བོད་མི་སྐོར་ཞིག་ལ་ཚོང་ལས་ཆེད་སྦྱོང་།

ད་ལོ་བོད་ནང་གི་ཁེ་ལས་པ་སྐོར་ཞིག་ལ་ཨ་རིའི་བེ་ཇི་ནེ་ཡ་གཙུག་ལག་སློབ་གྲྭའི་ནང་བདུན་ཕྲག་དྲུག་རིང་ཚོང་འབྲེལ་སྐོར་ལ་ཆེད་སྦྱོང་སྤྲོད་རྒྱུ་རེད།

ད་ལོར་ཨ་རིའི་བེ་ཇི་ནེ་ཡ་གཙུག་ལག་སློབ་ཆེན་ (Viginia University) དང་རྒྱ་ནག་བར་མི་སྣ་གསོ་སྐྱོང་གི་ལས་གཞི་ (2013 University of Virginia Tibetan Entrepreneurs Fellowship Program) ཞེས་པ་ཞིག་སྤེལ་འཆར་ཡོད་པ་དང་། ལས་གཞི་དེའི་ནང་བོད་ཁུལ་གྱི་ཁེ་ལས་པའི་ཁྲོད་ནས་མི་སྣ་ ༡༢ ཙམ་བདམས་ཏེ། ཨ་རིའི་བེ་ཇི་ནེ་ཡ་གཙུག་ལག་སློབ་ཆེན་ནང་ ༢༠༡༣ ཟླ་ ༩ ཚེས་ ༢༧ ཟླ་ ༡༡ པའི་ཚེས་ ༩ ཉིན་བར་གྱི་བདུན་ཕྲག་དྲུག་རིང་ཆེད་སྦྱོང་ཞིག་སྤྲོད་རྒྱུ་ཡིན་འདུག

ལས་གཞི་དེར་འཛུལ་འདོད་ཡོད་རིགས་ཚོར་ཆ་རྐྱེན་ཁག་ཅིག་བཞག་ཡོད་པ་ནི། ཀྲུང་གོའི་རྒྱལ་ཁབ་ན་ཡོད་པའི་བོད་པ་ཡིན་དགོས་པ། ད་ལྟ་ཁེ་ལས་གཉེར་བཞིན་པ་དང་གཉེར་རྒྱུར་སྤྲོ་བ་ཡོད་མཁན། མང་ཚོགས་དང་མཉམ་རུབ་ཀྱིས་ཚོང་ལས་བྱེད་པའི་སྤྲོ་བ་ཡོད་མཁན། ཁེ་ཕོགས་ཀྱི་ཞོར་དུ་སྤྱི་ཚོགས་ཞབས་ཞུ་བསྒྲུབ་འདུན་གྱི་ལྷག་བསམ་ལྡན་པ་སོགས་རེད།

གསལ་བསྒྲགས་ནང་། བོད་པའི་སྤྱི་ཚོགས་ལ་ཁེ་ཕན་བསྐྲུན་ཐུབ་པའི་ཁེ་ལས་དག་ལ་དམིགས་བསལ་གྱིས་གཞོགས་འདེགས་ཞུ་རྒྱུ་ཡིན་པ་དང་། ཟབ་སྦྱོང་དངོས་གཞིའི་ལས་རིམ་དག་ནི། ལག་ལེན་རང་བཞིན་གྱི་ཁེ་ལས་ནུས་པ་སྐྱེད་སྲིང་དང་། ཚོང་ལས་ཀྱི་འཇོན་ཐང་དམིགས་བསལ་ཅན་ལ་དགོས་མཁོར་བསྟུན་ཏེ་སྦྱོང་བརྡར་སྤྲོད་རྒྱུ། སྤྱི་ཚོགས་ཁེ་ལས་དང་ཉམས་མྱོང་བརྗེ་རེས་སྐོར་གྱི་སློབ་ཁྲིད། ཨ་རིའི་ནང་གི་ཚོང་ལས་ཚོགས་པ་སྐོར་ཞིག་ལ་ལྟ་སྐོར་བརྒྱུད་དངོས་སྦྱོང་ལྟ་བུའི་ཉམས་མྱོང་བརྗེ་རེས་བྱེད་རྒྱུ་བཅས་ཡིན་འདུག