དེ་རིང་ཨེ་རན་གྱི་སྲིད་འཛིན་འོས་བསྡུ་བྱེད་བཞིན་ཡོད་པ་དང་། ཐེངས་འདིའི་དངོས་གཞིའི་འོས་བསྡུའི་ཁྲོད་འོས་མི་ ༦ ཡོད་པ་དང་། འོས་བསྡུའི་ལས་རིམ་ཁྲོད་རྒྱལ་སྤྱིའི་རྟོག་ཞིབ་མི་སྣ་དང་གསར་འགོད་པ་ཚོར་བཀག་སྡོམ་བྱེད་ཀྱི་ཡོད་པ་མ་ཟད། ཨེ་རན་ནང་གི་གསར་བརྗེའི་གསར་ལམ་ཁག་ཅིག་བཙན་ཤེད་ཀྱིས་སྒོ་རྒྱག་བཅུག་པ་དང་དྲ་རྒྱའི་བརྒྱུད་ལམ་ཁག་ཏུ་བཀག་སྡོམ་ཤུགས་ཆེན་བྱས་ཡོད་འདུག
དེ་རིང་གི་འོས་བསྡུའི་ཁྲོད་འོས་གྲངས་བརྒྱ་ཆ་ ༥༠།༡ ཐོབ་མཁན་མ་བྱུང་ཚེ། ཕྱི་ཚེས་ ༢༡ ཉིན་འོས་གྲངས་མཐོ་ཤོས་གཉིས་ལ་བསྐྱར་དུ་འོས་བསྡུ་བྱ་རྒྱུ་ཡིན་པ་དང་། མཐའ་མའི་རྒྱལ་ཁ་ཐོབ་མཁན་དེས་ཕྱི་ཟླ་ ༨ ཚེས་ ༣ ཉིན་ཆེས་མཐོའི་དབུ་ཁྲིད་(Suppreme leader)ཁཱ་མེ་ནའེ་(Khamenei)ཡི་དགོངས་འཁྲོལ་ཐོབ་རྗེས་གཞི་ནས་སྲིད་འཛིན་དམ་བཅའ་འཇོག་དགོས་ཀྱི་ཡོད་འདུག ཐོག་མར་སྲིད་འཛིན་འོས་མིའི་ཁྲོད་ཞུགས་མཁན་ ༦༨༦ ཙམ་བྱུང་ཡོད་པ་ལས་མི་ ༨ ལ་འོས་ཆོས་ཚང་པའི་ངོས་འཛིན་ཐོབ་ཡོད་པ་དང་། དེ་དག་ཁྲོད་ཀྱི་མི་ ༢ རང་འགུལ་གྱིས་ཕྱིར་འཐེན་བྱས་རྗེས་ཨེ་རན་རྒྱལ་སྲུང་དྲུང་ཆེ་ཇཱ་ལེ་ལེ་(Saeed Jalili) དང་། རྒྱལ་ས་ཊེ་རན་གྱི་སྤྱི་ཁྱབ་པ་ཁ་ལེ་བྷ་ཧྥི་ (QaliBaf )། དམག་དཔོན་ཟུར་པ་མཱོ་སེན་ (Mohsen Rezai)། ཨེ་རན་རྡུལ་མཚོན་འབྲེལ་མོལ་བ་ཟུར་བ་ཧཱ་སན (Hassan Rowhani) ། བློན་ཆེན་ཟུར་པ་གྷ་རཱ་ཛེ་ (Mohammad Gharazi) བཅས་འོས་མི་ ༦ དངོས་སུ་གསལ་བསྒྲགས་བསྐྱངས་ཡོད། ཁོང་ཅག་ཚང་མ་ཁ་ཆེ་མཁྲེགས་འཛིན་ཆོས་དཔོན་གྱི་ཕྱོགས་གཏོགས་ཡིན་འདུག་ལ། བདུན་ཕྲག་གསུམ་རིང་གི་འོས་བསྡུའི་ཁྱབ་བསྒྲགས་ཁྲོད། ཧཱ་སེན་དང་ཇཱ་ལེ་ལེ། ཨ་ལེ་ཨབ་བྷར་གསུམ་ལ་རེ་བ་ཆེ་ཤོས་ཆགས་ཡོད་འདུག
དེ་སྔ་ཨེ་རན་གཞུང་གི་དམིགས་བསལ་སྐུ་ཚབ་ཐོག་ནུབ་ཕྱོགས་རྒྱལ་ཁག་ཁག་དང་ཨེ་རན་གྱི་རྡུལ་མཚོན་གནད་དོན་ཐོག་གྲོས་མོལ་བྱེད་མཁན་ཟུར་བ་ཧཱ་སན་ལགས་སུ། ཐེངས་འདིར་གསར་བརྗེ་ལས་འགུལ་བ་དང་ཁ་གཏད་ཕྱོགས་ཁག་གིས་རྒྱབ་སྐྱོར་ཤུགས་ཆེན་ཐོབ་ཡོད་པ་དང་། ཧཱ་སེན་ཁོ་རང་གིས་ཀྱང་ད་སྔའི་དབང་སྒྱུར་ལམ་ལུགས་ལ་བཅོས་སྒྱུར་བྱ་དགོས་པའི་རྣམ་འགྱུར་ཤུགས་ཆེན་བསྟན་ཡོད་འདུག ད་ཆར་ཨེ་རན་ནང་དང་རྒྱལ་སྤྱིའི་སྤྱི་ཚོགས་ཀྱི་སེམས་འཚབ་གཙོ་བོ་འོས་བསྡུའི་གྲུབ་འབྲས་དྲང་སྙོམས་ཡོང་མིན་དེ་ཡིན་པ་དང་། ད་སྔ་ཨེ་རན་ནང་གི་དབང་ཤུགས་ཆེ་ཤོས་ཆོས་དཔོན་ཁཱ་མེ་ནའེ་(Ayatollah Khamenei) གཙོས་པའི་ཆོས་དཔོན་དག་གི་ལག་ཏུ་ཡོད་སྟབས། ད་རེབ་ཀྱང་ཆོས་དཔོན་ཚོའི་རྒྱབ་སྐྱོར་མེད་མཁན་ཞིག་སྲིད་འཛིན་དུ་བསླེབ་དཀའ་བ་དང་། གལ་སྲིད་བསླེབ་པའི་དབང་དུ་བྱས་ཀྱང་དབང་ཤུགས་མེད་པ་ཆགས་རྒྱུ་ཡིན་པར་ཚོད་དཔག་བྱེད་ཀྱི་ཡོད་འདུག
ཨེ་རན་གྱི་སྲིད་འཛིན་འོས་མི་དག་ལ་འོས་བསྡུ་ལྷན་ཁང་གིས་ཞིབ་བཤེར་ཟིན་རྗེས། ཁ་ཆེ་ཆོས་དཔོན་དང་ཁྲིམས་དཔོན་བཅས་མི་སྣ་ ༡༢ ལས་གྲུབ་པའི་སློབ་སྟོན་ལྷན་ཚོགས་(Guardian Council)ཀྱིས་མཐའ་མའི་ཐག་གཅོད་བྱེད་ཀྱི་ཡོད་པ་དང་། ལྷན་ཚོགས་དེ་གྲོས་ཚོགས་དང་ཆེ་མཐོའི་དབུ་ཁྲིད་ཀྱིས་བསྐོ་བཞག་བྱེད་ཀྱི་ཡོད་འདུག དཔྱད་ཞིབ་པ་ཚོས་དེ་ནི་དབང་སྒྱུར་ལམ་ལུགས་ལ་དགའ་ཞེན་ཡོད་མཁན་ཁོ་ན་འདེམས་སྒྲུག་ཡོང་ཆེད་ཡིན་པའི་སྐྱོན་བརྗོད་བྱེད་ཀྱི་ཡོད། ཨེ་རན་གྱི་སྲིད་འཛིན་འོས་བསྡུའི་ཁྲོད་འོས་ཤོག་འཕེན་པའི་ཐོབ་ཐང་ཡོད་མཁན་མི་ས་ཡ་ ༥༠ ཙམ་ཡོད་པར་བསྒྲགས་ཡོད་ཀྱང་། ༢༠༠༩ ལོའི་དྲང་སྙོམས་མ་ཡིན་པའི་འོས་བསྡུའི་གྲུབ་འབྲས་དང་ཟིང་འཁྲུག་གི་རྐྱེན་ཀྱིས་ཐེངས་འདིར་མང་པོ་ཞིག་གིས་འོས་བསྡུའི་ཆ་ཤས་ལེན་གྱི་མེད་པའི་གནས་ཚུལ་ཐོན་འདུག འོས་ཤོག་འཕེན་མཁན་ན་གཞོན་བུ་མོ་མེ་ནཱ་(Mina)ཟེར་པ་ཞིག་གིས་ “སྐབས་སྔོན་མར་ང་ཚོའི་འོས་ཤོག་ཁོ་ཚོས་བརྐུས་པ་རེད། ཐེངས་འདིར་ང་ཚོའི་འོས་ཤོག་དྲང་པོ་དྲང་རྐྱང་ཐོག་རྩིས་རྒྱག་རྒྱུར་ཁེག་ཐག་ག་རེ་ཡོད་རེད། ”ཅེས་བརྗོད་འདུག
མང་ཚོགས་ཀྱི་ངོས་ནས་ཨེ་རན་གྱི་དཔལ་འབྱོར་ཉམས་གུད་བསྐྱར་གསོ་དང་། རྡུལ་ཕྲན་མཚོན་ཆའི་གནད་དོན་ཐད་རྒྱལ་ཚོགས་དང་ནུབ་ཕྱོགས་པར་ཁ་གཏད་གཅོག་རྒྱུ། ད་ལྟའི་དབང་སྒྱུར་ལམ་ལུགས་ལ་བཅོས་སྒྱུར་གཏོང་རྒྱུ་བཅས་ནི། ཐེངས་འདིའི་སྲིད་འཛིན་གསར་པའི་ལས་དོན་གཙོ་བོར་ངོས་འཛིན་བྱེད་ཀྱིན་ཡོད་འདུག ཨེ་རན་གྱི་ཆེ་མཐོའི་དབུ་ཁྲིད་ཁཱ་མེ་ནའེ་ཡི་སྐད་ཆས་མང་ཚོགས་ལ་གཡོ་འགུལ་ཆེན་པ་ཐེབས་ཀྱི་ཡོད་པ་དང་། ཕྱི་ཚེས་ ༡༢ ཉིན་ཁོང་གིས། “ཁག་ཅིག་གིས་སོ་སོའི་རྒྱལ་ཁབ་འདི་ཉིད་ཡག་པོ་ཞིག་ཡོང་ཆེད་ཁ་ཆེ་རིང་ལུགས་པར་རྒྱབ་སྐྱོར་བྱ་འདོད་མེད་པ་དེ་འདྲ་ཡོང་སྲིད་ངེས་རེད། འོན་ཀྱང་། ཁོང་ཚོ་ཡང་ངེས་པར་དུ་འོས་ཤོག་འཕེན་པར་འགྲོ་དགོས་རེད་”ཅེས་ལྟ་གྲུབ་དང་ཕྱོགས་ཁག་གང་ཡིན་ཡང་འོས་བསྡུའི་ཆ་ཤས་ལེན་དགོས་པའི་སྐུལ་མ་བཏང་འདུག
གསར་འགོད་པ། བནྡེ་སྐྱབས།
