གླུ་བ་གཉིས་ལ་ཁྲིམས་ཆད།

བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་གིས་ ༢༠༡༢ ལོའི་ཟླ་ ༧ པ་ཡས་མས་སུ་བོད་མདོ་སྨད་རྔ་པ་ཁུལ་རྔ་པ་རྫོང་རྨེའུ་རུ་མའི་རུ་ཆེན་དང་པོའི་གླུ་བ་པདྨ་འཕྲིན་ལས་དང་། གླུ་བ་ཕྱག་རྡོར་གཉིས་ཀྱིས་རང་ལུས་མེར་བསྲེཊ་སོགས་བོད་ནང་གི་གནས་སྟངས་དང་།  ༸གོང་ས་མཆོག་དང་པཎ་ཆེན་རིན་པོ་ཆེ། ཀིརྟི་རིན་པོ་ཆེ་བཅས་ལ་བསྟོད་གླུ་དང་དྲན་གླུ་བླངས་བ། སྲིད་སྐྱོང་བློ་བཟང་སེང་གེར་བསྟོད་གླུ་བཅས་བླངས་ཡོད་པའི་ཆེད་སྒྲིག་འོད་སྡེར་༼སོས་མེད་རྨ་ཁའི་ཟུག་གཟེར༽ ཞེས་པ་འགྲེམས་སྤེལ་བྱས་པའི་ཉིན་ཤས་རྗེས་སུ་རྨ་ཆུ་རྫོང་ཐོག་ཏུ་འཛིན་བཟུང་བྱས་ཏེ། ཟླ་ ༦ ལྷག་གི་རིང་རྔ་པ་རྫོང་དུ་བཀག་ཉར་བྱས་ཡོད་པ་མ་ཟད། འདི་ལོའི་ཕྱི་ཟླ་ ༢ ནང་ཁོང་གཉིས་ལ་ལོ་གཉིས་རེའི་བཙོན་འཇུག་ཁྲིམས་ཐག་བཅད་དེ་སི་ཁྲོན་གྱི་མེན་ཡཱང་བཙོན་ཁང་དུ་བསྐྱལ་ཡོད་ཚུལ་གྱི་ཡི་གེ་ཞིག་འབྲེལ་ཡོད་ནང་མིར་སྤྲད་ཡོད་ཀྱང་། ཁོང་གཉིས་ཀྱི་ནང་མི་སྔ་ཕྱི་ཐེངས་གཉིས་ཐུག་འཕྲད་དུ་བསྐྱོད་སྐབས།  འབྲེལ་ཡོད་ཚོས་ཁོང་གཉིས་མེན་ཡཱང་བཙོན་ཁང་དུ་མེད་ཚུལ་བརྗོད་ཡོད་སྟབས། ད་ཆར་ནང་མི་ཉེ་འབྲེལ་ཚོས་ཁོང་གཉིས་གར་ཡོད་ཀྱི་གནས་ཚུལ་ཅི་ཡང་མ་ཤེས་པར་ལྷག་འདུག

རང་ལོ་ ༢༢ ཡིན་པའི་གླུ་བ་པདྨ་འཕྲིན་ལས་ལགས་ཀྱི་ཕ་མིང་ལ་འཛམ་ལྷ་ (ཚེས་འདས) དང་མ་མིང་ལ་ཚེ་རིས་མ་འབོད་ཀྱི་ཡོད་པ་དང་། རང་ལོ་ ༣༢ ཙམ་ཡིན་པའི་གླུ་བ་ཕྱག་རྡོར་ལགས་ཀྱི་ཕ་མིང་ལ་མཆོག་ལྡན་མདོ་བ་འབོད་ཀྱི་ཡོད་འདུག གླུ་བ་ཕྱག་རྡོར་ལགས་ནི།  ༢༠༡༢ ཟླ་ ༨  ཚེས་ ༡༠ ཉིན་རང་ལུས་མེར་བསྲེཊ་གནང་སྟེ་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་གཅོད་པ་ལགས་ཀྱི་ཕ་སྤུན་གྱི་སྤུན་ཡིན་པ་དང་། གླུ་བ་ཁོང་གཉིས་ཀྱང་ཉེ་འབྲེལ་ཡིན་འདུག

ཁོང་གཉིས་ཀྱི་ཆེད་སྒྲིག་འོད་སྡེར་ ༼སོས་མེད་རྨ་ཁའི་ཟུག་གཟེར༽ ནང་།  ༼གངས་རིའི་མགོན༽དང་༼སྐྱོ་འབོད༽ ། ༼ ང་ཡི་རྩ་བའི་བླ་མ༽། ༼ ངོ་ཚ༽།   ༼བཟོད་མེད་ཀྱི་སྡུག་བསྔལ༽ ། ༼བདེན་དོན་ཁྲག་གི་དར་ཆ༽ ། ༼འཐད་པ་ཡིན༽། ༼ སྲིན་པོ༽། ༼མག་མོག༽ ། ༼བྱང་ཐང་གི་ན་བུན༽། ༼ཡིད་ཐང་ཆད་འགྲོ༽ བཅས་ཁྱོན་གླུ་ ༡༢ ཡོད་འདུག་ལ། དེ་དག་ལས་གླུ་བ་ཕྱག་རྡོར་གྱི་བླངས་བའི་ ༼འེ་རེད༽ ཅེས་པའི་གཞས་ཚིག་ནང་། ང་ཚོའི་རིན་ཆེན་གཏེར་ཁ།། བཙན་པོའི་འཕྲུལ་གྱིས་གཏོར་ནས།། གནས་འདི་སྟོངས་པར་བཟོས་པ།། དབང་མེད་བཙན་ཤེད་འེ་རེད།། སྔོན་བྱོན་མཁས་པའི་མཛད་རྗེས།། ལྔ་ཟུང་རིག་པའི་གནས་མཆོག། ཐབས་ཀྱིས་བརླགས་བརྩིས་བྱེད་པ།། དབང་མེད་བཙན་ཤེད་འེ་རེད།། ཁ་བ་གངས་རིའི་རྒྱུད་འཛིན།། ན་གཞོིན་དཔའ་བོ་དཔའ་མོ།། བཙན་གྱིས་དམར་གསོད་བྱས་པ།། དབང་མེད་བཙན་ཤེད་འེ་རེད།། གངས་ཅན་འགྲོ་བའི་མགོན་པོ།།རྒྱལ་དབང་བསྟན་འཛིན་རྒྱ་མཚོ།།བཙན་གྱིས་གཏན་བྲལ་བྱས་པ།།ང་ཚོའི་ལས་དབང་འེ་རེད།། ཅེས་དང་། གླུ་བ་པདྨ་འཕྲིན་ལས་ཀྱི་༼སྨྲེ་ངག༽ གཞས་ཚིག་ནང་། རྗེ་བླ་མ་ས་ཕྱོགས་གཞན་ལ་ཕེབས།། བོད་སློབ་འབངས་མ་མེད་ད་ཕྲུག་བཞིན།། རྒྱ་ནག་པོའི་འོག་ན་སྡུག་བསྔལ་ལྕི།། སྡུག་ལྕི་རུང་བཤད་ས་ང་མེད་གི།། བོད་གངས་རིའི་དཔའ་བོ་དཔའ་མོ་རྣམས།། ལུས་བུད་ཤིང་བཞིན་དུ་མེ་ལ་བསྲེགས།། མེ་དམར་པོའི་ཀླུང་ན་ན་ཟུག་ཆེ།། སྡུག་ཆེ་རུང་བཤད་ས་ང་མེད་གི།། བོད་ཉམ་ཆུང་ཉེས་མེད་ཁྲིམས་ལ་སྦྱར།། ལྕགས་ནག་པོ་བརྒྱབས་ནས་གསོད་རྡུང་བྱས།། ལུས་བཙོན་རར་སོང་ནས་འཇིགས་སྐྲག་མྱངས།། འཇིགས་ཆེ་རུང་བཤད་ས་ང་མེད་གི།། ཞེས་འཁོད་འདུག

གསར་འགོད་པ། དོན་གོ