འབྲུག་རྒྱལ་ཁབ་ཀྱི་སྐབས་གཉིས་པའི་སྲིད་བློན་འོས་བསྡུའི་ཁྲོད་མི་སེར་དམངས་གཙོ་ཚོགས་པའི་ཚོགས་གཙོ་ཚེ་རིོང་སྟོབས་རྒྱལ་ལགས་སུ་རྒྱལ་ཁ་ཐོབ་ཡོད་པ་རེད།
ཕྱི་ཚེས་ ༡༣ ཉིན་འབྲུག་རྒྱལ་ཁབ་ཀྱི་རྒྱལ་ཡོངས་གྲོས་ཚོགས་འོས་བསྡུ་ཆེན་པོ་ཐེངས་གཉིས་པ་དེ་གནང་ཡོད་པ་དང་། གྲོས་ཚོགས་འཐུས་མི་ཁྱོན་ ༤༧ ཡོད་པ་ལས་ཐེངས་འདིར། ད་ལྟའི་གཞུང་འཛིན་ཚོགས་པ་སྟེ་འབྲུག་ཕུན་སུམ་ཚོགས་པར་འོས་གྲངས་ ༡༥ ཐོབ་ཡོད་པ་དང་། མི་སེར་དམངས་གཙོ་ཚོགས་པ་ (PDP) ལ་འོས་གྲངས་ ༣༢ ཐོབ་སྟེ་མི་སེར་དམངས་གཙོ་ཚོགས་པའི་ཚོགས་གཙོ་ཚེ་རིང་སྟོབས་རྒྱལ་ལགས་ཀྱིས་འབྲུག་རྒྱལ་ཁབ་ཀྱི་སྲིད་བློན་ཐེངས་གཉིས་པའི་འོས་འགན་བཞེས་རྒྱུ་ཡིན་འདུག
མི་སེར་དམངས་གཙོ་ཚོགས་པ་ནི་འབྲུག་རྒྱལ་པོ་འཇིགས་མེད་སེང་གེ་དབང་ཕྱུག་མཆོག་གི་ཨ་ཁུ་སངས་རྒྱས་དངོས་འགྲུབ་ཀྱིས་གསར་འཛུགས་བྱས་པའི་ཆབ་སྲིད་ཚོགས་པ་ཞིག་ཡིན་པ་དང་། ༢༠༠༨ ལོའི་རྒྱལ་ཡོངས་གྲོས་ཚོགས་འོས་བསྡུའི་སྐབས་འོས་གྲངས་ ༢ ལས་ཐོབ་མེད།
ད་ལོ་ཕྱི་ཟླ་ ༥ པའི་ནང་འབྲུག་གཞུང་གི་འོས་བསྡུ་ལྷན་ཁང་གིས། འབྲུག་རྒྱལ་ཁབ་ནང་ཆབ་སྲིད་ཚོགས་པ་ ༤ ཡོད་པ་ལས་ཚོགས་པ་གཉིས་དངོས་གཞིའི་འོས་འགྲན་ནང་ཞུགས་དགོས་པའི་བཀོད་ཁྱབ་བཏང་བ་ལྟར། སྔོན་འགྲོའི་འོས་འདེམས་ཁྲོད་འབྲུག་ཕུན་སུམ་ཚོགས་པར་འོས་གྲངས་ ༣༣ ཐོབ་ཡོད་པ་དང་། མི་སེར་དམངས་གཙོ་ཚོགས་པར་འོས་གྲངས་ ༡༢ ཐོབ་ཡོད། འབྲུག་མཉམ་རུབ་ཚོགས་པར་འོས་ཤོག་ ༢ ལས་ཐོབ་མེད་ཀྱང་ཕྱིས་སུ་མི་སེར་དམངས་གཙོ་ཚོགས་པར་ཟླ་སྒྲིལ་བཏང་ཡོད་འདུག
འབྲུག་རྒྱལ་ཁབ་དེ་རྫོང་ཁག་ ༢༠ ལས་གྲུབ་ཡོད་པ་དང་། ཆབ་སྲིད་ཚོགས་པ་ ༤ ཡོད་པ་དག་ནི། འབྲུག་ཕུན་སུམ་ཚོགས་པ་ (DPT) དང་མི་སེར་དམངས་གཙོ་ཚོགས་པ་ (PDP)། འབྲུག་མཉམ་རུབ་ཚོགས་པ་ (DNT)། འབྲུག་སྦྱིར་དབང་ཚོགས་པ་ (DCT) བཅས་ལས། འབྲུག་ཕུན་སུམ་ཚོགས་པ་དང་མི་སེར་དམངས་གཙོ་ཚོགས་པ་གཉིས་ནི་འབྲུག་རྒྱལ་ཁབ་ཀྱི་ཆབ་སྲིད་ཁྲོད་ཤུགས་རྐྱེན་ཆེ་ཤོས་ཆགས་ཡོད།
འབྲུག་རྒྱལ་ཁབ་ནི་རྒྱ་གར་གྱི་སྲུང་སྐྱོབ་རྒྱལ་ཁབ་ཅིག་ཡིན་པ་དང་། རྒྱ་གར་གཞུང་གིས་འབྲུག་རྒྱལ་ཁབ་ལ་དཔལ་འབྱོར་དང་བདེ་སྲུང་ཐོག་རོགས་སྐྱོར་བྱེད་ཀྱིན་ཡོད་མ་ཟད། འབྲུག་པ་དག་རྒྱ་གར་ནང་ལས་ཀ་དང་སློབ་སྦྱོང་། ཡུལ་སྐོར་བཅས་སུ་སྐྱོད་པར་ཐོངས་ཆེན་ཞུ་མི་དགོས་པའི་མཐུན་རྐྱེན་སྤྲོད་ཡོད་པ་རེད། ལོ་སྔོན་མའི་ནང་འབྲུག་གི་སྲིད་བློན་འཇིགས་མེད་འཕྲིན་ལས་ཀྱིས་རྒྱ་གར་གཞུང་ལ་བཀའ་འདྲི་མ་ཞུས་པར། རྒྱ་ནག་གི་སྲིད་བློན་ཝན་ཅཱ་པོ་ལ་ཐུག་འཕྲད་དང་རྒྱ་ནག་ནས་སྤྱི་སྤྱོད་རླངས་འཁོར་ ༢༠ ནང་འདྲེན་བྱས་སྟབས། རྒྱ་གར་དང་འབྲུག་གཉིས་བར་གྱི་འབྲེལ་ལམ་ཇེ་སྡུག་ཏུ་ཕྱིན་ཡོད། ད་ལོའི་ཕྱི་ཟླ་ ༦ པའི་ཟླ་མཇུག་ལ་རྒྱ་གར་གཞུང་གིས་འབྲུག་རྒྱལ་ཁབ་ལ་སོལ་རླངས་དང་ས་སྣུམ་སོགས་ཀྱི་རོགས་སྐྱོར་མཚམས་འཇོག་བྱས་སྟབས། འབྲུག་རྒྱལ་ཁབ་ནང་སོལ་རླངས་དང་ས་སྣུམ་གྱི་རིན་གོང་ལྡབ་གཉིས་ལྷག་འཕར་ཏེ་དཀའ་ངལ་ཆེན་པོ་འཕྲད་ཡོད་འདུག
ཁ་སང་ཕྱི་ཚེས་ ༡༤ ཉིན། མི་སེར་དམངས་གཙོ་ཚོགས་པར་འོས་བསྡུའི་རྒྱལ་ཁ་ཐོབ་པར། རྒྱ་གར་གྱི་སྲིད་བློན་མན་མོ་ཧན་སིན་( Manmohan Singh) ལགས་ཀྱིས་ “ མི་སེར་དམངས་གཙོ་ཚོགས་པར་མང་མོས་འོས་ཤོག་ཐོབ་པར་དགའ་བསུ་ཞུ་རྒྱུ་དང་། རྒྱ་གར་གཞུང་གིས་ཧི་མ་ཡའི་འབྲུག་རྒྱལ་ཁབ་ལ་མངོན་སུམ་འཛེམས་མེད་ཀྱིས་རོགས་སྐྱོར་བྱ་རྒྱུ་ཡིན་” ཞེས་བརྗོད་ཡོད་འདུག
༢༠༠༠ ལོ་ནས་བཟུང་འབྲུག་རྒྱལ་པོ་འཇིགས་མེད་སེངྒེ་དབང་ཕྱུག་མཆོག་གིས་འབྲུག་གི་ཆབ་སྲིད་ལ་བསྐྱར་བཅོས་ཆེན་པོ་བཏང་ཡོད་པ་མ་ཟད། ཁོང་གི་དབང་ཆ་མང་པོ་ཞིག་བཀའ་བློན་ལྷན་ཚོགས་ལ་གནང་ཡོད་པ་དང་། ཐ་ན་གྲོས་ཚོགས་ཀྱིས་མང་མོས་ཐོག་རྒྱལ་པོ་ཁོ་རང་ཡང་ཕྱིར་འཕུད་གཏོང་ཆོག་པའི་ཆེས་མཐོའི་དབང་ཆའང་སྤྲད་ཡོད། ༢༠༠༥ ལོར་འབྲུག་རྒྱལ་ཁབ་ཀྱི་རྩ་ཁྲིམས་གཏན་འབེབས་དང་། ༢༠༠༨ ལོའི་སྔོན་ལ་རྒྱལ་པོས་ཁོང་གི་རྒྱལ་སྲས་ཆེ་བ་འཇིགས་མེད་གེ་སར་རྣམ་རྒྱལ་དབང་ཕྱུག་ལགས་སུ་རྒྱལ་སྲིད་སྤྲོད་རྒྱུའི་གསལ་བསྒྲགས་གནང་ཡོད་ཀྱང་། ༢༠༠༦ ལོའི་ཟླ་ ༡༢ ནང་གློ་བུར་དུ་རྒྱལ་སྲས་ཆེ་བར་རྒྱལ་སྲིད་གནང་ཡོད་པ་དང་། སྲིད་དབང་ཡོངས་རྫོགས་མི་མང་གིས་འོས་འདེམས་གནང་བའི་གྲོས་ཚོགས་འཐུས་མིར་སྤྲད་ཡོད་པ་རེད། ༢༠༠༨ ལོར་དམངས་གཙོའི་འོས་འདེམས་བརྒྱུད་དེ་འབྲུག་རྒྱལ་ཁབ་ཀྱི་སྲིད་བློན་ཐོག་མ་འཇིགས་མེད་འཕྲིན་ལས་བདམས་ཐོན་བྱུང་ཡོད།
བཀྲ་ཤིས་བདེ་ལེགས་ཡོད། ཡིན་ནའི། དྲག་ཤོས་ནང་ཁུལ་གཅིག་པུ་ནས་ཡང་བསྐོར་བསྐྱར་བསྐོར་མི་གནང་བ་ཡོང་བར་ཤོག