རྒྱ་གཞུང་གིས་ལྐོག་ཏུ་རྩོད་རྙོག་ཡོད་པའི་མཚོ་གླིང་དུ་རླངས་སྣུམ་མཁོ་འདོན་ལྟེ་གནས་ཤིག་གསར་འཛུགས་བྱེད་བཞིན་པར་ཉི་ཧོང་གིས་ངོ་རྒོལ་བྱས་འདུག
ཕྱི་ལོ་ ༢༠༡༠ ཙམ་ནས་ཉི་ཧོང་གི་ཤར་རྒྱུད་མཚོ་གླིང་བདག་དབང་ཐད་ཉི་ཧོང་དང་རྒྱ་ནག་བར་རྩོད་རྙོག་མང་དུ་བྱུང་ཡོད་པ་ལྟར། ཉེ་ཆར་རྩོད་རྙོག་ཡོད་པའི་མཚོ་གླིང་དང་བར་ཐག་ཉེ་སར་རྒྱ་གཞུང་གིས་གསང་བའི་ཐོག་ནས་རླངས་སྣུམ་མཁོ་འདོན་ལྟེ་གནས་ཤིག་གསར་འཛུགས་བྱེད་བཞིན་པ་ཉི་ཧོང་གིས་ཤེས་རྟོགས་བྱུང་སྟེ། ཟླ་འདིའི་ཕྱི་ཚེས་ ༣ ཉིན་གྱི་ཕྱི་དྲོར་ཉི་ཧོང་ནང་སྲིད་བློན་ཆེན་ཅན་ཡའི་ཝེ་ཡིས་གསར་འགོད་ལྷན་ཚོགས་སྟེང་ “ ཉི་ཧོང་ཤར་རྒྱུད་ཀྱི་མཚོ་གླིང་ལ་མཐའ་མཚམས་ཀྱི་དབྱེ་བ་གསལ་བོ་མེད་སྟབས། རྒྱ་ནག་གཞུང་གིས་ཉི་ཧོང་དང་གྲོས་མོལ་མ་བྱས་པར་ལྐོག་ནས་རླངས་སྣུམ་མཁོ་འདོན་ལྟེ་གནས་གསར་འཛུགས་བྱེད་བཞིན་པར་མོས་མཐུན་གཏན་ནས་མེད། ” ཅེས་བརྗོད་འདུག
ཉི་ཧོང་གཞུང་ཕྱོགས་ནས་གནས་ཚུལ་སྤེལ་བ་ལྟར་ན། རྒྱ་གཞུང་གི་བྱེད་ཐབས་དེ་ ༢༠༠༨ ལོར་ཉི་རྒྱ་གཉིས་བར་བཞག་པའི་ཤར་རྒྱུད་མཚོ་གླིང་གི་རླངས་སྣུམ་མཁོ་འདོན་གྲོས་ཆོད་དང་འགལ་ཡོད་འདུག གྲོས་ཆོད་དེའི་ནང་དུ་གང་མགྱོགས་ཀྱིས་མཚོ་གླིང་གི་ཐོན་ཁུངས་ཐུན་མོང་གིས་རྒྱ་སྐྱེད་གཏོང་རྒྱུ་ཐག་གཅོད་བྱས་ཡོད་པ་མ་ཟད། ཕྱོགས་གཉིས་ཀྱི་མཚོ་གླིང་གི་ཚོང་ལས་འབྲེལ་བ་མུ་མཐུད་གཉེར་བར་གྲོས་ཆོད་བཞག་ཡོད་ཀྱང་། ༢༠༡༠ ལོར་ཉི་རྒྱ་གཉིས་ཀྱི་མཚོ་གྲུ་གདོང་ཐུག་གི་དོན་རྐྱེན་བྱུང་རྗེས། རྒྱ་ནག་ཕྱོགས་ནས་མཚོ་གླིང་གི་ཚོང་ལས་འབྲེལ་བ་མཚམས་འཇོག་བྱས་ཡོད་འདུག
ཟླ་འདིའི་ཕྱི་ཚེས་ ༣ ཉིན་གྱི་གསར་འགོད་ལྷན་ཚོགས་ཤིག་གི་ཐོག རྒྱ་ནག་གི་ཕྱི་འབྲེལ་མགྲིན་ཚབ་མ་ཧྭ་ཁྲིན་ཡིན་གྱིས། “ ཉི་ཧོང་གིས་ངོ་རྒོལ་ཡོད་སྐོར་བརྗོད་པ་དེ་དང་ལེན་བྱེད་རྒྱུ་མིན་ལ། རྒྱ་ནག་གིས་རང་གི་མངའ་ཁོངས་སུ་འཛུགས་སྐྲུན་གྱི་ལས་གཞི་སྤེལ་བར་རྩོད་གླེང་བྱུང་དགོས་དོན་གང་ཡང་མེད། ” ཅེས་རྒྱལ་ཁབ་གཉིས་བར་གྱི་མཚོ་གླིང་དབྱེ་མཚམས་ལ་ངོས་ལེན་བྱས་མེད་པ་མ་ཟད། མཚོ་གླིང་གི་བདག་དབང་རྩོད་རྙོག་གིས་ཕན་ཚུན་བར་འགལ་ཟླ་བྱུང་རྐྱེན། མིག་སྔར་རྒྱལ་ཁབ་གཉིས་བར་གྲོས་མོལ་གྱི་ཐབས་ལམ་ཆད་དེ། ཉི་ཧོང་གིས་རྒྱ་ནག་ཕྱོགས་ནས་མངའ་ཁོངས་རྒྱ་སྐྱེད་ཀྱིས་མཚོ་གླིང་བདག་བཟུང་བྱེད་བཞིན་པར་འགོག་སྲུང་བྱེད་ཐབས་བྲལ་ཡོད་འདུག དེའི་ཐད་ཉི་རྒྱ་གཉིས་བར་གྱི་ཆབ་སྲིད་དཔྱད་བརྗོད་པ་ཞིག་གིས། ད་ལྟ་རྒྱ་གཞུང་གིས་མཚོ་གླིང་དུ་རླངས་སྣུམ་ཁེ་ལས་རྒྱ་སྐྱེད་གཏོང་རྒྱུ་རང་དབང་གི་གནས་བབ་ཅིག་ཏུ་གྱུར་ཡོད་སྐོར་བརྗོད་འདུག
ཕྱི་ཚེས་ ༥ ཉིན། ཉི་ཧོང་གི་སྲིད་འཛིན་ཤིན་ཟོ་ཨཱ་བྷི་ (Shinzō Abe ) ལགས་ཀྱིས་རྒྱ་གཞུང་ལ་རྒོལ་གཏམ་སྤེལ་དོན། “ བྱ་སྤྱོད་དེ་རྒྱལ་ཁབ་གཉིས་ཀྱི་མཚོ་གླིང་གྲོས་ཆོད་དང་འགལ་ཡོད་པ་གསལ་བོ་ཡིན་སྟབས། རྒྱ་ནག་གི་བྱ་སྤྱོད་དེ་ལ་ང་ཚོ་ཧ་ཅང་བློ་ཕམ་བྱུང་། ” ཞེས་རྒྱ་གཞུང་གིས་ཉི་རྒྱ་གཉིས་བར་བཞག་པའི་མཚོ་གླིང་གྲོས་ཆོད་ལ་སྲུང་གཙི་བྱེད་དགོས་པའི་འབོད་སྐུལ་གནང་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
