འཛམ་གླིང་འབྱོར་ལྡན་རྒྱལ་ཁབ་བརྒྱད་ཀྱི་ཚོགས་འདུ་ཐེངས་སོ་དགུ་བའི་སྟེང་ཚོང་འབྲེལ་ཡར་རྒྱས་གཏོང་ཕྱོགས་དང་སི་རི་ཡའི་གནད་དོན་བཅས་ཀྱི་ཐོག་གྲོས་ཆོད་བཞག་ཡོད་འདུག
ཕྱི་ཚེས་ ༡༧ དང་ ༡༨ ཉིན་གཉིས་རིང་བྱང་ཨར་ལན་ཌིའི་ནང་། འཛམ་གླིང་གི་འབྱོར་ལྡན་རྒྱལ་ཁབ་ ༨ དེ་(G8)། ཨ་རི་དང་ཨུ་རུ་སུ། ཉི་ཧོང་། ཧྥ་རན་སི། འཇར་མན། ཁེ་ན་ཌ། ཨི་ཊ་ལི། དབྱིན་ཡུལ་བཅས་ཀྱི་ཚོགས་འདུ་ཐེངས་ ༣༩ པ་དེ་ཚོགས་ཡོད་ཅིང་། ཚོགས་འདུའི་སྟེང་། རྒྱལ་ཁབ་དེ་དག་གི་ཚོང་ལས་སྡེ་ཚོགས་དག་གི་འབྲེལ་ལམ་ཡར་རྒྱས་དང་དཔྱ་ཁྲལ་ཉུང་དུ་གཏོང་རྒྱུ། ལྷག་པར་དུ་དཔྱ་ཁྲལ་སྐོར་གྱི་གནས་ཚུལ་རྒྱལ་སྤྱིའི་ཐུན་མོང་གིས་མཉམ་སྤྱོད་བྱེད་རྒྱུ་དང་། ཁེ་ལས་སྡེ་ཚན་ཁག་གིས་ཚོང་ལས་བྱེད་སྒོའི་གནས་ཚུལ་ཕྱི་གསལ་ནང་གསལ་ཡོང་ཐབས་བཅས་ལ་གྲོས་མཐུན་བྱུང་ཡོད་པ་རེད།
དབྱིན་ཇིའི་སྲིད་བློན་ཁམ་མེ་རོན་ ( David Cameron) ལགས་གསར་འགོད་པར་ཨ་རི་དང་ཡུ་རོབ་མཐུན་ཚོགས་གཉིས་ཀྱི་ཚོང་ལས་གྲོས་མཐུན་སྐོར་བརྗོད་དོན། ཐེངས་འདིར་ཨ་རི་དང་ཡུ་རོབ་མཐུན་ཚོགས་གཉིས་བར་རང་དབང་ཚོང་ལས་བྱེད་ཆོག་པའི་མོས་མཐུན་བྱུང་བ་དེ། འཛམ་གླིང་ལོ་རྒྱུས་ནང་གི་རང་དབང་ཚོང་ལས་གྲོས་མཐུན་བྱུང་བ་གཞི་རྒྱ་ཆེ་ཤོས་དེ་ཆགས་ཡོད་ཟེར།
གཞན། ཐེངས་འདི་གོང་གསལ་རྒྱལ་ཁབ་བརྒྱད་ཀྱི་དབུ་ཁྲིད་ཚོས་སི་རི་ཡའི་གནད་དོན་ཐོག་གྲོས་མཐུན་དོན་ཚན་ ༧ བཞག་ཡོད་པ་དང་། དེ་ནི་རྒྱལ་ཁབ་ཁག་གིས་འགྲོ་བ་མིའི་བདེ་སྡུག་གི་ངོ་བོའི་ཐོག་ནས་ཨ་སྒོར་ཐེར་འབུམ་ ༡།༥ ཡི་སྐྱོབ་གསོའི་རོགས་དངུལ་སྤྲོད་རྒྱུ་དང་། རྒྱལ་སྤྱིའི་སྟེང་ནས་སི་རི་ཡའི་གཞུང་ལ་གནོན་ཤུགས་སྤྲད་དེ། སི་རི་ཡའི་གཞུང་དང་ཁ་གཏད་ངོ་རྒོལ་ཚོགས་པ་གཉིས་ཅོག་ཙེ་གཅིག་གི་སྟེང་གྲོས་མོལ་ཡོང་ཐུབ་བྱེད་འཇུག་རྒྱུ། ཕྱི་ཟླ་ ༩ ནང་འཚོགས་འཆར་ཡོད་པའི་ཇི་ནེ་བཱ་( Geneva) གྲོས་མོལ་སྔོན་ལ་སི་རི་ཡའི་བར་བརྒལ་སྲིད་གཞུང་ཞིག་འཛུགས་ཐུབ་པ་བྱས་ཏེ། ཞི་འཇམ་ངང་སྲིད་གཞུང་མི་དམངས་ལ་རྩིས་སྤྲོད་བྱེད་དགོས་རྒྱུ་དང་། སི་རི་ཡའི་ནང་གི་ཁ་ཆེ་འཇིགས་སྐུལ་པ་རྩ་མེད་བཟོ་རྒྱུ། སི་རི་ཡའི་སྲིད་གཞུང་གིས་ཁ་གཏད་ངོ་རྒོལ་ཚོགས་པར་གཏོར་ཕམ་གཏོང་ཆེད་དུག་མཚོན་བེད་སྤྱོད་བྱས་པ་དེར། མཉམ་འབྲེལ་རྒྱལ་ཚོགས་ཀྱིས་རང་དབང་ལྡན་པའི་རྟོག་ཞིབ་ཚོགས་ཆུང་ཞིག་གིས་དུག་མཚོན་བེད་སྤྱོད་བཏང་ཡོད་མེད་ལ་ཞིབ་འཇུག་ནན་མོ་བྱ་རྒྱུའི་སྐུལ་འདེད་གཏོང་རྒྱུ་བཅས་ཀྱི་གྲོས་ཆོད་བཞག་ཡོད་འདུག
སི་རི་ཡ་རྒྱལ་ཁབ་ནང་ལོ་གཉིས་རིང་འཁྲུག་འཛིང་ཤོར་ཏེ། མི་མང་ ༩༣༠༠༠ ལྷག་གི་ཚེ་སྲོག་ཤོར་ཡོད་པ་དང་། འབུམ་ཕྲག་མང་པོ་ཁྱིམ་མཚེས་རྒྱལ་ཁབ་ཁག་ཏུ་བྲོས་བྱོལ་གྱིས་སྐྱབས་བཅོལ་ཞུས་ཡོད་སྟབས། འཛམ་གླིང་རྒྱལ་ཁབ་ཁག་གིས་སི་རི་ཡའི་དཀའ་རྙོག་སེལ་ཆེད། འབྱུང་འགྱུར་གྱི་ཕྱི་ཟླ་ ༩ པའི་ནང་སིད་སུའི་གྲོང་ཁྱེར་ཇི་ནེ་བཱ་ནང་གྲོས་མོལ་ཚོགས་འདུ་ཞིག་སྐོར་རྒྱུའི་ལས་འཆར་སྒྲིག་ཡོད་འདུག འོན་ཀྱང་། སི་རི་ཡ་གཞུང་དང་ཁ་གཏད་ངོ་རྒོལ་ཚོགས་པ་སུ་གང་གིས་ཀྱང་ཇི་ནེ་བཱ་གྲོས་མོལ་ལ་འཛུལ་ཞུགས་བྱེད་རྒྱུ་ཡིན་མིན་གྱི་རྣམ་འགྱུར་བསྟན་ཡོད་མི་འདུག
འབྱོར་ལྡན་རྒྱལ་ཁབ་བརྒྱད་ཀྱིས་སི་རི་ཡའི་སྲིད་འཛིན་བྷ་ཤཱར་( Bashar Hafaz al Assd) གྱི་གཞུང་གིས་ཁ་གཏད་ངོ་རྒོལ་ཚོགས་པར་དུག་མཚོན་བེད་སྤྱོད་བཏང་བ་ལ་མཐའ་གཅིག་ཏུ་སྐྱོན་བརྗོད་བྱས་ཡོད་པ་མ་ཟད། ཁ་སང་ཚེས་ ༡༨ ཉིན། རྒྱལ་ཁབ་ ༨ ཀྱི་གསར་འགོད་གསལ་བསྒྲགས་སྤེལ་པའི་ནང་། ཨུ་རུ་སུའི་སྲིད་འཛིན་པོ་ཊིན་( Putin) ལགས་ཀྱིས་སི་རི་ཡའི་སྲིད་འཛིན་བྷ་ཤཱར་གྱི་གཞུང་ནི་ཁྲིམས་མཐུན་གྱི་གཞུང་ཞིག་ཡིན་སྟབས་ང་ཚོས་རྒྱབ་སྐྱོར་བྱེད་ཀྱི་ཡོད་པ་དང་། ཐེངས་འདིར་ང་ཚོ་ཐུན་མོང་གི་དམིགས་ཡུལ་དེ་སི་རི་ཡའི་དཀའ་ངལ་གང་མགྱོགས་སེལ་ཐུབ་རྒྱུའི་རེ་བ་རྒྱག་གི་ཡོད་ཅེས་བརྗོད་འདུག ཡིན་ནའང་ཨ་རིས་སི་རི་ཡའི་གཞུང་གིས་དུག་མཚོན་བེད་སྤྱོད་བཏང་པའི་བདེན་དཔང་ཡོད་སྐོར་བརྗོད་དེ། སི་རི་ཡའི་ཁ་གཏད་ངོ་རྒོལ་ཚོགས་པར་མངོན་གསལ་དོད་པོས་མཚོན་ཆ་མཁོ་སྤྲོད་ཀྱི་རྒྱབ་སྐྱོར་བྱེད་ཀྱི་ཡོད་པ་རེད། ཡིན་ནའང་ཨུ་རུ་སུའི་སྲིད་འཛིན་པོ་ཊིན་གྱིས་སི་རི་ཡའི་གཞུང་གིས་དུག་མཚོན་བེད་སྤྱོད་བཏང་བ་ངོས་ལེན་བྱས་མེད།
