རྡོར་གླིང་གནས་སྡོད་རྒན་རྡོ་རྗེ་རིན་ཆེན་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཉེ་ལམ་བཀའ་ཟུར་ཀིརྟི་རིན་པོ་ཆེ་མཆོག་རྡོར་གླིང་སུ་ཁེའི་ཀིརྟིའི་དགོན་དགེ་ལྡན་བཀྲ་ཤིས་ཆོས་གླིང་གསར་བཞེངས་ཀྱི་ཐོག་མའི་ས་ཆོག་རྟེན་འབྲེལ་མཛད་སྒོར་ཆིབས་བསྒྱུར་བསྐྱངས་ཡོད་པ་ལྟར། ཕྱི་ཚེས་ ༢༦ ཉིན་རྡོར་གླིང་སྤོག་རི་སྦོང་སཾ་བྷོ་ཊ་གཏན་སློབ་དང་། དེ་ཁུལ་གྱི་ཁ་འཐོར་བོད་རིགས་མི་མང་གིས་ཇི་ལྟར་གསོལ་འདེབས་ཞུས་པ་བཞིན་རིན་པོ་ཆེ་མཆོག་རྡོར་གླིང་དུ་ཆིབས་བསྒྱུར་བསྐྱངས་ཏེ། སྦོག་རི་སྦོང་གཏན་སློབ་དུ་གཟིགས་སྐོར་དང་། དེར་ཡོད་དགེ་སློབ་དང་མི་མང་ལ་ལམ་སྟོན་བཀའ་སློབ་གནང་ཡོད་པ་མ་ཟད། སློབ་ཕྲུག་ཚོའི་ཞལ་ལག་གི་དོད་དུ་ཧིན་ ༥༠༠༠༠ སྩལ་ཡོད་འདུག
ཉིན་དེར་བཀའ་ཟུར་ཀིརྟིན་རིན་པོ་ཆེ་མཆོག་གིས་དེར་ཡོད་དགེ་སློབ་རྣམས་ལ་བཀའ་སློབ་གནང་སྐབས། ཤེས་ཡོན་སྲིད་བྱུས་རྩ་འཛིན་ལམ་སྟོན་ནང་བཞིན་སློབ་སྦྱོང་སྤྲོད་རྒྱུ་གལ་ཆེན་ཡིན་པ་དང་། བོད་པའི་ཆོས་དང་རིག་གཞུང་གི་རྩ་བ་བོད་སྐད་ཡིག་ཡིན་སྟབས། སྐད་ཡིག་ཉམས་པ་ཡིན་ན། ཆོས་རིག་ཉམས་འགྲོ་མ་ཟད། བོད་རིགས་ཀྱི་འདུ་ཤེས་དང་། བོད་མིའི་བསམ་བློ་ཡང་ཉམས་འགྲོ་བའི་སྐོར་དང་། དེ་བཞིན་མི་ཐོག་རྒན་པ་རྣམས་རྒྱ་གར་དུ་འབྱོར་རྗེས་སྐུ་ལས་སྐྱོན་ཏེ། ད་ལྟའི་དབུ་བཀའ་བློན་ནས་སྤྱི་འཐུས་ཚོགས་གཙོ་བར་གྱི་མི་སྣ་ཧྲ་ཐག་ཐག་ཅིག་གསོ་སྐྱོང་ཐུབ་ཡོད་སྟབས། མི་རབས་རྗེ་མས་གསོ་སྐྱོང་གནང་མཁན་ཁྱེད་རང་ཚོས་སྐུ་ལས་སྐྱོན་ཏེ། ཕྲུ་གུ་ཆུང་ཆུང་ཚོར་ཤེས་ཡོན་སློབ་གསོ་དང་བོད་པའི་ཆོས་དང་རིག་གཞུང་གི་སྟེང་ནས་བོད་མིའི་བསམ་བློ་ཡོད་མཁན་ཞིག་བཟོས་པ་ཡིན་ན། ཕྲུ་གུ་ཆུང་ཆུང་ཚོའི་གྲས་ནས་ད་ལྟའི་སྲིད་སྐྱོང་བློ་བཟང་སེངྒེ་ནང་བཞིན་དབུ་ཁྲིད་མཁན་ཐོན་སྲིད་སྐོར་སོགས་བཀའ་སློབ་གནང་ཡོད་པ་མ་ཟད། ཀིརྟིན་རིན་པོ་ཆེ་མཆོག་གིས་ཉེ་ཆར་༸རྒྱལ་བ་རིན་པོ་ཆེ་མཆོག་བྱང་ཤར་ཁུལ་དུ་ཆིབས་བསྒྱུར་བསྐྱངས་ཡོད་སྟབས། ཁྱེད་རང་ཚོས་ ༸རྒྱལ་བ་རིན་པོ་ཆེར་མཇལ་ཁ་དང་ཕྱག་མདུད་རག་པ་ཙམ་མིན་པར། ཁོང་གི་གསུང་ཚིག་རེ་རེའི་ལས་རང་ཉིད་ཀྱིས་གང་ཞིག་བསྒྲུབ་ཐུབ་མིན་ལ་བལྟས་ཏེ། མི་རེ་ངོ་རེས་ཁོང་གི་གསུང་ལས་ངའི་འདི་བྱེད་ཐུབ་པ་ཞིག་བྱུང་ན། རྒྱལ་བ་མཉེས་པའི་མཆོད་པ་དང་སྐུ་ཚེ་ཞབས་བརྟན་ཡང་དེ་ལས་ལྷག་ཅིག་མེད་ཅེས་ལམ་སྟོན་བཀའ་སློབ་གནང་འདུག
བཀའ་ཟུར་རིན་པོ་ཆེ་ཡིས་བོད་ཀྱི་བསྟན་སྲིད་ཐུགས་ལ་བཏེགས་པར་ཡི་རང་ཞུ།