གནས་ཆུང་གིས་བཀའ་ཕེབས་སོང་།

ང་ཚོས་དུས་རྒྱུན་དུ་གསོལ་བཞིན་པའི་ལྷ་ཀླུ་འདི་དག་ནི་དགོས་དུས་མེད་པའི་རྒྱུ་ནོར་ཞིག་དང་གཅིག་མཚུངས་རེད།
ང་ཚོས་བྱ་བ་འདི་་དག་མཚམས་མ་བཞག་ན་ད་ལྟའི་མཇུག་འབྲས་ལས་ངན་པའི་མཇུག་འབྲས་ཞིག་ཡོང་སྲིད་པ་རེད།

ངའི་དོག་པ་དེ་ལ་ལྗང་གཞོན་གྱིས་ར་སྤྲོད་བྱས་སོང་། མི་འདི་ཚོས་གོང་ས་མཆོག་ལ་ཡང་འདི་ལྟར་བཤད་ཡོང་དུས་གཞན་ལ་སྨོས་ཅི་དགོས། ད་ངོ་མ་བོད་པ་ཁག་ཅིག་སྨྱོ་ཚར་འདུག

མི་འུ་ཐུགས་ལྷ་ཞུས། ལྷ་འུ་ཐུགས་རྫུན་བཤད་།

༸གོང་ས་སྐྱབས་མགོན་ཆེན་པོས་ཀྱང་སྲིད་དབང་རྩིས་སྤྲོད་མ་གནང་བར་ཆབ་སྲིད་ཀྱི་གལ་ཆེའི་ལས་དོན་མཐའ་དག་གནས་ཆུང་དང་དཔལ་ལྡན་ལྷ་མོ་སོགས་ལ་མོ་ལུང་རྟགས་པ་ཞུས་ནས་ཐག་བཅོད་གནང་གི་ཡོད་པ་དང་། གལ་ཆེའི་དོན་དག་ནོར་འཆུག་བྱུང་མ་མྱོང་ཞེས་ཞལ་དྲོན་མོ་ནས་གསུང་ཡོད་ན། དེ་རིང་སྲིད་སྐྱོང་གིས་གནས་ཆུང་གི་བཀའ་ལུང་ཞིག་ཁྱབ་བསྒྲགས་བྱས་པར་དེ་ཙམ་ཧང་སང་དགོས་དོན་ཅི་ཡོད། མི་འདི་ཚོའི་བཤད་སྟངས་ལ་ལྟས་ན་གོང་ས་མཆོག་གིས་ཀྱང་གནང་ཆུང་ལ་བཀའ་ལུང་ཞུས་པ་དེ་ལག་པ་ཕྱི་ས་བརྩལ་བ་རེད་མི་ཟེར་བའི་ངེས་པ་མི་འདུག

༧རྒྱལ་བ་རིན་པོ་ཆེའི་བཀའ་དང་། གནས་ཆུང་གི་ལུང་། སྲིད་སྐྱོང་གི་གསལ་བསྒྲགས། ཟམ་གདོང་གི་བཙན་བཀའ་འདི་ཐམས་ཅད། མཐའ་བཏུག་ན་རྒྱ་དམར་སྲིད་གཞུང་གི་དགོས་དོན་བསྒྲུབ་རྒྱུ་ལས་གཞན་གང་ཡང་མི་འདུག་ཡག་པོ་ལྟོས་དང་ཤེས་ངེས་རེད། ཁོང་ཚོའི་རེ་འདོད་ནི་༧རྒྱལ་རིན་པོ་ཆེ་བོད་དུ་ཕེབས་ཐུབ་རྒྱུ་གཅིག་པོ་ལས། བོད་མི་མང་གིས་འདུན་ལམ་ནི་ག་པར་སོང་ཡང་སྣང་མེད་རེད་ད། ཡག་པོ་ལྟོས་ཨ་གཏན་གཏན་ཤེས་ཡོང་།

ད་ཡིན་ན་སྲིད་སྐྱོང་མཆོག་འུ་ཐུག་འདུག
སྲིད་སྐྱོང་གི་ཁ་ཕོ་ཆེ་སྲུང་དམར་བཅོལ་འདུག

རྒྱལ་ཁབ་གཅིག་དང་མི་རིགས་གཅིག་གི་རྩ་དོན་འཐབ་རྩོད་ཇི་ལྟར་བྱེད་མིན་གཟུགས་འདས་ལ་སྐད་ཆ་འདྲི་བའི་ལམ་ལུགས་དེ་སེང་གེ་བཀའ་ཤག་གིས་གསར་གཏོད་ཅིག་མིན་པར་སྲིད་དབང་བགྲེས་ཡོལ་ལ་མ་ཕེབས་སྔོན་ནས་ཡོད་པའི་ལམ་ལུགས་ཅིག་མ་རེད་པས། བྱས་ཙང་ནམ་རྒྱུན་རྒྱུན་འཛིན་བྱེད་དགོས་པའི་ཁ་གཡང་བསྒྲོགས་མཁན་དག་དེ་རིང་ག་རེ་བྱས་སོང་བ་རེད། གང་ཟག་ལ་རྟོན་པ་མ་རེད་པས།

ཁ་པོ་ཆེས་”རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་རྒྱུ་ཡིན་”ཞེས་སྟོང་གཏམ་ཁོ་ན་བཤད་པ་ལས། དོན་དངོས་སུ་བོད་དོན་བདེན་མཐའ་སེལ་ཐབས་ཀྱི་ལང་ཕྱོགས་གསལ་སྟོན་དང་། དངོས་ཡོད་ལས་དོན་སྣ་གཅིག་ཀྱང་མ་བསྒྲུབ་པས། དེང་སྐབས་ཟེར་རྒྱུས་ཕོངས་ཏེ་ཕྱིའི་རྣམ་པ་ལས་ནང་གི་དོན་སྙིང་གལ་ཆེ་བ་ཡོད་ཅེས་མང་ཚོགས་མགོ་བོ་རྨོངས་བར་བྱེད་ཀྱི་ཡོད།
བཀའ་ཤག་གིས་རང་ལུས་མེར་སྲེག་ཐད་འཛིན་པའི་སྲིད་བྱུས་ནི་ཧ་ཅང་མག་མོག་ཅིག་ཡིན་ཞིང་། འདི་ལོའི་ཟླ་ ༤ ཚེས་ ༡༢ ཉིན་གནས་ཆུང་གིས་རང་ལུས་མེར་བསྲེགས་མཚམས་འཇོག་གནང་ན་ལེགས་ཚུལ་གྱི་བཀའ་ལུང་ཕེབས་ཡོད་ཀྱང་། སྐབས་དེར་བཀའ་ཤག་གིས་མང་ཚོགས་ལ་བརྒྱུད་བསྒྲགས་མ་བྱས་པར་བཀའ་ལུང་གསང་མཛོད་དུ་བཅུག་པ་རེད། འོ་ན་ད་ཐེངས་གཞི་ནས་བཀའ་ལུང་ལ་བརྩི་བཀུར་ཞུས་ཏེ་མེར་བསྲེགས་མཚམས་འཇོག་གི་འབོད་སྐུལ་ཞུ་དགོས་དོན་གང་ཡིན་ནམ།
བདག་གིས་བསམ་ན་གཅིག་ནས་རྒྱ་ཕྱོགས་ནས་སྐྱོན་བརྗོད་ལོག་པ་བྱས་པར་ལང་ཕྱོགས་བརྟན་པོའི་གདོང་ལེན་བྱ་རྒྱུའི་ཉམས་མྱོང་གིས་མ་འདང་བ་དང་། གཉིས་ནས་བར་ལམ་སྲིད་སྐྱོང་དང་བཀའ་ཤག་སྐབས་བཅུ་བཞི་པའི་བྱ་སྤྱོད་ཐད་རྩོམ་ཡིག་གང་མང་ཐོན་ཞིང་། དོན་དངོས་ཀྱི་གནས་ཚུལ་མང་པོ་ཞིག་ལ་གསལ་ཁ་ཐོན་པས། ད་ནི་ཉི་ཤར་སྦར་མོས་མི་ཁེབ་པར་བསམ་སྟེ། ལས་དོན་ལེགས་གྲུབ་མ་བྱུང་བའི་གནད་དོན་འཛར་འཛོར་དེ་དག་གནས་ཆུང་ལ་ལག་འཕྱིས་བྱས་པ་ལས་མ་འདས།
བོད་རིགས་མི་མང་རྣམ་པ་དང་ལྷག་པར་བཙན་བྱོལ་བོད་མི་ཚོ། ད་ནི་ང་ཚོས་བཀའ་ཤག་སྐབས་རྗེས་མའི་ཐད་ངེས་པར་བསམ་བློ་གཏོང་བའི་དུས་ལ་སླེབས་འདུག ངོ་མ་རེད། ཕྱིའི་རྣམ་པ་ལས་ནང་གི་དོན་སྙིང་གལ་ཆེ་བ་རེད། ང་ཚོ་ལ་འབུམ་རམ་པ་དང་མཁས་དབང་གི་མིང་རྫིག་པོ་དེ་འདྲ་དགོས་དོན་ཡེ་ནས་མི་འདུག ང་ཚོ་ལ་དོན་དངོས་ཀྱི་ལས་དོན་བསྒྲུབ་མཁན་དེ་འདྲ་དགོས་འདུག ཁ་སྟོང་པར་གནམ་ལ་འཕུར་བསྡད་མཁན་དེ་འདྲ་དགོས་དོན་གཏན་ནས་མི་འདུག དོན་ངོ་མའི་ལས་ཀ་བྱེད་མཁན་དགོས་འདུག དེང་སྐབས་གང་སྐྱིད་ནས་ཚོགས་གཙོ་སྤེན་པ་ཚེ་རིང་ཡར་རྒྱུགས་མར་རྒྱུགས་བྱེད་པ་མཐོང་རྒྱུ་ཡོད་པ་ལས། སྲིད་སྐྱོང་མཐོང་རྒྱུ་མི་འདུག་ཟེར།

སྲིད་སྐྱོད་དང་བོད་མིའི་སྒྲིག་འཛུགས་ཀྱི་གནང་ཕྱོགས།

ད་ལྟའི་སྲིད་སྐྱོང་བློ་བཟང་སེང་གེ་ཡིས་དབུ་ཁྲིད་པའི་བཀའ་ཤག་གིས་ག་རེ་གནང་གི་ཡོད་རེད་དམ། རྒྱ་ནག་གི་སྙོན་འཛུགས་ལ་རང་ཉིད་དཀའ་འདོན་བྱེད་མ་ཚར་བར་བསྡད་འདུག རང་ཉིད་དཀར་འདོན་བྱེད་པར་བོད་མིའི་རྩ་དོན་བཙོང་། རང་སྲེག་ལས་འགུལ་ཉེས་ཅན་དུ་བརྩི་ལ་ཉེ་བའི་ཚད་དུ་སླེབས་འདུག
རང་ལུས་མེ་སྲེག་གནང་མཁན་བོད་མི་རྒྱལ་གཅེས་དཔའ་བོ་དཔའ་མོ་རྣམས་གྱིས་བོད་རྒྱལ་ཁབ་དང་མི་རིགས་ཀྱི་རྩ་དོན་ཆེད་སོ་སོའི་ཚེ་སྲོག་དང་ནང་མི་བུ་ཕྲུག་བློས་གཏོང་གནང་གི་ཡོད་པ་དེར། གོང་དུ་“ཚབས་ཆེ་བའི་ལས་འགུལ་”ཞེས་བཀོད་འདུག དེ་སྔོན་སྲིད་སྐྱོང་གིས་དབྱིན་སྐད་ནང་བོད་མིའི་རང་སྲེག་ལ་ “drastic action”ཞེས་པའི་ཐ་སྙད་བེད་སྤྱོད་བཏང་སོང་། ཐ་སྙན་འདི་རྒྱ་ནག་གིས་བོད་མིའི་རང་སྲེག་ལ་བེད་སྤྱོད་བྱེད་སྲིད་པ་ཞིག་ལས་བོད་མིའི་དབུ་ཁྲིད་ཅིག་གིས་བེད་སྤྱོད་གཏོང་སྲིད་པ་ཞིག་བསམ་ཡིད་ལས་འདས་པ་རེད།

ཐེངས་འདིར་གནས་ཆུང་གི་བཀའ་ལུང་བསྩལ་བྱུང་ཞེས་བོད་མིའི་སེམས་ཁམས་ལ་བཙན་གནོན་བྱེད་ཀྱི་འདུག བོད་མི་ཚོས་གནང་བབ་གང་འདྲ་ཞིག་གི་འོག་རང་ལུས་མེ་སྲེག་ཅིའི་ཕྱིར་གཏོང་གི་ཡོད་པ་ད་ལྟའི་བཀའ་ཤག་གིས་གསལ་བོར་མཁྱེན་གྱི་མེད་པ་རེད་དམ། མཁྱེན་བཞིན་དུ་རང་ཉིད་དཀར་འདོན་བྱ་ཆེད་དེ་ལྟར་གསུང་གི་ཡོད་རེད། དེ་སྔོན་༧གོང་ས་མཆོག་དང་བསམ་གདོང་རིན་པོ་ཆེ་སོགས་ཀྱིས་བོད་ནང་གི་བོད་མི་ཚོར་རང་ལུས་མེར་སྲེག་ཐོངས་ཟེར་ཆོག་གི་མ་རེད་ལ། རང་ལུས་མེར་སྲེག་མ་གཏོང་ཞེས་གསུང་རྒྱུའི་འོས་བབ་ང་ཚོར་ཡོད་མ་རེད་གསུངས་ཡོད་རེད། འདི་ཕྱོགས་ནས་མི་མང་པོ་ང་ཚོས་མེ་སྲེག་མ་གཏོང་ཟེར་རྒྱུའི་ཐོབ་ཐང་ཡོད་མ་རེད་ཅེས་བརྗོད་ཀྱི་ཡོད་རེད།

འོན་ཀྱང་། བཀའ་ཤག་གིས་ཡང་ནས་བསྐྱར་དུ་རང་ལུས་མེ་སྲེག་མཚམས་འཇོག་བྱ་དགོས་པར་གསུངས་པ་རེད། དེ་དག་ཀྱང་རང་ལུས་མེ་སྲེག་ལ་སྐུལ་སློང་བྱེད་མཁན་བཙན་བྱོལ་བོད་མིའི་སྒྲིག་འཛུགས་དང་མགོ་ཁྲིད་ཚོ་ཡིན་པའི་སྙོན་འཛུགས་བྱེད་ཡོང་སྐབས། རང་ལུས་མེ་སྲེག་གི་རྒྱབ་ཏུ་བཙན་བྱོལ་སྒྲིག་འཛུགས་དང་མགོ་ཁྲིད་ཚོ་མེད་པ་དཀར་འདོན་དང་འབྲེལ་ཏེ་རང་ལུས་མེ་སྲེག་མཚམས་འཇོག་བྱ་དགོས་སྐོར་གསུང་གི་ཡོད་པ་རེད།

ད་ལྟའི་བཀའ་ཤག་གིས་ལས་དོན་ཡོད་ཚད་གནང་ཆུང་གི་བཀའ་ལུང་འོག་སྒྲུབ་ཀྱི་ཡོད་དམ། ད་ཆར་ཆོས་སྲིད་ཐ་དད་ཡིན་ཟེར་གྱི་ཡོད་རེད་ལ། ལྷག་པར་དུ་དགའ་ལྡན་ཕོ་བྲང་དང་བོད་མིའི་སྒྲིག་འཛུགས་ཁ་ཁ་ཡིན་ཟེར་གྱི་ཡོད་རེད། དེ་ན་བཀའ་ཤག་གིས་གནང་ཆུང་ལ་བཀའ་ལུང་ཞུ་བའི་ཁྲིམས་སྒྲིག་ཅིག་བཅའ་ཁྲིམས་ཀྱི་དོན་ཚན་གང་ཞིག་ཏུ་གསལ་ཡོད་དམ། དེ་བས་གོང་ཡིག་ནང་ “བོད་མིའི་སྒྲིག་འཛུགས་ཀྱི་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོས་བཀའ་ལུང་བསྩལ་་་་་་”ཞེས་བཀོད་འདུག་པ་དེ་རེད། བོད་མི་རིགས་ནི་ནང་པ་དང་བོན། ཁ་ཆེ། ཡི་ཤུ་སོགས་ཆོས་ལུགས་སྣ་ཚོགས་ལས་གྲུབ་པའི་མི་རིགས་ཤིག་རེད། དགའ་ལྡན་ཕོ་བྲང་དང་བོད་གཞུང་གཉིས་ཁ་ཁ་བཟོས་རྗེས་གནས་ཆུང་བོད་མིའི་སྒྲིག་འཛུགས་ཀྱི་གཞུང་བསྟེན་དགྲ་ལྷ་ཇི་ལྟར་ཆགས་པ་རེད། ང་ཚོ་ཆོས་ལུགས་རིས་མེད་ཡིན་ཟེར་བཞིན་དུ་གཞུང་བསྟེན་དགྲ་ལྷ་ཞིག་ཇི་ལྟར་ཡོང་ཆོག་གི་རེད་དམ།

སྲིད་སྐྱོང་མཆོག་དང་བཀའ་ཤག བོད་མིའི་ཆབ་སྲིད་ཀྱི་དབུ་ཁྲིད་རྣམ་པས་ལས་དོན་གང་བྱེད་པར་སྔ་འདང་ཕྱི་འདང་ཡག་པོ་རེ་གནང་རོགས། དེ་མིན་བོད་མི་རིགས་ཀྱི་རྩ་དོན་ལ་དགེ་སྐྱོན་གང་གི་ཕྱོགས་སུ་འགྲོ་གི་ཡོད་མེད་དང་། ལོ་རྒྱུས་ཀྱི་གཟི་བརྗིད་ཅིག་གམ་ནག་ཉེ་གང་ཞིག་ཏུ་འགྱུར་གྱི་ཡོད་མེད་ལ་དགོངས་པ་ཡག་པོ་བཞེད་དགོས་ཀྱི་འདུག

སྲུང་མ་དམ་ཚིག་ཅན་ལ་མཚན་སྨོད་ཞུ་བཞིན་པའི་ཉེས་པ་འདི་ཡོངས་རྫོགས་བཀའ་ཤག་གི་སྟེང་དུ་འབབ་པ་ཡིན། བཀའ་ཤག་གིས་འགན་འཁུར་དགོས་པ་ཡིན། བཀའ་ཤག་གསར་པ་༧རྒྱལ་བ་རིན་པོ་ཆེའི་མཛད་རྗེས་ནག་བསུབ་གཏོང་གི་ཡོང་པ་མ་རེད་གདའ།།

ང་ཚོས་ད་ལྟའི་བར་གཞན་ལ་ཆེ་ཆེ་རྫིག་རྫིག་གི་ཐོག་གཞན་ལ་ངོམ་སོ་ཞེས་པའི་མཁས་དབང་བློ་བཟང་སེང་གེ་ཡང་མདོར་བསྡུས་ན་ཆབ་སྲིད་ཀྱི་གོ་རྟོགས་ཀྱང་གནས་ཆུང་ལས་སྐྱོ་བ་ཡིན་པ་འདྲ།རྗེས་ཕྱོགས་ནས་སྲིད་སྐྱོང་འོས་བསྡུའི་ཚབ་ལ་མང་མོས་ཐོག་གནས་ཆུང་ཆོས་རྒྱལ་གྱི་མཚན་བསྒྱུར་(གནས་ཆུང་སྲིད་སྐྱོང་)ཏེ་བསྐོས་ན་ཡག་པོ་འདུག ཨ་རི་ཨ་ཝར་ཊི(Havard university)གཙུག་ལག་སློབ་གྲྭའི་འབུམ་རིམ་གྱི་གནས་རིམ་ཡོད་པའི་སྲིད་སྐྱོང་གིས་ཆབ་སྲིད་ཀྱི་ཐོག་ནས་ཀྱང་གནས་ཆུང་ལ་མགོ་བོ་སྒུར་ཡོད་ཚེ་དེ་ལས་གཞན་པ་བཤད་མ་དགོས་པ་རེད། ཧ་ཅང་འུ་ཐུག་ཡོད་པ་འདྲ། རྗེས་ལ་དོན་དག་མ་བྱུང་ཚེ་མི་མངོན་པའི་དབྱིངས་ན་བཞུགས་པའི་གནས་ལ་ལག་པ་ཕྱིས་ན་སྲིད་སྐྱོང་ཁོ་གཙང་མ་གཙང་རྐྱང་ཆགས་ངེས་ཡིན། གོ་ཐོས་ལ་སྲིད་སྐྱོང་ཁོང་ལས་ཁུངས་ནས་བསྡོད་པའི་དུས་ཚོད་ལས་ཕྱི་རྒྱལ་འགྲོ་དུས་ཚོད་མང་པོ་མེད་འགྲོ་བསམ་གྱི་འདུག དེའི་འགྲོ་སོང་ལའང་དང་ཐུགས་སེམས་བཞེས་དགོས་པར་སེམས། ཕྱིའི་རྒྱལ་ཁབ་ཀྱི་སྤྱི་འཐུས་ཞིག་ལ་ཐུག་པ་ཙམ་གྱི་བོད་དོན་ལ་འགྱུར་བ་ཐེབས་མི་ཟད་མ་ཟད་དེ་བོད་དོན་ཆེད་རེད་ཅེས་ཀྱང་བརྗོད་དཀའ་བ་ཡིན། གང་ལྟར་ཡག་པོ་གནང་པའི་རེ་བ་བྱེད་ཀྱི་ཡོད།

བཀའ་ཤག་ནས་དེ་སྔོན་འབོད་སྐུལ་འདི་རབ་དང་རིམ་པར་གནང་ཡོད། ད་ལན་ཐོག་མ་མ་རེད། ཧ་ལས་མདོག་མི་དགོས། ད་ལམ་གནས་ཆུང་ཆོས་སྐྱོང་ལ་ལུང་བསྟན་ཞུས་པ་དེ་ང་ཚོའི་གོམས་གཤིས་ལ་བདག་པོ་བརྒྱབ་པ་ཞིག་རེད། མི་འདོད་པའི་རྣམ་འགྱུར་སྟན་ནས་གང་ཡོང་། དེ་ལས་འཇོན་པོ་ཡིན་ན་རྒྱ་མིའི་བརྗོད་བབ་ལ་ལན་རྒྱོབ།

གཞིས་ལུས་བརྒྱ་ཕྲག་ལྷག་བོད་མི་རིགས་ཀྱི་བདེ་དོན་དུ་རང་སྲོག་ལུས་ལོངས་སྤྱོད་དང་བཅས་ཕུལ་དང་ཕུལ་བཞིན་པ་དེ་ལྟར་ཡང་། བཙན་བྱོལ་གཞུང་ད་དུང་ལྷ་བླའི་ལུང་བསྟན་ལ་གཞི་བཅོལ་གཞིས་ལུས་པ་རྣམས་ལ་འབོད་བསྐུལ་བྱེད་པ་ནི་སེམས་ཕམ་དགོས་པ་ཞིག་རེད། ལྷ་མིན་འདྲེ་མིན་གནས་དོལ་སུ་ཞིག་ལ་ཡིད་ཆེས་འོས་སམ། འདས་པའི་ཆ་ལ་གཟིགས་དང་ད་དུང་རྨོངས་གཉིད་ལས་མ་གྲོལ་བ་རེད་དམ། སྔར་ཡིན་ན་མི་མང་ནས་སྲིད་སྐྱོང་མཆོག་ལ་ཡིད་ཆེས་ག་ཚོད་བྱས་ཡོད། ད་ཆོས་གོས་གྱོན་དང་མ་གྱོན་ཁྱད་པར་ལས་ཆོས་བྱེད་དགེ་འདུན་པ་ཞིག་དང་ཅིས་མ་མཚུངས། ད་དུང་་་་ད་དུང་་་་

བོད་ལ་གཏམ་དཔེ་ཞིག་ཡོད་རེད། མི་འུ་ཐུག་ནས་ལྷ་ལ་ཞུས།། ལྷ་འུ་ཐུག་ནས་སྐྱག་རྫུན་བཤད། །

་་་་་ ཟླ་འདིའི་ཚེས་ ༡༨ ཉིན་བཅས་སུ་གནས་ཆུང་ཆོས་རྒྱལ་ཆེན་པོས་བོད་མིའི་རང་ལུས་མེར་བསྲེགས་མཚམས་འཇོག་དགོས་པའི་བཀའ་ལུང་བསྩལ་བ་ལྟར། གཞིས་བྱེས་བོད་མི་ཡོངས་ཀྱིས་རང་ལུས་མེར་བསྲེགས་སོགས་ཚབས་ཆེའི་ལས་འགུལ་རིགས་མི་སྤེལ་རྒྱུའི་སྐུལ་ཞུས་འདུག ་་་་་ཟེར།