ཟླ་འདིའི་ཕྱི་ཚེས་ ༩ ནས་ ༢༣ བར་༸གོང་ས་མཆོག་གིས་ནེའུ་ཛི་ལན་ཌི་དང་ཨོ་སི་ཊི་ལི་ཡ་བཅས་རྒྱལ་ཁག་གཉིས་ནང་ཆོས་ཕྱོགས་ཀྱི་མཛད་འཕྲིན་བསྐྱང་རྒྱུ་ཡིན་འདུག
ཟླ་འདིའི་ཕྱི་ཚེས་ ༡ ནས་ ༤ བར་༸གོང་ས་མཆོག་གིས་བཞུགས་སྒར་དུ་རྒྱ་གར་གྱི་དད་ལྡན་པ་ ༡༢༠༠ ལྷག་དང་། ཧི་མ་ལ་ཡའི་རི་རྒྱུད་དང་རྒྱ་རིགས། ཉི་ཧོང་། ཨི་ཊ་ལི། དབྱིན་ཇི། དེ་བཞིན་ངྷ་ས་ཁུལ་གྱི་བོད་རིཊ་སེར་སྐྱ་མི་མང་བཅས་མི་ ༧༠༠༠ ལྷག་ལ་རྒྱལ་སྲས་ཞི་བ་ལྷས་མཛད་པའི་༼སྤྱོད་འཇུག༽བཀའ་ཆོས་གནང་གྲུབ་ཏེ། དེ་རིང་ཕྱི་ཚེས་ ༦ ཉིན་གྱི་སྔ་དྲོ་དགའ་ལྡན་ཕོ་བྲང་ཡིག་ཚང་དང་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་མགོ་ཁྲིད། བཞུགས་སྒར་སེར་སྐྱ་མང་མང་བཅས་ཀྱིས་ཕེབས་སྐྱེལ་ཁྲོད་ལྡི་ལིར་ཆིབས་བསྒྱུར་གནང་སོང་། ཕྱི་ཚེས་ ༩ ཉིན་༸གོང་ས་མཆོག་ནེའུ་ཛི་ལན་ཌིའི་ནང་ཆིས་བསྒྱུར་གྱིས་ས་གནས་ཀྱི་ཡེ་ཤུའི་ལྷ་ཁང་ (Christchurch) ཞེས་པའི་ནང་དད་ལྡན་པ་རྣམས་ལ་༼བདེན་པ་བཞི༽ ཆོས་འབྲེལ་དང་། ས་གནས་མི་མང་ལ་༼བྱམས་སྙིང་རྗེ་དང་ཞི་བདེའི་ཀ་བ༽ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་དང་། ཕྱི་ཚེས་ ༡༡ ཉིན་གྲོང་ཁྱེར་ཊོ་ནེ་ཌེན་ས་ (Dunedin) ས་གནས་སུ་༼ཆོས་ལུགས་ལས་བརྒལ་བའི་འཛམ་གླིང་སྤྱིའི་ཀུན་སྤྱོད༽ ཅེས་པའི་བརྗོད་གཞིའི་ཐོག་བཀའ་སློབ། ཕྱི་ཚེས་ ༡༢ ཉིན་རྒྱལ་ས་ཨོ་ཁི་ལན་ཌིར་ (Auckland) མི་མང་ལ་༼བདེ་སྐྱིད་ཀྱི་ལམ་བུ༽ ཞེས་པའི་བརྗོད་གཞིའི་ཐོག་བཀའ་སློབ་བཅས་གནང་རྒྱུ་ཡིན་འདུག
ཕྱི་ཚེས་ ༡༤ ཉིན་༸གོང་ས་མཆོག་ཨོ་སི་ཊི་ལི་ཡའི་གྲོང་ཁྱེར་སེ་ཌེ་ནེ་ (Sydney) ནང་ཆིབས་བསྒྱུར་གྱིས། ཉིན་གཉིས་རིང་གྲོང་ཁྱེར་དེའི་ལྟེ་གནས་ཁང་ (Sydney Entertainment Center) དུ་དད་ལྡན་ཆོས་ཞུ་བ་རྣམས་ལ་ཁུ་ནུ་བླ་མ་བསྟན་འཛིན་རྒྱལ་མཚན་གྱིས་མཛད་པའི་༼བྱང་ཆུབ་སེམས་ཀྱི་བསྟོད་པ་རིན་ཆེན་སྒྲོན་མེ༽ ཆོས་འབྲེལ་དང་། ཚེས་ ༡༦ ཉིན་དེར་ཡོད་མི་མང་ལ་༼རྒྱུན་ལྡན་གྱི་མི་ཚེའི་ནང་ཚུལ་ཁྲིམས་ཐོག་དྲན་ཤེས་ཇི་ལྟར་བསྟེན་དགོས༽ ཞེས་པའི་བརྗོད་གཞིའི་ཐོག་བཀའ་སློབ། ཚེས་ ༡༨ ཉིན་གྲོང་ཁྱེར་མེལ་བྷོ་རོན་དུ་དད་ལྡན་པ་རྣམས་ལ་༼སྙིང་རྗེ་དང་གཞི་རྩའི་བདེ་ཐབས༽ ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག ཚེས་ ༢༡ ནས་ ༢༣ བར་གྲོང་ཁྱེར་ཨ་དྷི་ལ་དྷི་ལྟེ་གནས་ཁང་དུ་མི་མང་ལ་༼ བདེ་སྐྱིད་འཚོལ་བ༽ ཞེས་པའི་བརྗོད་གཞིའི་ཐོག་བཀའ་སློབ་དང་བདེན་བཞིའི་ཆོས་འབྲེལ་བཅས་གནང་རྒྱུ་ཡིན་པ་མ་ཟད། དེར་ཡོད་མི་མང་ལ་༼ཐུན་མོང་ལ་དབང་བའི་འཛམ་གླིང་སྤྱིའི་ཀུན་སྤྱོད༽ཞེས་པའི་བརྗོད་གཞིའི་ཐོག་བཀའ་སློབ་བཅས་གནང་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༧ དང་ ༢༨ བཅས་ཉིན་གཉིས་རིང་༸གོང་ས་མཆོག་གིས་ངྷ་སྟེང་བོད་ཁྱིམ་དུ་བོད་པའི་གཞོན་སྐྱེས་ཚོར་༼ལེགས་བཤད་བློ་གསལ་མིག་འབྱེད༽བཀའ་ཆོས་གནང་རྒྱུ་ཡིན་འདུག
གསར་འགོད་པ། དོན་གོ
ཇི་སྐད་དུ་བཀའ་ཟུར་ཐུབ་བསྟན་ལུང་རིགས་ཞལ་ལས།
རྩ་བ་རུལ་པའི་སྡོང་པོ་ལ། །རྟེན་པར་བྱེད་པ་བླུན་པོའི་རྟགས། །རང་ཡང་འཁོར་བར་བྱིང་བ་ལ། །སྐྱབས་སུ་འཛིན་རྣམས་བླུན་པོའི་རྟགས། །