བོད་ཀྱི་གཞོན་ནུ་ལྷན་ཚོཊ་ཀྱི་ཚོགས་ཆེན་ཐེངས་ ༡༥ པའི་ཉིན་དང་པོར་གཞོན་ནུའི་རང་བཙན་ལངས་ཕྱོགས་ལ་འགྱུར་བ་གཏོང་དགོས་མིན་ཐོག་བགྲོ་གླེང་གནང་ཡོད་པ་ལྟར། དེ་རིང་སྔ་དྲོར་འདི་གའི་གསར་འགོད་པས་ཚོགས་ཞུགས་པ་འགར་བསམ་ཚུལ་དྲིས་ཡོད།
ཨ་རིའི་ནའེ་ཡོག་ནེའུ་ཇར་སི་ས་རྒྱུན་ཚོགས་གཙོ་འཕྲིན་ལས་སྐལ་བཟང་ལགས་ཀྱིས་བརྗོད་དོན། “ ཁ་སང་ཉིན་དང་པོར་ཚོགས་འདུ་སྔ་སྣུར་དང་འབྲེལ་བའི་གནད་དོན་ཐད་སྐད་ཆ་མདོར་བསྡུས་ཤིག་བྱུང་སོང་། ཡིན་ནའང་ད་དུང་ཐག་གཅོད་གང་ཡང་བྱུང་ཐུབ་ཡོད་པ་མ་རེད། ད་དུང་ཉིན་ལྔ་ཙམ་ལྷག་ཡོད་སྟབས། ག་ལེར་ག་ལེར་ཡག་པོ་ཡོང་བའི་ཡིད་ཆེས་བྱེད་ཀྱི་ཡོད། ད་ལྟའི་ཆར་ལངས་ཕྱོགས་ལ་འགྱུར་བ་གཏོང་མིན་ཐོག་སྐད་ཆ་བྱུང་མེད་པས་དམིགས་བསལ་ཞུ་རྒྱུ་མེད་ཀྱང་། ༧རྒྱལ་བ་རིན་པོ་ཆེ་མཆོག་གི་བཀའ་དེ་ང་ཚོའི་ནོར་བུ་ལྟ་བུ་ཡིན་སྟབས། ང་ཚོ་སུ་འདྲ་ཞིག་ཡིན་རུང་ཁོང་གི་བཀའ་ལ་ཞིབ་འཇུག་དང་རྩད་གཅོད་ཡག་པོ་བྱེད་དགོས་པ་རེད་དྲན་གྱི་འདུག ང་ཚོ་བོད་ཀྱི་གནད་དོན་དེ་ཡག་པོ་ཆགས་དགོས་ཀྱི་ཡོད་ན། ༧རྒྱལ་བ་ཪིན་པོ་ཆེ་མཆོག་གི་བཀའ་བརྩི་དགོས་པ་རེད་བསམ་གྱི་ཡོད”ཅེས་བརྗོད་སོང་།
མན་ཌི་རྫོང་ཁོངས་སྦོན་ཊིར་ས་རྒྱུན་ཚོགས་གཙོ་བསོད་ནམས་བསྟན་འཛིན་ལགས་ཀྱིས། “ ང་ཚོ་ས་གནས་ནས་ཀྱིས་རྒྱལ་བ་རིན་པོ་ཆེ་མཆོག་གི་བཀའ་བརྩིས་ཏེ། གཞོན་ནུས་རང་བཙན་བརྩད་ན་ཏག་ཏག་བསྡད་ཀྱི་མི་འདུག་གསུང་གི་འདུག་ལ། ང་རང་སྒེར་ངོས་ཀྱང་༧རྒྱལ་བ་རིན་པོ་ཆེ་མཆོག་གི་བཀའ་བརྩིས་ནས་དབུ་མའི་ལམ་ལ་འགྲོ་ཐུབ་ན་བསམ་གྱི་འདུག ཡིན་ནའང་། ད་ལྟ་ལངས་ཕྱོགས་ལ་འགྱུར་བ་འགྲོ་མིན་དེ་ཚོགས་འདུ་འགྲོ་བཞིན་པ་ཡིན་དུས། ཚོགས་འདུ་ཚར་བ་དང་གསལ་བོ་ཧ་གོ་ངེས་རེད། དེ་སྔའི་ཕྱག་ལས་གནང་ཕྱོགས་ཀྱི་ཐད་ནས་རང་བཙན་གྱི་དོན་དུ་ལས་འགུལ་རབས་དང་རིམ་པ་མང་པོ་ཞིག་སྤེལ་ཡོད་སྟབས་འཐུས་ཤོར་སོང་ཡོད་པ་རེད་དྲན་གྱི་འདུག ” ཅེས་བརྗོད་སོང་།
མན་པ་ཊི་ས་རྒྱུན་དངུལ་གཉེར་སྐལ་བཟང་གཡུ་སྒྲོན་ལགས་ཀྱིས་བརྗོད་དོན། “ལས་ཀ་བྱས་ན་ནོར་འཁྲུལ་ཡོང་གི་རེད། གཞོན་ནུས་ལས་ཀ་བྱས་པ་ལ་བརྟེན་ནས་༧རྒྱལ་བ་རིན་པོ་ཆེ་མཆོག་གི་ལྷ་དགོངས་དཀྲིགས་པ་རེད། ༧རྒྱལ་བ་རིན་པོ་ཆེ་མཆོག་གིས་གཞོན་ནུ་དང་མི་ཁ་ཤས་ཀྱིས་གསུངས་ནས་བཀའ་རིམ་པ་མང་པོ་ཕེབས་ཡོད་པ་རེད། གལ་ཆེ་ཤོས་ཤིག་ལ་ལྷ་དགོངས་དཀྲིགས་པའི་ནོར་འཁྲུལ་དེར་ང་ཚོས་ངོས་ལེན་ཞུས་ཏེ། དགོངས་སེལ་ཞུ་རྒྱུ་གཏན་འཁེལ་བ་རེད” ཅེས་བརྗོད་སོང་།
ས་ལི་སྒར་ས་རྒྱུན་ཚོགས་གཙོ་ཟླ་བ་རྒྱལ་པོ་ལགས་ཀྱིས། “ ལངས་ཕྱོགས་ཟེར་བ་དེར་འགྱུར་བ་གཏོང་རྒྱུ་ཡོད་པ་མ་རེད། དེ་འགྱུར་བ་གཏོང་བར་བགྲོ་གླེང་དང་སྦྱང་བཤད་མང་པོ་དགོས་ལ། འགྱུར་བ་གཏོང་སའི་ས་ཆ་ཞིག་ཀྱང་དགོས་པ་རེད། གཞོན་ནུ་ལྷན་ཚོགས་དེ་མི་རབས་ནས་མི་རབས་ཀྱི་གཞོན་སྐྱེས་ཚོས་སློབ་སྦྱོང་བྱེད་སའི་སྡིངས་ཆ་ཞིག་ཆགས་བསྡད་ཡོད་སྟབས། ལམ་སང་འགྱུར་བ་གཏོང་རྒྱུ་ལས་སླ་བོ་རྩ་བ་ནས་ཡོད་པ་མ་རེད། འོན་ཀྱང་། འགྱུར་བ་གཏོང་མི་ཆོག་པ་མ་རེད། སྐབས་དང་དགོས་པ་བྱུང་ན་ཆབ་སྲིད་ཀྱི་ལས་ཀ་ལ་བརྐྱང་སྐུམ་མང་པོ་ཡོད་པ་རེད། ” ཅེས་བརྗོད་སོང་།
༡ ཚོགས་ཐོག་ཏུ་གཞོན་ནུའི་ལངས་ཕྱོགས་ལ་འགྱུར་གཏོང་དགོས་མིན་གྱི་བསམ་ཚུལ་ཤུགས་ཆེན་ཚོགས་མིའི་ནང་ཐོན་གྱི་ཡོད་པ་འདི་ནད་འགག་ཞིག་རེད་འདོད། ངས་བལྟས་ན་ཕྱོགས་གཅིག་ནས་༸རྒྱལ་བར་དད་པ་དམ་ཚིག་དང་། ལྷ་ཡི་ལུང་བསྟན་སོགས་ལ་ཡིད་ཆེས་ཤུགས་དྲགས་པས་ཡིན་སྲིད་མོད། ཕྱོགས་གཞན་ཞིག་ནས་སོ་སོ་སྒེར་ལ་རང་བཙན་གྱི་ལངས་ཕྱོགས་བརྟན་པོ་མེད་པར་རྐང་པ་གཉིས་འཛུགས་བྱས་པས་རེད།
༢ གཞོན་ནུའི་ཚོགས་མི་ཞིག་ཡིན་ན་རང་ཉིད་ལ་བོད་རང་བཙན་རྒྱལ་ཁབ་སླར་གསོ་བྱེད་ཐུབ་པའི་གདེངས་ཚོད་དང་སྤོབས་པ་དེ་མ་མཐའ་ཡང་དགོས་ངེས་ཤིག་རེད་འདོད། ཚོགས་མི་ནང་དེ་ལྟ་བུའི་གཅིག་མཐུན་ཅན་གྱི་ལྟ་བ་དང་། ལངས་ཕྱོགས་བརྟན་པོ་མེད་པས་རྐྱེན་གྱི་དཀའ་ངལ་མང་པོ་འཕྲད་ཀྱི་ཡོད་པ་རེད།
༣ དབུས་བོད་མིའི་སྒྲིག་འཛུགས་ཀྱི་ངོས་ནས་མུ་མཐུད་དེ་ལམ་དབུ་མའི་སྲིད་བྱུས་བཟུང་ནས་བོད་མིའི་ཆོས་དང་རིག་གཞུང་སོགས་མྱུར་སྐྱོབ་ཆེད་འཐབ་རྩོད་བྱེད་ཀྱི་ཡོད་པ་རེད། ལྷག་པར་དུ་སྲིད་དབང་མི་མང་གི་བདམས་པའི་སྲིད་སྐྱོང་མཆོག་ལ་ཕུལ་བ་འདིས་རྒྱ་ནག་གཞུང་གི་བློ་ཡུལ་ན་ཡོད་པའི་ཏཱ་ལའི་བླ་མའི་གནད་དོན་དེ་བོད་ཀྱི་གནད་དོན་ཅན་དུ་གྱུར་པ་རེད། ༸གོང་ས་མཆོག་གི་གནང་སྟངས་འདིས་རྒྱ་ནག་གི་དཔོན་རིགས་ཚོ་བསམ་ཡུལ་ལས་འདས་ཏེ་རྒྱལ་སྤྱིའི་སྒང་བོད་ཀྱི་ནད་དོན་ཟེར་བ་ཞིག་མེད་པར་སྒྲུབ་ཐབས་སྣ་ཚོགས་བྱེད་ཀྱི་ཡོད་པ་རེད། དབུས་བོད་མིའི་སྒྲུག་འཛུགས་ལ་གྲོས་མོལ་གྱི་སྒོ་མོ་བྱེད་ཀྱི་མེད་པ་གནད་དོན་འདིའི་རྐྱེན་གྱིས་ཅི་ལ་མིན།
༤ ང་ཚོའི་འཐབ་རྩོད་བྱེད་དུས་མ་འགྲིག་ས་གཙོ་བོ་གཅིག་ཡོད་པ་ནི་ང་ཚོ་ལ་གཅིག་མཐུན་གྱི་ལངས་ཕྱོགས་མེད་པས་རེད། གཅིག་མཐུན་གྱི་ལངས་ཕྱོགས་ཤིག་གི་ཐོག་ནས་ང་ཚོས་འཐབ་རྩོད་བྱས་ཡོད་པ་ཡིན་ན་ང་ཚོའི་མཐོང་ལམ་ན་འབྲས་བུ་བཟང་པོ་ཞིག་མངོན་ཐུབ་ངེས་རེད། ཡིན་ནའང་ང་ཚོ་ལ་དེ་མེད། སྡུག་ས་ནས་བཤད་ན། ང་ཚོའི་སྐད་འབོད་སྐབས་སུའང་གཅིག་མཐུན་གྱི་འབོད་ཚིག་མེད། དཔེར་ན། སུམ་དུས་སྐད་འབོད་སྐབས། ལམ་དབུ་མར་འདོད་མཁན་གྱི་མི་མང་བརྒྱ་ཆ་མང་པོས “བོད་རང་བཙན་གཙང་མ་ཡིན། རྒྱ་མི་བོད་ནས་ཕར་རྒྱུགས་ཤིག” ཞེས་སྐད་འབོད་རྒྱུག་གི་ཡོད། མདོ་དོན། སྲིད་བྱུས་གཅིག་གི་འོག་ཏུ་ལངས་ཕྱོགས་གཅིག་དང་། འབོད་ཚིག་གཅིག་ཡོང་དགོས་ངེས་ཡིན། ཡིན་ནའང་ང་ཚོའི་སྲིད་བྱུས་ཁྱེར་སྟངས་དང་། མི་མང་གི་གོ་རྟོགས་སོགས་གང་ཅིའི་ནས་དེ་ལྟར་མ་ཡོང་བའི་གནད་འགག་དེ་ལ་རྣོ་བསམ་བཏང་སྟེ་མ་གྲོས་བསམ་པ་གཅིག་མཐུན་གྱི་འཐབ་རྩོད་བྱེད་སྟངས་ཤིག་ཁྱེར་ཡོང་ནས་ང་ཚོ་ལ་དགོས་པའི་རང་དབང་གི་ཉིན་མ་ཞིག་ཤར་ཐུབ་པར་ཚང་མས་འབད་བརྩོན་བྱེད་དགོས་ཀྱི་ཡོད་པར་འདོད་དོ།།
བོད་ཀྱི་གཞོན་ནུ་ལྷན་ཚོགས་ཀྱི་ལང་ཕྱོགས་ལ་ཅིས་ཕྱིར་འགྱུར་བ་གཏོང་དགོས་སམ། བོད་ཀྱི་གཞོན་ནུ་ལྷན་ཚོགས་ཀྱིས་༸རྒྱལ་བའི་དགོངས་པ་ག་དུས་དཀྲུགས་པ་རེད། ལས་འགུལ་དང་བྱ་སྤྱོད་ཅི་ཞིག་གིས། གནའ་ནས་ད་བར་ཕྲུ་གུས་འཇའ་སྣེ་དེད་པ་བཞིན་ང་ཚོར་ནམ་ཡང་ཆབ་སྲིད་ཀྱི་ལང་ཕྱོགས་བརྟན་པོ་ཞིག་མེད་པ་འདི་འདྲ་གང་ཡིན་ནམ། ང་ཚོས་ཁ་ནས་སྲིད་ཕྱོགས་ཀྱི་སྐད་ཆ་འཆད་ཀྱང་ཡོད་ཚད་ཀྱི་མཇུག་དད་པ་དང་དམ་ཚིག་ཅིག་གིས་བསྡུ་དགོས་པ་འདི་གང་ཡིན་ནམ། ང་ཚོའི་སྤྱི་ཚོགས་ནང་གི་ཆབ་སྲིད་ཀྱི་ལྟ་སྒྲུབ་ཞིག་སྐྱོང་དགོས་ན་རྒྱལ་བའི་དམ་ཚིག་དང་བླ་ལྷའི་བཀའ་དབང་དེ་ཨང་དང་པོ་ཅིས་ཕྱིར་འཛིན་དགོས་སམ། འདི་ལྟ་བུའི་ལྟ་སྒྲུབ་དེ་ལ་ཡང་དག་པའི་མང་གཙོ་དང་ཆབ་སྲིད་ཀྱི་ལྟ་སྒྲུབ་ཟེར་རམ་ཡང་ན་ཆོས་ཉམས་ལེན་གྱི་ལྟ་སྒྲུབ་ཟེར།
ཕྱི་ལོ་ ༡༩༤༦ ཡས་མས་ནས་རྒྱ་གཞུང་གིས་ངན་སེམས་བསྐྱངས་པ་དེའི་མཇུག་འབྲས་ང་ཚོར་ཡང་དག་པའི་ཆབ་སྲིད་ཀྱི་ལྟ་སྒྲུབ་སྲ་བརྟན་ཞིག་མེད་སྟབས་མཐར་ ༡༩༥༩ ནང་བོད་ས་ཡོངས་རྫོགས་རྒྱ་འོག་ཏུ་ཤོར་བ་མ་ཡིན་ནམ། ༸རྒྱལ་བའི་དགོངས་གཞི་སྒྲུབ་རྒྱུ་ཨང་དང་པོ་དེ་བོད་མི་མི་རེའི་ངོ་ནས་བོད་དོན་འཐབ་རྩོད་བྱེད་རྒྱུ་དེ་མིན་པར་ཚོགས་པས་ཚོགས་པ་རྩ་གཏོར་གཏོང་རེས་ཀྱིས་བོད་མའི་ནང་འཁུལ་འགལ་ཟླ་བཟོ་རྒྱུ་འདི་དག་ཡིན་ནམ། གལ་སྲིད་བོད་ཀྱི་གཞོན་ནུ་ལྷན་ཚོགས་དེ་སྒོ་རྒྱག་སྟེ་ཚོགས་མི་ཡོད་ཚད་དབུ་ལམ་དུ་ཤར་སྐྱོད་བྱ་ནུས་ཚེ། དེའི་མཇུག་འབྲས་རྒྱ་ནག་གཞུང་གིས་ད་གྲོས་མོལ་བྱེད་ཀྱི་ཡིན་ད་ཟེར་སྲིད་དམ། ཀྲུང་ཧྭ་མི་མང་སྤྱི་འཐུས་རྒྱལ་ཁབ་ཟེར་བའི་མི་མང་དུང་ཕྱུར་བཅུ་གསུམ་ཙམ་གྱི་བདག་པོ་འདི་ཡང་དག་པའི་མང་གཙོའི་ལམ་ཞིག་མ་ཆགས་པའི་གོང་དུ་ང་ཚོར་དབུ་ལམ་ལ་བསྟེན་ནས་བོད་ཀྱི་དཀའ་བརྙོག་སེལ་ཐུབ་པའི་གདེངས་ཚོད་ཡོད་དམ། གལ་སྲིད་ཡོད་ན་ད་ལྟའི་དམར་པོའི་གཞུང་འཛིན་པ་ཚོའི་བསམ་བློར་འགྱུར་བ་འགྲོ་དགོས་སྟབས་དེ་ག་དུས་འགྲོ་རྒྱུ་རེད། གང་འདྲ་ཞིག་བྱ་ནས། མང་གཙོ་མ་ཡིན་པའི་རྒྱུ་རྐྱེན་གང་ཞིག་ལ་བརྟེན་ནས་འགྱུར་བ་འགྲོའམ།
ལོ་རྒྱུས་རང་བཞིན་ལྡན་པའི་བོད་རང་བཙན་གྱི་འཐབ་རྩོད་དེར་བོད་པ་ཁོ་ན་ཙམ་མིན་པར་འཛམ་གླིང་ཡུལ་གྲུ་ཀུན་ཏུ་རྒྱལ་ཁབ་གཞན་དག་གི་མི་མང་འབུམ་ཕྲག་དུ་མས་དུས་ནས་དུས་སུ་སྲང་ལམ་དུ་ཐོན་ཏེ་སོ་སོའི་རང་སྐད་ཐོག་ཏུ་བོད་རང་བཙན་ཡིན། བོད་ནང་དུ་འགྲོ་བ་མི་ཡི་ཐོབ་ཐང་དགོས་ཟེར་བ་ལས་གཞན་པའི་འབོད་ཚིག་ཞིག་མི་སྒྲོག་པ་འདི་ཅི་ཡིན་ནམ། ཁོ་ཚོས་བོད་པས་ལྟ་སྒྲུབ་གཞན་ཞིག་རྩོད་ཀྱིན་ཡོད་པ་མི་ཤེས་པ་ཡིན་ནམ། མི་མང་དེ་དག་ལ་ལོ་ངོ་ལྔ་བཅུ་དང་དྲུག་ཅུའི་རིང་གཞོན་ནུས་རྒྱུད་བསྐུལ་བྱས་པ་ཡིན་ནམ་ཡང་ན་ལོ་རྒྱུས་རང་བཞིན་ལྡན་པའི་བོད་རང་བཙན་གྱི་འཐབ་རྩོད་དེར་ཁོ་ཚོས་རང་ངོས་ནས་རྒྱབ་སྐྱོར་བྱེད་པ་ཡིན། ང་ཚོས་ནམ་ཡང་ཕྱི་ཡི་རྒྱལ་ཁབ་ཁག་ནས་རོགས་རམ་བཙལ་དང་འཚོལ་བཞིན་པ་དང་། ཁོ་ཚོས་ཀྱང་ཆས་སྲིད་དང་དཔལ་འབྱོར་གང་ཅིའི་ཐད་ནས་རོགས་རམ་སྤྲད་དང་སྤྲོད་བཞིན་པ་ཁག་ལས། ལྷག་དོན་ཆབ་སྲིད་ཀྱི་རྒྱབ་སྐྱོར་འདི་དག་དབུ་མའི་ལམ་ཁོ་ནར་བསྟེན་ནས་བྱུང་བ་ཡིན་ནམ་ཡང་ན་འཐབ་རྩོད་དེ་གཉིས་ཀའི་ཐོག་ནས་བྱུང་བ་ཞིག་རེད། ཡང་ན་ཁོ་ཚོར་བོད་དོན་ལ་འཛིན་པའི་ལྟ་སྒྲུབ་ཅི་ཡང་མེད་ཁར་ནམ་ཡང་འཐོབ་རྒྱུ་མེད་པའི་གང་ཚོད་དུ་རྒྱ་གཞུང་ལ་ངོ་རྒོལ་དང་སྐད་འབོད་བྱེད་ཀྱིན་པ་ཡིན་ནམ།
གལ་སྲིད་ཀྲུང་ཧྭ་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་ཡིག་ཆ་དང་དེའི་མཆན་འགྲེལ་སོགས་ལྟར་ན། བོད་ལ་དེ་འདྲའི་རང་སྐྱོང་དེ་རག་པ་ནས་བཟུང་བོད་མི་སྤྱི་བོ་གནམ་སྟན་ཡོངས་རྫོགས་ཀྱིས་དམར་པོའི་ལྟ་སྒྲུབ་དང་ཏང་ལ་ཡིད་ཆེས། ཏང་གླུ་ལེན་བཞིན་མེས་རྒྱལ་སྲུང་སྐྱོབ། དེ་སྔོན་རྒྱ་གཞུང་གིས་བོད་མི་ས་ཡ་གཅིག་ཙམ་བསད་པ་དང་། ད་དུང་ཡང་གསོད་དང་འཛིན་བཞིན་པ་རྣམས་ལ་ཁོངས་འགྲས་དང་ཞེ་སེམས་གང་ཡང་མེད་ཟེར་དགོས་སམ། ཡང་ན་སྐབས་དེ་དུས་ཆོལ་ཁ་གསུམ་ལ་རྒྱ་གཞུང་གིས་དམིགས་བསལ་མང་གཙོའི་ལྟ་སྒྲུབ་ཞིག་སྐྱོང་དུ་འཇུག་པར་མ་ཚད། ང་ཚོས་ཀྱང་སྐབས་དེར་གངས་ཅན་པའི་དཔའ་བོ་དཔའ་མོ་དང་མེས་པོ་ཚོར་དུས་ནས་དུས་སུ་རྗེས་དྲན་ཞུ་རུ་འཇུག་རྒྱུ་ཡིན།
དུས་རབས་ཉེར་གཅིག་པའི་མང་གཙོ་དང་རང་དབང་གི་ས་སྒང་ཆེན་པོ་འདིའི་སྟེང་དུ་གློ་བུར་དུ་མི་བུ་ས་ཡ་དྲུག་ཙམ་སོ་སོའི་ཕ་མ་དང་མེས་པོ། གཉེན་ཉེ་དང་སྤུན་གྲོགས་བསད་པའི་དགྲ་བོ་ལག་དམར་དེའི་ཚེ་གཡོག་ཏུ་འགྱུར་ཚེ། སྐབས་དེར་ང་ཚོ་དང་འདྲ་བའི་རང་དབང་དང་མང་གཙོ་ལ་དགའ་བའི་འཛམ་གླིང་སྐྱེ་བོ་ཀུན་ལ་ཚོར་བ་ཇི་འདྲ་ཞིག་སྐྱེ་སྲིད།
རང་བཙན་གྱི་ལྟ་སྒྲུབ་རྩོད་ཟེར་དུས་མཚོན་ཆ་དང་དྲག་སྤྱོད་མ་གཏོགས་གཞན་པའི་ཐབས་ལམ་ཞིག་མེད་དམ། ལོ་རྒྱུས་རང་བཞིན་ལྡན་པའི་རང་བཙན་གྱི་འཐབ་རྩོད་དེ་རྒྱལ་སྤྱིའི་ཁྲིམས་ལུགས་དང་ཁྲིམས་ཁང་། དེ་བཞིན་འགྲོ་བ་མི་ཡི་ཐོབ་ཐང་ཚོགས་སྡེ་ཁག་ལ་ཞུ་བཏུག་གིས་རྒྱལ་སྤྱིའི་ཁྲིམས་ལུགས་ལྟར་དངོས་ཟོག་དངོས་བདག་རང་ལ་ཕྱིར་དག་སྤྲོད་ཐུབ་པའི་རང་བཙན་གྱི་འཐབ་རྩོད་ཅིག་བྱ་རྒྱུ་མེད་དམ།
གང་ལྟར་རྨོངས་པ་ང་ལ་མཚོན་ན་དྲི་བ་འདི་དག་ལ་ལན་དགོས་པ་ཤ་སྟག་རེད་འདུག
གཞོན་ནུའི་བསྐོངས་ཚོགས་སྔོན་ལ་ཚོགས་དུས།།
རྣམ་རྟོག་མང་པོའི་སྒོ་མོ་ཕྱེ་སོང་།།
རང་བཙན་དབུ་མའི་ལངས་ཕྱོགས་བཤད་དུས།།
གྲོས་ཆོད་ལད་པོ་ག་ལེར་ལོས་ཡོང་།།
རང་བཙན་བརྩད་མི་ཆོག་པ་རྒྱལ་བའི་བཀའ་རེད་གསུང་མཁན་དག་གིས་ཁོང་ལ་མ་ཉེས་ཁ་གཡོག་བྱས་པ་རེད། མང་གཙོའི་ལུང་པ་ན་མེད་པ་ཞིག་ཀྱང་རེད། འདི་འདྲེའི་གནད་འགག་ཅིག་ཚོགས་ཆེན་གཅིག་ཙམ་ལ་ཐག་གཅོད་གནང་འོས་ཞིག་མ་རེད། གཞན་ལྷ་དགོངས་དཀྲིགས་པ་ཟེར་བ་དང། མི་ཁ་ཤས་ཟེར་བ། གཞོན་ནུ་ཟེར་བ་། ཏག་ཏག་སྡད་མི་འདུག
གཞོན་ནུའི་རང་བཙན་གྱི་ལྟ་བར་འགྱུར་བ་མ་སོང་ན་བཟང་གི་རེད་སྙམ། བཙན་བྱོལ་བའི་སྒྲིག་འཛུགས་ནང་དུ་འདི་ལྟ་བུའི་ལངས་ཕྱོགས་ངེས་པར་དུ་དགོས་པ་རེད། ཡིན་ནའང་། རང་བཙན་ཁར་ཁྱེར་ནས་དབུ་མའི་ལམ་དང་༸གོང་ས་མཆོག་བཅས་ལ་གཞི་མེད་སྐྱོན་བརྗོད་བྱེད་པ་དེའི་རིགས་ལ་ཐག་གཅོད་ནན་པོ་ཞིག་བྱ་དགོས་པ་རེད་སྙམ།
གཞུང་གི་ལངས་ཕྱོགས་ལ་བལྟས་ནས་ཚོགས་པའི་ལངས་ཕྱོགས་བསྒྱུར་བ་འམ། ཚོགས་པའི་ལངས་ཕྱོགས་ལ་བསམ་ནས་གཞུང་གི་ལངས་ཕྱོགས་བསྒྱུར་དགོས་པར་ཤོད་མཁན་དག་ནི། མང་གཙོའི་དྲི་མ་ཙམ་ཡང་མེད་རྟགས་ཡིན་པས་གཞོན་ནུས་སྔར་བཞིན་གནང་ན་ལེགས།
གལ་སྲིད་ལངས་ཕྱོགས་ལ་འགྱུར་བ་བཏང་བ་ཡིན་དུས། བོད་ཀྱི་གཞོན་ནུ་ལྷན་ཚོགས་ནས་དབུ་མའི་ལམ་གྱི་གཞོན་ལྷན་དུ་འགྱུར་བ་རེད་ལ། དབུ་མའི་ལམ་ལས་འགུལ་ཁང་གི་ཁྱབ་ཁོངས་བསྙོན་མེད་དེ་ཆགས་པ་རེད། ཡིན་ནའི། བོད་ཀྱི་གཞོན་ལྷན་ངོ་མ་དེ་ལོགས་སུ་ཐོན་རྒྱུ་རེད་ལ། སྒོས་སུ་བོད་ནང་ནས་ཐོན་རྒྱུ་རེད། དེ་དུས་སྔར་གྱི་ཆུ་སྒང་གསར་རྙིང་ལྟ་བུ་ལས་རྦད་དེ་ཁ་ཁ་ཆགས་ཚར་བ་རེད། གཅིག་བྱས་ན་འདི་ནི་བོད་ཀྱི་ཤི་གསོན་ཐག་གཅོད་ཀྱི་གདམ་ག་ཡག་ཤོས་དེ་ཡིན་ཡང་སྲིད།
གོང་ས་མཆོག་དགོང་པ་འཚོང་བ་དངོས་གནས་རེད། ཡིན་ན་ཡང་ད་ལྟའི་སྐབས་ལ་ཆོས་ཕྱོགས་གིས་ཐུགས་འགན་ཁོ་ན་བཞེས གིས་ཡོད་དུས་གང་ཡང་གནང་གི་མི་འདུག རེ་བ་བཟང་ས་ནས་བརྒྱབ། གྲ་བསྒྲིགས་སྡུག་ས་ནས་བྱེད་གསུང་མྱོང་བ་རེད།
ཨ་དཀར་འཇམ་དབྱངས་ནས།