དེ་རིང་ཕྱི་དྲོར་བོད་ཀྱི་སྨན་རྩིས་ཁང་ཚོགས་ཁང་དུ་༸གོང་ས་མཆོག་གི་ཕྱག་དེབ་ ༢༨༠ ཙམ་འགྲེམས་སྟོན་དང་འབྲེལ་བགྲོ་གླེང་ཞིག་ཚོགས་སོང་།
༸གོང་ས་མཆོག་གི་ཕྱག་དེབ་ཕྱོགས་བསྡུ་གནང་མཁན་མགོན་པོ་རྒྱལ་ལགས་ཀྱིས་དེ་རིང་ཕྱི་དྲོའི་ཆུ་ཚོད་ ༢ པའི་སྟེང་། བོད་ཀྱི་སྨན་རྩིས་ཁང་ཚོགས་ཁང་དུ་༸གོང་ས་མཆོག་གི་གསུང་རྩོམ་བོད་ཡིག་ནང་ཡོད་པའི་དེབ་ ༡༡༦ ཙམ་དང་། དབྱིན་ཡིག་ཐོག་ཡོད་པ་ ༡༣༨། དེ་བཞིན། རྒྱ་ཡིག་དང་རྒྱ་གར། ཀོ་རི་ཡ་སོགས་ཀྱི་ཡི་གེའི་ནང་ཡོད་པ་བཅས་ཁྱོན་ཕྱག་དེབ་ ༢༨༠ ཙམ་འགྲེམས་སྟོན་གནང་བ་དང་འབྲེལ། རྣམ་རྒྱལ་གྲྭ་ཚང་གི་གྲྭ་ཐུབ་བསྟན་ཡར་འཕེལ་ལགས་དང་། བོད་ཀྱི་དཔེ་མཛོད་ཁང་གི་ཉམས་ཞིབ་པ་ན་ག་སངས་རྒྱས་བསྟན་དར་ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་ཨ་འབྲུག་དཀོན་མཆོག་ལགས་བཅས་གདན་འདྲེན་གྱིས་༸གོང་ས་མཆོག་གི་དགོངས་གཞི་དང་བོད་མིའི་ལག་ལེན་བར་གྱི་ཁྱད་པར་དང་། ༧གོང་ས་མཆོག་གི་བཀའ་སློབ་ལམ་སྟོན་གྱི་གལ་ཆེན་རང་བཞིན། དེ་བཞིན་རྒྱ་ནག་གཞུང་དང་རྒྱ་ནག་མི་མང་གིས་༸གོང་ས་མཆོག་ལ་ལྟ་སྟངས་སོགས་ཀྱི་ཐོག་གཏམ་བཤད་གནང་སོང་།
སྐབས་དེར་གྲྭ་ཐུབ་བསྟན་ཡར་འཕེལ་ལགས་ཀྱིས་༧གོང་ས་མཆོག་གིས་བོད་སྤྱི་དོན་ལ་སྐུ་ངལ་མང་པོ་བསྐྱོན་ཡོད་པ་དང་། ཁོང་གི་ལམ་སྟོན་དགོངས་བཞེད་ཁག་ཧ་ཅང་ཕུགས་རྒྱང་རིང་བོ་དང་རྩ་ཆེན་པོ་ཡིན་ཡང་བོད་མི་ཚོས་ཁོང་ལ་དད་པ་དག་སྣང་ཅི་ཙམ་བྱེད་ཀྱི་ཡོད་པ་དེ་ལྟ་བུ་ཞིག་ཁོང་གི་དགོངས་གཞི་བསྒྲུབ་ཐུབ་ཀྱི་མེད་སྐོར་བརྗོད་བྱུང་། ན་ག་སངས་རྒྱས་བསྟན་དར་ལགས་ཀྱིས་༧གོང་ས་མཆོག་གིས་བཀའ་སློབ་གནང་བཞིན་པ་དེ་དག་ཧ་ཅང་རྩ་ཆེན་པོ་དང་གཏིང་ཟབ་མོ་ཡིན་པ་དང་། ལོ་ངོ་ཉིས་སྟོང་ལྔ་བརྒྱའི་སྔོན་ལ་སྟོན་པ་ཤཀྱཱ་ཐུབ་པས་བཀའ་གནང་བ་དེ་དག་ཀྱང་འདི་ལས་ལྷག་ཅིག་མིན་སྐོར་བརྗོད་བྱུང་། དེ་བཞིན། ཨ་འབྲུག་དཀོན་མཆོག་ལགས་ཀྱིས་དེང་སྐབས་རྒྱ་ནག་ནང་༧གོང་ས་མཆོག་གི་བཀའ་རྩོམ་སྐོར་ལ་སློབ་སྦྱོང་དང་ཉམས་ཞིབ་ཤུགས་ཆེན་པོ་བྱེད་ཀྱིན་ཡོད་ཀྱང་བོད་པ་རང་ངོས་ནས་བྱིན་རླབས་ཆེན་པོ་དང་རྩ་ཆེན་པོ་ཡིན་རབས་ཙམ་ལས། ཁོང་གི་བཀའ་སློབ་དང་ཕྱག་རྩོམ་ཁག་ལ་སློབ་སྦྱོང་དང་དཔྱད་ཞིབ། སྤྱི་ཚོགས་རང་བཞིན་གྱི་བགྲོ་གླེང་སོགས་གནང་ཐུབ་ཀྱི་མེད་སྐོར་བརྗོད་བྱུང་།
མཇུག་ཏུ་གསར་འགོད་པས་ཕྱག་དེབ་ཕྱོགས་བསྡུ་གནང་མཁན་མགོན་པོ་རྒྱལ་ལགས་སུ་ཕྱག་དེབ་ཕྱོགས་བསྡུས་ཀྱི་དམིགས་ཡུལ་དང་། མ་འོངས་པར་ལས་གཞི་འདིར་འཆར་གཞི་ཅི་ཡོད་སྐོར་དྲིས་པར། ཁོང་གིས། “ང་རང་གིས་ད་ལྟའི་བར་༸གོང་ས་མཆོག་གི་ཕྱག་དེབ་ ༥༧ ཙམ་བཀླགས་པ་དང་། དེའི་བརྒྱུད་རིམ་ཁྲོད་དུ་༸གོང་ས་མཆོག་ལ་ཕྱག་དེབ་ག་ཚོད་ཅིག་ཡོད་དམ་བསམ་པའི་དྲི་བ་ཞིག་བསླེབས་སོང་། དེ་ནས་སྒེར་ངོས་ནས་འགྲོ་སོང་བཏང་ཏེ་སྐུ་སྒེར་ཡིག་ཚང་དང་དྷ་ས་བོད་ཀྱི་དཔེ་མཛོད་ཁང་། དེ་བཞིན་སློབ་གྲྭ་ཁག་གི་དཔེ་མཛོད་སོགས་སུ་སྐོར་བ་བརྒྱབ་ནས་ཕྱག་དེབ་མང་པོ་བསྡུ་རུབ་བྱས་ཏེ་ལོ་ ༡ ལྷག་ཕྱིན་པ་དང་། ད་ལྟའི་བར་ས་གནས་ཁག་ ༡༥ ཙམ་ནང་ཕྱག་དེབ་འགྲེམས་སྟོན་བྱས་ཡོད་ལ། མ་འོངས་པར་མུ་མཐུད་དུ་དགོན་སྡེ་དང་སློབ་གྲྭ་ཁག་ཏུ་འགྲེམས་སྟོན་བྱ་རྒྱུ་དང་། ལྷག་པར་དུ་རྒྱ་གར་གྱི་མཐོ་སློབ་ ༥ ཡི་ནང་འགྲེམས་སྟོན་བྱེད་པར་འབྲེལ་བ་བྱེད་བཞིན་པའི་སྒང་ཡིན། ལས་གཞི་འདི་འགྲེམས་སྟོན་ཁོ་ན་ལ་དམིགས་པ་ཞིག་མིན། ༸གོང་ས་མཆོག་བོད་མིའི་བླ་ན་མེད་པའི་དབུ་ཁྲིད་ཅིག་ཡིན་པའི་ཆ་ནས་བོད་མི་ཚོས་ཁོང་གི་དགོངས་གཞི་དང་མཛད་འཕྲིན་རྣམས་ཤེས་རྟོགས་དང་ལག་ལེན་ཡོང་ཐབས་བྱེད་རྒྱུ་གལ་ཆེན་ཡིན་པ་དང་། ལྷག་པར་དུ་མ་འོངས་པར་བོད་ལ་ལོག་ཐུབ་ཚེ། གཞན་ཡུལ་ནས་༸གོང་ས་མཆོག་གིས་བོད་སྤྱི་བའི་དོན་དུ་སྐུ་ངལ་ཅི་ཙམ་བསྐྱོན་ཡོད་པ་དང་། མཛད་པ་འཕྲིན་ལས་ཇི་ལྟར་བསྐྱངས་པ་སོགས་བོད་རང་གི་སྐད་ཡིག་གི་ཐོག་ནས་ངོ་འཕྲོད་པ་དང་རྩིས་སྤྲོད་ཐུབ་པའི་རེ་བ་བཅངས་ཡོད། ” ཞེས་དང་།
ཁོང་གིས་མུ་མཐུད་བརྗོད་དོན། “ ངས་ལས་འཆར་ལྔ་ཙམ་ཡིག་ཐོག་ཏུ་བསྒྲིགས་ཡོད། དང་པོ་༸གོང་ས་མཆོག་གི་ཕྱག་དེབ་འགྲེམས་སྟོན། གཉིས། ༸གོང་ས་མཆོག་གི་དགོངས་གཞིའི་ཐོག་མཁས་པའི་བགྲོ་གླེང་། གསུམ། གསུང་རྩོམ་འགྲེམས་སྟོན་ཁང་འཛུགས་རྒྱུ། བཞི། གསུང་རྩོམ་ཡིག་བསྒྱུར་སྡེ་ཚན་འཛུགས། ལྔ། རྒྱལ་སྤྱིའི་ཏཱ་ལའི་བླ་མའི་དཔེ་མཛོད་ཁང་ཞིག་འཛུགས་ཐུབ་པའི་རེ་བ་ཡོད། ” ཅེས་བརྗོད་སོང་།
གནས་ཚུལ་རྒྱས་པ་བོད་ཀྱི་དུས་བབ་ཚགས་པར་སྟེང་འགོད་རྒྱུ་ཡིན།
་་་་་་་་་་“ ངས་ལས་འཆར་ལྔ་ཙམ་ཡིག་ཐོག་ཏུ་བསྒྲིགས་ཡོད། དང་པོ་༸གོང་ས་མཆོག་གི་ཕྱག་དེབ་འགྲེམས་སྟོན། གཉིས། ༸གོང་ས་མཆོག་གི་དགོངས་གཞིའི་ཐོག་མཁས་པའི་བགྲོ་གླེང་། གསུམ། གསུང་རྩོམ་འགྲེམས་སྟོན་ཁང་འཛུགས་རྒྱུ། བཞི། གསུང་རྩོམ་ཡིག་བསྒྱུར་སྡེ་ཚན་འཛུགས། ལྔ། རྒྱལ་སྤྱིའི་ཏཱ་ལའི་བླ་མའི་དཔེ་མཛོད་ཁང་ཞིག་འཛུགས་ཐུབ་པའི་རེ་བ་ཡོད། ” ་་་་་་་་་་་་་