བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༩༢ སྟེང་གི་རྩོམ་སྒྲིག་པའི་གཏམ།
རྔོན་པས་རི་དྭགས་རྨས་མ་བདས། །ལ་ལ་བདའ་དུས་ཟིན་པར་རེ། །ཐུར་ལ་བདའ་དུས་འཆོར་བར་དོགས། །རེ་དོགས་ངང་ནས་ལ་ལུང་བརྒལ།།
བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས་རྒྱ་ནག་གི་གསང་མྱུལ་བ་སྤེན་པ་ཚེ་རིང་ཟེར་བ་ཞིག་འཇུས་པའི་གནས་ཚུལ་ཁྱབ་བསྒྲགས་བྱས་མ་ཐག ནམ་རྒྱུན་བོད་མི་ཚོ་ཉུལ་སའི་བརྒྱུད་ལམ་ཁག་ཏུ་གནས་ཚུལ་དེའི་སྐོར་ལ་གླེང་སློང་ཤུགས་ཆེན་བྱས། གླེང་གིན་གླེང་གིན་གནས་ཚུལ་གསར་པ་མང་པོ་ཐོན། གསང་མྱུལ་བ་སྤེན་པའི་ངོ་ཤེས་འགས་སྤེན་པ་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ལས་བྱེད་ཡིན་རབས་དང། བདེ་སྲུང་གིས་ཁོ་པར་གསོལ་ཕོགས་སྤྲོད་ཀྱི་ཡོད་ཚུལ་བཤད། སྐད་ཆ་དེ་དག་དང་མཉམ་དུ་གསང་མྱུལ་བ་སྤེན་པ་དང་༸གོང་ས་མཆོག་ལྷན་དུ་བསྒྲོན་པའི་པར་ཞིག་ཀྱང་བརྒྱུད་ལམ་ཁག་ཏུ་ཐོན། གནས་ཚུལ་འདི་དག་གིས་མང་ཚོགས་ལ་དྲི་བ་དང་དོགས་པ་མང་པོ་བསླངས་ཤིང་འཇིགས་པ་དང་ཡིད་ཆད་སྣ་ཚོགས་བསྐྲུན།
བདེ་སྲུང་གི་གསལ་བསྒྲགས་ནང་ཉེས་ཅན་སྤེན་པའི་གནས་ཚུལ་དང་མཉམ་དུ་ཁོ་རང་འཛིན་བཟུང་བྱེད་མཁན་གཉིས་ཀྱི་པར་དང་གནས་ཚུལ་ཁྱབ་བསྒྲགས་བྱས་ཏེ་ཨ་ཆད་ཨུ་ཐུག་གི་རང་མདོག་བསྟན། བདེ་སྲུང་གིས་ཁྲིམས་ལུགས་ལག་བསྟར་གྱི་ཞོར་དུ་གྱོད་དོན་གང་དེའི་འབྲེལ་ཡོད་མི་སྣའི་བདེ་འཇགས་ཀྱི་འགན་འཁྲི་ཡང་ལྷན་གཅིག་འཁྱེར་དགོས། གསལ་བསྒྲགས་ནང་སྤེན་པས་བཙན་བྱོལ་ནང་དམར་གསོད་དྲག་སྤྱོད་ཀྱི་ལས་འགུལ་སྤེལ་བར་ཆེད་དུ་ཡོང་སྐོར་གཅིག་དང་། གསར་འགོད་པ་ཚོར་མི་གཞན་གཉིས་ཀྱིས་དྲག་སྤྱོད་གཏོར་རྒོལ་གྱི་ལས་འགུལ་སྤེལ་འཆར་ཡོད་པ་ལྐོག་གསོད་བྱེད་དུ་ཡོང་ཚུལ་གཉིས་བཤད།
རྒྱ་ནག་གི་ཉེན་རྟོག་པ་ངྷ་རམ་ས་ལར་འབྱོར། བདེ་སྲུང་ལས་ཁུངས་ཀྱིས་ཁོའི་ནུས་རྩལ་ལ་ཧམ་པ་སྐྱེས་ཏེ་འགུག་ཐབས་བྱས། རེ་དོགས་བར་ནས་༧གོང་ས་མཆོག་ལ་མཇལ་མཁར་བཏང་། གསོལ་ཕོགས་སྤྲད། འོན་ཀྱང་རཱའུ་བྷེ་སི་ཡིས་སྤེན་པའི་མགུ་མ་ཁེངས་པར་ལྐོག་ནས་རྒྱ་ནག་ལ་ལག་པ་བསྲིངས་ཏེ་ལིའི་གཡུས་ཆོན་གྱི་བཀོད་བྱུས་འོག་རྒྱུག མདའ་གཅིག་གིས་ཤ་གཉིས་གསོད་པའི་དཔེ་ལྟར། བདེ་སྲུང་ལས་ཁུངས་དང་ལིའི་གཡུས་ཆོན་གཉིས་ཀའི་རྔན་པ་ཟོས། ད་དུང་ངྷ་ས་དང་གངས་སྐྱིད། ལྡི་ལི་དང་བལ་ཡུལ་སོགས་ནས་ཀྱང་ལས་ཀ་སྣ་ཚོགས་བྱས་ཏེ་སྐྱིད་པོ་བཏང་། མཐར་གསར་འབྱོར་བ་ཕོ་གསར་གཉིས་ཀྱིས་སྤེན་པ་འཇུས་ཏེ་བདེན་དཔང་དང་མཉམ་དུ་བདེ་སྲུང་ལ་ཕུལ། བདེ་སྲུང་གིས་ད་དུང་རེ་དོགས་ཁྲོད་ནས་ཟླ་བཞིར་བསྒུག་རྗེས་རྒྱ་གར་ཉེན་རྟོག་པར་སྤྲད།
འདས་པའི་མི་ལོ་ལྔ་བཅུའི་རིང་བཀའ་ཤག་དང་བདེ་སྲུང་གིས་རྒྱ་ནག་གི་གསང་མྱུལ་བར་གཟབ་དགོས་རབས་བཤད་ཡོད་ལ། མང་ཚོགས་ནང་དུ་ཡང་རྒྱ་ནག་གི་མྱུལ་མ་དང་སོ་པ་ཞེས་ཉེས་མེད་ལ་ཉེས་འཛུགས་དང་། མི་དཀར་པོར་ཞ་ནག་པོ་གཡོག་པའི་སྲོལ་ཞིག་དར་ཡོད། “རྐུ་མ་ཁྱིམ་རྭ་ནང་མར་འཛུལ། བདག་པོས་སྒོ་རྭ་ཕྱི་མར་སྒུག” ཅེས་པའི་དཔེ་ལྟར། གསང་མྱུལ་བ་དགའ་ལྡན་ཕོ་བྲང་གཟིམ་ཆུང་དང་གངས་ཅན་སྐྱིད་གཤོང་བདེ་སྲུང་ནང་འཛུལ་བའི་མི་ཚད་འབྲོ་གྲབས་བར་ཅི་ཞིག་ལ་སྒུག་པ་ཡིན་ནམ། མི་འདི་གསང་མྱུལ་བ་དངོས་གནས་ཡིན་མིན་ད་དུང་ཁ་ཚོན་གཅོད་དཀའ་ཡང་། གད་སྲིད་ཡིན་པའི་དབང་དུ་བཏང་ན་ལོ་བཞི་དང་ཟླ་བཞིའི་རིང་ཅི་ཞིག་རྐུ་འཕྲོག་ཨེ་བྱེད་དང་གང་དུ་གཏོར་རྒོལ་ཨེ་གཏོང་ལ་རེ་སྒུག་བྱས་པ་རེད་དམ།
