ཟླ་འདིའི་ཕྱི་ཚེས་ ༢༢ ཉིན་ཁམས་དཀར་མཛེས་རྫོང་ཁོངས་ཀྱི་ལ་རྩེ་ཁ་ཟེར་བའི་ས་ཆ་རུ་བོད་རང་བཙན་གྱི་ཡིག་ཆ་མང་པོ་གཏོར་འགྲེམས་བྱས་ཡོད་འདུག
ཟླ་རེའི་བོད་ཚེས་ ༡༥ ཉིན་བོད་མི་ཚོས་མཆོད་འབུལ་ཕྱག་སྐོར་བྱེད་པ་སོགས་ཆོས་ཕྱོགས་ཀྱི་ཉིན་མོ་གལ་ཆེན་ཞིག་ཡིན་པ་ལྟར། ཟླ་འདིའི་ཕྱི་ཚེས་ ༢༡ དང་བོད་ཟླ་ ༦ ཚེས་ ༡༥ ཉིན། ཁམས་དཀར་མཛེས་རྫོང་གི་ཤར་ཕྱོགས་ལ་རྩེ་ཁ་ཟེར་བ་དེར་སེར་སྐྱ་མང་པོ་འདུ་འཛོམས་བྱས་ཡོད་པའི་སྐབས་དང་བསྟུན་ཏེ། “ བོད་རང་བཙན་ཡིན། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད། ” ཅེས་པ་སོགས་ཀྱི་ཡིག་ཆ་མང་པོ་གཏོར་འགྲེམས་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། གནས་ཚུལ་དེ་བྱུང་མ་ཐག་རྒྱ་གཞུང་གིས་ཉེན་རྟོག་པ་མང་པོ་བཏང་སྟེ། གནས་ཚུལ་དེར་རྩད་ཞིབ་ཀྱིས་ས་གནས་བོད་མི་ཚོའི་འགྲོ་འོང་ལ་དམ་དྲག་ཆེན་པོ་བྱེད་མགོ་བརྩམས་ཡོད་པ་མ་ཟད། དཀར་མཛེས་རྫོང་དང་བྲག་མགོ་རྫོང་གཉིས་བར་འགྲོ་འོང་བྱེད་མཁན་གྱི་རླངས་འཁོར་སོགས་ལའང་ཞིབ་བཤེར་བྱས་ཏེ་ཡིག་ཆ་གཏོར་མཁན་དེ་རྩད་གཅོད་བྱེད་བཞིན་ཡོད་འདུག
ས་གནས་ཉེན་རྟོག་པ་དང་དཀར་མཛེས་རྫོང་ཉེན་རྟོག་ཁང་གཉིས་མཉམ་འབྲེལ་གྱིས་རྫོང་ཐོག་གི་མགྲོན་ཁང་ཁག་ལ་ཞིབ་བཤེར་དང་། དཀར་མཛེས་རྫོང་ཁོངས་ཀྱི་ཞང་ཁ་ཤས་ནང་དུའང་འདྲི་རྩད་ཞིབ་བཤེར་དང་། ས་གནས་གྲོང་གསེབ་ཁག་གི་མགོ་ཁྲིད་ཚོར་རྒྱལ་ཁབ་ཁ་བྲལ་གཏོང་མཁན་འཛིན་བཟུང་བྱེད་དགོས་པའི་བཀའ་རྒྱ་བཏང་ཡོད་ཀྱང་། ད་ལྟའི་ཆར་ཡིག་ཆ་གཏོར་མཁན་སུ་ཡིན་ཤེས་རྟོགས་བྱུང་ཡོད་མི་འདུག
