ཁ་སང་ཕྱི་ཚེས་ ༡༡ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥།༢༠ ཙམ་ལ་བོད་མདོ་ཁམས་དཀར་མཛེས་རྟའུ་རྫོང་ཐོག་ཏུ། བཙུན་མ་ཞིག་གིས་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་ཡོད་པ་དང་། གནས་ཚུལ་བྱུང་སྟེ་ཅང་མ་འགོར་བར་ས་གནས་ཉེན་རྟོག་ཡོང་སྟེ་བཙན་འཁྱེར་བྱས་པ་ཙམ་ལས། ཞིབ་ཕྲའི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
དེ་རིང་གསར་འགོད་པས་ཁ་པར་བརྒྱུད་རྒྱ་གར་ལྷོ་ཕྱོགས་དགའ་ལྡན་དགོན་པའི་ཕ་ཡུལ་རྟའུ་ཉི་མཚོ་ནས་ཡིན་པའི་གྲྭ་ཡ་མ་ཚེ་རིང་ལགས་སུ་བཅར་འདྲི་བྱས་པར་ཁོང་གིས། “ གནས་ཚུལ་དེ་བོད་ནས་འབྲེལ་ཡོད་མི་སྣ་ཞིག་གིས་ཁ་པར་བརྒྱུད་དེ། ཁ་སང་ཕྱི་དྲོའི་ཆུ་ཚོད་ ༥ ཡས་མས་སུ་རྟའུ་རྫོང་ཉི་མཚོ་དགོན་པའི་འདབས་རོལ་དུ་ཡོད་པའི་རྒྱ་མིའི་ལས་ཁུངས་ཉེ་འཁྲིས་སུ་བཙུན་མ་ཞིག་གིས་རང་ལུས་མེར་བསྲེཊ་གནང་སོང་བ་དང་། རང་ལུས་མེར་བསྲེཊ་གནང་སྟེ་ཅང་མ་འགོར་བར་ས་གནས་ཉེན་རྟོག་པ་ཡོང་སྟེ་དར་རྩེ་མདོའི་སྨན་ཁང་ཞིག་ཏུ་འཁྲིད་སོང་ཅེས་བརྗོད་བྱུང་། ཁ་སང་རང་ལུས་མེར་བསྲེཊ་གནང་མཁན་བཙུན་མ་ཁོང་གྲོང་སྡེ་གང་ནས་ཡིན་མིན་དང་། མིང་དང་ལོ་ག་ཚོད་ཡིན་མིན་སོགས་ཤེས་ཐུབ་ཀྱི་མི་འདུག དེའི་རྗེས་ནས་ང་ལ་འབྲེལ་བ་བྱེད་པའི་གོ་སྐབས་བྱུང་མ་སོང་། ”ཞེས་བརྗོད་བྱུང་།
ཡང་ཁོང་ལ་ཉིན་འདི་འགར་ཉ་མཚོ་དགོན་དུ་མདོ་ཁམས་རིས་མེད་འཇང་དགུན་ཆོས་ཆེན་མོ་འཚོགས་བཞིན་ཡོད་པའི་སྐབས་དང་ཁེལ་ཡོད་སྟབས། རྒྱ་གཞུང་གིས་ཉ་མཚོ་དགོན་པར་དམ་དྲག་བྱེད་ཀྱི་ཡོད་མེད་དྲིས་པར། ཁོང་གིས། “ ཟླ་འདིའི་ཕྱི་ཚེས་ ༡༠ ཉིན་ནས་བཟུང་རྟའུ་ཉི་མཚོ་དགོན་ཐོས་བསམ་དར་རྒྱས་གླིང་ནང་མདོ་ཁམས་རིས་མེད་འཇང་དགུན་ཆོས་སྐབས་ལྔ་པ་མགོ་འཛུགས་གནང་སྟེ། དེ་རིང་ཉིན་གསུམ་པ་ཆགས་འདུག ཉིན་བཅུའི་རིང་ཚོགས་འཆར་ཡོད་པའི་འཇང་དགུན་ཆོས་ཐོག་མདོ་ཁམས་གཉིས་ཀྱི་རིས་མེད་ཆོས་རྒྱུད་ཁག་གི་དགོན་སྡེ་ཁག་ ༦༠ ལྷག་གི་གྲྭ་བཙུན་ ༣༠༠༠ ལྷག་མཉམ་ཞུགས་བྱས་འདུག ཉིན་གཉིས་པའི་ཐོག་གསེར་རྟ་བླ་རུང་ལྔ་རིག་ནང་བསྟན་སློབ་གླིང་གི་མཁན་པོ་ཚུལ་ཁྲིམས་བློ་གྲོས་མཆོག་དང་། ཁང་གསར་སྐྱབས་མགོན་ཐུབ་བསྟན་དགེ་ལེགས་རྣམ་རྒྱལ་མཆོག ཉི་མཚོ་དགོན་པའི་ཁྲི་བ་རྒན་བློ་བཟང་རྒྱ་མཚོ་བཅས་གདན་ཞུ་གནང་སྟེ་མང་ཚོགས་ལ་བཀའ་སློབ་གནང་འདུག ཐེངས་འདིའི་འཇང་དགུན་ཆོས་ཐོག་ཡོང་མཁན་གྱི་དགོན་པ་མང་ཆེ་བ་ཁམས་ཕྱོགས་ནས་རེད། མདོ་སྨད་ཕྱོགས་ནས་རྔ་པ་ཀིརྟི་དགོན་པ་དང་དགོན་སྡེ་ཁག་ཅིག་མཉམ་ཞུགས་གནང་ཡོད་འདུག ཁ་སང་གི་གནས་ཚུལ་དེ་ས་གནས་སུ་འཇང་དགུན་ཆོས་ཚོགས་བཞིན་པའི་སྐབས་སུ་བྱུང་ཡོད་སྟབས། ད་ལྟའི་ཆར་དགོན་པའི་ངོས་ནས་མི་སྣ་བསྐོ་འཇོག་གིས་ཕྱི་ཡོང་གྲྭ་བཙུན་གཙོས་པའི་གྲྭ་མང་དགོན་ནས་ཕྱིར་འགྲོ་བ་དང་། གྲྭ་བ་ཚོས་འགྲོ་འོང་ཐད་དོ་དམ་ནན་མོ་བྱེད་ཀྱི་འདུག དེ་མིན་རྒྱ་ནག་གཞུང་གིས་ས་གནས་སུ་དམག་མི་འགྲེམས་འཇོག་གིས་དམ་དྲག་བྱེད་ཀྱིན་པའི་གནས་ཚུལ་བྱུང་མི་འདུག ” ཅེས་བརྗོད་བྱུང་།
ཡ །འདྲ་པར་དང་པོའི་གོང་གི་ཡི་གེ་ནོར་འདུག་གོ།