ཟླ་འདིའི་ཕྱི་ཚེས ༥ ཉིན་བྲག་མགོ་རྫོང་གི་དགེ་འདུན་པ་ཚེ་དབང་གྲགས་པ་ལགས་རྒྱ་གཞུང་གིས་ཀློད་གྲོལ་བཏང་ཏེ་རང་ཁྱིམ་དུ་འབྱོར་ཡོད་ཀྱང་། བཙོན་ཁང་དུ་ཁོང་ལ་མནར་གཅོད་གང་མང་བཏང་ཡོད་སྟབས་སྐུ་གཟུགས་གནས་སྟངས་ཧ་ཅང་སྐྱོ་བོ་ཡིན་པ་མ་ཟད། ཁོང་གི་ལག་པ་ཡ་གཅིག་ལ་གནོད་སྐྱོན་ཆེན་པོ་བཟོས་ཡོད་འདུག
གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༠༨ ཟླ་ ༦ ཚེས་ ༦ ཉིན་བྲག་མགོ་རྫོང་གི་དགེ་འདུན་པ་ཚེ་དབང་གྲགས་པ་ལགས་དང་ཁམས་རྟའུ་རྫོང་གི་དགེ་འདུན་པ་ཐུབ་བསྟན་རྒྱ་མཚོ་ལགས། ཡུལ་ཤུལ་ཁུལ་རྫ་སྟོད་རྫོང་གི་དགེ་འདུན་པ་བྱང་ཆུབ་ཉི་མ་བཅས་ཀྱིས། ཁམས་བྲག་མགོ་རྫོང་ཐོག་ཏུ་བོད་ལ་རང་དབང་དགོས། བོད་མིར་འགྲོ་བ་མིའི་ཐོབ་ཐང་དགོས། ཆོས་དད་རང་དབང་གི་ཐོབ་ཐང་དགོས་སོགས་ཀྱི་ཞི་རྒོལ་སྐད་འབོད་གནང་བ་མ་ཟད། བསྐྱར་དཔར་བྱས་པའི་བོད་ཀྱི་རྒྱལ་དར་མང་པོ་གཏོར་འགྲེམས་བྱས་སྐབས། རྒྱ་གཞུང་ཉེན་རྟོག་པས་ཁོང་ཚོར་གཅར་རྡུང་དྲག་པོ་བཏང་ཏེ་ཟླ་ ༡ ཙམ་གྱི་རིང་བྲག་མགོ་རྫོང་ཐོག་ནས་བཀག་ཉར་བྱས་རྗེས། དར་མདོ་རྫོང་དུ་མུ་མཐུད་བཀག་ཉར་བྱས་ཡོད་འདུག
ཕྱིས་སུ་དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་གིས། གྲྭ་བྱང་ཆུབ་ཉི་མ་ལགས་ལ་བཙོན་འཇུག་ཁྲིམས་ཐག་ལོ་ ༣ དང་། ཐུབ་བསྟན་རྒྱ་མཚོ་ལགས་ལ་ལོ་ ༤ ། ཚེ་དབང་གྲགས་པ་ལགས་ལ་ལོ་ ༥ བཅས་ཀྱི་བཙོན་འཇུག་ཁྲིམས་ཐག་བཅད་དེ་སི་ཁྲོན་མེན་ཡཱང་བཙོན་ཁང་དུ་བཙོན་འཇུག་བྱས་ཡོད་པ་དང་། ༢༠༡༡ ལོ་དང་ ༢༠༡༢ ལོ་བཅས་ལ་བྱང་ཆུབ་ཉི་མ་ལགས་དང་ཐུབ་བསྟན་ཉི་མ་ལགས་གཉིས་སྔ་རྗེས་སུ་ཀློད་གྲོལ་བཏང་ཡོད་འདུག
