནས་སློབ་ཐོན་བྱུང་བའི་སློབ་ཕྲུག་རྣམས་ཀྱི་དབྱིན་ཡིག་གི་ཆུ་ཚད་ཧ་ཅང་ལེགས་པོ་དགོས་ངེས་ཡིན། འོན་ཀྱང་ཁོང་ཚོ་དེ་འདྲའི་ལེགས་པོ་ཞིག་ཡོད་དམ། གལ་ཏེ་ཀློག་པ་པོ་མང་ཆེ་བས་བློ་གཟུ་བོར་གནས་ཏེ་ཁོང་ཚོའི་དབྱིན་ཡིག་གི་ཆུ་ཚད་ལེགས་པོ་ཡོད་པར་ངོས་འཛིན་ཚེ། ཕྲན་ལ་ཞུ་རྒྱུ་འཕར་མ་གང་ཡང་མ་མཆིས། འོན་ཀྱང་ཀློག་པ་པོ་ཚོས་དེ་ལས་ལྡོག་པའི་ལན་ཞིག་བཏབ་ཚེ། ཁོ་བོས་མགྲིན་པ་གཟེངས་སུ་བཏེགས་ཏེ། ”དབྱིན་སྐད་བརྒྱུད་ལམ་ཐོག་སློབ་ཁྲིད་བྱས་ཚེ་སློབ་ཕྲུག་གི་དབྱིན་ཡིག་ཆུ་ཚད་ཚད་ལྡན་ཞིག་བཟོ་ཐུབ་པའི་ཁག་ཐེག་སུས་ཀྱང་བྱ་མི་ཐུབ་ལ། སློབ་ཁྲིད་བརྒྱུད་ལམ་བོད་ཀྱི་སྐད་ཡིག་ཐོག་བསྒྱུར་བ་དེས་དབྱིན་ཡིག་གི་ཆུ་ཚད་ཞན་དུ་འགྲོ་བའི་ངེས་པ་ནི་དེ་བས་ཀྱང་མེད།” ཅེས་བརྗོད་པར་བྱེད།
བདག་གི་བསམ་པར་སྐད་ཡིག་ (བོད་ཡིག་གམ་དབྱིན་ཡིག་སོགས་) ཚད་འཕེར་བཟོ་ཐབས་ནི་སློབ་ཁྲིད་བརྒྱུད་ལམ་ལ་དེ་ཙམ་རག་ལས་མེད་ཅིང་། དེ་ནི་གཙོ་བོ་སྐད་ཡིག་སློབ་ཁྲིད་ཀྱི་སྤུས་ཚད་ལ་རག་ལུས་ཡོད། མཐའ་ན་རང་རེའི་སློབ་གྲྭ་ཁག་ནང་གཞི་རིམ་བར་མ་དང་གོང་མའི་སྐབས་སུའང་བོད་སྐད་བརྒྱུད་ལམ་ནས་དབྱིན་ཡིག་སློབ་ཁྲིད་བྱེད་མཁན་ནི་ཉུང་ཉུང་གཏན་ནས་མིན་པས། ནོར་འཛོལ་དེ་དག་ནི་ང་ཚོའི་བསམ་བརྗོད་ལས་འདས་པ་ཞིག་རེད། རྩོམ་འབྲིའི་ནུས་པ་དང་། ངག་རྩལ། ཀློག་རྩལ་སོགས་སྐྱེད་སྲིང་བྱས་ཏེ། སློབ་མར་དེ་འདྲའི་གོམས་གཤིས་འཇགས་པ་བྱེད་རྒྱུ་ནི་སྐད་ཡིག་གི་ནུས་རྩལ་ཡར་རྒྱས་གཏོང་རྒྱུར་མེད་ཐབས་མེད་པ་ཞིག་ཡིན་ནའང་། རང་རེའི་སློབ་གྲྭ་ཁག་ནང་དེ་འདྲའི་ནུས་རྩལ་སྐྱེད་སྲིང་བྱེད་མཁན་ཤིན་ཏུ་དཀོན། དེས་ན་སློབ་ཕྲུག་ཚོའི་སྐད་ཡིག་ཚད་ལྡན་ཡོང་རྒྱུར་ང་ཚོས་རེ་བ་ཇི་ལྟར་རྒྱག་གམ།
ལོག་རྟོག་གསུམ་པ། གཞི་རིམ་ཤེས་ཡོན་སྲིད་བྱུས་ནི་ཟམ་གདོང་རིན་པོ་ཆེས་བཟོས་པ་ཞིག་རེད།
བདག་གིས་སྐབས་མང་པོར་ ”གཞི་རིམ་ཤེས་ཡོན་སྲིད་བྱུས་ནི་བཀའ་བློན་ཁྲི་ཟུར་ཟམ་གདོང་རིན་པོ་ཆེས་བསྐྲུན་པའི་ ’རྟོག་པའི་འཆར་སྣང་’ ཙམ་ཡིན་པས། དེར་མི་མང་གིས་རྒྱབ་སྐྱོར་བྱ་མཁན་དཀོན།”ཅེས་ལབ་གླེང་བྱས་པ་ཐོས། གཞན་ཡང་རེ་ཟུང་གིས་”ཟམ་གདོན་རིན་པོ་ཆེ་ནི་དགེ་སློང་ཞིག་ཡིན་པས་ཁོང་ལ་བུ་ཕྲུག་མེད། དེར་བརྟེན་ཕྲུ་གུའི་འཚོ་ཐབས་ཀྱི་མདུན་ལམ་དང་ཡ་བྲལ་བའི་ཤེས་ཡོན་སྲིད་བྱུས་ཤིག་གཏན་འབེབས་བྱས་པ་ནི་ངོས་ལེན་བྱ་དཀའ།” ཞེས་པའང་ཐོས། དེ་ལྟ་བུའི་སྐྱེ་བོ་ཚོས་གཞི་རིམ་ཤེས་ཡོན་སྲིད་བྱུས་ཀྱི་རགས་ཟིན་བཟོ་འགོད་བྱས་པའི་བརྒྱུད་རིམ་ལ་སློབ་སྦྱོང་བྱས་ཚེ། ད་གཟོད་གཞི་ནས་གཞི་རིམ་ཤེས་ཡོན་སྲིད་བྱུས་ནི་མི་གཅིག་གིས་བཟོས་པ་མིན་པར་ངེས་ཤེས་རྙེད་ཐུབ།
བཀའ་བློན་ཁྲི་ཟུར་ཟམ་གདོང་རིན་པོ་ཆེས་ཕྱི་ལོ་ ༢༠༠༣ ལོར་སྲིད་བྱུས་ཀྱི་འཆར་ཟིན་ཞིག་བཟོ་འགོད་གནང་བ་དང་། ལོ་དེ་གར་སྐབས་དེའི་ཤེས་རིག་དྲུང་ཆེ་གཡུ་ཐོག་ཀརྨ་ལགས་ཀྱི་གཙོ་སྐྱོང་འོག་ཚོགས་མི་ལྔ་ལས་གྲུབ་པའི་ཤེས་ཡོན་སྲིད་བྱུས་ཟིན་བྲིས་ཚོགས་ཆུང་ཞིག་ཆེད་བཙུགས་གནང་། ཚོགས་ཆུང་གི་ཟིན་བྲིས་དང་པོ་འགོད་འབུལ་བྱུང་བར། བཀའ་ཤག་གིས་ཞིབ་འཇུག་ནན་ཏན་དང་འབྲེལ་ཟིན་བྲིས་གཉིས་པ་གཏན་འབེབས་ཀྱིས་བཙན་བྱོལ་བོད་མིའི་ཤེས་ཡོན་སྡེ་ཚན་ཁག་དང་། མཁས་པ་ཁག་བཅས་ལ་དགོངས་འཆར་སླད་རྒྱ་ཁྱབ་འགྲེམས་སྤེལ་གནང་། ཤེས་རིག་ལས་ཁུངས་སུ་ཕྱོགས་ཁག་ནས་དགོངས་འཆར་གང་འབྱོར་རྣམས་ཕྱོགས་བསྡོམས་ཀྱིས་འབྲེལ་ཡོད་རྣམས་ལ་ཁུངས་འབུལ་ཞུས། ཕྱི་ལོ་ ༢༠༠༤ ཟླ་དང་པོར་རྒྱ་གར་གྱི་སྲོལ་རྒྱུན་དང་། དེང་རབས་ཀྱི་ལམ་སྲོལ་ལ་མཁས་པའི་མཁས་དབང་རྣམས་ཀྱི་བགྲོ་གླེང་ཚོགས་འདུ་ཞིག་གོ་སྒྲིག་གནང་ནས། ཟིན་བྲིས་གཉིས་པའི་ཐོག་བགྲོ་གླེང་ཟབ་རྒྱས་ཞུས། དེ་མཚུངས་ཕྱི་ལོ་ ༢༠༠༤ ཟླ་ ༢ པའི་ནང་བོད་ཀྱི་མཁས་པ་དང་ཤེས་ཡོན་འཛིན་སྐྱོང་མི་སྣའི་བགྲོ་གླེང་ཚོགས་འདུ་ཞིག་བསྐོང་ཚོགས་གནང་། ཟིན་བྲིས་ཚོགས་ཆུང་གི་རགས་ཟིན་གསུམ་པར་སླར་ཡང་བཀའ་ཤག་གི་ཞིབ་འཇུག་དང་འབྲེལ། ཕྱི་ལོ་༢༠༠༤ ཟླ་ ༦ པའི་ནང་བཀའ་ཤག་གིས་དེང་རབས་ཀྱི་མཁས་པའི་རྒྱལ་སྤྱིའི་ཚོགས་འདུ་ཞིག་གོ་སྒྲིག་གནང་ཞིང་། བགྲོ་གླེང་གི་དགོངས་འཆར་ལས་ལེགས་ཆ་བླང་འོས་བླངས་ཏེ་མཐའ་མའི་ཟིན་བྲིས་བཟོ་འགོད་བྱས།
མཐར་ཕྱི་ལོ་ ༢༠༠༤ ཟླ་ ༩ ནང་སྐབས་བཅུ་གསུམ་པའི་སྤྱི་འཐུས་ཚོགས་དུས་བརྒྱད་པར་གོ་བསྡུར་གནང་སླད་འབུལ་ལམ་ཞུས་པར། སྤྱི་ཡོངས་བགྲོ་གླེང་གིས་དོན་ཚན་རེ་ཟུང་ཐོག་མོས་ཤོག་བསྡུ་བཞེས་གནང་ནས་བཟོ་བཅོས་གནང་འོས་གནང་རྗེས། གཞི་རིམ་ཤེས་ཡོན་སྲིད་བྱུས་ཀྱི་ཡིག་ཆ་དེ་ཉིད་བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་གནང་བ་རེད།
གོང་དུ་གཞི་རིམ་ཤེས་ཡོན་སྲིད་བྱུས་ཀྱི་ཟིན་བྲིས་བཟོ་འགོད་བྱེད་སྟངས་ཀྱི་བརྒྱུད་རིམ་གནད་བསྡུས་ཤིག་ངོ་སྤྲོད་བྱེད་དགོས་དོན་ནི། སྲིད་བྱུས་འདི་ཉིད་ཞག་གཅིག་ལ་གློ་བུར་དུ་བཟོས་པ་མིན་པར་ཤེས་རྟོགས་ཡོང་ཆེད་ཡིན། ལས་དོན་འདིའི་ནང་སྲོལ་རྒྱུན་དང་དེང་རབས་ཀྱི་མཁས་དབང་མང་པོས་དུས་ཡུན་རིང་པོར་སྐུ་ལས་ཚད་མེད་བསྐྱོན་ཡོད། དེར་བརྟེན། ང་ཚོས་རང་སྒེར་གྱི་འཆར་སྣང་འབའ་ཞིག་ལ་གཞི་བཅོལ་ནས་སྲིད་བྱུས་འདིར་སྐྱོན་བརྗོད་བྱེད་པ་ནི། ཡང་སྙིང་འོས་འཚམས་ཤིག་ཡིན་ནམ་ཞེས་པའི་དྲི་བ་ངང་གིས་སླེབས་འོང་།
མཇུག་བསྡུ།
ངས་རྩོམ་ཡིག་འདིའི་ནང་གཞི་རིམ་ཤེས་ཡོན་སྲིད་བྱུས་དང་འབྲེལ་བའི་རང་གི་བསམ་ཚུལ་སྤེལ་བ་འདིས། རྒྱ་ཆེའི་ཀློག་པ་པོ་ཚོས་མཐའ་གཅིག་ཏུ་ཕྲན་གྱི་གང་བཤད་ལ་ངོས་ལེན་བྱེད་པའི་རེ་བ་ཞུ་གི་མེད་ཅིང་། དེ་ལྟར་ཡོང་མ་སྲིད་པ་ཞིག་རེད། འོན་ཀྱང་སློབ་གསོའི་གནད་དོན་གལ་ཆེའི་རིགས་(ངས་འདིར་གླེང་བ་ལྟ་བུ་)ལ་ངེས་པར་དུ་བགྲོ་གླེང་ལྷུག་པོ་བྱ་རྒྱུ་ནི་གལ་འགངས་ཧ་ཅང་ཆེ་ཡང་། རང་རེའི་སྤྱི་ཚོགས་ནང་སྟོང་ཆ་འདི་ལྷག་ཡོད། དེར་བརྟེན་ཁོ་བོས་རྩོམ་ཡིག་འདི་སྤེལ་དོན་ནི་ཤེས་ལྡན་པ་ཚོས་བརྗོད་གཞི་འདི་དང་འབྲེལ་བའི་ཐོག་རྒྱུ་མཚན་ཁུངས་ལྡན་དང་དཔྱད་ཞིབ་ཚད་ལྡན་གྱིས་བགྲོ་གླེང་ཟབ་རྒྱས་ཡོང་བའི་ཆེད་དུ་ཡིན།
རང་ཅག་རྣམས་སྲིད་དོན་སྐྱབས་བཅོལ་བ་ཡིན་པའི་དབང་གིས། བཙན་བྱོལ་སྤྱི་ཚོགས་ནང་ཆབ་སྲིད་ལས་འགུལ་ཐོག་ཚོར་བ་སྐྱེན་པོ་ཡོད། ཁོ་བོས་འདིའི་ཐད་དགག་བྱ་ཞུ་དགོས་དོན་གང་ཡང་མེད། འོན་ཀྱང་ང་ཚོས་ངེས་པར་དུ་ཤེས་དགོས་པར། ང་ཚོའི་ཐབ་རྩོད་ཀྱི་རྣམ་པ་ནི་འཚེ་བ་མེད་པ་ཡིན་པས། འཚེ་བ་མེད་པའི་འཐབ་རྩོད་ལ་ཤེས་ཡོན་ནི་མེད་དུ་མི་རུང་བའི་ལག་ཆ་གཙོ་བོ་དེ་ཡིན། དེར་བརྟེན་ཤེས་ཡོན་གྱི་སྤུས་ཚད་གོང་མཐོར་གཏོང་བར་སྤྱི་ཚོགས་ཡོངས་ཀྱིས་འགན་འཁུར་བླངས་དགོས། དེས་ན་ཤེས་ཡོན་ཡར་རྒྱས་གཏོང་བར་སྐུལ་འདེད་བྱེད་པ་འདི་ཡང་ཆབ་སྲིད་ཀྱི་ལས་འགུལ་ཞིག་ཡིན་ནོ། །
བཀའ་དྲིན་ཆེ་རྒྱལ་མཚན་ལགས་དང་ལོ་ཙཱ་བ་བཟང་པོ་ལགས།
ཤེས་ཡོན་སྲིད་བྱུས་ལ་རྒྱབ་སྐྱོར་བརྒྱ་ཆའི་བརྒྱ་ཡོད། ཡིན་ནའང་སློབ་གྲྭ་ཁ་ཤས་ཀྱིས་ལག་བསྟར་བྱེད་ཀྱི་མེད་པ་དེ་འགྲིག་གི་ཡོད་པ་མ་རེད། དེ་ལ་ཤེས་རིག་ལས་ཁུངས་ལའང་འགན་ཡོད་པ་རེད། བཀའ་ཤག་སྐབས་སྔོན་མའི་དུས་སུ་ཤེས་ཡོན་སྲིད་བྱུས་ཐོག་འབད་བརྩོན་ཞེ་དྲག་གནང་བ་རེད། ཡིན་ནའང་ད་རེས་ཀྱི་བཀའ་ཤག་འདིས་བར་ལམ་འཐུས་ཤོར་ཟེར་ན་འདྲ་སྣང་མེད་ལྟ་བུར་བཞག་སོང་ལ། ཤེས་རིག་བཀའ་བློན་མཆོག་གིས་བཀའ་སློབ་གནང་སྟངས་ཀྱི་ཐད་ནས་ཀྱང་གདེང་ཚོད་དང་ཆོད་སེམས་དེ་ཙམ་མེད་པའི་བཟོ་འདྲ་བོའི་ཐོག་ནས་ཤལ་ཤུལ་བྱས་ཏེ་བཞག་གནང་སོང་བསམ་གྱི་ཡོད།
སྐབས་དོན་དང་འབྲེལ་བའི་ཆ་ནས་རྒྱུན་དུ་ཡོད་པའི་བསམ་ཞིག་ཞུ་འདོད།
ང་ཚོས་ཆབ་སྲིད་ཀྱི་ལས་འགུལ་ནང་དུ་མི་རབས་གསལ་བ་རྣམས་མཉམ་ཞུགས་བྱེད་ཚད་ཞན་པ་དང་། བྱས་པ་དེ་ཡང་འཁྲབ་སྟོན་གྱི་རྣམ་གཙོ་བ་ལས་རང་བྱུང་གི་རྣམ་པ་ཞན་པ། བོད་ནང་གི་གཞོན་སྐྱེས་དག་དང་མི་འདྲ་བར་། བཙན་བྱོལ་ནང་གི་གཞོན་སྐྱེས་མང་ཆེ་བས་རང་ཉིད་ཀྱི་འདུན་ལམ་ལས་རྒྱལ་ཁབ་ལས་དོན་གལ་ཆུང་དུ་བརྩི་བ། མདོར་ན་རང་ཉིད་ཆབ་སྲིད་ཀྱི་སྐྱབས་བཅོལ་བ་ལུང་པ་མེད་མཁན་ཞིག་ཡིན་པའི་ཚོར་བ་རྣོན་པོ་མེད་མཁན་གྱི་མི་རབས་ཤིག་གྲུབ་ཟིན་པའམ་འགྲུབ་བཞིན་གླེང་ཕྱོགས་ཤིག་གང་སར་འདུག
གལ་སྲིད་གླེང་ཕྱོགས་འདི་བདེན་པ་ཡིན་ན་རྒྱལ་ཁབ་ཅིག་གི་མདུན་ལམ་ལས་གཞིགས་ན་ཧ་ཅང་ཉེན་ཁ་ཆེ་བའི་གནད་དོན་ཞིག་རེད།
འོ་ན་འདིའི་གནད་དོན་གང་ལ་ཐུག་འདུག་གམ་སྙམ་ནཿ ཁོ་བོའི་ཀླད་པར་འཆར་བ་ལྟར་ན་ང་ཚོའི་གཞི་རིམ་སློབ་གྲྭ་ཁག་གི་ནང་དུ་དེང་རབས་ཤེས་ཡོན་སྤྱིར་བཏང་བའི་ཞོར་དུ་ཆོས་སློབ་པ་ལས་ཆབ་སྲིད་ཡེ་ནས་མི་སློབ་པ་འདི་ལ་ཐུག་མེད་དམ་སྙམ། ང་ཚོ་ཆབ་སྲིད་ཀྱི་སྐྱབས་བཅོལ་བ་ཡིན་ཀྱང་རང་གི་རྒྱུན་འཛིན་པ་དག་ལ་ཆབ་སྲིད་མི་སློབ་པ་ནི་ངོ་མ་བཤད་ན་ཡ་མཚན་སྐྱེས་འོས་པ་ཞིག་རེད།
ཡ་ཧུ་ད་བས་ལོ་ངོ་སྟོང་ཕྲག་གི་རིང་ལ་རང་ཡུལ་དང་བྲལ་ནས་བསྡད་ཡོད་ཀྱང་མི་རིགས་ཀྱི་འདུ་ཤེས་དང་རང་བཙན་གྱི་ལྟ་བ་བརླག་མེད་སྟབས་མཐར་རང་བཙན་རག་ཐུབ་པ་བྱུང་བ་རེད། ཁོ་ཅག་དང་རང་ཅག་ཅིའི་ཕྱིར་མ་འདྲ་བ་རེད་དམ། ངས་བལྟས་ན་ཁོ་ཅག་གི་གཞོན་སྐྱེས་དག་ལ་རང་ཉིད་ཀྱི་ཆབ་སྲིད་ཀྱི་གནད་དོན་སློབ་པར་འཐུས་ཤོར་མ་སོང་བའི་དབང་གིས་ཡིན་རྒྱུ་རེད་སྙམ།
ཤེས་ཡོན་འགན་འཛིན་མཆོག་གིས་སློབ་ཁྲིད་བརྒྱུད་ལམ་བོད་སྐད་ལ་བྱེད་པ་དེ་ཤེས་ཡོན་སྲིད་བྱུས་ཀྱི་དམིགས་བྱ་གཙོ་བོ་དེ་མིན་མདོག་བསྟན་འདུག དེ་ནི་མཁས་དབང་ཟམ་གདོང་རིན་པོ་ཆེས་བཙན་བྱོལ་ནང་དུ་བོད་ཀྱི་སྐད་ཡིག་གི་གནས་བབ་གོང་བཏང་བ་དེ་རྐང་རྗེས་ལག་བསུབ་སོང་རུང་འགྱོད་པ་མེད་པའི་རྣམ་འགྱུར་ཕྱིར་མངོན་བྱེད་ཅིག་རེད། བྱུང་ན་མཐོ་སློབ་པར་དུ་དགོས་པ་དང་དེ་མ་བྱུང་རུང་འཛིན་རིམ་བཅུ་གཉིས་བར་དུ་སློབ་ཁྲིད་བརྒྱུད་ལམ་བོད་སྐད་བྱེད་པ་དེ་ཤེས་ཡོན་སྲིད་ཇུས་ཀྱི་དམིགས་འབེན་གཙོ་བོ་ཞིག་རེད།
དེ་ནས་ལོག་རྟོག་གསུམ་པ་ཟེར་བ་དེ་ཡང་བདེན་པའི་ཆ་ཧ་ཅང་མང་བ་རེད། ལར་ནས་ཟམ་གདོང་མཆོག་སྐུ་དངོས་ཀྱིས་ཐད་ཀར་བྱས་པ་ཞིག་མིན་ཀྱང་ཁོང་གི་དབང་ཐང་གི་ཟིལ་ལས་བྱུང་བ་ཞིག་ལ་ངོས་འཛིན་བྱེད་ཆོག སྲིད་ཇུས་དེ་འགྲུབ་པར་ཁོང་གི་ཤུགས་རྐྱེན་དེ་གལ་སྲིད་བརྒྱ་ཆར་བགོས་ན་དགུ་བཅུ་ལས་མང་བ་ཟིན་པར་སྙམ། འདི་དག་གི་སྐོར་ལ་ང་ལ་ཡང་རྒྱུས་མེད་པ་མ་རེད།