བོད་མདོ་སྨད་སྟག་ཚང་ལྷ་མོ་ཀིརྟི་དགོན་དུ་ཀིརྟིའི་དགོན་ཁག་བཞི་གཙོས་པའི་དགེ་འདུན་པ་རྒྱ་ཕྲག་ལྷག་འདུ་འཛོམས་ཀྱིས་ཕར་ཕྱིན་དབྱར་ཆོས་ཆེན་མོ་ཚོགས་བཞིན་ཡོད་འདུག
སངས་རྒྱས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། འདི་ལོའི་ཕྱི་ཟླ་ ༦ པའི་ཚེས་ ༢༤ ཉིན་ནས་བཟུང་བོད་མདོ་སྨད་རྔ་པ་ཀིརྟིའི་དགོན་སྡེ་ཁག་གི་སྤྱི་ཁྱབ་ནང་བསྟན་ཤེས་ཡོན་འགན་འཛིན་ལྷན་ཚོགས་ཀྱི་གོ་སྒྲིག་འོག ཀིརྟི་སྐུ་ཕྲེང་རིམ་བྱོན་གྱི་གདན་ས་གཙོ་བོ་སྟག་ཚང་ལྷ་མོ་ཀིརྟི་དགོན་དུ་སྟག་ཚང་ལྷ་མོ་ཀིརྟི་དགོན་དང༌རྔ་པ་ཀིརྟི་དགོན། ཧོར་ཚང་ཀིརྟི་དགོན། ཚོ་བདུན་ཀིརྟི་དགོན་བཅས་དགོན་སྡེ་ཁག་བཞིའི་ཕར་ཕྱིན་ལོ་རིམ་གཉིས་པ་ནས་ལྔ་བའི་བར་གྱི་འཛིན་གྲྭ་བཞི་དང༌། གདན་ས་སོ་སོའི་ནང་ཕར་ཕྱིན་ལ་དོན་གཉེར་ཡོད་པའི་སློབ་གཉེར་བ་བཅས་དགེ་འདུན་པ་བརྒྱ་ཕྲག་ལྷག་ལྷན་འཛོམས་ཀྱིས་ཕར་ཕྱིན་དབྱར་ཆོས་ཆེན་མོ་ཚོགས་བཞིན་ཡོད་འདུག་ལ། ཐེངས་འདིའི་ཕར་ཕྱིན་དབྱར་འདི་ནི། བོད་ཀྱི་ལོ་རྒྱུས་ཐོག་གི་ཕར་ཕྱིན་དབྱར་ཆོས་བསྐྱར་གསོ་ཙམ་དུ་མ་ཟད། མདོ་སྨད་ཀྱི་ཡུལ་དུ་ཕར་ཕྱིན་དབྱར་ཆོས་ཚོགས་ཐེངས་ཐོག་མ་དེ་ཆགས་ཡོད་འདུག
ཕར་ཕྱིན་དབྱར་ཆོས་ཞེས་པ་ནི་ཐོག་མ་གསང་ཕུར་དར་བའི་འཆད་ཉན་གྱི་ལམ་སྲོལ་ཞིག་ཡིན་ཡང༌། རིམ་པས་རྐྱེན་སྣ་ཚོགས་ཀྱི་དབང་གིས་གསང་ཕུར་དབྱར་ཆོས་ཉམས་ཆག་ཏུ་ཕྱིན་སྟེ། མདོ་དབུས་གཉིས་ཀར་ད་བར་བསྐྱར་གསོ་ཐུབ་མེད་སྟབས། ཀིརྟི་སྐུ་ཕྲེང་བཅུ་གཅིག་པ་མཆོག་གིས་ཀིརྟིའི་གདན་ས་ཆེན་པ་བཞིས་གཙོས་མདོ་སྨད་ཁུལ་གྱི་ཆོས་སྡེ་རྣམས་སུ་ཕར་ཕྱིན་འཆད་ཉན་འཕེལ་རྒྱས་ཆེད་དམིགས་པ་ཞིག་ཡིན་འདུག་ལ། ལོ་ལྟར་ཀི་རྟིའི་དགོན་ཁག་ཆེ་ཤོས་བཞིའི་ནང་རེ་མོས་ཀྱིས་ཉིན་གྲངས་ ༢༠ རིང་ཚོགས་ཏེ། རྗེ་རིན་པོ་ཆེའི་དྲང་ངེས་ལེགས་བཤད་སྙིང་བོ་རྩོད་གཞུང་བྱས་ཏེ་རྒྱ་བོད་ཀྱི་འབྲེལ་ཡོད་གཞུང་ཆེན་ཁག་ལ་གཟིགས་རྟོག་དང་བརྒལ་བརྟག་རྩོད་པ་གནང་གི་ཡོད་འདུག
གསར་འགོད་པ། དོན་གོ
