གངས་བཙན་པོ།
སྤྱིར་བཙན་བྱོལ་ནང་གི་དུས་དེབ་དང་ཚགས་ཤོག་ཡོད་ཚད་རང་དབང་ཡིན་པ་སྨོས་ཅི་དགོས། ཡིན་ཡང་ལོ་གྲངས་དུ་མའི་རིང་ལ་མ་ཉམས་པར་ད་དུང་ཡིན་ན་ཡང་སྔོན་ལྟར་ཁ་ཕྱོགས་དང་ལས་རིགས་ཕྱོགས་གང་ཐད་ནས་ཡར་རྒྱས་སུ་འགྲོ་བཞིན་པའི་ཚགས་ཤོག་ནི་བོད་ཀྱི་དུས་བབ་དང་བང་ཆེན་གཉིས་ཡིན། འོན་ཀྱང་སྐབས་སུ་བབ་པ་ནི་བོད་ཀྱི་དུས་བབ་ཀྱི་དར་རྒུད་ཕྱོགས་ཅུང་ཙམ་གླེང་འདོད་བྱུང་།
བོད་ཀྱི་དུས་བབ་དྲ་ལམ་འདི་ནི་གཙོ་བོ་གསར་འགྱུར་ཕྱོགས་བཀོད་སའི་ཁོར་ཡུག་གུ་ཡངས་ཤིག་དང་དྲང་བདེན་དང་གནས་ལུགས་བརྗོད་སའི་བོད་པ་ཚང་གི་གཡང་ཁྱིམ་ཞིག་ལ་ཚང་མའི་ངོས་འཛིན་ཞུ་བཞིན་འདུག དེར་བརྟེན་ང་དང་ང་འདྲ་བའི་དྲ་འཁྱམས་པ་ཞིག་ལ་མཚོན་ན་ཡང་དུས་བབ་ཚང་གི་སྒོ་ཁ་ན་ག་དུས་ཡིན་ན་ཡང་ཉལ་ནས་བསྡད་ཡོད། རྒྱུ་མཚན་ཅིའི་ཕྱིར་ཞེ་ན་འདི་ནི་ངའི་རེ་སྒུག་གི་ལམ་ཁ་ཞིག་དང་མ་འོངས་པའི་མདུན་ལམ་སྟོན་སའི་ཁོར་ཡུག་ཅིག་ལ་ངོས་བྱེད་ཀྱི་ཡོད།
བོད་ཡིག་ལ་དུང་ཞེན་ཆེ་མཁན་དང་བོད་པ་ལ་ཤ་ཚ་ཡོད་མཁན་མང་པོ་ཞིག་གིས་བོད་ཀྱི་དུས་བབ་ཚང་གི་དྲ་ལམ་འདི་ན་ཉིན་མཚན་མེད་པར་གསར་འགྱུར་སོགས་རྒྱུ་ཆ་ཁག་རེ་རེ་བཞིན་ཀློག་གིན་འདུག དེ་མ་ཟད་བོད་ནང་ཁུལ་དུ་ཡིན་ན་ཡང་མང་པོ་ཞིག་གི་དེང་སྐབས་དྲ་ཚིགས་འདི་ལ་དོ་སྣང་དང་རེ་སྒུག་བྱེད་ཀྱིན་འདུག དེས་སྟབས་ཀྱིས་འུ་ཅག་ཚང་གི་དུས་བབ་དྲ་ཚིགས་འདི་ཉམས་རྒུད་དུ་འགྲོ་མི་སྲིད། ཚགས་པར་དང་དྲ་ཚིགས་གཉིས་ཀྱི་ཕྱོགས་ནས་བསྡུར་ན་དྲ་ཚིགས་ལ་གཟིགས་མཁན་མང་ཡང་ཐོག་མར་དུས་བབ་ཚང་གི་དབུ་འཕང་བསྟོད་མཁན་ཚགས་པར་རེད།
འདི་ནས་རྩིས་པའི་ལོ་བཞིའི་ཡར་སྔོན་དུ་དྲ་ཚིགས་ཀློག་རྒྱུའི་གོམས་སྲོལ་དང་དྲ་ཚིགས་ཀྱི་ཆ་རྐྱེན་ཡང་ཞན་པས་དུས་བབ་ཚགས་ཤོག་ཉོ་བ་སོགས་ལ་དོ་སྣང་བླ་མེད་ཞིག་བྱུང་ཡོད། ལྷག་པར་དུ་རྒྱལ་ཁབ་ཉི་ཤུ་ལྷག་ནང་འགྲེམས་སྤེལ་བྱེད་བཞིན་པ་གོ་ཐོས་བྱུང་ཡོད། འདི་ནི་རང་མི་རིགས་ཤིག་གི་བྱ་བཞག་བླ་མེད་ཞིག་ཡིན་པ་མ་ཟད་ཚགས་ཤོག་འདིའི་འོད་ སྟོང་གི་མདུན་ལམ་ཞིག་ཏུ་ཡང་ངོས་འཛིན་བྱེད་ཆོག་པར་སེམས། དེང་སྐབས་དྲ་ཚིགས་ཀློག་མཁན་ཧ་ཅང་མང་པོ་རེད། ཡིན་ཡང་ཚགས་ཤོག་འདི་མུ་མཐུད་དུ་མཇུག་མ་སྒྲིལ་པར་དུས་ཐོག་ཏུ་འགྲེམས་སྤེལ་ཐུབ་ན་དགེ་མཚན་མི་དམན་པ་ཞིག་ཡོད་པར་མཐོང་།
དེང་སང་མི་རེ་ཟུང་ཞིག་གིས་རྒྱ་བོད་དབྱིན་གསུམ་གྱི་ཐོག་ནས་དྲ་ཚིགས་དགོས་པར་རེ་བ་དང་བསམ་ཚུལ་གསུང་མཁན་ཡོད་ཀྱང་བོད་ཀྱི་དུས་བབ་འདི་ཁ་བྱང་དང་མཐུན་པར་རང་སོར་ནས་ལངས་དགོས་པ་འདི་ཧ་ཅང་གི་གནད་འགག་ཆེན་པོ་ཞིག་རེད་སྙམ། སྤྱི་བཏང་སྐད་ཡིག་མང་པོའི་སྟེང་ནས་གསར་འགྱུར་རིགས་འགོད་སྤེལ་བྱེད་ཐུབ་ན་དགེ་མཚན་ཡོད་ཀྱང་བོད་ཀྱི་དུས་བབ་འདི་ནི་བོད་རང་གི་སྐད་ཡིག་གཅེས་སྐྱོང་ཁང་གི་དྲ་ཚིགས་ཤིག་ཆགས་ཡོད་སྟབས། མུ་མཐུད་དུ་བོད་ཡིག་ཁོ་ནས་དྲ་ཚིགས་ཤིག་ཏུ་རྒྱུན་འཁྱོང་བྱས་ཏེ་སྐད་ཡིག་གཞན་དང་མཉམ་བསྲེས་མ་བྱས་ན་ལེགས་པར་སེམས།
དགེ་སྐྱོན་གཉིས་ཀའི་ངོས་ནས་གླེང་དགོས་པ་དྲང་བདེན་གྱི་ལམ་ཁ་དང་པོ་ཡིན་སྟབས། དེ་བས་དུས་བབ་ཚང་གི་སྐྱོན་ཕྱོགས་ཐེར་འདོན་བྱེད་དགོས་རྒྱུ་ནི་གང་ཡིན་ཞེ་ན། ཉེ་ལམ་ཟིན་བྲིས་མེད་པར་བཟོས་པ་འདི་ཧ་ཅང་ནག་ཉེས་ཆེན་པོ་ཞིག་ཏུ་ངོས་འཛིན་མི་བྱེད་ཐབས་མེད་རེད། བོད་ནང་ཡིན་ན་ཐུགས་ཁག་མེད་རང་དབང་ལུང་པ་འདིར་རང་དབང་གླེང་སའི་ཁོར་ཡུག་ཆེན་པོ་ཞིག་གི་སྒོ་རྒྱབ་པ་དེ་བློ་ཕམ་དགོས་པའི་གནས་ཤིག་རེད། སྤྱིར་བསམ་ཚུལ་མི་མཐུན་པ་དང་ལྟ་བ་མི་མཐུན་པ་ཧ་ཅང་མང་པོ་སླེབ་ཀྱི་ཡོད་པ་ཤེས་ལ། དེ་དང་འབྲེལ་ནས་རྩོམ་སྒྲིག་པ་ལ་ཡང་ཁ་རྡུང་མང་པོ་གཏོང་གིན་ཡོད་པ་གོ་མྱོང་།
འོན་ཀྱང་རྒྱལ་སྲས་ཆེན་པོ་ཞི་བ་ལྷས། གལ་ཏེ་བཅོས་སུ་ཡོད་ན་ནི། །དེ་ལ་མི་དགར་ཅི་ཞིག་ཡོད། །གལ་ཏེ་བཅོས་སུ་མེད་ན་ནི། །དེ་ལ་མི་དགའ་བྱས་ཅི་ཕན།། ཞེས་གསུངས་པ་ལྟར། འདིའི་ཐད་ཁྱེད་རྣམ་པས་བསམ་གཞིགས་གཏོང་དགོས་པ་ཞིག་ཆགས་འདུག ཟིན་བྲིས་ཕྱོགས་ལ་རྩོམ་སྒྲིག་པའི་སྣང་མེད་བཏང་བའི་ཉེས་པ་ཁོ་ན་ཞིག་ཏུ་ངོས་འཛིན་བྱེད་ཀྱིན་ཡོད། དྲ་ཚིགས་མདུན་ངོས་ཀྱི་ས་ཁུངས་ཡང་ཆུང་དྲག་པ་མ་ཟད་རྩོམ་སྤེལ་སྐབས་སུ་ཚོད་འཛིན་སོགས་བྱེད་མ་ཐུབ་པའི་རྒྱུ་རྐྱེན་མང་པོ་ཞིག་གི་འོག་ནས་མཇུག་བསྡུ་དགོས་པ་ཆགས་ཡོད། བཙན་བྱོལ་ནང་དུ་འབྲི་རྩོམ་བྱེད་མཁན་མང་པོ་ཞིག་ད་བར་དུ་སྐྱེད་སྲིང་བྱས་ཡོད་པ་སྨོས་མེད་རེད། དུས་བབ་ཟིན་བྲིས་ད་དུང་ཡིན་ན་ཡང་སླར་གསོ་ཐུབ་པའི་རེ་བ་དང་ཡིད་ཆེས་ངང་དུ་སྒུག་ནས་བསྡད་ཡོད། །
དུས་བབ་ནི། ལོ་ན་རྒས་པས་མགྱོགས་པོར་བྱོན་མི་ཐུབ་པ་དེ་མ་གཏོགས།
གཞན་དུས་བབ་ཁོང་ཧ་ཅང་གི་བཟང་པོ་དང་ལེགས་པོ་རང་རེད།
བཀྲིས་བདེ་ལེགས་སོ།།
ཞལ་བྲོའོ།།
བཙན་བྱོལ་ཁུལ་དུ་བོད་ཡིག་གི་ཚགས་ཤོག་དང་དྲ་བ་ཚད་ལྡན་ཞིག་ཡོད་པ་ནི་བོད་ཀྱི་དུས་བབ་རེད་འདོད་ཡོད། ཡིན་ཡང་དུས་བབ་ལའང་སྐྱོན་མི་ཉུང་བ་ཞིག་འདུག་ལ་སྐྱོན་ཆེ་ཤོས་ཤིག་ཡོད་པ་ནི་རྩོམ་པ་པོ་ཚོས་རྩོམ་ཡིག་སྤེལ་དུས་རྩོམ་པ་པོ་རང་ལ་འཛིན་མཚམས་ཡོད་པའི་མིང་ཚིག་རྣམས་རྩོམ་སྒྲིག་ཚོགས་མི་ཚོའི་འདོད་པ་བཞིན་བསྒྱུར་འགྲོ་ནའང་དག་ནོར་ཡིག་ནོར་རྣམས་རང་འཇགས་བཞག་པ་དེ་རེད། དེ་མིན་སྤྱི་ཚོགས་སུ་འགན་ཁུར་སྟངས་སོགས་གང་གི་ཆ་ནས་བལྟས་ནའང་དུས་བབ་ནི་ངོ་མ་ཚགས་ཤོག་དང་དྲ་བ་ཡག་ཤོས་སུ་མཐོང་། འདི་ནི་དུས་ཡུན་རིང་པོར་དྲ་བ་དང་ཚགས་ཤོག་བཀླགས་ཤིང་དུས་བབ་དང་ངོ་ཤེས་རྙིང་པར་གྱུར་པ་ཞིག་གི་བསམ་ཚུལ་བརྣལ་མ་ལགས།
འུ་ཅག་གངས་ཅན་པའི་ལས་དབང་དང་ཁ་ཕྱོགས་གླེང་སའི་ཚགས་པར་བོད་ཡིག་རང་རྐྱ་བའི་ཐོག་ཡོད་པའི་རྒྱ་ཁྱབ་ཆེ་ཤོས་སུ་གྱུར་བའི་རང་དབང་སྨྲ་བརྗོད་ཀྱི་གར་སྟེགས་གཅིག་པུ་སྟེ་༼བོད་ཀྱི་དུས་བབ༽ངེད་ཚང་གི་གཡང་ཁྱིམ་དྲོན་མོ་ཁྱོད་ནམ་ཡང་མི་ནུབ་པར་གྱུ་ཅིག
དུས་བབ་རྩོམ་སྒྲིག་པ་དོན་གྲུབ་བཀྲ་ཤིས་མཆོག་གིས་གསལ་བཤད་གནང་བར་ཐུགས་རྗེ་ཆེ་ཞུ། ཕྲན་ཆུང་གིས་དེ་སྔོན་ནས་དུས་བབ་ཚང་གི་ཟིན་བྲིས་དེ་ཡར་རྒྱས་ཤིག་གཏོང་ཐུབ་ན་ཅི་མ་རུང་བསམ་བསྡད་ཡོད། དེ་ནས་དུས་བབ་ཚང་གི་གསར་འགྱུར་གནད་སྨིན་དག་ཉི་མ་རྟག་པར་རེ་རེ་བཞིན་ཀློག་གི་ཡོད།
གངས་བཙན་པོ་ལགས་ཀྱིས་བསམ་པ་རྣམ་དག་གིས་དུས་བབ་ཚང་གི་དགེ་སྐྱོན་གླེང་བར་ཞེ་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ཁྱེད་ཀྱི་གསུངས་པ་ལྟར་བཅོས་སུ་ཡོད་པའི་རིགས་བཅོས་ཐབས་དང་ཡར་རྒྱས་གཏོང་ཐུབ་ལ་འབད་ངེས་ཡིན།
དེ་དང་མཉམ་དུ་གསལ་བཤད་ཞུ་རྒྱུ་གཉིས་ཡོད། དང་པོ། བོད་ཀྱི་དུས་བབ་ཚགས་པར་སྐོར། དེང་གི་གོ་ལ་འདི་གློག་རྡུལ་གྱི་གོ་ལ་ཞིག་དང་། དེང་གི་དུས་རབས་འདི་ཆ་འཕྲིན་གྱི་དུས་རབས་ཤིག་ཏུ་འཕེལ་ཏེ། བོད་ཀྱི་དུས་བབ་དྲ་ཚིགས་ཀློག་མཁན་ཅི་ཙམ་མང་ན་ཡང་། དུས་བབ་ཚགས་པར་འདི་མུ་མཐུད་དཔར་འགྲེམས་ཞུ་ངེས་ཡིན་ལ། དེང་སྐབས་ཀྱང་དབུས་ངྷ་རམ་ས་ལ་དང་ས་གནས་ལྷོ་ཕྱོགས་མོན་གྷོ་གཉིས་སུ་དུས་མཉམ་དུ་དཔར་འགྲེམས་བྱས་དང་བྱེད་བཞིན་ཡོད།
གཉིས་པ། བོད་ཀྱི་དུས་བབ་ཟིན་བྲིས་སྐོར། བོད་ཀྱི་དུས་བབ་དྲ་ཚིགས་ནང་གི་ཟིན་བྲིས་སྔར་བཞིན་ཡོད་ལ། ཟིན་ཐོ་སྤེལ་འགྲེམས་སོགས་ཀྱང་སྔར་བཞིན་རྒྱུན་ལྡན་ཡིན་ན་ཡང་། ཉིད་ཀྱིས་གསུངས་པ་ལྟར། ཉེ་ལམ་ཕྱི་ཟླ་ ༣ པ་ཙམ་ནས་དུས་བབ་ཟིན་བྲིས་ཨ་མའི་ནང་བཟོ་བཅོས་ཤིག་གི་དབང་གིས་དུས་བབ་དྲ་བའི་མདུན་ངོས་འོག་གི་ཟིན་བྲིས་གསར་ཤོས་དང་ཁྱབ་ཤོས་ཟེར་བ་དེ་གཉིས་མེད་པ་ཆགས་ཡོད། འདིའི་སྐོར་ལ་མི་འགྱང་པར་དུས་བབ་ཟིན་བྲིས་པ་རྣམས་ལ་གསལ་བསྒྲགས་ཤིག་སྤེལ་འཆར་ཡོད་སྟབས། སྐབས་དེར་ལྷན་རྒྱས་ཀྱིས་མཐུན་འགྱུར་དང་མཉམ་རུབ་ཡོང་བ་ཞུ།།
དུས་བབ་རྩོམ་སྒྲིག་པས། ༢༠༡༣།༥།༧