རྒྱ་ནག་གཞུང་གིས་ཁམས་འབྲི་རུ་རྫོང་གི་གནས་རི་ནགས་ལྷ་ཛམ་བྷ་ལར་གཏེར་ཁ་སྔོག་འདོན་བྱེད་སྐབས། ས་གནས་མི་མང་ ༤༥༠༠ ལྷག་གིས་ངོ་རྒོལ་བྱས་ཡོད་འདུག
མིང་བརྗོད་འདོད་མེད་པའི་བོད་མི་ཞིག་གིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས་ཕྱི་ལོ་ ༡༩༩༠ ཡས་མས་ནས་བཟུང་ཁམས་ནགས་ཤོད་འབྲི་རུ་རྫོང་དུ་གཏེར་ཁ་སྔོག་འདོན་གྱི་ལས་གཞི་མགོ་འཛུཊ་བྱས་པ་དང་། ལྷག་པར་དུ་ ༢༠༡༢ ལོར་སྔ་ཕྱི་ཐེངས་མང་པོར་ས་གནས་ཀྱི་གནས་རི་གྲགས་ཅན་ནགས་ལྷ་ཛམ་བྷ་ལར་གཏེར་ཁ་བསྔོག་འདོན་གྱི་ལས་གཞི་བརྩམས་སྐབས། ས་གནས་མི་དམངས་ཀྱིས་ངོ་རྒོལ་ཤུགས་ཆེར་བྱས་ཏེ་བཀག་འགོག་ཐུབ་པ་བྱུང་ཡོད་འདུག་མོད། ཟླ་འདིའི་ཕྱི་ཚེས་ ༢༤ ཉིན་རྒྱ་ནག་གཞུང་གིས་ཡང་བསྐྱར་ཛམ་བྷ་ལ་གནས་རིར་གཏེར་ཁ་སྔོག་འདོན་བྱེད་རྩིས་བྱེད་སྐབས། འབྲི་རུ་རྒྱལ་ཤོད་པད་དཀར་ཁུལ་དང་ནགས་ཤོད་ཕུ་མདའ་བར་གསམ་གྱི་ཡུལ་མི། དེ་བཞིན་རྩ་ལ་ཤང་ཚུན་བཞིན་འབྲི་རུ་བ་བཅས་ཁྱོན་མི་མང་ ༤༥༠༠ ལྷག་དང་། རླངས་འཁོར་ ༡༠༠༠ ལྷག་གས་ལྷའི་ཉེ་འགྲམ་ཟླ་ཐང་ཤང་དུ་འཛོམས་ཏེ་ངོ་རྒོལ་བྱས་ཡོད་འདུག་ལ། ཉིན་དེར་ངོ་རྒོལ་བྱེད་དུ་ཡོང་མཁན་བོམ་འཕན་ཤང་གཡམ་འཕའ་གྲོང་ནས་ཡིན་པའི་མགོན་པོ་དང་ཨ་བུ་གཉིས་རླངས་འཁོར་བརྡབ་སྐྱོན་བྱུང་སྟེ་གྲོངས་ཡོད་འདུག
ཕྱི་ཚེས་ ༢༥ ཉིན་རྒྱ་གཞུང་གིས་དམག་མི་རླངས་འཁོར་ཆེ་ཆུང་ ༥༠ ལྷག་མངགས་གཏོང་གིས་མི་མང་ལ་དྲག་གནོན་བྱེད་རྩིས་བྱེད་སྐབས། ས་གནས་མི་མང་དང་དམག་མིའི་བར་གདོང་ཐུག་ཡོང་ཉེན་གནས་སྟངས་ཆགས་ཡོད་འདུག་ལ། ཕྱིས་སུ་རྒྱ་ནག་གཞུང་གིས་གཏེར་ཁ་སྔོག་འདོན་གྱི་ལས་གཞི་འདིས་ས་གནས་ཀྱི་གཞུང་ལམ་དང་གློག་བསྒྱུར་ས་ཚིགས་འཛུགས་སྐྲུན་སོཊ་མང་ཚོགས་ལ་ཕན་པའི་ལས་གཞི་ཞིག་ཡིན་པའི་གསལ་བསྒྲགས་བྱས་ཡོད་ཀྱང་། ས་གནས་མི་མང་ངོས་ལེན་མ་བྱས་པར་དེང་ཕྱིན་ནགས་ལྷའི་གནས་རིར་གཏེར་ཁ་བསྔོག་འདོན་དང་གཞུང་ལམ་གསར་བཟོ། གློག་སྡོང་གསར་འཛུགས། གློག་བསྒྱུར་ས་ཚུགས་གསར་བསྐྲུན་སོཊ་བྱེད་མི་ཆོག་པའི་རེ་སྐུལ་ཞུས་མཐར། འབྲི་རུ་རྫོང་མི་དམངས་སྲིད་གཞུང་གིས་མི་མང་གི་རེ་འདུན་ལ་ཁས་ལེན་གྱི་གསལ་བསྒྲགས་ཤིག་བཀྲམས་ཡོད་འདུག
འབྲི་རུ་རྫོང་ནགས་ལྷ་ཛམ་བྷ་ལ་ནི། འབྲི་རུའི་ལུང་པའི་མི་རྣམས་ལ་ཁ་འཛིན་གདོང་གྲོགས་བྱེད་མཁན་གྱི་ཡུལ་ལྷའི་གནས་རི་ཞིག་ཡིན་པ་ཐུན་མོང་གིས་ངོས་འཛིན་དང་གསོལ་མཆོད་བྱེད་ཀྱི་ཡོད་པ་མ་ཟད། གཏེར་རྫས་ཀྱི་ཕྱུག་པའི་བོད་གངས་ཅན་གྱི་གནས་རི་གཞན་དང་མ་འདྲ་བའི་ཁྱད་འཕགས་ཀྱི་གནས་རི་ཞིག་ཀྱང་ཡིན་འདུག
