ཨི་ཇིབ་བར་བརྒལ་སྲིད་འཛིན་བསྐོ་བཞག

ཨི་ཇིབ་ཀྱི་སྲིད་འཛིན་མོར་སི་ཡིས་སྲིད་འཛིན་ལས་འགན་བཞེས་ཏེ་ལོ་གཅིག་འཁོར་མ་ཐག མི་མང་གི་གྱེན་ལོག་ལ་དམག་སྤྱིས་རྒྱབ་རོགས་བྱས་ཏེ་སྲིད་འཛིན་ཕྱིར་འཕུད་བཏང་ཡོད་འདུག

དེ་རིང་སྔ་དྲོརཨི་ཇིབ་རྒྱལ་ཁབ་ཀྱི་དམག་སྤྱི་ཆེན་མོ་སེ་སེ་ ( Abdel Fattah el-Sisi)ཡིས་རྒྱལ་ཡོངས་བརྙན་འཕྲིན་བརྒྱུད་དེ། འདས་པའི་ལོའི་ནང་ཨི་ཇིབ་ནང་རྙོག་ཟིང་མང་པོ་བྱུང་སྟེ་རྒྱལ་ཁབ་དཀའ་ཉེན་ལ་ཐུག་ཡོད་པ་དང་། སྲིད་འཛིན་མོར་སི་ཡིས་མང་ཚོགས་ཀྱི་མངོན་འདོད་ལ་ཉན་འཇོག་མི་བྱེད་པར། ཟིང་འཁྲུག་སྔར་ལས་ཤུགས་ཆེ་རུ་འགྲོ་བཞིན་ཡོད་པ་བཅས་ལ་བརྟེན་ཏེ། གནས་སྐབས་རིང་རྒྱལ་ཁབ་ཀྱི་རྩ་ཁྲིམས་ཕྱིར་བསྡུ་བྱས་ཏེ་ཨི་ཇིབ་ཀྱི་སྲིད་འཛིན་མོར་སི་( Mohamed Morsi )ལས་གནས་ནས་ཕྱིར་འཕུད་མི་གཏོང་ཐབས་མེད་ཆགས་པ་དང་། གམས་སྐབས་རིང་ཆེས་མཐོའི་ཁྲིམས་ཁང་གི་ཁྲིམས་དཔོན་མཱན་སོར་(Adli Mansour)ལགས་ཨི་ཇབ་བར་བརྒལ་སྲིད་འཛིན་དུ་བསྐོ་བཞག་བྱས་ཡོད་པ་ཁྱབ་བསྒྲགས་བྱས་མ་ཐག མི་མང་སྟོང་ཕྲག་མང་པོས་རྒྱལ་ས་ཁེད་རོབ་ཀྱི་རང་དབང་ཐང་ཆེན་དུ་ཤོག་སྦག་སྒྲོན་པ་སོགས་དགའ་བསུའི་རྣམ་པ་ཤུགས་ཆེན་བསྟན་ཡོད་འདུག སྲིད་འཛིན་མོར་སིའི་ཕྱོགས་གཏོགས་ཁ་ཆེ་སྤུན་ཟླ་མཐུན་ཚོགས་ཀྱི་མགྲིན་ཚབ་ཇྷི་ཧཱ་ཌི་( Gehad el-Haddad) ཡིས་བྷེ་བྷེ་སི་གསར་འགོད་པར། “སྲིད་འཛིན་མོར་སི་དང་ཁོང་གི་ལས་རོགས་ཚང་མ་དམག་མིས་འཛིན་བཟུང་བཀག་གཉར་བྱས་སོང”ཅེས་བརྗོད་ཡོད་འདུག

ཕྱི་ཟླ་ ༤ ཚེས་ ༢༨ ཉིན་ནས་བཟུང་གྱེན་ལོག་ཤོག་ཁག་ཌཱ་མཱ་རོབ་ཊི( Tamarod) ཡིས་སྲིད་འཛིན་མོར་སི་ལ་གནོན་ཤུགས་སྤྲད་དེ། སྲིད་འཛིན་འོས་འདེམས་སྔ་བསྣུར་གསལ་བསྒྲགས་ཡོང་རྒྱུར། འདས་པའི་ཟླ་གཅིག་ལྷག་རིང་མི་མང་ས་ཡ་ ༢༢ ཙམ་གྱི་མཚན་རྟགས་བསྡུ་རུབ་བྱས་ཡོད་པ་དང་། ཨི་ཇིབ་ཀྱི་ཆབ་སྲིད་ཚོགས་པ་དང་དྲུག་བཞི་གཞོན་ནུའི་ལས་འགུལ། རྒྱལ་ཁབ་ཉེན་སྐྱོབ་ཚོགས་པ་བཅས་ཀྱིས་ཐེངས་འདིའི་གྱེན་ལོག་ལས་འགུལ་ལ་སྣེ་ཁྲིད་ཡོད་པ་དང་། ད་རེབ་ཕྱོགས་གཉིས་ཀྱི་མི་མང་ངོ་རྒོལ་སྐབས་་ཁྱོན་མི་ ༥༠ བསད་ཡོད་པ་དང་ ༡༠༠ ལྷག་ལ་རྨས་སྐྱོན་ཕོག་སྟེ་སྨན་ཁང་དུ་སྨན་བཅོས་བྱེད་ཀྱིན་ཡོད་འདུག

ཕྱི་ཚེས་ ༣༠ ཉིན་ཏེ་མོར་སི་ཡིས་ཨི་ཇིབ་སྲིད་འཛིན་གྱི་ལས་འཁུར་ཞུས་ཏེ་ལོ་གཅིག་འཁོར་བའི་ཉིན་མོ་དང་བསྟུན་ཏེ། གྱེན་ལོག་ལས་འགུལ་ཚོགས་པ་ཌཱ་མཱ་རོབ་ཊི་ཡི་སྣེ་ཁྲིད་འོག ཨི་ཇིབ་རྒྱལ་ས་ཁེད་རོབ་( Cairo)ཀྱི་རང་དབང་ཐང་ཆེན་དང་སྲིད་འཛིན་ཕོ་བྲང་མདུན། དེ་བཞིན་གྲོང་ཁྱེར་ཁག་མང་པོའི་ནང་མི་མང་སྟོང་ཕྲག་མང་པོ་འདུ་འཛོམས་བྱས་ཏེ། སྲིད་འཛིན་མོར་སི་ཡིས་དབང་ཆ་བཟུང་བའི་རིང་། ཨི་ཇིབ་ཀྱི་ཆབ་སྲིད་དང་དཔལ་འབྱོར། སྤྱི་ཚོགས་བཅས་ཀྱི་གནས་སྟངས་ཇེ་སྡུག་ཏུ་ཕྱིན་ཡོད་པ། དེ་བཞིན། རྒྱལ་ཁབ་ཀྱི་རྩ་ཁྲིམས་ནང་སྲིད་འཛིན་རང་ཉིད་ལ་ཆེས་མཐོའི་དབང་ཆ་སྤྲད་པ་སོགས་ལ་ངོ་རྒོལ་ལས་འགུལ་སྤེལ་ཏེ། མོར་སི་སྲིད་འཛིན་གྱི་གོ་གནས་ལས་གང་མགྱོགས་དགོངས་ཞུ་བྱེད་དགོས་པའི་སྐད་འབོད་བྱས་སྟབས། ཨི་ཇིབ་ཀྱི་དམག་སྤྱི་ཆེན་མོ་སེ་སེ་ཡིས་བར་འདུམ་བྱས་ཏེ། ཆུ་ཚོད་ ༤༨ རིང་སྲིད་འཛིན་མོར་སི་ཡིས་མི་མང་གི་མངོན་འདོད་ལ་ཉན་འཇོག་མ་བྱས་ཚེ། དམག་དཔུང་གིས་སྲིད་གཞུང་རྩིས་མེད་གཏོང་རྒྱུ་ཡིན་པའི་ཐ་ཚིག་བསྒྲགས་ཡོད་པ་དང་། སྐབས་དེར་སྲིད་འཛིན་མོར་སི་ཡིས། “ ང་རང་ཨི་ཇིབ་མི་མང་གིས་དམངས་གཙོའི་འགྲོ་ལུགས་ལྟར་འོས་འདེམས་བྱས་པའི་སྲིད་འཛིན་ཡིན་པ་དང་། དམག་སྤྱིའི་ཐ་ཚིག་དེར་ངོ་ལེན་རྩ་བ་ནས་མེད་པ་མ་ཟད། དེ་ནི་དམག་མིའི་གྱེན་ལོག་གིས་སྲིད་གཞུང་མགོ་རྟིང་བསློགས་ཏེ་དབང་རྒྱལ་ཁབ་ཀྱི་དབང་ཆ་སྒེར་སྤྱོད་བྱས་པ་རེད” ཅེས་བརྗོད་ཡོད།

ཁ་སང་ཕྱི་ཚེས་ ༣ ཉིན་ཨི་ཇིབ་ཀྱི་དམག་སྤྱི་སེ་སེ་ཡིས་ཨི་ཇིབ་རྒྱལ་ཡོངས་བརྙན་འཕྲིན་བརྒྱུད་ཨི་ཇིབ་སྲིད་འཛིན་མོར་སི་ཡིས་མི་མང་གི་མངོན་འདོད་ལ་དང་ལེན་མ་བྱས་སྟབས། ཁོ་རང་སྲིད་འཛིན་ལས་གནས་ནས་ཕྱིར་འཕུད་བཏང་བ་དང་། རྒྱལ་ཁབ་ཀྱི་རྩ་ཁྲིམས་གནས་སྐབས་རིང་ཕྱིར་བསྡུ་བྱས་ཏེ། ཨི་ཇིབ་སྲིད་འཛིན་གསར་བ་ཞིག་འོས་འདེམས་མ་བྱུང་བར། ཆེས་མཐོའི་ཁྲིམས་ཁང་གི་ཁྲིམས་དཔོན་མཱན་སོར་ལགས་ཀྱིས་ཨི་ཇིབ་བར་བརྒལ་སྲིད་འཛིན་གྱི་ལས་འགན་བཞེས་དགོས་པའི་གསལ་བསྒྲགས་སྤེལ་འདུག ད་དུང་། བར་བརྒལ་སྲིད་བློན་མཱན་སོར་དང་། དེ་སྔའི་སྲིད་བློན་ཧེན་ཞཱམ། དམག་སྤྱི་སེ་སེ་གསུམ་ལས་གྲུབ་པའི་བར་བརྒལ་སྲིད་འཛིན་ཚོགས་ཆུང་ཞིག་རྩ་འཛུགས་བྱས་ཏེ། རྒྱལ ཁབ་ཀྱི་རྩ་ཁྲིམས་བསྐྱར་བཅོས་གཏན་འབེབས་བྱེད་རྒྱུ་ཡིན་སྐོར་བསྒྲགས་འདུག

ཨ་རིའི་སྲིད་འཛིན་ཨོ་བྷ་མས་ཐེངས་འདིར་ཨི་ཇིབ་ནང་མི་མང་གིས་ངོ་རྒོལ་བྱས་པའི་སྐོར་བརྗོད་དོན། “ དམག་མིས་ཨི་ཇིབ་མི་མང་གི་རང་དབང་དང་ཐོབ་ཐང་སྲུང་སྐྱོབ་བྱེད་རྒྱུ་དང་། ད་ལྟའི་བར་བརྒལ་སྲིད་གཞུང་གིས་དོན་མེད་གང་བྱུང་མི་མང་འཛིན་བཟུང་བཙོན་འཇུག་མི་བྱེད་རྒྱུར་རེ་སྐུལ་ཞུ་ཡོད” ཅེས་བརྗོད་འདུག དེ་བཞིན། ཡུ་རོབ་མཐུན་ཚོགས་ཀྱི་ཕྱི་འབྲེལ་སྲིད་ཇུས་འགན་འཛིན་ཁཱ་ཋི་རིན་( Cattherine Athton) ལགས་ཀྱིས་ཀྱང་། “ སྲིད་འཛིན་དང་སྲིད་བློན་གཉིས་མི་མང་གིས་རང་དབང་དང་དྲང་བདེན་ཐོག་ནས་འོས་འདེམས་བྱས་ཏེ། རྒྱལ་ཁབ་ཀྱི་རྩ་ཁྲིམས་གསར་བར་མོས་མཐུན་ཆོག་མཆན་སྤྲོད་དགོས” ཅེས་བརྗོད་འདུག

སྲིད་འཛིན་མོར་སི་ནི་ ༢༠༡༢ ལོའི་ ༦ ཚེས་ ༣༠ ཉིན་ཨི་ཇིབ་མི་མང་གིས་དམངས་གཙོའི་ལམ་ནས་འོས་འདེམས་བྱས་པའི་སྲིད་འཛིན་ཐོག་མ་དེ་ཆགས་ཡོད་ཀྱང་། འདས་པའི་ལོ་གཅིག་རིང་རྒྱལ་ཁབ་ནང་དཀའ་རྙོག་མང་པོ་ཞིག་བྱུང་ཡོད་པ་མ་ཟད། རྒྱལ་ཁབ་ཀྱི་རྩ་ཁྲིམས་ནང་སྲིད་འཛིན་ལ་དབང་ཆ་ཆེན་པོ་ཡོད་པ་བེད་སྤྱོད་ལོག་པར་བཏང་བ་བཅས་ལ་བརྟེན་ཏེ། སྲིད་འཛིན་གསར་པའི་ལས་དོན་བྱེད་ཕྱོགས་ཐོག་ཨི་ཇིབ་མི་མང་གི་འདོད་བློ་མ་ཁེངས་པར་ངོ་རྒོལ་གང་སར་བྱུང་སྟབས། ཐེངས་འདིར་ཨི་ཇིབ་རྒྱལ་ཁབ་ཀྱི་དམག་སྤྱི་ཆེན་མོས་གཞུང་གི་ལས་དོན་ཐོག་ཐེ་ཇུས་བྱས་ཏེ་སྲིད་འཛིན་མོར་སི་ཕྱིར་འཕུད་བཏང་ཡོད་འདུག

ཨི་ཇིབ་རྒྱལ་ཁབ་ནི་ཨ་ཧྥི་རི་ཀའི་གླིང་ཆེན་གྱི་འདས་པའི་ལོ་རྒྱུས་ཁྲོད། རྒྱལ་ཁབ་དང་མི་རིགས་གཞན་གྱིས་བཙན་འཛུལ་མ་ཐེབས་པའི་རྒྱལ་ཁབ་གཅིག་པུ་དེ་ཆགས་ཡོད་འདུག