རང་བཙན་དང་རིགས་ཞེན་བར་གྱི་འགལ་འབྲེལ།

ཨ་ཚོགས་ཀླུ་མཁར་བྱམས། 

   “ རང་བཙན་རང་གཤིས་སུ་གྲུབ་པའི་སྐྱེ་བུ་ཞིག་ཡོང་བར་བྱེད་པ་ལ།  དབང་འཛིན་པའི་ཁ་སྔ་རྗེས་ལ་རྒྱུག་མཁན་གྱི་རྐུབ་གཡོག་ཅིག་དང་། ཚོང་པ་ཚོའི་ལག་རྡོ་ལྟ་བུ་མི་བྱེད་རྒྱུ་དེ་ཡིན་ན། ལྟོས་བཅས་ཀྱིས་ལས་སླ་བོ་ཞིག་ཡིན་མོད། དམངས་ཀྱི་ཁ་བཀོད་འོག་ཟུར་ལ་བུད་དེ་མང་ཁ་འཁྱེར་ཕྱོགས་ཀྱི་རྗེས་སུ་མི་འབྲང་མཁན་ཞིག་བྱ་རྒྱུ་དེ་ཡིན་ན། ཧ་ཅང་གིས་བློས་གཏོང་ཆེན་པོ་ཞིག་ཡིན”

་་་་་་་་ ལུའུ་ཞུན་（鲁迅）གྱིས།   

ཁ་དམག་ཁོ་ནས་རང་བཙན་མི་ལོན་པ་ཀུན་ཀྱིས་ཤེས་མོད།  བདེན་པ་རི་ནང་བཞིན་ཡོད་མཁན་ཚོ་དམག་ས་འདི་ནས་ཕམ་སོང་ན་སེམས་ནད་དེ་སུ་ལ་བཤད།  ཧ་ལམ་ཐའེ་ཝན་ཀུན་ཕན་ཐེབས་རྩ་ཁང་གིས་གོ་སྒྲིག་བྱས་པའི་ཚོགས་འདུ་དེའི་ནང་ཡིན་པ་ཡོད། དགེ་རྒན་ཞིག་གིས་ང་ལ་རྒྱལ་ཁབ་དང་ཡུལ་མིའི་འོས་འགན་སྐོར་དྲི་བ་བསླེབས་སོང་། ངས་བོད་ལ་རང་བཙན་ཐོབ་རྗེས་ང་བོད་ལ་ལོག་མིན་དང་བོད་ཀྱི་ཡུལ་མི་བྱེད་མིན་ལྟ་རྒྱུ་ཡིན། ང་ལ་རྒྱལ་ཁོངས་ཤིག་རང་དབང་གིས་འདེམས་རྒྱུ་བྱུང་ཕྱིན་ཨི་ཌ་ལའི་རོམ་དང་། ཡང་ན་དཀྱིལ་ཤར་གྱི་ཨེ་ཇབ་གང་རུང་ཞིག་ཡིན་ངེས། ཡུལ་ལུང་དེ་ཚོའི་ཤེས་རིག་གི་སྤོབས་པར་ང་འགྲམ་ཆུ་ལྡང་མྱོང་ཡོད། ཡང་ལྷ་སྒྲུང་དང་དེང་རབས་འབྲེལ་མཚམས་ནས་མི་ཚེ་ཉོབ་ཐོ་ཞིག་སྐྱེད་སར་རྒྱ་གར་ཡང་འགྲིག་བསྡད་ཡོད་སྐོར་བརྗོད། མགྲོན་ཐུན་འདིའི་ཁ་དམག་གྱི་ཕམ་ཁའང་འདི་ནས་མགོ་བཙུགས།  

ངས་མུ་མཐུད་ནས་གོང་གི་དྲི་བ་དེ་ཚོར་གང་ཡོང་ཡོང་གིས་གསལ་བཤད་བྱས། དཔེར་ན། མི་སེར་སྤེལ་མཁན་ལ་ངོ་རྒོལ་བྱེད་རྒྱུ་ནི་མིའི་རིགས་ཀྱི་ཡོངས་ཁྱབ་རིན་ཐང་གི་སྐད་ཆ་ཞིག་ལས། རིགས་རྒྱུད་བྱེ་བྲག་པ་ཞིག་དང་། དེར་རྒྱལ་མཚམས་ཀྱི་བཅད་རྒྱ་ཡོད་པ་ཞིག་ལ་ངས་མཐོང་གི་མེད།  ད་ཆ་ང་བོད་རང་བཙན་འཐབ་རྩོད་ཁྲོད་ཞུགས་པ་དེའང་ང་བོད་པ་ཡིན་པའི་རྒྱུ་མཚན་གྱིས་མ་ཡིན་པར། རང་བཙན་ཤོར་བའི་ཉེར་ལེན་གྱིས་ཐད་གར་གནོད་འཚེ་ཕོག་མཁན་གྱི་མི་ཞིག་ཡིན་སྟབས་འཐབ་རྩོད་འདིའི་ནང་འདམ་ག་མེད་པར་ཚུད་པ་རེད། རང་བཙན་རག་ཚར་ན་ང་བོད་རྒྱལ་ཁབ་ཀྱི་མི་སེར་བྱེད་མིན་དེ་དུས་བལྟས་ན་ཆོག་གི་རེད། ཅི་ལྟར་བཤད་ཀྱང་རུང་ང་བོད་ལ་འགྲོ་རྒྱུའི་གོ་སྐབས་ཤར་བའི་ཉིན་མོར་ངའི་ཞེན་ཆགས་ངོས་ཀྱི་བོད་དེ་ལྷག་མེད་པའང་གསལ་བོ་རེད་ལ། ཡང་གཅིག་བཤད་ན། བོད་རང་བཙན་ཞིག་ཐོབ་ཀྱང་རུང་ང་ཚོ་ནང་བཞིན་གྱི་རང་དབང་རིང་ལུགས་པ་ཚོའི་འཁང་ར་ཇེ་ཆེར་འགྲོ་སྲིད་པ་རེད། སྐབས་དེར་ང་ཐའེ་ཝན་གྱི་རང་བཙན་འཐབ་རྩོད་ནང་ཞུགས་ཀྱང་ཆོག  དཔེར་ན་གསར་བརྗེ་བ་ཆེན་མོ་ཆིས་ངྒོབ་ར་(Che Guevara)ནི་དེ་འདྲའི་མི་སྤྱོད་ལོག་ཅིག་ཡོད་སོགས་ཁ་ནས་ཐོན་ཚད་ཅིག་བཤད་ཡོད།

རེད་དེ།  སྐུ་ཞབས་ཚའེ་མིན་ཞན་(ཐའེ་ཝན་གྱི་རྒྱལ་སྲུང་བློན་ཆེན་ཟུར་བ) གྱིས་ངའི་མཐོ་བཤད་དམའ་བཤད་དེ་ཚོར་ཉན་རྗེས། ཐོག་མར་བློ་མ་བདེ་བའི་རྣམ་འགྱུར་བསྟན་སོང་། ཁོས་ང་ལ་“ ཁྱེད་ལོ་ཆུང་ཆུང་རེད། ང་ལོ་བདུན་ཅུ་དོན་བདུན་ཡིན། རང་བཙན་རྩོད་ན་ལྟ་བ་བརྟན་དགོས་པ་དང་བྱེད་ཐབས་འཇམ་དགོས་ཁར། སོ་སོའི་ཕ་ཡུལ་ལ་བརྩེ་བ་ཟབ་མོ་ཞིག་དགོས་པ་རེད། ང་ཨ་རི་ནས་ཚུར་ལོག་སྐབས་ཐའེ་ཝན་གྱི་ཉེས་ཅན་པའི་མིང་ཐོའི་ནང་ཡོད་པ་མ་ཟད། ཕ་གིར་ཁྲིམས་རྩོད་པའི་ལས་ཀ་ཁྲག་ཁྲག་ཡོད་པ་གཡུགས་ཏེ་ཡོང་བ་ཡིན་”  སོགས་ནང་མོལ་གྱི་ཚུལ་དུ་རྗོད་ཀྱིན་འདུག ད་དུང་ཁག་མེད་ས་ཞིག་ལ། ཁོང་ཚོས་ང་ལ་བཏང་བའི་མགྲོན་ཤོག་གི་རྒྱབ་ངོས་སུ་ཐའེ་ཝན་ལ་མ་ཡུམ་ཀྱི་འདུ་ཤེས་འཛིན་དགོས་པའི་སྙན་ངག་གསོན་ཉམས་ལྡན་པ་ཞིག་བྲིས་འདུག་པ་ངས་རྗེས་ནས་མཐོང་སོང་། (རྩོམ་འདིའི་ཚན་པ་ཕྱི་མའི་ནང་སྙན་ངག་དེ་བཀོད་ཡོད)

ཡང་དགོང་མོ་ཞིག་ལ་སྐུ་ཞབས་ཐིམ་མུའུ་ཇུ་ལགས་ཀྱིས་གསོལ་ཆང་བཞེས་ཞོར། ཁྱོད་འདི་ཆབ་སྲིད་ལྟ་གྲུབ་ཐོག་གི་འབྲོག་པ་རུ་སྤོར་ ( 政治理论上的游牧民族  ) ཞིག་རེད་ཟེར་ནས་ང་ལ་ཀུ་རེ་རྩེས་སོང་། སྐད་ཆ་དེའི་ཕུགས་ན་ང་ལ་རང་བཙན་གྱི་ལྟ་བ་རང་རྐྱ་འཕེར་བ་ཞིག་མི་འདུག་ཟེར་ནས་གོ་རྒྱུ་བཏང་པ་གསལ་བོ་རེད།  དགོང་མོ་དེར་ངས་ཉིན་ཐོའི་ནང་[རང་བཙན་ཞེས་ཁ་ན་མ་ཐོ་བའི་བརྗོད་གཞི་ཞིག་ཁྱེར་ནས་ཡོང་ཡོད་མོད། ཕར་ནས་ཐོན་ཁར་སྐྱེས་དམན་སྨན་ཁང་ལ་ཕྱིན་པའི་རྔམ་སྐྲག་ད་དུང་ཡལ་མེད་ཁར། དགུ་བཅུ་གསུམ་ཚོགས་པའི་ལས་ཡུན་རྫོགས་གྲབས་ཡོད་སྟབས་བྲེལ་འཚུབ་འཕར་མ་ཞིག་གིས་མགོ་ནང་བཏུམ་འདུག དེར་བརྟེན། རང་བཙན་གྱི་སྐད་ཆ་དེ་ང་དང་ཐག་རིང་ཐག་རིང་ཤིག་ལ་ཕྱིན་ཚར་འདུག མ་གཞི་ནས་བོད་རང་བཙན་ཟེར་བའི་ཡིག་རྡོག་མཁྲེགས་པོ་འདི་ཚོ་ཡིན་ན། སྟོན་པ་ཡེ་ཤུ་འདོགས་བྱེད་ཀྱི་ཁྲམ་ཤིང་གི་ལྕགས་གཟེར་ནང་བཞིན་མི་ཆུང་ཆུང་ཞིག་གི་ལུས་ངག་ཡིད་གསུམ་པོ་དམ་དུ་འདོགས་བྱེད་ཅིག་ག་ནས་ཡིན། ང་ཙམ་ཞིག་གིས་འཐབ་རྩོད་ཁུངས་མ་འཁྱོལ་རུང་མི་ཚེ་བསྐྱལ་སྟངས་རེ་ཡོད་ཆོག་ལ། མ་གཞི་སྲིད་དོན་འཆར་སྒོའི་ཐད་རྒྱལ་ཁབ་མེད་པའི་རིང་ལུགས་དང་། ཝུའུ་ཐོ་པེ་ཡ། འཚེ་མེད་ཞི་བའི་བསྟི་གནས་སོགས་ཀྱང་གོང་བཀུར་བྱ་རྒྱུར་དཀའ་ངལ་ཅང་མི་འདུག ཕྱོགས་མཚུངས་རང་བཙན་མ་ཡིན་པའི་ཐབས་ལམ་ཞིག་གིས་བོད་ལ་དུས་བདེ་གནས་འཇམ་ཡོང་ཐུབ་ན་དེ་ལ་དགག་བྱ་མེད་མོད། ངའི་བློ་ངོར་དེ་ལྟ་བུའི་ཐབས་ལམ་ཞིག་མ་གྲུབ་པ་དེ་ང་རང་ཉིད་ཀྱི་དཀའ་ངལ་ཡིན་ལས་ཆེ] འདི་ལྟར་བྲིས་འདུག

ངས་ཐའེ་ཝན་ནས་རང་སེམས་ཉུལ་བའི་གྲུབ་དོན་ལ་བསྡོམས་ཤིག་བརྒྱབ་ན། མིའི་བསམ་བློའི་ནང་བརྩེ་ཞེན་དང་སྐྱོན་བརྗོད་གཉིས་མཉམ་གནས་བྱེད་རྒྱུ་དེ་ནང་འགལ་ཞིག་མིན་མོད། རང་བཙན་འཐབ་རྩོད་དང་རིགས་ཀྱི་ཞེན་པ་གཉིས་འགལ་བ་ཡིན་པའི་བློ་ཞིག་ང་ལ་སྔོན་ནས་ཡོད་ཁར། ད་ཆ་སེམས་ཚོར་དེ་ཤུགས་ཆེ་རུ་འགྲོ་བཞིན་འདུག  བོད་རང་བཙན་འཐབ་རྩོད་ཁྲོད་ང་རང་ཞུགས་ཁུལ་རེད་དེ། འདི་ཡང་ཕར་དེད་ན་ཡུལ་ལུང་དང་ཤ་རུས་ཀྱི་ཞེན་ཁོག་ལ་འབྲེལ་བ་མི་འདུག  གཙོ་བོ་གཉའ་གནོན་འཁུར་འདུན་མེད་པ་དང་མི་ལ་ཆེ་མཐོང་དགོས་པའི་ཚོར་བ་སྲབ་བོ་ཞིག་གིས་སྐྱེད་པར་སྣང་། ཆབ་སྲིད་རྐྱང་བའི་ངོས་ནས་བཤད་ན་བཙན་པོའི་སྙིང་སྟོབས་ཕོ་ཕྱི་རབས་པའི་འགན་འཁྲི་ཡིན་ཟེར་བའི་ཚིག་ཚོན་པོ་འདི་ཚོ། ད་ཆ་ང་ར་བཟི་དུས་མ་གཏོགས་ངའི་ཁ་ནས་ཐོན་ཐུབ་ཀྱི་མི་འདུག མ་འོངས་པའི་བོད་རང་བཙན་གྱི་རྒྱལ་ཁབ་དེའང་བོད་རིགས་རྐྱང་བ་ཞིག་དང་། བོད་ཀྱི་ཤེས་རིག་ཁོ་ན་མ་གཏོགས་མེད་པའི་ཡུལ་ལུང་སྦུབས་སུ་དོག་པོ་ཞིག་ཡིན་ས་མི་འགྲོ་བའང་ཟུར་བལྟས་ལེབ་མཐོང་རེད།

རྩོམ་པ་པོས་མཆན:   [ ཁ་སྔོན་ཕྱི་ཟླ་ལྔ་བར་ཐའེ་ཝན་བོད་ཀྱི་མཛའ་གྲོགས་ཚོགས་པ་གཙོས། ཚོགས་པ་ཁག་མཉམ་འབྲེལ་འོག རྒྱལ་ས་ཐའེ་པེ་རུ་<< ཐའེ་ཝན་ཡང་རྩ་སྟོང་དུ་འགྲོ་བའི་རྒྱལ་ཁབ་ཅིག་ལ་མི་འགྱུར་བའི་ཆེད་དུ། ལྷོ་སོག་དང་། ཡུ་གུར། བོད་བཅས་ཀྱི་ཐོག་ན་བློ་སྐྱེད་གང་ཡོིད། >>ཅེས་པའི་བརྗོད་གཞིའི་ཐོག རྒྱལ་སྤྱི་རང་བཞིན་གྱི་ཚོགས་འདུ་ཞིག་འཚོགས་པ་དང་།  ཚོགས་ཐོག་དེར་ལྷོ་སོག་དང་།  ཡུ་གུར་གྱི་འབྲེལ་ཡོད་མི་སྣ་གདན་ཞུས་གནང་འདུག་ལ། ཕྲན་བོད་ཀྱི་མིང་ཐོག་ནས་ཕྱིན།  སྐབས་དེའི་མཐོང་ཐོས་དང་། བརྒྱུད་ལམ་ཁག་གིས་ཡིག་ངག་གཉིས་ཐོག་ནས་བཅར་འདྲི་བྱས་པ་བཅས་གཞིར་བཞགས་ཏེ། སྙན་ཞུའི་རྩོམ་ཡིག་གི་འབྲི་ཐབས་སྤྱད་ནས་རྩོམ་འདི་བྲིས་ཤིང་། རྩོམ་ཡིག་འདི་ནི་དེའི་ནང་གི་ཚན་པ་གཅིག་ཡིན། ]