རྫོང་དཔོན་པདྨ་རིག་འཛིན་གྱི་གོ་གནས་བླངས།

ཉེ་ཆར་རྒྱུ་རྐྱེན་ཁ་གསལ་མེད་པར་རེབ་གོང་ཐུན་རིན་རྫོང་གི་བོད་རིགས་རྫོང་དཔོན་པདྨ་རིག་འཛིན་ལགས་ཀྱི་གོ་གནས་བླངས་ཏེ་ད་སྔ་ལས་གནས་གང་ཡང་སྤྲད་མི་འདུག་ཟེར།

གནས་ཚུལ་བཏང་འབྱོར་ལ། ཕྱི་ཟླ་ ༦ ཚེས་ ༢༤ ཉིན་མཚོ་སྔོན་རེབ་གོང་ཐུན་རིན་རྫོང་གི་བོད་རིགས་རྫོང་དཔོན་པདྨ་རིག་འཛིན་ལགས་རྒྱུ་མཚན་གསལ་ཁ་མེད་པའི་ཐོག་ནས་གོ་གནས་བླངས་ཡོད་པ་དང་། ད་སྔ་གོ་གནས་འདི་ཡིན་གྱི་གོ་སྒྲིག་གང་ཡང་མེད་པར་བཞག་ཡོད་སྟབས། གནས་ཚུལ་དེ་བྱུང་རྗེས་རེབ་གོང་ས་ཁུལ་གྱི་དམངས་ཆེན་འཐུས་མི་ཚོ་དང་། སྡེ་བ་ཁག་གི་སྡེ་དཔོན་རྣམས་ཁུལ་དང་རྫོང་རིམ་པའི་སྲིད་གཞུང་དུ་བཅར་ཏེ། ཁོང་གི་གོ་གནས་ཕབ་དགོས་པའི་རྒྱུ་མཚན་གསལ་བཤད་དགོས་པ་དང་། རྫོང་དཔོན་སྤྱི་སེམས་ཅན་ཁོང་གི་ལས་གནས་བསྐྱར་གསོ་ཡོང་བའི་རེ་འདུན་ཞུས་ཡོད་ཀྱང་དོན་འབྲས་སོན་མེད་པ་མ་ཟད། རྫོང་དཔོན་པདྨ་རིག་འཛིན་གྱི་གོ་གནས་ཕབ་པའི་གནས་ཚུལ་དེ་ཆེད་མངགས་ཞིང་ཆེན་ནས་བཀའ་ཕབ་པ་ཡིན་ཚུལ་བརྗོད་ཡོད་འདུག

རྫོང་དཔོན་པདྨ་རིག་འཛིན་ལགས་ནི། ཆེས་ཐོག་མར་སྲིད་གཞུང་གི་བྱ་བའི་སྙན་ཞུ་བོད་ཡིག་བོད་སྐད་ཐོག་སྒྲོགས་སྦྱང་བྱེད་དུ་འཇུག་མཁན་དེ་ཆགས་ཡོད་འདུག

རྫོང་དཔོན་པདྨ་རིག་འཛིན་ལགས་ནི། ༢༠༡༢ ལོར་དམངས་ཆེན་འཐུས་མིའི་འདེམས་ཤོག་བརྒྱུད་ཐུན་རིན་རྫོང་གི་རྫོང་དཔོན་དུ་བསྐོ་བཞག་བྱུང་བ་ཞིག་ཡིན་པ་དང་། ད་རེབ་ཀྱི་གནས་ཚུལ་དེ་བྱུང་རྗེས་ས་གནས་མི་མང་ཚོས། པདྨ་མ་རིག་འཛིན་ལགས་ནི་ཕུལ་དུ་བྱུང་བའི་ཏང་ཡོན་ཞིག་དང་། རྒྱལ་ཁབ་དང་མི་དམངས་ཀྱི་ལས་དོན་འབད་སྒྲུབ་ཞུ་མཁན་ཞིག་ཡིན་སྟབས། འདི་ལྟར་རྒྱུ་མཚན་གསལ་ཁ་མེད་པར་གནས་དབྱུང་བཏང་བ་ནི། མི་དམངས་ཀྱིས་ཏང་དང་རྒྱལ་ཁབ་ལ་བཅངས་པའི་རེ་བ་དོན་སྨིན་མ་བྱུང་བ་མ་ཟད། ཏང་དང་རྒྱལ་ཁབ་ཀྱི་མགོ་ཁྲིད་ཚོས་ལས་དོན་སྒྲུབ་ཕྱོགས་དྲང་བདེན་མིན་པ་བཅས་ཀྱི་སྐྱོན་བརྗོད་བྱེད་བཞིན་ཡོད་འདུག