ཕྱི་ཚེས་ ༥ ཉིན་ལྷོ་ཨ་མེ་རི་ཀའི་རྒྱལ་ཁབ་བྷོ་ལི་ཝེ་ཡཱ་ ( Bolivia) དང་ཝེ་ནེ་ཛུ་ལཱ་ ( Venezuela)། དེ་བཞིན། ནེ་ཁཱ་རཱ་གྷི་ (Nicaragua) གསུམ་གྱིས་ཨ་རིའི་གསང་བ་ཕྱིར་བསྒྲགས་བྱེད་མཁན་སི་ནོལ་ཌིན་ལ་ཆབ་སྲིད་ཀྱི་སྐྱབས་བཅོལ་བ་ངོས་ལེན་བྱེད་ཀྱི་ཡིན་པའི་ཁས་ལེན་བྱས་འདུག
ཕྱི་ཚེས་ ༥ ཉིན་ཝེ་ནེ་ཛུ་ལཱའི་རང་བཙན་དུས་དྲན་ཉིན་མོར། སྲིད་འཛིན་མཱ་ཌོ་རོབ་ (Nicola Maduro) ཀྱིས། “ ངས་འགྲོ་བ་མིའི་བདེ་རྩའི་ངོ་བོའི་སྟེང་། ཨ་རིའི་གསང་བ་ཕྱི་བསྒྲགས་བྱེད་མཁན་སི་ནོལ་ཌིན་ལ་ཆབ་སྲིད་ཀྱི་སྐྱབས་བཅོལ་ངོས་ལེན་བྱེད་ཀྱི་ཡིན། ”ཞེས་བསྒྲགས་ཡོད་པ་དང་། དེ་བཞིན། ནེ་ཁཱ་རཱ་གྷིའི་སྲིད་འཛིན་ཨོར་ཊེ་གྷ་ཡིས་ཀྱང་ “ སྐུ་ཞབས་སི་ནོལ་ཌིན་ལགས་གནས་སྟངས་གཞན་ཞིག་གི་འོག་ནས་ནེ་ཁཱ་རཱ་གྷིའི་རྒྱལ་ཁོངས་སུ་བསླེབ་ཐུབ་པ་ཡི་ན། ང་ཚོས་ཁོང་ལ་སྐྱབས་བཅོལ་བར་ངོས་ལེན་དང་དགའ་བསུ་ཞུ་རྒྱུ་ཡིན” ཞེས་བརྗོད་འདུག
གསར་ལམ་ཁག་ཏུ་གནས་ཚུལ་ཐོན་པ་ལྟར་ན། སྐུ་ཞབས་སི་ནོལ་ཌིན་གྱིས་ཡང་བསྐྱར་རྒྱལ་ཁབ་ ༦ ཙམ་ལ་སྐྱབས་བཅོལ་སྙན་ཞུ་ཕུལ་ཡོད་འདུག་ཀྱང་། ཨ་རིའི་གཞུང་གིས་གནོན་ཤུགས་སྤྲོད་པར་དོགས་ཏེ་རྒྱལ་ཁབ་གང་དག་ཡིན་མིན་གསལ་ཁ་མི་འདུག སི་ནོལ་ཌིན་གྱིས་ཨུ་རུ་སུའི་གཞུང་ལ་ཕུལ་བའི་སྐྱབས་བཅོལ་སྙན་ཞུ་ཕྱིར་འཐེན་བྱས་སྟབས། ཨུ་རུ་སུའི་ཕྱི་སྲིད་བློན་ཆེན་གཞོན་པ་སེར་གྷེ( Sergey A Ryabkov) ཡིས་སི་ནོལ་ཌིན་གྱིས་ཨུ་རུ་སུའི་ས་ཐོག་ཏུ་སྐྱབས་བཅོལ་ཞུ་ཐབས་མེད་ཅིང་ཁོས་རང་ཉིད་འགྲོ་སའི་ཡུལ་ཞིག་གང་མགྱོགས་འདེམས་དགོས་པའི་འབོད་སྐུལ་ཞུས་ཡོད་པ་རེད།
ཕྱི་ཚེས་ ༤ ཉིན་ཨུ་རུ་སུའི་སྲིད་འཛིན་པུ་ཊིན་ (Putin) གྱིས་འབྱུང་འགྱུར་ཕྱི་ཟླ་ ༩ པའི་ནང་སྲིད་འཛིན་པུ་ཊིན་གྱི་གཙོ་སྐྱོང་འོག ཨུ་རུ་སུའི་ནང་རྒྱལ་ཁབ་ ༢༠ ཡི་ཚོགས་འདུ་ཞིག་འཚོགས་འཆར་ཡོད་སྐོར་ཨ་རིའི་སྲིད་འཛིན་ཨོ་བྷ་མར་བཏང་ཡོད་ཀྱང་། ཨ་རིའི་གཞུང་གིས་སི་ནོལ་ཌིན་མུ་མཐུད་ཨུ་རུ་སུའི་རྒྱལ་སྤྱིའི་གནམ་ཐང་དུ་སྦས་སྐུང་བྱེད་བཅུག་པ་ཡིན་ན། ཨ་རིའི་སྲིད་འཛིན་ཨོ་བྷ་མ་ཚོགས་བཅར་བྱེད་ཐབས་མེད་པའི་རྣམ་འགྱུར་བསྟན་ཡོད་འདུག
ཕྱི་ཟླ་ ༦ ནང་དབྱིན་ཇིའི་གྷ་ཌེན་ (The Guardian) གསར་འགོད་པ་གྷུ་ལུན་གྷི་རིན་ཝལ་ཌི་ ( Glenn Greenwald ) དང་གློག་བརྙན་བཟོ་སྐྲུན་པ་ལྕམ་ལོ་རཱ་ ( Laura Poitra) གཉིས་ཀྱིས་སི་ནོལ་ཌིན་ལ་བཅར་འདྲི་ཐེངས་གཉིས་པ་བྱས་པའི་བརྙན་པར་ཞིག ཕྱི་ཚེས་ ༨ ཉིན་གྷ་ཌེན་གསར་ཤོག་སྟེང་བཏོན་ཡོད་པའི་ནང་། སི་ནོལ་ཌིན་གྱིས། “ང་རང་ཨ་རིའི་གསང་བའི་ལས་དོན་གྱི་སྒྲིག་གཞི་དང་འགལ་ཡོད་ཀྱང་། ཨ་རིའི་གཞུང་གིས་མི་སྒེར་གྱི་རང་དབང་ལ་ཚད་འཛིན་བྱེད་ཀྱི་ཡོད་སྟབས་ངས་གསང་བ་ཕྱིར་བསྒྲགས་བྱས་པ་ཡིན། ཨ་རིའི་གཞུང་གིས་ངས་ནག་ཉེས་ཆེན་པོ་ཞིག་བཟོས་ཡོད་པར་ངོས་འཛིན་དང་། ཨ་རིའི་དགྲ་བོ་ཚོར་ཨ་རིའི་གསང་བའི་གནས་ཚུལ་ཧ་གོ་བཅུག་པར་རོགས་རམ་བྱས་ཚུལ་བརྗོད་ཀྱི་ཡོད་ཀྱང་། ཨ་རིའི་གཞུང་གིས་མི་མང་ས་ཡ་མང་པོའི་ཁ་པར་དང་གློག་འཕྲིན་ཡིག་ཚགས་བཅས་ལ་ལྐོག་མྱུལ་བྱེད་ཀྱིན་ཡོད་པ་དེ་སུ་ཞིག་གིས་ཕྱི་བསྒྲགས་བྱས་ཀྱང་། ཨ་རིའི་གཞུང་གིས་མི་དེར་ནག་ཉེས་འཛུགས་རྒྱུ་ཡིན་པ་གསལ་བོ་རེད། ཨ་རིའི་རྒྱལ་ཁབ་འདི་གཞི་རྩའི་ཡག་པོ་ཡོད་ཀྱང་། དེང་སང་ཨ་རིའི་གཞུང་གིས་གཞུང་གི་དམིགས་ཡུལ་བསྒྲུབ་ཆེད་འགྲོ་སོང་ཚད་མེད་བཏང་སྟེ་མི་མང་གི་རང་དབང་ལ་ཚོད་འཛིན་བྱེད་ཀྱི་ཡོད་པ་རེད། ”ཅེས་བརྗོད་ཡོད་འདུག
ལྷོ་ཨ་མེ་རི་ཁའི་རྒྱལ་ཁབ་གསུམ་གྱིས་སི་ནོལ་ཌིན་ལ་ཆབ་སྲིད་ཀྱི་སྐྱབས་བཅོལ་བར་ངོས་ལེན་བྱ་རྒྱུ་ཡིན་པ་གསལ་བསྒྲགས་བྱས་ཡོད་ཀྱང་། ཨུ་རུ་སུའི་གཞུང་གིས་སི་ནོལ་ཌིན་ཨུ་རུ་སུའི་རྒྱལ་སྤྱིའི་གནམ་ཐང་ནས་ཕྱིར་སྐྱོད་ལ་རྒྱབ་སྐྱོར་མ་བྱས་ཚེ། ཁོ་རང་མུ་མཐུད་ལྷག་རྒྱུ་ཡིན་པ་དང་། གལ་སྲིད་ཨུ་རུ་སུའི་གཞུང་གིས་སི་ནོལ་ཌིན་ཕྱི་ལོགས་སུ་འགྲོ་རུ་བཅུག་པ་ཡིན་ན། ཨ་རི་དང་ཨུ་རུ་སུ་རྒྱལ་ཁབ་གཉིས་བར་གྱི་འབྲེལ་ལམ་ཇེ་སྡུག་ཏུ་འགྲོ་ངེས་ཡིན་པར་ཚོད་དཔག་བྱེད་ཀྱིན་ཡོད།
