ཡུ་གུར་ནང་མི་ ༢༧ དམར་གསོད།

ཁ་སང་ཡུ་གུར་རང་སྐྱོང་ཁུལ་སན་སན་རྫོང་ལི་ཁི་ཆིན་གྲོང་བརྡལ་དུ་ཡུ་གུར་བ་དང་ཉེན་རྟོག་པའི་བར་ཟིང་འཁྲུག་གི་དོན་རྐྱེན་ཞིག་བྱུང་སྟེ་ཁྱོན་མི་གྲངས་ ༢༧ དམར་གསོད་བཏང་འདུག

༢༠༠༩ ལོའི་བདུན་ལྔ་ཡུ་གུར་ངོ་རྒོལ་ཆེན་མོའི་དུས་དྲན་ཐེངས་ ༤ པ་བསླེབ་ལ་ཉེ་སྐབས། ཟླ་འདིའི་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༦ ཡས་མས་སུ། རྒྱ་ནག་ཡུ་གུར་རང་སྐྱོང་ཁུལ་ཌུར་བྷན་(Turban)སན་སན་རྫོང་ལི་ཁི་ཆིན་གྲོང་བརྡལ་དུ་ཡུ་གུར་བ་ཁག་ཅིག་གིས་ལག་ཏུ་གྲི་སོགས་བཟུང་སྟེ། ས་གནས་ཉེན་རྟོག་ལས་ཁུངས་དང་སྲིད་གཞུང་གི་ལས་ཁུངས་ལྟེ་གནས་སོགས་སུ་གཏོར་རྒོལ་དང་། ཉེན་རྟོག་ལས་ཁུངས་དང་ཉེན་རྟོག་པའི་རླངས་འཁོར་མེར་བསྲེགས་བཏང་ཡོད་པ་མ་ཟད། ངོ་རྒོལ་ཟིང་འཁྲུག་ཁྲོད་ཁྱོན་མི་གྲངས་ ༢༧ དམར་གསོད་བཏང་ཡོད་འདུག

རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན།   ཐེངས་འདིའི་དམར་གསོད་ཁྲོད་ཉེན་རྟོག་པ་སོགས་སྲིད་གཞུང་གི་ལས་བྱེད་ ༩ དང་མི་སེར་དཀྱུས་མ་ ༨ ། ངོ་རྒོལ་བ་ ༡༠ བཅས་འདས་གྲོངས་སུ་གྱུར་བ་དང་། མི་ ༣ ལ་རྨས་སྐྱོན་ཕོག་ནས་སྨན་ཁང་དུ་ཡོད་པ། ཟིང་འཁྲུག་ཁྲོད་ངོ་རྒོལ་བ་ ༣ འཛིན་བཟུང་བྱས་ཤིང་། བྲོས་བྱོལ་དུ་སོང་བའི་ངོ་རྒོལ་བ་ཚོ་རྩད་གཅོད་བྱེད་བཞིན་པའི་སྒང་ཡིན་ལུགས་བརྗོད་འདུག

ཡུལ་དངོས་སུ་རྟོག་ཞིབ་བྱེད་མཁན་གྱི་ལས་བྱེད་པ་ཞིག་གིས་འཛིན་བཟུང་བྱས་པའི་ངོ་རྒོལ་བ་ ༣ ལ་འདྲི་གཅོད་བྱེད་སྐབས་སྐད་ཆ་གང་ཡང་བཤད་མེད་ནའང་། ཡུ་གུར་ལྷོ་རྒྱུད་དུ་དམ་དྲག་ནན་པོ་བྱས་ཡོད་སྟབས། ཁོ་ཚོ་བྱང་ཤར་གྱི་ལྷིང་འཇགས་ས་ཆ་དེར་ཡོང་ནས་ཟིང་འཁྲུག་བསླངས་བར་ཚོད་དཔག་བྱེད་ཀྱི་ཡོད་སྐོར་དང་། གདུག་རྩུབ་ཆེ་བའི་དམར་གསོད་དང་གཏོར་བཅོམ་བྱེད་སྟངས་ལ་བལྟས་ན་ཁོ་ཚོ་ཆེད་དུ་སྦྱོང་བརྡར་ཐོབ་མཁན་ཤ་སྟག་ཡིན་ལུགས་སོགས་བརྗོད་འདུག

ས་གནས་ཡུ་གུར་བ་ཚོས་ཐེངས་འདིའི་ཟིང་འཁྲུག་གི་འབྱུང་རྐྱེན་སྐོར་བརྗོད་པ་ལྟར་ན། ཡུ་གུར་ཁུལ་དུ་གནད་དོན་ཅི་ཞིག་བྱུང་ཡང་རྒྱ་གཞུང་གིས་དཔྱད་ཞིབ་མི་བྱེད་པར་ཐད་ཀར་ཡུ་གུར་མི་མང་ལ་ནག་ཉེས་འཛུགས་པ་དང་། སྲིད་གཞུང་གི་མི་སྣ་ཚོས་དྲག་སྤྱོད་པ་རྩད་གཅོད་བྱེད་པར་ཁ་གཡར་ནས་ཡུ་གུར་མི་མང་གི་སྡོད་གནས་སོགས་ལ་གང་བྱུང་སྔོག་བཤེར་བྱེད་པ་མ་ཟད། སྐྱེས་པ་རྣམས་ཀྱི་ཁ་སྤུ་བཞར་དགོས་པ་དང་བུད་མེད་ཚོའི་གདོང་རས་ལེན་དགོས་པ་སོགས། ཡུ་གུར་མི་རིགས་ཀྱི་ཡུལ་སྲོལ་གོམས་གཤིས་ལ་བཙན་གནོན་གཏོང་བཞིན་པ་བཟོད་མ་ཐུབ་པར་ངོ་རྒོལ་བྱས་ཚུལ་བརྗོད་འདུག

ཁ་སང་འཇར་མན་དུ་རྟེན་གཞི་བྱས་པའི་འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་བྷི་ལི་ཤཱ་ཡིས་གོང་གི་དོན་རྐྱེན་དེའི་ཐད་འབོད་སྐུལ་གནང་དོན།  “  རྒྱ་གཞུང་གིས་དངོས་ཡོད་གནས་ཚུལ་ལ་སྦ་གསང་དང་འཁྱོག་བརྗོད་སྣ་ཚོགས་བྱེད་བཞིན་ཡོད་སྟབས། རྒྱལ་སྤྱིའི་ཚོགས་སྡེ་ཁག་ཡུལ་དངོས་སུ་སོང་ནས་འབྲེལ་ཡོད་ཀྱི་གནད་དོན་ལ་རྟོག་ཞིབ་དང་། རྒྱ་གཞུང་གི་བྱེད་སྟངས་ནོར་འཁྲུལ་ཅན་ལ་གནོན་ཤུགས་སྤྲོད་དགོས་པའི་འབོད་སྐུལ། རྒྱ་གཞུང་གིས་དངོས་ཡོད་གནས་ཚུལ་ལ་འཁྱོག་བརྗོད་མི་བྱེད་པར་གནད་དོན་དེའི་སྔ་གཞུག་གི་འབྱུང་རྐྱེན་བཅས་རྒྱལ་སྤྱིའི་ཐོག་ཁ་གསལ་བཟོ་རྒྱུར་ང་ཚོས་རེ་སྐུལ་བྱེད་བཞིན་ཡོད། ” ཅེས་སོགས་བརྗོད་འདུག