རྒྱ་གཞུང་གིས་སྐུ་འབུམ་བྱམས་པ་གླིང་གི་ཉེ་འཁོར་དུ་ཧ་ཡང་བཟོ་གྲྭ་ཞིག་གསར་རྒྱག་བྱས་ཏེ། བཟོ་གྲྭའི་དུག་རླངས་ཀྱིས་ས་གནས་ཀྱི་མི་མང་དང་ཁོར་ཡུག་ལ་གནོད་སྐྱོན་ཆེན་པོ་ཐེབས་ཀྱི་ཡོད་འདུག
བོད་ནས་ཁུངས་འདི་གར་གནས་ཚུལ་འབྱོར་བ་ལྟར་ན། ཉེ་བའི་ལོ་འགའི་སྔོན་ནས་བཟུང་རྒྱ་ནག་གཞུང་གིས་བོད་མདོ་སྨད་མཚོ་སྔོན་སྐུ་འབུམ་བྱམས་པ་གླིང་གི་ཉེ་འཁྲིས་སུ་ཧ་ཡང་བཟོ་གྲྭ་ཞིག་གསར་རྒྱག་བྱས་ཏེ། བཟོ་གྲྭའི་དུག་རླངས་ཀྱིས་ཉེ་འཁོར་མི་མང་ལ་ནད་ཡམས་འདྲི་མིན་བྱུང་སྟེ་མི་མང་གི་བདེ་ཐང་ལ་གནོད་སྐྱོན་ཚབས་ཆེན་ཐེབས་ཀྱི་ཡོད་པ་མ་ཟད། ཉེ་འཁོར་གྱི་ཆུ་བོ་འབག་བཙོག་བཟོས་པ་དང་། ཤིང་ནགས་དང་རྩི་ཤིང་སོགས་རང་བཞིན་གྱིས་སྐམ་ནས་འགྲོ་བཞིན་ཡོད་འདུག་ལ། བཟོ་གྲྭའི་དུག་རླངས་ཀྱིས་ས་གནས་ཀྱི་གནམ་གཤིས་ཀྱང་ཐལ་མདོག་ཏུ་བསྒྱུར་ཡོད་འདུག
གནས་ཚུལ་འདིའི་ཐད་ས་གནས་མང་ཚོགས་དང་ཡུལ་སྐོར་ལྗོངས་རྒྱུ་བ། ས་གནས་གཞན་ནས་ཡོང་བའི་དད་ལྡན་པའི་ཁྲོད་གླེང་སློང་ཤུགས་ཆེར་བྱེད་ཀྱི་ཡོད་པ་མ་ཟད། ཉེ་བའི་དུས་ནས་ས་གནས་མི་མང་གིས་གོང་རིམ་ལ་ཞུ་གཏུག་བྱ་རྒྱུར་ཐབས་ཤེས་ཡོད་རྒུ་འདོན་ཀྱི་ཡོད་འདུག
གསར་འགོད་པ། དོན་གོ
བོད་ཡུལ་མདོ་སྨད་མཚོ་སྔོན་སྐུ་འབུམ་བྱམས་པ་གླིང་། །
ཉེ་འཁྲིས་བཟོ་གྲྭ་གསར་རྒྱག་དུག་རླངས་ནད་ཡམས་ལ། །
མི་མང་བདེ་ཐང་གནོད་སྐྱོན་ཚབས་ཆེན་ཐེབས་ཡོད་པ། །
མི་མང་རང་གིས་གོང་རིམ་ཀུན་ལ་ཞུ་གཏུག་ལེགས། །