ཡུལ་ཤུལ་དུ་འཇང་དགུན་ཆོས་ཆེན་མོ་ཚོཊ་འདུག

ཟླ་འདིའི་ཕྱི་ཚེས་ ༢༨ ཉིན་མདོ་ཁམས་འཇང་དགུན་ཆོས་ཆེན་ཐེངས་ ༡༤ ཡུལ་ཤུལ་བོད་རིགས་རང་སྐྱོང་ཁུལ་ཤུལ་མ་སྡེ་བར་ཡོད་པའི་དགོན་དགེ་ལྡན་ཕུན་ཚོགས་བཤད་སྒྲུབ་དར་རྒྱས་གླིང་དུ་ཡར་ཚོགས་བཞིན་ཡོད་པ་དང་། ཁ་སང་ཡར་ཚོགས་སྐབས་དགེ་ལྡན་ཕུན་ཚོགས་བཤད་སྒྲུབ་དར་རྒྱས་གླིང་གི་དགེ་སྐུལ་གྱིས་མཛད་རིམ་ངོ་སྤྲོད་དང་། མཆོག་སྤྲུལ་བསྟན་འཛིན་ཆོས་རྒྱལ་མཆོག་གིས་གསུང་བཤད་བཅས་གནང་རྗེས། མདོ་ཁམས་འཇང་དགུན་ཆོས་དོ་དམ་ཚོགས་པའི་ཚོགས་གཙོ་སེར་བྱེས་ལྷ་རམས་པ་འཇམ་དཔལ་བློ་ཤེར་ལགས་ཀྱིས་མཛད་རིམ་ངོ་སྤྲོད་དང་འབྲེལ། དགོན་སྡེ་ཁག་ཏུ་དགེ་འདུན་པ་ཚོས་ཀུན་སྤྱོད་ཡར་རྒྱས་དང་སློབ་གཉེར་གནང་དགོས་པ་མ་ཟད། དགོན་སྡེ་ཁག་གིས་གྲངས་ཚད་གཙོ་བོར་མི་འཛིན་པར་སྤུས་ཚད་ཡག་པོ་ཡོང་བར་འབད་པ་བྱ་དགོས་པའི་བཀའ་སློབ་གནང་ཡོད་འདུག

ཐེངས་འདིའི་ཉིན་བཅུ་གཉིས་རིང་ཚོགས་འཆར་ཡོད་པའི་མདོ་ཁམས་འཇང་དགུན་ཆོས་ཐོག མདོ་ཁམས་ཡུལ་གྱི་དགོན་སྡེ་ཁག་ ༤༧ གྱི་བླ་སྤྲུལ་དགེ་བཤེས་དང་གྲྭ་བ་ ༡༩༧༣ ཙམ་དང་། གཞིས་དགོན་དུ་བླ་གྲྭ་ ༣༠༠ བཅས་ཁྱོན་དགེ་འདུན་ཞལ་གྲངས་ ༢༠༠༠ ལྷག་འཛོམས་བྱུང་ཡོད་འདུག་ལ། ཉིན་དེ་དག་རིང་གདན་ས་ཁག་གི་ཕྱག་ལེན་ལྟར་ཚད་མ་རྣམ་འགྲེལ་གྱི་དོན་ལ་ཐོས་བསམ་དང་དོགས་གཅོད་གནང་རྒྱུ་ཡིན་འདུག

རྒྱ་གར་ལྷོ་ཕྱོགས་སེར་བྱེས་གྲྭ་ཚང་བྱ་བྲལ་ཁང་ཚན་གྱི་གྲྭ་ཐུབ་བསྟན་རིག་བཟང་ལགས་ཀྱིས་གནས་ཚུལ་བཏང་འབྱོར་ལྟར་ན། མདོ་ཁམས་འཇང་དགུན་ཆོས་ཆེན་མོ་ནི། ༡༩༩༩ ལོར་རྫ་ཆུ་ཁའི་སློབ་གཉེར་བ་འགས་སྣེ་འཁྲིད་འོག་ཐེངས་དང་པོ་དབོན་པོ་དགོན་པའི་ནང་ཚུགས་ཡོད་པ་དང་། དུས་དེ་ནས་བཟུང་ ༢༠༠༠ ལོར་རྫ་སེར་ཤུལ་དགོན་དུ་ཐེངས་གཉིས་པ་དང་།  ༢༠༠༡ ལོར་མཁར་ནང་མགོན་དུ་ཐེངས་གསུམ་པ། ༢༠༠༢ ལོར་འབུམ་རྙིང་དགོན་དུ་ཐེངས་བཞི་བ། ༢༠༠༣ ལོར་བོ་རོད་དགོན་དུ་ཐེངས་ལྔ་བ། ༢༠༠༤ ལོར་ཟིལ་དཀར་དགོན་དུ་ཐེངས་དྲུག་པ། ༢༠༠༥ ལོར་འབུམ་གསར་དགོན་དུ་ཐེངས་བདུན་པ། ༢༠༠༦ ལོ་མང་དགེ་དགོན་དུ་ཐེངས་བརྒྱད་པ། ༢༠༠༧ ལོར་ཇོ་བོ་དགོན་དུ་ཐེངས་དགུ་བ། ༢༠༠༩ ལོར་འཇུ་མང་དགོན་དུ་ཐེངས་བཅུ་བ། ༢༠༡༠ ལོར་སྒྲུབ་རྒྱུད་དགོན་དུ་ཐེངས་བཅུ་གཅིག་པ། ༢༠༡༡ ལོར་བདེ་དགོན་དགོན་དུ་ཐེངས་བཅུ་གཉིས་པ། ༢༠༡༢ ལོར་ཐར་ཤུལ་དགོན་དུ་ཐེངས་བཅུ་གསུམ་པ་བཅས་དོ་དམ་ཚོགས་ཆུང་རིམ་འདེམས་ཀྱིས་ལོ་ལྟར་ཚོགས་ཐུབ་ཡོད་འདུག

ཐེངས་འདིའི་མདོ་ཁམས་འཇང་དགུན་ཆོས་ཚོགས་ཡུལ་ཡུལ་ཤུལ་ཤུལ་མ་དགོན་དགེ་ལྡན་ཕུན་ཚོགས་བཤད་སྒྲུབ་དར་རྒྱས་གླིང་ནི། གྲུབ་དབང་མཚོ་སྐྱེས་རྡོ་རྗེའི་རིང་ལུགས་འཛིན་པ་ཆེན་པོ། གསང་སྔགས་རྙིང་མའི་རྒྱུད་སྡེ་དང་ཐེག་པ་རིམ་དགུ་ལ་མཁས་ཤིང་གྲུབ་པ་བརྙེས་པའི་སྒ་བའི་བླ་མ་རབ་འབྱམས་པ་ཞེས་པའི་ཕྱག་བཏབ་ཅིང་། དེ་ནས་བཟུང་སྒ་བའི་བླ་མ་སྐུ་རབས་བཅུ་གསུམ་གྱིས་གསང་སྔགས་རྙིང་མའི་སྲོལ་རྒྱུན་མི་ཉམས་རྒྱུན་འཛིན་གནང་བ་དང་། དུས་རབས ༡༨ པའི་སྨད་ཙམ་ལ་རྗེ་བཙུན་བྱང་གླིང་པཎྚི་ཏ་འདུལ་ལྡན་ཡེ་ཤེས་ཚུལ་ཁྲིམས་ཀྱིས་རིམ་བཞིན་གསེར་མདོག་ཅོད་པན་འཆང་བའི་རིང་ལུགས་སུ་བསྒྱུར་ཡོད་འདུག  ༡༩༥༨ ལོའི་ཟིང་འཁྲུག་ཁྲོད་ཆོས་སྡེའི་གཙུག་ལག་ཁང་དང་སྐུ་གསུང་ཐུགས་རྟེན། རིག་དངོས་རྩ་ཆེན་གྱི་རིགས་ཐམས་ཅད་མིང་གི་ལྷག་མ་ཙམ་དུ་གྱུར་ཡོད་ཀྱང་།  ༡༩༨༥ ལོར་བྱང་གླིང་པཎྜི་ཏ་སྐུ་ཕྲེང་ལྔ་བ་བློ་བཟང་ཚེ་རིང་སྟོབས་རྒྱས་མཆོག་དང་བླ་མ་རྒྱལ་མཚན་སྤྲུལ་སྐུ། མཁན་རིན་པོ་ཆེ་བློ་བཟང་བཟོད་པ་བཅས་ལས་སྣེ་ལྷན་འཛོམས་ཐོག་ཆོས་སྒོ་ཕྱེ་ཡོད། ༡༩༩༠ ཡས་མས་ནས་བཟུང་ཆོས་རྭ་དང་སློབ་གཉེར་བར་ཁྲིད་རྒྱུན་གསར་འཛུགས་བྱས་ཏེ། བསྡུས་ཆུང་ནས་སྐབས་གཉིས་པའི་བར་སློབ་གཉེར་བྱེད་བཞིན་ཡོད་པ་མ་ཟད། བོད་ཡིག་ཡར་རྒྱས་དང་ཕ་སྐད་རྒྱུན་འཛིན་ཆེད་སེར་སྐྱ་ཕོ་མོ་དབྱེར་མེད་ལ་རྨོངས་སེལ་འཛིན་གྲྭ་དང་། ལེགས་བཤད་སློབ་གླིང་ཞེས་པ་གསར་འཛུགས་ཀྱིས་བརྡ་དག་སྙན་གསུམ་སོགས་ཀྱི་སློབ་ཁྲིད་དང་མཛུབ་སྟོན་བྱེད་བཞིན་ཡོད་འདུག་ལ། ད་ལྟའི་ཆར་བླ་སྤྲུལ་ ༥ དང་དགེ་འདུན་ཞལ་གྲངས་ ༣༠༠ ལྷག་ཡོད་འདུག