རྒྱ་གར་ནང་གི་བོད་དོན་རྒྱབ་སྐྱོར་བ་བེ་ཇི་ཀ་རན་ཌེ་ལགས་ཀྱིས་༧གོང་ས་མཆོག་གི་མཛད་རྣམ་དང་འབྲེལ་བའི་བོད་ཀྱི་གནས་ཚུལ་སྐོར་རི་མོའི་ལམ་ནས་བྲིས་པའི་བྱིས་སྒྲུང་དཔེ་དེབ་ཅིག་དབུ་འབྱེད་གནང་སོང་།
ཁ་སང་ཕྱི་ཚེས་ ༦ ཉིན་གྱི་ཕྱི་དྲོ་ཆུ་ཚོད་ ༤ པའི་སྟེང་ངྷ་ས་མེག་གྷན་ཉིན་སློབ་ཚོགས་ཁང་དུ། བོད་སྨྱུག་ཚོགས་པའི་གོ་སྒྲིག་འོག རྒྱ་གར་བོད་ཀྱི་གྲོགས་པོ་བེ་ཇི་ཀ་རན་ཌི་( Vijay Kranti) ལགས་ཀྱིས་དབྱིན་ཇིའི་སྐད་ཡིག་ནང་ཡོད་པའི་རི་མོའི་ལམ་ནས་བྲིས་བའི་བྱིས་སྒྲུང་༼ཏཱ་ལའི་བླ་མ། ཞི་བདེའི་དམག་མི་ཞིག ༽ཅེས་པ་དེ་སློབ་གྲྭའི་སློབ་སྤྱི་གཙོས་དགེ་སློབ་ཚོ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་བཅས་མཉམ་ཞུགས་ཐོག་དབུ་འབྱེད་གནང་སོང་།
བསྟན་འཛིན་བརྩོན་འགྲུས་ལགས་ཀྱིས་སྐུ་ཞབས་བེ་ཇི་ཀ་རན་ཌེ་ལགས་ངོ་སྤྲོད་གནང་བར། ཁོང་ནི་ཆེད་ལས་པར་རྒྱག་མཁན་དང་གསར་འགོད་པ། རྩོམ་པ་པོ་བཅས་ཡིན་པ་དང་། ད་ལྟ་བར་ཁོང་གིས་དཔེ་དེབ་ ༩ ཙམ་བཏོན་ཡོད་འདུག འདས་པའི་ལོ་ ༣༠ རིང་ཁོང་གིས་བོད་དང་བོད་དོན་སྐོར་གྱི་པར་དང་རྩོམ་ཡིག་མང་པོ་རྒྱ་གར་གྱི་ཚགས་པར་དང་དུས་དེབ། དྲ་ཚིགས་སོགས་སུ་བཀོད་དེ་རྒྱ་གར་མི་མང་ལ་བོད་སྐོར་ལ་གོ་རྟོགས་སྤེལ་ཡོད་འདུག བསྟན་འཛིན་བརྩོན་ལགས་ཀྱིས། “ ང་སྔོན་ཆད་སློབ་མ་ཡིན་དུས་ཁོང་གིས་བྱིས་སྒྲུང་དཔེ་དེབ་ཅིག་བརྩམས་ཡོད་པའི་ནང་ངས་བོད་ཀྱི་འཐབ་རྩོད་དང་ལོ་རྒྱུས་སྐོར་གྱི་གནད་འགག་མང་པོ་ཞིག་མཐོང་སྟེ་སློབ་སྦྱོང་བྱས་མྱོང་ཡོད” ཅེས་བརྗོད་བྱུང་།
དེ་རྗེས་རྩོམ་པ་པོ་ཁོང་ད་རེབ་དབུ་འབྱེད་གནང་བའི་བྱིས་སྒྲུང་དེའི་སྐོར་ངོ་སྤྲོད་གནང་རྒྱུར། དཔེ་དེབ་འདི་ཁྱེད་རང་ཚོ་དགའ་ཤོས་ཀྱི་མི་ ༧གོང་ས་མཆོག་གི་སྐོར་ཡིན། ༡༩༨༢ ལོར་ངས་བྱིས་སྒྲུང་དཔེ་དེབ་དང་པོ་དེ་འབྲི་སྐབས་ངའི་བསམ་བློ་ནང་ཏཱ་ལའི་བླ་མ་སུ་ཡིན་མིན་དང་ཁོང་རྒྱ་གར་ནང་ཕེབས་དགོས་དོན། བོད་ཟེར་བའི་རྒྱལ་ཁབ་ག་འདྲ་ཞིག་ཡིན་མིན་སྐོར་སོགས་བྲིས་ཡོད། དེང་སང་རྒྱ་གར་གཙོས་འཛམ་གླིང་མི་མང་གིས་ ༧གོང་ས་ཏཱ་ལའི་བླ་མའི་སྐོར་གྱི་གནས་ཚུལ་མང་པོ་ཤེས་ཀྱི་ཡོད་ཀྱང་། ད་རུང་འཛམ་གླིང་ནང་གི་མི་མང་པོ་ཞིག་གིས་ཁོང་དང་བོད་པའི་སྐོར་དེ་ལས་མང་བ་ཤེས་འདོད་ཡོད་མཁན་མང་པོ་ཡོད་སྟབས། ངས་ཁོ་ཚོའི་རེ་འདོད་སྐོང་ཆེད་ལ་བསམ་བློ་བཏང་བ་ཡིན། བོད་ཀྱི་གནད་དོན་སྐོར་ཆབ་སྲིད་ཀྱི་ངོ་བོའི་ཐོག་མང་ཚོགས་ལ་བཤད་པ་ཡིན་ན་དཀའ་ངལ་ཡོད་པ་རེད། བོད་དོན་རྒྱབ་སྐྱོར་བ་མང་པོས་དཔེ་དེབ་སྣ་མང་བརྩམས་ཏེ། བོད་དོན་ཁྱབ་བསྒྲགས་བྱེད་པ་ནང་བཞིན། ངས་བྱིས་སྒྲུང་དཔེ་དེབ་འདི་བྲིས་ཏེ་བོད་དོན་ཁྱབ་བསྒྲགས་ལ་ཕན་ཐོགས་གང་ལེགས་ཡོང་བར་རེ་བ་བྱེད་ཀྱིན་ཡོད་ཅེས་སོགས་བརྗོད་བྱུང་།
བྱིས་སྒྲུང་དཔེ་དེབ་དེའི་ནང་དོན་གཙོ་བོ། ༧གོང་ས་སྐུ་བཅུ་གསུམ་པའི་ཡང་སྲིད་འཚོལ་སྟངས་སྐོར་དང་། བོད་དེ་ཨེ་ཡ་ཤའི་ས་ཆ་གང་དུ་ཡོད་པ་དང་དེའི་ཁྱིམ་མཚེས་རྒྱལ་ཁབ་གང་དག་ཡིན་པ། ༡༩༤༩ ལོའི་སྔོན་དུ་བོད་པར་རང་ཉིད་ཀྱི་ཤོག་དངུལ་དང་ཊམ་ཀ སྦྲག་རྟགས་བཅས་ཡོད་པའི་བོད་རང་བཙན་རྒྱལ་ཁབ་ཅིག་ཡིན་པ་དང་། རྒྱ་ནག་གིས་བོད་བཙན་བཟུང་ཇི་ལྟར་བྱས་མིན་སོགས་བཀོད་འདུག
རྩོམ་པ་པོས་ངོ་སྤྲོད་གནང་བ་ལྟར་ན། ཁོང་སློབ་ཕྲུག་ཡིན་སྐབས་ཁོ་ཚོའི་སློབ་དེབ་ནང་རྒྱ་གར་གྱི་ཁྱིམ་མཚེས་རྒྱལ་ཁབ་ཁག་གི་སྐོར་གྱི་སློབ་ཚན་ཞིག་ཡོད་པ་དང་། དེའི་ནང་རྒྱ་གར་གྱི་ཁྱིམ་མཚེས་རྒྱལ་ཁབ་ཅིག་ནི་བོད་ཡིན་སྐོར་བཀོད་ཡོད་འདུག དེ་ནི་ཁོས་བོད་ཅེས་པའི་ཐ་སྙད་དེ་ཆེས་ཐོག་མར་མཐོང་བ་ཡིན་པ་དང་། ཁོ་རང་གིས་ཆེས་དགའ་མོས་བྱེད་ཡུལ་ནི། བོད་པའི་རྒྱལ་བོ་ཏཱ་ལའི་བླ་མ་སྐུ་གཤེགས་རྗེས། བོད་ཀྱི་བླ་མ་དང་གཞུང་གི་དཔོན་རིགས་ཚོས་ཁོང་གི་ཡང་སྲིད་བྱིས་པ་ཆུང་ཆུང་དེ་ཇི་ལྟར་འཚོལ་ཞིབ་གནང་བ་དང་། ཡང་སྲིད་ཐག་གཅོད་གནང་རྗེས་བྱིས་པ་ཆུང་ཆུང་དེ་ཇི་ལྟར་བོད་པའི་ཆོས་སྲིད་གཉིས་ཀྱི་དབུ་ཁྲིད་དུ་བསྐོ་བཞག་བྱས་པ་དེ་ཡིན་འདུག
ཁོང་རང་སློབ་མཐར་ཕྱིན་རྗེས་གསར་འགོད་པའི་ཕྱག་ལས་གནང་ཡོད་པ་དང་། སྐབས་དེར་རྒྱ་གར་གྱི་ཚགས་ཤོག་ཁག་གིས་ཁོ་ལ་བོད་པའི་སྐོར་མང་ཙམ་འབྲི་བའི་རེ་སྐུལ་ཞུས་ཡོད་ཀྱང་། སྐབས་དེར་ཁོས་བོད་དང་ཏཱ་ལའི་བླ་མ། བོད་ཀྱི་ལག་སྐོར་མ་ཎི། ལྕེ་བསྣར་བའི་གུས་སྲོལ་མ་གཏོགས་ཤེས་ཀྱི་མེད་པ་དང་། དེའི་རྗེས་༧གོང་ས་མཆོག་གི་མཛད་རྣམ་ངོས་ཀྱི་ཡུལ་དང་ངོས་ཀྱི་མི་མང་ཞེས་པའི་དཔེ་དེབ་བཀླགས་ཏེ་བོད་སྐོར་ལ་མང་པོ་ཤེས་ཡོད་འདུག
གསར་འགོད་པ། ལྷ་སྐྱབས་རྒྱལ།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
དེང་སྐབས་བོད་མི་ཚོས་བོད་རང་བཙན་མིན་པར་སྒྲུབ་གང་ནུས་བྱེད་པའི་དུས་འདིར་ཕྱི་རྒྱལ་བ་ཚོས་བོད་རང་བཙན་ཡིན་པར་སྒྲུབ་པའི་དུས་ཚོད་ཅིག་འཆར་ནས་ཡོང་གིན་པ་འདི་ཡང་དེང་རབས་ཆབ་སྲིད་ཀྱི་འགྱུར་འགྲོས་ཤིག་ཡིན་རྒྱུ་རེད་པ།
སྔར་བོད་མི་སྟོང་ཕྲག་མང་པོས་རང་བཙན་ཤོར་འགྲོ་སྐབས་སྲོག་བསྡོས་ཀྱིས་ཤི་འཛིངས་བྱས་པ་རེད་མོད། སྐབས་དེར་ཕྱི་རྒྱལ་གྱི་གཞུང་སྒེར་ནང་དུ་རྒྱབ་སྐྱོར་བྱེད་མཁན་རེ་གཉིས་ལས་མ་བྱུང་སྐད། དེང་སྐབས་བོད་མི་གཞུང་སྒེར་གཉིས་ཐད་ནས་བོད་རང་བཙན་མི་འདོད་པ་མ་ཟད། བོད་རང་བཙན་གླེང་བ་ཙམ་གྱིས་བོད་ཀྱི་ཆོས་སྲིད་གཉིས་ལ་འགལ་སོང་བར་མཐོང་བའི་དུས་འདིར། ཕྱི་རྒྱལ་བ་ཚོས་བོད་རང་བཙན་ཡིན་པའི་སྒྲུབ་བྱེད་རྡོ་སྒྲིག་སྒྲིག་བྱས་དང་བྱེད་བཞིན་འདུག
ད་ནམ་ཞིག་བོད་པས་བོད་རང་བཙན་མིན་ཞེས་སྒྲུབ་བྱེད་ཁོངས་ལུང་རྡོ་སྒྲིག་སྒྲིག་བྱས་ནས་བོད་རང་བཙན་མིན་པར་སྒྲུབ་གང་ནུས་བྱས་ན། ཕྱི་རྒྱལ་བ་ཚོས་ལུང་དང་རིག་པ། ཡིག་ཆ་སོགས་མང་དུ་དྲངས་ཏེ་བོད་རང་བཙན་ཡིན་པར་སྒྲུབ་གང་ནུས་ཅི་ཐུབ་བྱེད་པའི་ཉི་མ་ནག་པོ་ཞིག་འཆར་སྲིད་དམ།
ངོ་མ་ཆབ་སྲིད་ཟེར་བ་འདི་མགོར་རྡོ་བཞུས་པ་ལྟར་ནག་ཐོམ་མེ་བ་ཞིག་རེད་ཨང་།
སྐུ་ཞབས་Vijay Kranti ལགས་ལ་ཐུགས་རྗེ་ཆེ་ཞུ།
གྲོགས་ལྷ་སྐྱབས་རྒྱལ་གྱིས་གསར་འགྱུར་མང་པོ་བྲིས་ཀྱངཁོང་གི་མིང་འཁོད་གསར་འགྱུར་མཐོང་བ་དེ་རིང་གི་འདི་ཐོག་མ་ཡིན།
བཀའ་དྲིན་ཆེ་གྲོགས་བཟང་པོ། ཚིག་སྦྱོར་དང་དོན་སྟོན་སྟངས་སོགས་གང་ནས་ཐད་ནས་ལེགས་པར་མཐོང་བྱུང་བས་མུ་མཐུད་ནས་འབད་པས་སྒྲུབས་ཤིག་ཀྱེ།
བོད་ཀྱི་དུས་བབ་ཚང་གི་གསར་འགོད་པ་གསར་པ་ལྷ་སྐྱབས་རྒྱལ་ལགས་སུ་བཀྲ་ཤིས་བདེ་ལེགས་ཞུ་བཞིན་ཡོད། གོང་འཁོད་གསར་འགྱུར་དེ་ཧ་ཅང་གི་ཚིག་འགྲོས་བདེ་བོ་དང་ཁ་གསལ་བོ་ཡག་པོ་འདུག གསར་འགོད་པ་ཚོའི་རྣམ་དཔྱོད་དང་ཉམས་མྱོང་ལ་འགྲན་ཟླ་ཡོད་པ་མ་རེད། ཁྱེད་ཅག་ལ་གུས་ཞབས་ཆེན་པོ་བྱེད་ཀྱིན་ཡོད་ལགས་སོ།།།
ཕྱི་མི་ཞིག་གི་བོད་དེ་རང་བཙན་ཡིན་པའི་བསྐོར་གྱི་དེབ་བྲིས་པར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན།
ཁོང་ལ་སྙིང་ཐག་པ་ནས་ཡི་རངས་དང་ཐུགས་རྗེ་ཆེ་ཞུ་འདོད་བྱུང་།
་་་་་ བྱིས་སྒྲུང་དཔེ་དེབ་དེའི་ནང་དོན་གཙོ་བོ། ༧གོང་ས་སྐུ་བཅུ་གསུམ་པའི་ཡང་སྲིད་འཚོལ་སྟངས་སྐོར་དང་། བོད་དེ་ཨེ་ཡ་ཤའི་ས་ཆ་གང་དུ་ཡོད་པ་དང་དེའི་ཁྱིམ་མཚེས་རྒྱལ་ཁབ་གང་དག་ཡིན་པ།
༡༩༤༩ ལོའི་སྔོན་དུ་བོད་པར་རང་ཉིད་ཀྱི་ཤོག་དངུལ་དང་ཊམ་ཀ སྦྲག་རྟགས་བཅས་ཡོད་པའི་བོད་རང་བཙན་རྒྱལ་ཁབ་ཅིག་ཡིན་པ་དང་། རྒྱ་ནག་གིས་བོད་བཙན་བཟུང་ཇི་ལྟར་བྱས་མིན་སོགས་བཀོད་འདུག ་་་་་་་་་་
སྐུ་ཞབས་Vijay Krantiཁོང་ལ་བཀའ་དྲིན་ཆེ་ཞུའོ།