དེ་རིང་ཕྱི་དྲོ་དབུས་བོད་མིའི་སྒྲིག་འཛུཊ་ཀྱིས་བོད་ནང་རང་ལུས་མེར་བསྲེཊ་གནང་མཁན་རྒྱལ་གཅེས་པ་གྲྭ་དཀོན་མཆོག་བསོད་ནམས་ལཊ་ཀྱི་ཆེད་གཞུང་འབྲེལ་ཐོག་བསྔོ་སྨོན་མཆོད་འབུལ་གནང་སོང་།
དེ་རིང་ཕྱི་ཚེས་ ༢༤ ཉིན་གྱི་ཕྱི་དྲོའི་ཆུ་ཚོད་ ༤།༠༠ སྟེང་དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བཀའ་ཟུར་ཀིརྟི་རིན་པོ་ཆེ་མཆོག་དབུ་བཞུགས་ཐོག སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་། དབུས་བོད་མིའི་སྒྲིག་འཛུགས་ཀྱི་ལྷན་ཁང་གི་དྲུང་ཆེ་ཆུང་དང་སྲི་ཞུ་ལས་བྱེད་ཡོངས། བཞུགས་སྒར་ཉེ་འཁྲིས་ཀྱི་དགོན་སྡེ་ཁག་གི་གྲྭ་བཙུན་དང་སེར་སྐྱ་མི་མང་བཅས་འདུ་འཛོམས་ཐོག ཟླ་འདིའི་ཕྱི་ཚེས་ ༢༠ ཉིན་བོད་ནང་རང་ལུས་མེར་བསྲེཊ་ཀྱིས་རྒྱ་གཞུང་ངོ་རྒོལ་གནང་སྟེ་འདས་གྲོངས་སུ་ཕྱིན་པའི་སི་ཁྲོན་ཞིང་ཆེན་རྔ་པ་ཁུལ་མཛོད་དགེ་རྫོང་ཐང་སྐོར་སོག་ཚང་སྡེ་བའི་ཕ་བསོད་ནམས་དཔལ་ལྡན་དང་མ་ལན་ཕྲུག་གཉིས་ཀྱི་བུ། སོག་ཚང་དགོན་བཀྲ་ཤིས་ཐེག་མཆོག་གླིང་གི་རང་ལོ་ ༡༨ ཡིན་པའི་གྲྭ་དཀོན་མཆོག་བསོད་ནམས་ལཊ་གཙོས། ད་ལྟའི་བར་བོད་བསྟན་སྲིད་མི་རིགས་ཆེད་རང་ལུས་མེར་བསྲེཊ་གནང་མཁན་གྱི་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ཀྱི་ཆེད་གཞུང་འབྲེལ་ཐོག་བསྔོ་སྨོན་མཆོད་འབུལ་གནང་སོང་།
མཆོད་འབུལ་སྨོན་ལམ་ཐོག་སྲིད་སྐྱོང་བློ་བཟང་སེང་གེ་མཆོག་གིས། ཕྱི་ལོ་ ༢༠༠༩ ལོ་ནས་ད་ལྟའི་བར་བོད་མི་སྐྱ་སེར་ཕོ་མོ་ ༡༢༠ རང་ལུས་མེར་བསྲེཊ་གནང་སྟེ་བོད་མི་ ༡༠༣ འདས་གྲོངས་སུ་གྱུར་ཡོད་པ་དང་། ༢༠༡༣ ལོ་གཅིག་པུའི་ནང་བོད་མི་སྐྱ་སེར་ ༢༢ རང་ལུས་མེར་བསྲེཊ་གནང་ཡོད་པ་ངོ་སྤྲོད་དང་འབྲེལ། ད་ལྟའི་ཆར་རྒྱ་གར་སྤྱི་ཡོངས་དང་། ལྷག་པར་དུ་ཧི་མ་ཅལ་ནང་རྒྱ་གར་གསང་བའི་ལས་ཁུངས་ཀྱིས་ནང་ཆོས་དང་འབྲེལ་བའི་དགོན་སྡེ་ཁག ཉེན་ཁ་ཡོད་པའི་ས་གནས་བཅས་སུ་ལྟ་རྟོག་བྱེད་ཀྱི་ཡོད་པ་དང་། རྒྱུ་རྐྱེན་གཙོ་བོ་ཉེ་ཆར་འཇིགས་སྐུལ་རིང་ལུགས་པས་གནས་མཆོག་རྡོ་རྗེ་གདན་གྱི་མཆོད་རྟེན་ཉེ་འགྲམ་དང་། བོད་པའི་དགོན་པ་བཅས་སུ་འགད་རྫས་གཡུག་ཏེ་གནོད་སྐྱོན་བཟོས་ཡོད་སྟབས། ཚང་མས་ཐུགས་སྣང་དང་གཟབ་གཟབ་བྱ་རྒྱུ་གལ་ཆེན་ཡིན་སྐོར་བརྗོད་བྱུང་།
ཁོང་གིས་༸གོང་ས་མཆོག་སྐུ་ཕྱཱ་དང་མ་འོངས་པར་བོད་མི་ཚོས་དོ་སྣང་གནང་ཕྱོགས་ཐད། “ བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གནད་ཡོད་མི་སྣར་༸གོང་ས་མཆོག་གཙོས་པའི་དགོན་སྡེ་ཁག་གི་བདེ་འཇགས་ལ་དམིགས་བསལ་འགན་འཁུར་དགོས་ཀྱི་འདུག་ཅེས་ཞུས་པ་ལྟར། ད་ལྟའི་ཆར་རྒྱ་གར་གཞུང་གིས་དམིགས་བསལ་༸གོང་ས་མཆོག་གི་སྐུ་ཕྱཱར་དོ་སྣང་དང་སྲུང་སྐྱོབ་གནང་གི་ཡོད། གཙོ་ཆེ་ཤོས་ང་ཚོའི་གཞིས་ཆགས་ཁག་རྒྱ་གར་ཡུལ་མི་དང་འདྲེས་ཡོད་པ་དང་། ལྷག་པར་དུ་ཁ་ཆེ་དང་འབྲེལ་ཡོད་པའི་གཞིས་ཆགས་ཁག་ གིས། བོད་མིའི་སྒྲིག་འཛུགས་ཀྱི་ངོས་ནས་འབོད་སྐུལ་ཞུས་པ་ལྟར་ཕན་ཚུན་གྱི་མཐུན་ལམ་ལ་ཐུགས་སྣང་གནང་རྒྱུ་དང་། རྒྱ་བལ་འབྲུག་གསུམ་དུ་ཡོད་པའི་བོད་མི་ཚང་མས་ཡུལ་མི་དང་ཆོས་ལུགས་ཕན་ཚུན་བར་མཐུན་སྒྲིལ་བྱ་རྒྱུ་གལ་ཆེན་དུ་འཛིན་དགོས་པའི་འབོད་སྐུལ་ཞུ་བཞིན་ཡོད། ” ཅེས་གསུངས་བྱུང་།
