སྐུ་ངུར་སྨྲིག་གོས་ཀྱིས་རབ་མཛེས་ཤིང་།།
གསུང་ཡན་ལག་དྲུག་ཅུའི་ཆ་ཤས་རྫོགས།།
ཐུགས་བྱམས་དང་སྙིང་རྗེའི་བདག་ཉིད་ཅན།།
མགོན་༧རྒྱལ་བའི་སྐུ་ཚེ་ཞབས་པད་བརྟན།།
༄༅། ། རང་ཅག་གངས་ཅན་སྐྱེ་འགྲོ་ཡོངས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་བདུན་ཅུ་དོན་བརྒྱད་ལ་ཕེབས་པའི་༧སྐུའི་འཁྲུངས་སྐར་ཉིན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་ཡོངས་ནས་བཅོས་མིན་གྱི་འཚམ་འདྲིའི་བཀྲིས་བདེ་ལེགས་གྲངས་མེད་ཞུ་བ་དང་། ༧མགོན་པོ་གང་ཉིད་སྐུ་ཚེ་ཞབས་པད་རྡོ་རྗེའི་ངོ་བོར་བརྟན་པ་དང་གང་མགྱོགས་རང་ཡུལ་གངས་ཅན་ལྗོངས་ཀྱི་ཕོ་བྲང་པོ་ཏ་ལར་ཞབས་སོར་འཁོད་ཐུབ་པའི་སྨོན་འདུན་ཞུ།།
དབུས་བོད་ཀྱི་གཞོན་ལྷན་སྤྱི་ཁྱབ་དབུས་རྒྱུན་ལས་ཁང་ནས་ཕུལ།
༄༅།། ཁམས་གསུམ་ཆོས་ཀྱི་རྒྱལ་པོ། ལྷར་བཅས་སྲིད་ཞིའི་གཙུག་རྒྱན། འཛམ་གླིང་ཞི་བདེའི་དེད་དཔོན་བོད་མིའི་བླ་ན་མེད་པའི་དབུ་འཁྲིད། ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་༧༨ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་སྐལ་བཟང་དགའ སྟོན་ལ་གཞིས་བྱེས་བུད་མེད་ཡོངས་ཀྱིས་རྟེན་འབྱུང་འཚམས་འདྲི་བཀྲ་ཤིས་བདེ་ལེགས་དང་སྐུ་ཚེ་བསྐལ་བརྒྱའི་བར་དུ་བརྟན་ཅིང་ཐུགས་ཀྱི་བཞེད་དགོངས་ལྷུན་གྱི་འགྲུབ་པའི་སྨོན་འདུན་ཞུ།
སྒོ་གསུམ་གུས་པ་ཆེན་པོས་གུས་ཕྱག་དང་བཅས། བོད་ཀྱི་བུད་མེད་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་ནས་ཕྱི་ལོ་ ༢༠༡༣ ཟླ་ ༧ ཚེས་ ༦ ལ།།
ཤིས་ཚིག
དགེ་འདུན་གྲུབ་པའི་མཚན་གྱི་དོན་ནས་བྱོན་པའི་སངས་རྒྱས་གཉིས་པ་ཁྱེད།།
ལྔ་ལྡན་གླིང་གི་དབྱེ་བས་མ་ཆོད་ཀླ་ཀློའི་ཞིང་ཁམས་ཐམས་ཅད་གཤེགས།།
དྲི་མེད་ལུང་དང་རྟོགས་པའི་བསྟན་དང་ཚད་མེད་སྙིང་རྗེའི་ཞབས་རྗེས་ནི།།
མ་ཐེག་ཀུན་བཟོད་སྒེག་མོའི་འཁུན་སྒྲ་སྲིད་པའི་ཁོངས་ལས་རིང་དུ་བརྒལ།།
ལོག་སྨོན་ཆུ་སྲིན་རྒྱ་མཚན་མཛེས་ཤིང་འཁོར་བའི་རྒྱ་མཚོར་ངལ་གསོ་བའི།།
གདུག་རྩུབ་སྙིང་ཁམས་མེ་རུ་འབར་བའི་མི་སྲུན་དྲག་པོའི་སྡེ་དེར་ཡང་།།
འཚེ་མེད་སྙིང་རྗེའི་ཡུལ་དུ་སྒོམ་པའི་བྱང་ཆུབ་སེམས་ཀྱི་ལྟ་བ་དེར།།
ཆེ་དགུ་མ་བགྲོས་གཅིག་ཏུ་བཏུད་པའི་རྣམ་ཐར་ཡང་དག་དོན་གྱིས་མཛེས།།
རྣམ་པར་དག་པའི་ཐུགས་གཤིས་བཟང་བོས་ཆེ་དགུའི་སྙིང་ལ་བདེ་བ་སྟེར།།
ཤིན་ཏུ་ཞི་བའི་སྤྱོད་པ་བཙུན་པས་འགྲོ་བའི་སེམས་ལ་ངལ་གསོ་ཐོབ།།
ཡང་དག་སྐུ་ཡི་གསུང་དབྱངས་གཅིག་གིས་ཐམས་ཅད་ཐར་བའི་ས་ལ་འགོད།།
རྣམ་པར་རྒྱལ་བའི་རྒྱལ་མཚན་མཛེས་པས་བླ་ན་མེད་པའི་སྟོན་པར་ངེས།།
ཁྱེད་སྐུ་མི་ནུབ་སྲིད་པའི་རྒྱལ་མཚན་བསྐལ་བརྒྱར་བརྟན་པའི་བཀྲ་ཤིས་ཤོག།
ཤིན་ཏུ་དག་པའི་ཐུགས་དགོངས་ཟབ་མོ་ལྷུན་གྱིས་འགྲུབ་པའི་བཀྲ་ཤིས་ཤོག།
ཁྱེད་ཞབས་དྲི་མེད་གསེར་གྱི་འཁོར་ལོ་ཁ་བ་ཅན་ལ་བསྒྱུར་བར་ཤོག།
ས་ཡ་དྲུག་དང་འཛམ་གླིང་སྐྱེ་འགྲོ་ཞི་བདེའི་དཔལ་གྱིས་འཚོ་བར་ཤོག།
བོད་གངས་ཅན་དང་ཁྱད་པར་དུ་འཛམ་གླིང་སྐྱེས་འགྲོ་ཀུན་གྱི་སྟོན་པ་ཆེན་པོ་༸གོང་ས་ལྷ་མིའི་རྣམ་འདྲེན་གང་གི་སྐུའི་འཁྲུངས་སྐར་དང་སྟབས་བསྟུན་ནས་ཁོང་གི་སྐུ་ཚེ་མི་ཤིག་རྡོ་རྗེའི་ཁམས་སུ་བརྟན་པའི་སྨོན་འདུན་དང་བཅས་བོད་ཀྱི་དགུ་བཅུ་གསུམ་ལས་འགུལ་ཚོགས་པས་ ༢༠༡༣ ། ༧ ། ༤ གུས་ཕུལ།
དབུས་དབུ་མའི་ལམ་མི་མང་ལས་འགུལ་ཁང།
༄༅།། ལྷར་བཅས་སྲིད་ཞིའི་གཙུག་རྒྱན། འཇིག་རྟེན་ཞི་བདེའི་དེད་དཔོན། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག ཁམས་གསུམ་ཆོས་ཀྱི་རྒྱལ་པོ། འཕགས་མཆོག་འཇིག་རྟེན་དབང་ཕྱུག་མིའི་རྣམ་པར་རོལ་པ། བོད་མི་ཡོངས་ཀྱི་འདུ་ཕྱིའི་མགོན་སྐྱབས་དང་བླ་ན་མེད་པའི་དབུ་འཁྲིད་སྤྱི་ནོར་ྋགོང་ས་སྐྱབས་མགོན་ཐམས་ཅད་མཁྱེན་པ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ། མཚན་དངོས་ནས་སྨོས་ན་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་ཕྱི་ལུགས་ལྟར། དགུང་གྲངས་ ༧༨ བཞེས་པའི་སྐུའི་འཁྲུངས་སྐར་ལ། དགའ་དད་སྤྲོ་གསུམ་གྱི་སྒོ་ནས་འཚམས་འདྲིའི་བཀྲ་ཤིས་བདེ་ལེགས་ཞུ།
ངྷ་ས་དབུས་དབུ་མའི་ལམ་མི་མང་ལས་འགུལ་ཁང་གི་སྤྱི་ཁྱབ་ཡིག་ཚང་ནས་ ༢༠༡༣ ཟླ་ ༧ ཚེས་ ༦ ལ།།
༄༅།། བོད་གཞིས་བྱེས་ཡོངས་ཀྱི་འདི་ཕྱིའི་དབུ་འཁྲིད་བླ་ན་མ་མཆིས་པ་འཛམ་གླིང་ཞི་བདེའི་དེད་དཔོན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲང་༧༨ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་བའི་སྐལ་བཟང་བཀྲ་ཤིས་ཀྱི་ཉིན་མོར་བཞུགས་སྒར་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གི་༧སྤྱི་ཁྱབ་འགན་འཛིན་དང་། འགན་འཛིན་ལྷན་ཚོགས་ལས་བྱེད་ཐུན་མོང་ནས་ལྷ་ཕྱག་གྲང་མེད་དང་བཅས་སྒོ་གསུམ་རབ་ཏུ་གུས་པས་བཀྲིས་བདེ་ལེགས་ཀྱི་འཚམས་འདྲི་ཞུ་བ་དང་ཆབས་ཅིག་༧གོང་ས་མཆོག་སྐུ་ཚེ་ཞབས་པད་སྐལ་བརྒྱར་བསྟན་པའི་སྨོན་འདུན་རྕེ་གཅིག་ཏུ་ཞུ།། བཞུགས་སྒར་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་ནས་ཕྱི་ལོ་༢༠༡༣ ཟླ་༧ ཚེས་༥ བཟང་པོར་ཕུལ།།
འཕགས་ཡུལ་ཇོ་ནང་འགྲོ་ཕན་ལྷན་ཚོགས།
༄༅།། སྤྱི་ནོར་༧གོང་ས་༧སྐྱབས་མགོན་༧རྒྱལ་བའི་དབང་པོ་མཆོག་དགུང་གྲངས་ ༧༨ ལ་ཕེབས་པའི་སྐུའི་འཁྲུངས་སྐར་དུས་ཆེན་ལ་གཞིས་བྱེས་ཇོ་ནང་པ་ཡོངས་ཀྱི་ཚབ་བྱས་ནས་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ།
